« ថ្ងៃទី ៩–១៥ ខែ វិច្ឆិកា អេធើរ ១–៥ ៖ ‹ ហែកវាំងនននៃការឥតជំនឿ › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )

« ថ្ងៃទី ៩–១៥ ខែ វិច្ឆិកា អេធើរ ១–៥ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២០

ពួកសាសន៍យ៉ារេឌចាកចេញពីទីក្រុងបាបិល ដោយ អាលប៊ីន វេសេលកា

ថ្ងៃទី ៩–១៥ ខែ វិច្ឆិកា

អេធើរ ១–៥

« ហែកវាំងនននៃការឥតជំនឿ »

ពេលអ្នករំឭកអ្វីដែលអ្នកបានរៀនអំឡុងពេលអ្នកសិក្សា អេធើរ ១–៥ តើសេចក្តីពិតអ្វីខ្លះដែលអ្នកទទួលអារម្មណ៍បំផុសគំនិត ដើម្បីជួយកុមារឲ្យរកឃើញ ? ប្រហែលមានគំនិតយោបល់ជាច្រើននៅក្នុងគម្រោងមេរៀននេះ អាចជួយបានផងដែរ ។

កត់ត្រាចំណាប់អារម្មណ៍របស់អ្នក

អញ្ជើញឲ្យចែកចាយ

សូមបង្ហាញរូបភាពរបស់បងប្រុសយ៉ារេឌ ( សូមមើល គម្រោងមេរៀននៅសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និង ក្រុមគ្រួសារ ) ។ សូមឲ្យកុមារចែកចាយអ្វីដែលពួកគេដឹងអំពីលោក ។

បង្រៀនគោលលទ្ធិ ៖ កុមារតូចៗ

អេធើរ ១:៣៣–៤៣; ២:១៦–២៥; ៣:១–៦

ព្រះវរបិតាសួគ៌ព្រះសណ្ដាប់ ហើយឆ្លើយតបការអធិស្ឋានរបស់ខ្ញុំ ។

រឿងរបស់បងប្រុសយ៉ារេឌបង្ហាញពីរបៀបបីបួនដែលព្រះអាចជួយយើង ពេលយើងអធិស្ឋាន ។

សកម្មភាពដែលអាចជ្រើសរើស

សូមអញ្ជើញសមាជិកវួដពីរបីនាក់ ដែលចេះភាសាផ្សេងៗឲ្យនិយាយភាសានោះពីរបីប្រយោគឲ្យសិស្សរបស់អ្នកស្តាប់ ( ឬចាក់ការថតសំឡេងនៃភាសាផ្សេងនោះ ) ។ សូមឲ្យកុមារធ្វើជានិយាយភាសាមួយផ្សេងទៀត ហើយបង្ហាញថា វាមានការលំបាកដើម្បីយល់គ្នា ពេលយើងពុំនិយាយភាសាដូចគ្នា ។ សូមប្រើការណ៍នេះ ដើម្បីប្រាប់ពីដំណើររឿងនៃប៉មបាបិលនៅក្នុង លោកុប្បត្តិ ១១:១–៩ និង អេធើរ ១:៣៣ ។ សូមអាន អេធើរ ៣:១៣ និង ១៥ ហើយពន្យល់អំពីរបៀបដែលបងប្រុសយ៉ារេឌបានអធិស្ឋានថា លោក និងមិត្តភក្តិរបស់លោក ព្រមទាំងគ្រួសាររបស់លោកអាចយល់គ្នាទៅវិញទៅមកបាន ( សូមមើល អេធើរ ១:៣៤–៣៧ ) ។ សូមអាន និងជួយកុមារឲ្យយល់ពីចម្លើយរបស់ព្រះអម្ចាស់ដល់ការអធិស្ឋានរបស់លោកនៅក្នុង អេធើរ ១:៣៥ ។ អ្នកក៏អាចប្រើ « ជំពូកទី ៥០ ៖ ពួកសាសន៍យ៉ារេឌចាកចេញពីទីក្រុងបាបិល » ( ដំណើររឿងព្រះគម្ពីរមរមន ទំព័រ ១៤៣–១៤៤ ឬមើលវីដេអូដូចគ្នានេះនៅគេហទំព័រ ChurchofJesusChrist.org ) ។
សូមអញ្ជើញឲ្យកុមារធ្វើជាសាងសង់ភេត្រា ដូចបានពិពណ៌នានៅក្នុង អេធើរ ២:១៦–១៧ ។ សូមពន្យល់ពីបញ្ហាដែលពួកសាសន៍យ៉ារេឌបានមានជាមួយភេត្រា ( សូមមើល អេធើរ ២:១៩ ) ហើយសូមសួរកុមារនូវអ្វីដែលពួកគេបានធ្វើចំពោះបញ្ហាទាំងនោះ ។ សូមអាន អេធើរ ២:១៨–១៩ ដើម្បីបង្រៀនកុមារអំពីរបៀបដែលបងប្រុសយ៉ារេឌយកបញ្ហារបស់លោកទូលទៅកាន់ព្រះអម្ចាស់នៅក្នុងការអធិស្ឋាន ។ សូមថ្លែងទីបន្ទាល់ថា យើងអាចអធិស្ឋានជានិច្ច ពេលយើងមានសំណួរ ឬបញ្ហា ។
សូមសង្ខេប អេធើរ ២:១៩–៣:៦ យ៉ាងខ្លី ដើម្បីពន្យល់ពីរបៀបដែលព្រះអម្ចាស់បានឆ្លើយតបទៅនឹងសំណួរបងប្រុសយ៉ារេឌអំពីភេត្រាទាំងនេះ ។ សូមដាក់ក្រួស ១៦ គ្រាប់នៅពេញថ្នាក់រៀន ហើយអញ្ជើញកុមារឲ្យរាប់ក្រួសនោះ ពេលពួកគេរកឃើញវា ។ សូមបង្ហាញរូបភាពនៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ហើយសូមឲ្យកុមារប្រាប់អ្នកឡើងវិញអំពីរឿងនោះ ( សូមមើលទំព័រសកម្មភាពសប្តាហ៍ ) ។

អេធើរ ១:១៣, ១៥

ខ្ញុំត្រូវបានបង្កើតតាមរូបភាពនៃព្រះ ។

ពេលបងប្រុសយ៉ារេឌបានឃើញព្រះអម្ចាស់ នោះលោកបានដឹងថា « មនុស្សទាំងអស់ត្រូវបានបង្កើតឡើង កាលពីដំបូង តាមរូប [ របស់ទ្រង់ ] ផ្ទាល់ » ( អេធើរ ៣:១៥ ) ។

សកម្មភាពដែលអាចជ្រើសរើស

សូមបង្ហាញរូបភាពមួយរបស់ព្រះអង្គសង្គ្រោះ ហើយអញ្ជើញកុមារឲ្យចង្អុលទៅផ្នែកផ្សេងៗនៃព្រះកាយរបស់ទ្រង់ ។ សូមពន្យល់ថា ពេលបងប្រុសរបស់យ៉ារេឌបានឃើញព្រះយេស៊ូវគ្រីស្ទ នោះលោកបានដឹងថា យើងទាំងអស់គ្នាមើលទៅដូចព្រះយេស៊ូវ ។ ពេលអ្នកចង្អុលទៅផ្នែកមួយនៃរាងកាយនៅក្នុងរូបភាព សូមអញ្ជើញពួកគេឲ្យចង្អុលទៅផ្នែកដូចគ្នានៃរាងកាយផ្ទាល់របស់ពួកគេ ។ សូមថ្លែងទីបន្ទាល់ថា យើងត្រូវបានបង្កើតឡើងឲ្យដូចជាព្រះវរបិតាសួគ៌ និងព្រះយេស៊ូវគ្រីស្ទដែរ ។
សូមច្រៀងចម្រៀងមួយបទដែលទាក់ទងនឹងរូបកាយរបស់យើង ដូចជាបទ « ក្បាល ស្មា ជង្គង់ និងជើង » ( សៀវភៅចម្រៀងកុមារ ទំព័រ ១២៩ ) ។ សូមជួយកុមារឲ្យនិយាយពីមូលហេតុដែលពួកគេមានអំណរគុណចំពោះផ្នែកផ្សេងៗនៃរាងកាយរបស់ពួកគេ ។

កុមាររត់នៅទីវាល — យើងត្រូវបានបង្កើតឡើងតាមរូបភាពរបស់ព្រះ ។

បង្រៀនគោលលទ្ធិ ៖ កុមារធំៗ

អេធើរ ១:៣៣–៤៣; ២; ៣:១–១៧

ខ្ញុំអាចទទួលបានវិវរណៈដើម្បីជួយដល់ខ្ញុំ ។

តើអ្នកអាចជួយកុមារឲ្យរៀនអំពីវិវរណៈ មកពីគំរូរបស់បងប្រុសយ៉ារេឌដោយរបៀបណា ? តើបទពិសោធន៍អ្វីខ្លះដែលអ្នកអាចចែកចាយ ពេលព្រះអម្ចាស់បានជួយអ្នកឲ្យស្វែងរកដំណោះស្រាយចំពោះបញ្ហា ឬសំណួររបស់អ្នក ?

សកម្មភាពដែលអាចជ្រើសរើស

ពីមុនចាប់ផ្តើមថ្នាក់ សូមសរសេរឃ្លា « ក្រោកឈរ ងាកក្រោយ និងអង្គុយចុះ » ជាភាសាផ្សេងៗនៅលើបន្ទះក្រដាសបីបួន ( អ្នកអាចប្រើម៉ាស៊ីនបកប្រែតាមអ៊ិនធើរណែត ឬជំនួយបកប្រែមកពីនរណាម្នាក់ដែលចេះភាសាផ្សេងនោះ ) ។ សូមឲ្យបន្ទះក្រដាសមួយទៅកាន់កុមារម្នាក់ៗ ហើយអញ្ជើញពួកគេឲ្យព្យាយាមធ្វើតាមការណែនាំនោះ ។ សូមប្រើវាដើម្បីជួយពន្យល់អ្វីដែលបានជំរុញការអធិស្ឋានរបស់បងប្រុសយ៉ារេឌនៅក្នុង អេធើរ ១:៣៣–៣៧ ។ សូមអានខគម្ពីរនេះជាមួយគ្នា ហើយសូមឲ្យកុមារផ្តោតចិត្តទុកដាក់ទៅលើព្រះទ័យរបស់ព្រះអម្ចាស់លើយ៉ារេឌ និងមិត្តភក្តិ ព្រមទាំងគ្រួសាររបស់លោក ។ តើយើងរៀនអ្វីខ្លះចេញពីដំណើររឿងនេះអំពីការអធិស្ឋាន ?
សូមចាត់កុមារម្នាក់ៗឲ្យអានវគ្គខគម្ពីរមួយខាងក្រោម ហើយជួយពួកគេរកមើលសំណួរ ឬបញ្ហាមួយដែលបងប្រុសយ៉ារេឌមាន អេធើរ ១:៣៣–៣៥; អេធើរ ១:៣៦–៣៧ និង អេធើរ ២:១៨–២០ ។ តើបងប្រុសយ៉ារេឌបានធ្វើអ្វីខ្លះអំពីបញ្ហា ឬសំណួរទាំងនោះ ? តើព្រះអម្ចាស់បានជួយលោកតាមករណីនីមួយៗយ៉ាងដូចម្តេច ? សូមឲ្យកុមារគិតអំពីបញ្ហាដែលពួកគេត្រូវការជំនួយ ។ តើពួកគេអាចធ្វើតាមគំរូរបស់បងប្រុសយ៉ារេឌ ដើម្បីស្វែងរកដំណោះស្រាយចំពោះបញ្ហារបស់ពួកគេយ៉ាងដូចម្ដេច ? សូមចែកចាយបទពិសោធន៍មួយ ដែលអ្នកបានអធិស្ឋានទូលសូមជំនួយ ហើយព្រះអម្ចាស់បានជួយអ្នក ។

អេធើរ ៣:៤–១៧

ខ្ញុំត្រូវបានបង្កើតតាមរូបភាពនៃព្រះ ។

កុមារដែលអ្នកបង្រៀននឹងប្រឈមមុខនឹងសារលិខិតខុសឆ្គងច្រើនអំពីព្រះ អំពីខ្លួនពួកគេ និងរូបកាយរបស់ពួកគេ ។ ខគម្ពីរទាំងនេះគឺជាឱកាសមួយដើម្បីបង្រៀន សេចក្តីពិតអស់កល្បអំពីប្រធានបទទាំងនេះ ។

សកម្មភាពដែលអាចជ្រើសរើស

សូមអាន អេធើរ ៣:៦–១៦ ជាមួយកុមារ ហើយសូមជួយពួកគេឲ្យធ្វើបញ្ជីមួយនៃអ្វីដែលបងប្រុសយ៉ារេឌបានរៀនអំពីព្រះអម្ចាស់មកពីបទពិសោធន៍ ។ ហេតុអ្វីវាសំខាន់ដើម្បីដឹងរឿងទាំងនេះ ? ឧទាហរណ៍ តើវាជះឥទ្ធិពលដល់របៀបដែលយើងយល់ឃើញពីរូបកាយរបស់យើងប៉ុណ្ណា ដែលដឹងថាយើងត្រូវបានបង្កើតឡើងតាមរូបភាពនៃព្រះនោះ ?
សូមសរសេរពាក្យ រូបកាយសាច់ឈាម និង វិញ្ញាណខាងវិញ្ញាណ នៅលើក្តារខៀន ។ សូមអញ្ជើញកុមារឲ្យចែកចាយពីបុគ្គលិកលក្ខណៈនៃរូបកាយខាងសាច់ឈាម ( យើងមានស្បែក ឈាម ជាដើម ) ហើយសរសេរចម្លើយរបស់ពួកគេនៅលើក្តារខៀន ។ សូមអាន អេធើរ ៣:៤–១៧ ជាមួយគ្នា ហើយសូមអញ្ជើញកុមារឲ្យរកមើលអ្វីដែលពួកគេរៀនអំពីរូបកាយខាងវិញ្ញាណរបស់ពួកគេ ។ សូមថ្លែងទីបន្ទាល់ថា រូបកាយ និងវិញ្ញាណរបស់យើងត្រូវ « បានបង្កើតឡើងតាមរូប [ ព្រះយេស៊ូវ ] ផ្ទាល់ » ( អេធើរ ៣:១៥ ) ។

អេធើរ ៥:២–៤

ពួកសាក្សីបីនាក់ថ្លែងទីបន្ទាល់អំពីព្រះគម្ពីរមរមន ។

មរ៉ូណៃបានព្យាករថា ពួកសាក្សីបីនាក់នឹងជួយស្ថាបនាសេចក្តីពិតនៃព្រះគម្ពីរមរមន ។ អ្នកអាចប្រើការព្យាករនេះដើម្បីពង្រឹងទីបន្ទាល់របស់កុមារ ហើយបំផុសគំនិតពួកគេឲ្យធ្វើជាសាក្សីនៃព្រះគម្ពីរមរមនតាមរបៀបផ្ទាល់របស់ពួកគេ ។

សកម្មភាពដែលអាចជ្រើសរើស

សូមសរសេរពាក្យសំខាន់មួយចំនួនមកពី អេធើរ ៥:២–៤ នៅលើក្តារខៀន ដូចជាពាក្យ ផ្ទាំងចំណារ, ព្រះចេស្តា, សេចក្តីពិត, សាក្សី, និង ទីបន្ទាល់ ។ សូមអានខគម្ពីរទាំងនេះជាមួយកុមារ ហើយអញ្ជើញពួកគេឲ្យឈប់ ពេលអ្នកអានដល់ពាក្យមួយដែលនៅលើក្តារខៀន ហើយនិយាយអំពីមូលហេតុដែលពាក្យទាំងនោះមានសារៈសំខាន់ ។ ដើម្បីបង្រៀនកុមារអំពីសាក្សីបីនាក់ អ្នកអាចមើល « ជំពូក ៧ ៖ ពួកសាក្សីឃើញផ្ទាំងមាស » ( ដំណើររឿងព្រះគម្ពីរគោលលទ្ធិ និងសេចក្ដីសញ្ញា ទំព័រ ៣១–៣៣ ) និង « ទីបន្ទាល់នៃពួកសាក្សីបីនាក់ » នៅក្នុងព្រះគម្ពីរមរមន ។ ហេតុអ្វីព្រះសព្វព្រះទ័យឲ្យមនុស្សបីនាក់ឃើញផ្ទាំងចំណារមាស ?
សូមប្រាប់កុមារអំពីរបៀបដែលអ្នកដឹងថា ព្រះគម្ពីរមរមនពិត ។ សូមឲ្យកុមារចែកចាយមូលហេតុដែលពួកគេដឹងថា ព្រះគម្ពីរនេះពិត ។ សូមជួយពួកគេឲ្យគិតអំពីរបៀបដែលពួកគេអាចធ្វើជាសាក្សីនៃព្រះគម្ពីរមរមន ហើយលើកទឹកចិត្តពួកគេឲ្យចែកចាយភាពជាសាក្សីរបស់ពួកគេជាមួយនរណាម្នាក់នាសប្តាហ៍នេះ ។

លើកទឹកចិត្តឲ្យមានការរៀនសូត្រនៅឯគេហដ្ឋាន

សូមអញ្ជើញកុមារឲ្យគិតពីអ្វីមួយដែលពួកគេអាចទូលសូមជំនួយពីព្រះវរបិតាសួគ៌ ដូចបងប្រុសយ៉ារេឌបានធ្វើដែរ ។ សូមលើកទឹកចិត្តពួកគេឲ្យស្វែងរកជំនួយតាមរយៈការអធិស្ឋាន ។

ការកែលម្អការបង្រៀនរបស់យើង

សូមបង្រៀនអំឡុងពេលសកម្មភាព ។ ពេលកុមារកំពុងធ្វើសកម្មភាព ដូចជាគូររូប ឬធ្វើសកម្មភាពលើទំព័រសកម្មភាព នោះអ្នកអាចប្រើពេលនេះដើម្បីសង្កត់ធ្ងន់លើសេចក្តីពិតដែលបានបង្រៀនតាមរយៈសកម្មភាពទាំងនេះ ។

ទំព័រសកម្មភាព ៖ ព្រះវរបិតាសួគ៌បានឆ្លើយតបការអធិស្ឋានរបស់បងប្រុសយ៉ារេឌ