ជំពូកទី ៤០
ការនិមិត្តនៅក្នុងព្រះវិហារបរិសុទ្ធខឺតឡង់
ខែ មេសា ឆ្នាំ ១៨៣៦
មួយសប្តាហ៍បន្ទាប់ពីព្រះវិហារខឺតឡង់បានឧទ្ទិសឆ្លងរួច ពួកបរិសុទ្ធបានធ្វើការប្រជុំមួយទៀតនៅទីនោះ ។ ពួកសាវកបានប្រសិទ្ធពរសាក្រាម៉ង់ ហើយយ៉ូសែប ស៊្មីធ និងទីប្រឹក្សារបស់លោកបានចែកសាក្រាម៉ង់ទៅឲ្យពួកបរិសុទ្ធ ។
គោលលទ្ធិ និង សេចក្តីសញ្ញា ១១០ក្បាលកណ្ឌ
បន្ទាប់មក យ៉ូសែប ស៊្មីធ និង អូលីវើរ ខៅឌើរី បានទៅកន្លែងមួយតែពីរនាក់នៅក្នុងព្រះវិហារបរិសុទ្ធ ជាកន្លែងដែលពួកលោកបានលុតជង្គង់ចុះ ហើយបានអធិស្ឋាន ។ បន្ទាប់ពីការអធិស្ឋានរបស់ពួកលោក នោះពួកលោកបានទទួលការនិមិត្តដ៏អស្ចារ្យមួយ ។ ពួកលោកបានឃើញព្រះអម្ចាស់យេស៊ូវគ្រីស្ទ ។ ព្រះនេត្រទ្រង់ភ្លឺចែងចាំងដូចជាភ្លើង ។ ព្រះកេសារបស់ទ្រង់សដូចជាព្រិល ហើយព្រះភក្ត្ររបស់ទ្រង់ភ្លឺជាងពន្លឺព្រះអាទិត្យទៅទៀត ។
ព្រះយេស៊ូវបានមានបន្ទូលប្រាប់យ៉ូសែប និងអូលីវើរនូវកិច្ចការដ៏អស្ចារ្យជាច្រើន ។ ទ្រង់បានមានបន្ទូលប្រាប់ពួកលោកឲ្យសប្បាយរីករាយចុះ ដោយសារអំពើបាបរបស់ពួកលោកត្រូវបានអត់ទោសឲ្យហើយ ។ ទ្រង់សព្វព្រះទ័យនឹងព្រះវិហារបរិសុទ្ធ ហើយបានមានបន្ទូលថា ពួកបរិសុទ្ធដែលសាងសង់វាគួរតែរីករាយ ។ ទ្រង់បានទទួលយកព្រះវិហារបរិសុទ្ធថាជាដំណាក់ដ៏បរិសុទ្ធរបស់ទ្រង់ ។ ព្រះយេស៊ូវបានមានបន្ទូលថា ទ្រង់នឹងយាងមកព្រះវិហារបរិសុទ្ធឲ្យញឹកញាប់ ។ ប៉ុន្តែប្រសិនបើមនុស្សពុំរក្សាព្រះវិហារបរិសុទ្ធឲ្យបរិសុទ្ធទេ នោះទ្រង់នឹងពុំយាងមកឡើយ ។
បន្ទាប់មក យ៉ូសែប និង អូលីវើរបានឃើញម៉ូសេនៅក្នុងព្រះវិហារបរិសុទ្ធ ។ ម៉ូសេគឺជាព្យាការីម្នាក់ដែលបានរស់នៅជាយូរលង់ណាស់មកហើយ ។ លោកបានត្រឡប់មកកាន់ផែនដីវិញដើម្បីស្តារឡើងវិញនូវអំណាចបព្វជិតភាពដ៏ពិសេសដល់យ៉ូសែប និង អូលីវើរ ។ អំណាចនេះនឹងជួយកូនចៅអ៊ីស្រាអែលឲ្យត្រូវបានប្រមូលផ្តុំទៅក្នុងសាសនាចក្រមកពីគ្រប់ទិសទីទាំងអស់នៃផែនដី ។ អំណាចនេះក៏ផ្តល់សិទ្ធិអំណាចដល់ព្យាការីដើម្បីបញ្ជូនពួកអ្នកផ្សព្វផ្សាយសាសនាទៅប្រកាសដំណឹងល្អនៅទូទាំងពិភពលោក ។
បន្ទាប់មក យ៉ូសែប និង អូលីវើរបានឃើញអេលីសេ ។ អេលីសេបានស្តារនូវអំណាចបព្វជិតភាពពិសេសដល់ពួកលោកដែលអំណាចនោះធ្លាប់បានប្រទានឲ្យអ័ប្រាហាំ ។ អ័ប្រាហាំក៏ជាព្យាការីម្នាក់ដែលបានរស់នៅជាយូរលង់ណាស់មកហើយដែរ ។ ជាមួយនឹងអំណាចនេះ ពួកបរិសុទ្ធអាចមានពរជ័យដូចទៅនឹងពរជ័យដែលព្រះបានសន្យាដល់អ័ប្រាហាំ ។
បន្ទាប់មក យ៉ូសែប និង អូលីវើរ បានឃើញអេលីយ៉ា ដែលជាព្យាការីម្នាក់ទៀតដែលបានរស់នៅជាយូរលង់ណាស់មកហើយ ។ អេលីយ៉ាបានស្តារនូវអំណាចបព្វជិតភាពពិសេសដល់ពួកលោកដើម្បីជួយដល់ក្រុមគ្រួសារសុចរិត ។ អំណាចនេះធ្វើឲ្យក្រុមគ្រួសារត្រូវបានផ្សារភ្ជាប់ជាមួយគ្នានៅក្នុងព្រះវិហារបរិសុទ្ធ ដើម្បីឲ្យពួកគេអាចរស់នៅជាមួយគ្នាជារៀងរហូត ។