ជំពូកទី ៧
ពួកសាក្សីឃើញផ្ទាំងចំណារមាស
ឆ្នាំ ១៨២៩–១៨៣០
ព្រះយេស៊ូវបានជ្រើសរើសបុរសបីរូបផ្សេងទៀតឲ្យឃើញផ្ទាំងចំណារមាស ហើយធ្វើជាសាក្សីថា ផ្ទាំងទាំងនោះមានពិតមែន ។ ពួកបុរសទាំងនោះគឺ ម៉ាទិន ហារីស, អូលីវើរ ខៅឌើរី និង ដាវីឌ វិតមើរ ។
យ៉ូសែបបានយកពួកសាវកបីរូបនោះទៅក្នុងព្រៃ ជាកន្លែងដែលពួកលោកបានអធិស្ឋាន ។ ទេវតាបានយាងមក ហើយបានបង្ហាញផ្ទាំងចំណារមាសឲ្យពួកលោកឃើញ ។ ព្រះយេស៊ូវបានប្រាប់ពួកសាក្សីទាំងបីរូបឲ្យប្រាប់មនុស្សនូវអ្វីដែលពួកលោកបានឃើញ ។
យ៉ូសែបបានសប្បាយចិត្តខ្លាំងណាស់ ។ ពួកសាក្សីបីរូបនឹងប្រាប់មនុស្សអំពីផ្ទាំងចំណារមាស ហើយមនុស្សកាន់តែច្រើននឹងជឿថា យ៉ូសែបបានប្រាប់សេចក្តីពិត ។
ព្រះយេស៊ូវបានប្រាប់យ៉ូសែបឲ្យបង្ហាញផ្ទាំងនោះដល់ពួកសាក្សីប្រាំបីនាក់បន្ថែមទៀត ។ ពួកបុរសប្រាំបីនាក់បានកាន់ផ្ទាំងចំណារមាសនៅក្នុងដៃរបស់ពួកលោក ហើយបានឃើញការសរសេរនៅលើផ្ទាំងទាំងនោះ ។
ពួកសាក្សីទាំងអស់បានសរសេរអំពីផ្ទាំងចំណារមាស ។ ពួកលោកបាននិយាយថា ពួកលោកបានឃើញផ្ទាំងនោះ ហើយពួកលោកបានថ្លែងទីបន្ទាល់ថា ផ្ទាំងទាំងនោះមានពិតប្រាកដមែន ។ ពាក្យពេចន៍របស់ពួកសាក្សីទាំងនោះមាននៅក្នុងព្រះគម្ពីរមរមន ។
បន្ទាប់ពីយ៉ូសែប ស៊្មីធបានបកប្រែ ហើយពួកសាក្សីបានឃើញផ្ទាំងនោះរួចមក នោះយ៉ូសែបពុំត្រូវការផ្ទាំងទាំងនោះទៀតឡើយ ។ ទេវតាមរ៉ូណៃបានបង្ហាញព្រះកាយ ហើយយ៉ូសែបបានប្រគល់ផ្ទាំងចំណារមាសត្រឡប់ទៅទ្រង់វិញ ។
បន្ទាប់ពីយ៉ូសែបបានបញ្ចប់ការបកប្រែព្រះគម្ពីរមរមន នោះលោកបានយកវាទៅកន្លែងបោះពុម្ព ។ យ៉ូសែបគ្មានប្រាក់ដើម្បីបង់ថ្លៃឲ្យអ្នកបោះពុម្ពឡើយ ។ ម៉ាទិន ហារីសមានប្រាក់គ្រប់គ្រាន់ ហើយនៅក្នុងវិវរណៈមួយលោកត្រូវបានសុំឲ្យចែកប្រាក់នោះដើម្បីបង់ថ្លៃឲ្យអ្នកបោះពុម្ព ។
សាតាំងពុំចង់ឲ្យព្រះគម្ពីរមរមនត្រូវបានបោះពុម្ពឡើយ ។ វាពុំចង់ឲ្យមនុស្សអានព្រះគម្ពីរនោះទេ ។ ពួកមនុស្សទុច្ចរិតបានព្យាយាមបញ្ឈប់អ្នកបោះពុម្ពនោះ ។
បុរសម្នាក់បានទៅកន្លែងបោះពុម្ពនៅថ្ងៃអាទិត្យ ហើយបានលួចយកទំព័រមួយចំនួននៃព្រះគម្ពីរមរមន ។ គាត់បានបោះពុម្ពទំព័រទាំងនោះនៅក្នុងសារព័ត៌មាន រហូតដល់បុរសផ្សេងទៀតបានបញ្ឈប់គាត់ពីការលួចទំព័រផ្សេងទៀត ។
មនុស្សដែលព្យាយាមបញ្ឈប់ការបោះពុម្ពពុំបានទទួលជោគជ័យឡើយ ដោយសារពួកមនុស្សទុច្ចរិតពុំអាចបញ្ឈប់កិច្ចការរបស់ព្រះយេស៊ូវបានឡើយ ។ ជាច្រើនខែក្រោយមក ការបោះពុម្ពព្រះគម្ពីរមរមនត្រូវបានបញ្ជប់ ។