« ថ្ងៃទី ២៦ ខែ តុលា–ថ្ងៃទី ១ ខែ វិច្ឆិកា មរមន ១–៦ ៖ ‹ ខ្ញុំសង្ឃឹមថា ខ្ញុំអាចបញ្ចុះបញ្ចូលអស់អ្នករាល់គ្នា…ឲ្យប្រែចិត្ត › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ថ្ងៃទី ២៦ ខែ តុលា–ថ្ងៃទី ១ ខែ វិច្ឆិកា មរមន ១–៦ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២០
មរមនសង្ខេបផ្ទាំងចំណារទាំងឡាយ ដោយ ថម ឡូវែល
ថ្ងៃទី ២៦ ខែ តុលា–ថ្ងៃទី ១ ខែ វិច្ឆិកា
មរមន ១–៦
« ខ្ញុំសង្ឃឹមថា ខ្ញុំអាចបញ្ចុះបញ្ចូលអស់អ្នករាល់គ្នា…ឲ្យប្រែចិត្ត »
កុមារអាចពិបាកយល់ពីព្រឹត្តិការណ៍ដែលបានពិពណ៌នានៅក្នុង មរមន ១–៦ ទាំងស្រុង ប៉ុន្តែពួកគេនៅតែអាចរៀនមេរៀនមកពីដំណើររឿងនៃការរស់នៅដ៏សុចរិតរបស់មរមននៅក្នុងពិភពលោកដ៏ទុច្ចរិតនេះបាន ។ តើអ្នកអាចប្រើបទពិសោធន៍នេះដើម្បីបង្រៀនកុមារអំពីរបៀបបន្តស្មោះត្រង់ចំពោះដំណឹងល្អយ៉ាងដូចម្ដេច ?
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
តើកុមារដឹងអ្វីខ្លះអំពីមរមន ? សូមអញ្ជើញពួកគេឲ្យចែកចាយអ្វីដែលពួកគេដឹង ឬបានរៀនជាមួយក្រុមគ្រួសារពួកគេ ។ សូមបង្ហាញរូបភាពមរមន ដូចជារូបភាពមួយនៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ អាចជួយបាន ។
បង្រៀនគោលលទ្ធិ ៖ កុមារតូចៗ
ខ្ញុំអាចសុចរិតដូចជាមរមន ។
ទោះបីកុមារដែលអ្នកបង្រៀននៅក្មេងក្តី ពួកគេក៏អាចអភិវឌ្ឍគុណសម្បត្តិខាងវិញ្ញាណ ហើយរស់នៅដោយសុចរិតបាន ។
សកម្មភាពដែលអាចជ្រើសរើស
-
សូមអាន មរមន ១:១–៣ ឲ្យកុមារស្តាប់ ឬប្រើ « ជំពូកទី ៤៩ ៖ មរមន និងការបង្រៀនរបស់លោក » ( ដំណើររឿងព្រះគម្ពីរមរមន ទំព័រ ១៣៨–១៤២ ឬមើលវីដេអូដូចគ្នានេះនៅគេហទំព័រ ChurchofJesusChrist.org ) ។ សូមអញ្ជើញពួកគេឲ្យស្តាប់រកមើលអាយុមរមន ពេលអាំម៉ារ៉ុនបានប្រគល់បេសកកម្មពិសេសមួយដល់លោក ។ បន្ទាប់មក សូមឲ្យពួកគេលើកម្រាមដៃតាមចំនួននោះ ។ ដើម្បីជួយកុមារឲ្យស្រមៃពីភាពវ័យក្មេងរបស់មរមន សូមបង្ហាញរូបភាពរបស់បុគ្គលម្នាក់ដែលមានអាយុ ១០ ឆ្នាំ ។ សូមជួយពួកគេឲ្យយល់អំពីគុណសម្បត្តិដែលអាំម៉ារ៉ុនបានឃើញមរមន ពេលលោកនៅក្មេង ហើយថ្លែងទីបន្ទាល់ថា កុមារអាចក្លាយដូចជាមរមនដែរ ពេលពួកគេធ្វើតាមព្រះយេស៊ូវគ្រីស្ទ ។
-
សូមលេងល្បែងកម្សាន្តមួយដែលកុមារធ្វើតាមសកម្មភាពគ្រឹះដែលអ្នកធ្វើ ។ បន្ទាប់មក សូមបង្ហាញរូបភាពអំពីអ្វីដែលព្រះយេស៊ូវបានធ្វើ ហើយនិយាយអំពីរបៀបដែលយើងអាចធ្វើតាមទ្រង់ ( សូមមើល សៀវភៅរូបភាពដំណឹងល្អ លេខ ៣៣–៣៥, ៤១–៤២ ) ។ សូមពិភាក្សាអំពីរបៀបដែលមរមនបានធ្វើតាមព្រះយេស៊ូវគ្រីស្ទ—ឧទាហរណ៍ តាមរយៈការបង្រៀនដំណឹងល្អ ការលើកទឹកចិត្តមនុស្សឲ្យគោរពតាមព្រះ និងការស្រឡាញ់មនុស្សដទៃ ។
ព្រះវរបិតាសួគ៌បានប្រទានពរជ័យជាច្រើនដល់ខ្ញុំ ។
ការបង្រៀនរបស់មរមនអាចជួយកុមារឲ្យទទួលស្គាល់ពរជ័យដែលព្រះវរបិតាសួគ៌បានប្រទានដល់ពួកគេ ។
សកម្មភាពដែលអាចជ្រើសរើស
-
សូមអាន មរមន ៣:៣ និង ៩ ឲ្យកុមារស្តាប់ ហើយសូមពន្យល់ថា ពួកសាសន៍នីហ្វៃពុំបានទទួលស្គាល់ថា ព្រះវរបិតាសួគ៌បានប្រទានពរដល់ពួកគេទេ ។ សូមជួយកុមារឲ្យគិតអំពីពរជ័យដែលព្រះវរបិតាសួគ៌បានប្រទានដល់ពួកគេ ។ សូមបង្ហាញរូបភាព ឬវត្ថុនានាដើម្បីផ្ដល់ជាគំនិតដល់ពួកគេ ។ តើយើងអាចធ្វើអ្វីខ្លះនាពេលសព្វថ្ងៃនេះ ដើម្បីបង្ហាញថា យើងមានអំណរគុណចំពោះព្រះវរបិតាសួគ៌សម្រាប់ពរជ័យរបស់យើង ?
-
សូមជួយកុមារឲ្យគិតអំពីពរជ័យដែលព្រះវរបិតាសួគ៌បានប្រទានដល់ពួកគេ ហើយសូមឲ្យពួកគេគូររូបភាពនៃពរជ័យទាំងនោះ ។ សូមអញ្ជើញពួកគេឲ្យព្យួររូបភាពរបស់ពួកគេនៅកន្លែងណាក៏បាននៅផ្ទះរបស់ពួកគេ ដែលពួកគេអាចឃើញរូបភាពទាំងនោះ ហើយចងចាំថា ព្រះវរបិតាសួគ៌ប្រទានពរដល់ពួកគេតាមរបៀបជាច្រើន ។ អ្នកក៏អាចអញ្ជើញពួកគេឲ្យរកមើលពរជ័យដែលកើតមកពីព្រះវរបិតាសួគ៌ ពេលពួកគេច្រៀងវគ្គទីមួយនៃបទ « ខ្ញុំអរគុណព្រះបិតា » ផងដែរ ( សៀវភៅចម្រៀងកុមារ ទំព័រ ៩ ) ។
ព្រះវរបិតាសួគ៌សព្វព្រះទ័យឲ្យខ្ញុំស្រឡាញ់មនុស្សគ្រប់គ្នា ។
តើអ្នកអាចជួយកុមារដែលអ្នកបង្រៀនឲ្យមានបំណងប្រាថ្នាទទួលអារម្មណ៍នៃសេចក្តីស្រឡាញ់ដល់អស់អ្នកដែលនៅជុំវិញពួកគេដោយរបៀបណា ?
សកម្មភាពដែលអាចជ្រើសរើស
-
សូមឲ្យកុមារម្នាក់ៗគូររូបមនុស្សម្នាក់នៅលើក្តារខៀន ហើយចង្អុលបង្ហាញពីរបៀបដែលបុគ្គលម្នាក់ៗដែលពួកគេបានគូរនោះមើលទៅផ្សេងពីមនុស្សដទៃទៀត ។ សូមគូសរូបបេះដូងធំមួយនៅជុំវិញរូបគំនូរទាំងអស់ ។ សូមជួយកុមារឲ្យយល់ថា ព្រះវរបិតាសួគ៌សព្វព្រះទ័យឲ្យយើងស្រឡាញ់មនុស្សគ្រប់រូប ។ សូមអាន មរមន ៣:១២ ដោយគូសបញ្ជាក់អំពីពាក្យ « ស្រឡាញ់ » និង « បានស្រឡាញ់ » ។ តើមរមនបានធ្វើអ្វីខ្លះដើម្បីបង្ហាញសេចក្តីស្រឡាញ់របស់លោកដល់មនុស្សដទៃ ?
-
សូមច្រៀងចម្រៀងជាមួយគ្នាមួយបទអំពីសេចក្ដីស្រឡាញ់ដល់មនុស្សដទៃ ដូចជាបទ « ព្រះយេស៊ូវមានបន្ទូលស្រឡាញ់មនុស្សគ្រប់រូប » ( សៀវភៅចម្រៀងកុមារ ទំព័រ ៣៩ ) អំឡុងពេលបង្ហាញរូបភាពកុមារមកពីជុំវិញពិភពលោក ។ សូមថ្លែងទីបន្ទាល់អំពីសេចក្តីស្រឡាញ់របស់ព្រះ ចំពោះបុត្រាបុត្រីទាំងអស់របស់ទ្រង់ ។ សូមបំពេញទំព័រសកម្មភាពសប្ដាហ៍នេះជាមួយនឹងកុមារ ។
បង្រៀនគោលលទ្ធិ ៖ កុមារធំៗ
មរមន ១:១–៣; ២:១, ២៣–២៤; ៣:១–៣, ១២, ១៧–២២
ខ្ញុំអាចសុចរិតដូចជាមរមន ។
មរមននៅក្មេងណាស់ ពេលអាំម៉ារ៉ុនបានទទួលស្គាល់ថា លោកនឹងទទួលខុសត្រូវមើលថែផ្ទាំងចំណារពិសិដ្ឋនោះបាន ។ តើគុណសម្បត្តិសុចរិតណាខ្លះ ដែលអ្នកឃើញនៅក្នុងកុមារដែលអ្នកបង្រៀន ?
សកម្មភាពដែលអាចជ្រើសរើស
-
សូមអញ្ជើញកុមារម្នាក់ៗឲ្យអានវគ្គខគម្ពីរមួយខាងក្រោម ហើយជួយពួកគេចែកចាយអ្វីដែលពួកគេរៀនអំពីមរមន ៖ មរមន ១:១–៣; ២:១, ២៣–២៤ និង ៣:១–៣, ១២, ២០–២២ ។ បន្ទាប់មកចែកចាយគុណសម្បត្តិសុចរិតដែលអ្នកឃើញនៅក្នុងកុមារដែលអ្នកបង្រៀន ។
-
សូមបង្ហាញរូបភាពមរមន ( សូមមើលរូបភាពនៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ) ។ សូមជួយកុមារឲ្យយល់ថា ដោយសារមរមនមានការទទួលខុសត្រូវ និងគួរឲ្យទុកចិត្តបានក្នុងការមើលថែ និងថែរក្សាកំណត់ត្រានីហ្វៃ ទើបយើងមានព្រះគម្ពីរមរមននាសព្វថ្ងៃនេះ ។ សូមនិយាយជាមួយកុមារអំពីអត្ថន័យនៃពាក្យការទទួលខុសត្រូវ និងគួរឲ្យទុកចិត្តបាន ។ សូមអញ្ជើញពួកគេឲ្យពិចារណាពីរបៀបនានាដែលពួកគេអាចមានការទទួលខុសត្រូវកាន់តែច្រើន ។
មរមនអាយុ ១០ ឆ្នាំ ដោយ ស្កត អិម ស្នូ
សេចក្ដីព្រួយដែលគាប់ព្រះទ័យដល់ព្រះដឹកនាំទៅរកការប្រែចិត្តពិតប្រាកដ ។
មរមនបានឃើញថា ពួកសាសន៍នីហ្វៃទុច្ចរិតបានកើតទុក្ខ ប៉ុន្តែទុក្ខព្រួយរបស់ពួកគេពុំមែនជាទុក្ខព្រួយដែលបំផុសគំនិតពួកគេឲ្យប្រែចិត្តទេ ( សូមមើល មរមន ២:១៣ ) ។ តើអ្នកអាចជួយកុមារឲ្យយល់ពីភាពខុសគ្នារវាងសេចក្តីព្រួយខាងលោកិយ និងសេចក្ដីព្រួយដែលគាប់ព្រះទ័យដល់ព្រះដែលដឹកនាំទៅរកការប្រែចិត្តតាមរបៀបណា ?
សកម្មភាពដែលអាចជ្រើសរើស
-
សូមសរសេរពាក្យទាំងនេះនៅលើក្តារខៀន ៖ សេចក្តីព្រួយដែលដឹកនាំទៅរកការប្រែចិត្ត និង សេចក្តីព្រួយដែលពុំដឹកនាំទៅរកការប្រែចិត្ត ។ សូមអញ្ជើញកុមារឲ្យឆ្លាស់វេនគ្នាអានខគម្ពីរចេញពី មរមន ២:៨, ១០–១៥ ។ សូមជួយពួកគេសរសេរអ្វីដែលពួកគេរៀនអំពីសេចក្តីព្រួយ នៅក្នុងពាក្យដែលត្រឹមត្រូវនៅលើក្តារខៀន ។ តើយើងអាចប្រាកដថា សេចក្តីព្រួយដែលយើងទទួលអារម្មណ៍នោះចំពោះអំពើបាបរបស់យើងដឹកនាំយើងឲ្យផ្លាស់ប្តូរដោយរបៀបណា ?
-
សូមអញ្ជើញសមាជិកម្នាក់នៃគណៈប៊ីស្សព ឬឪពុក ឬម្តាយម្នាក់របស់កុមារណាម្នាក់ ឲ្យចែកចាយជាមួយសិស្សក្នុងថ្នាក់អំពីរបៀបដែល សេចក្តីព្រួយដែលគាប់ព្រះទ័យព្រះ អាចជួយយើងឲ្យផ្លាស់ប្តូរ ដើម្បីក្លាយកាន់តែដូចព្រះវរបិតាសួគ៌ និងព្រះយេស៊ូវគ្រីស្ទ ។ ហេតុអ្វីវាសំខាន់ដើម្បីទទួលស្គាល់ថា តើយើងមានអារម្មណ៍នៃសេចក្តីព្រួយដែលគាប់ព្រះទ័យដល់ព្រះ ឬសេចក្តីព្រួយខាងលោកិយ ? សូមអញ្ជើញកុមារឲ្យស្រាវជ្រាវ មរមន ២:១២ ដើម្បីរកឃើញហេតុផលអំពីមូលហេតុដែលការប្រែចិត្តអាចធ្វើឲ្យ « ចិត្តយើង…អររីករាយ » ( មរមន ២:១២ ) ។
ខ្ញុំអាចទទួលអារម្មណ៍នូវសេចក្តីស្រឡាញ់របស់ព្រះវរបិតាសួគ៌ចំពោះមនុស្សដទៃ ។
ជារឿយៗ វាងាយស្រួលស្រឡាញ់អ្នកដែលនៅជុំវិញយើង និងអ្នកដែលចូលចិត្តយើង ប៉ុន្តែមរមនបានបង្ហាញថា ដោយមានជំនួយពីព្រះវរបិតាសួគ៌ នោះយើងអាចស្រឡាញ់អស់អ្នកដែលជឿ និងធ្វើអ្វីៗផ្សេងពីយើងផងដែរ ។
សកម្មភាពដែលអាចជ្រើសរើស
-
សូមជួយកុមារម្នាក់អាន មរមន ៣:១២ ហើយសូមអញ្ជើញកុមារឲ្យសរសេរប្រយោគមួយដែលសង្ខេបពីអ្វីដែលពួកគេរៀនពីមរមនអំពីការស្រឡាញ់មនុស្សដទៃ ។ សូមអញ្ជើញកុមារឲ្យចែកចាយអំពីអ្វីដែលពួកគេបានសរសេរ ។ តើយើងអាចទទួលអារម្មណ៍នៃសេចក្តីស្រឡាញ់ដែលព្រះមានដល់មនុស្សដទៃដូចម្តេច ? ( សូមមើល មរ៉ូណៃ ៧:៤៨ ) ។ តើយើងអាចធ្វើអ្វីខ្លះ ដើម្បីបង្ហាញសេចក្តីស្រឡាញ់របស់យើងដល់សិស្សនៅក្នុងថ្នាក់ និងមនុស្សនៅក្នុងគ្រួសាររបស់យើង ?
-
សូមអញ្ជើញកុមារធ្វើសកម្មភាពនៅលើទំព័រសកម្មភាពនាសប្ដាហ៍នេះ ។ សូមជួយពួកគេឲ្យគិតអំពីរបៀបដ៏មានអត្ថន័យដើម្បីឈោងទៅជួយអស់អ្នកណាដែលអាចមានភាពខុសប្លែកពីយើងដោយសេចក្ដីស្រឡាញ់ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមលើកទឹកចិត្តកុមារឲ្យដាក់តាំងទំព័រសកម្មភាពសប្ដាហ៍នេះ នៅកន្លែងណាមួយនៅផ្ទះរបស់ពួកគេ ដើម្បីវាជាការរំឭកពួកគេដើម្បីបង្ហាញសេចក្តីស្រឡាញ់ដល់មនុស្សដទៃ ។ សូមផ្តល់ឱកាសមួយឲ្យពួកគេចែកចាយអ្វីដែលពួកគេបានធ្វើនៅក្នុងម៉ោងបង្រៀនក្រោយ ។
ការកែលម្អការបង្រៀនរបស់យើង
សូមកែសម្រួលសកម្មភាពនានាឲ្យសមស្របតាមអាយុរបស់កុមារដែលអ្នកបង្រៀន ។ កុមារតូចៗត្រូវការការពន្យល់លម្អិត ហើយរៀនពីវិធីសាស្ដ្របង្រៀនសាមញ្ញៗ ។ កាលពួកគេកាន់តែធំទៅ នោះពួកគេអាចចូលរួមចំណែកបានច្រើនជាងមុន ហើយអាចចែកចាយគំនិតរបស់ពួកគេបានប្រសើរជាង ។ សូមផ្ដល់ឱកាសដល់កុមារទាំងអស់ដែលមានអាយុសមរម្យឲ្យចែកចាយ ថ្លែងទីបន្ទាល់ និងចូលរួម ហើយផ្ដល់ជំនួយតាមសេចក្ដីត្រូវការ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ២៥–២៦ ) ។