ជំពូកទី ៤៨
យ៉ូសែប ស៊្មីធ សូមជំនួយពីប្រធានាធិបតី
ខែ មីនា–ខែ វិច្ឆិកា ឆ្នាំ ១៨៣៩
យ៉ូសែប ស៊្មីធ បានសរសេរសំបុត្រទៅពួកបរិសុទ្ធ អំឡុងពេលលោកនៅជាប់គុកលីប៊ើធី ។ លោកបានប្រាប់ពួកគេឲ្យកត់ត្រានូវរឿងអាក្រក់ៗដែលពួកមនុស្សកំណាចបានធ្វើចំពោះពួកគេ ។ លោកបានប្រាប់ថា ពួកគេគួរតែផ្ញើនូវអ្វីដែលពួកគេបានសរសេរទៅអ្នកដឹកនាំប្រទេស ។
យ៉ូសែបបានប្រាប់ពួកបរិសុទ្ធឲ្យសរសេរឈ្មោះមនុស្សដែលបានធ្វើបាបពួកគេ ។ លោកបានថ្លែងថា ពួកគេគួរតែសរសេរអំពីរបៀបដែលផ្ទះសម្បែង និងស្រែចម្ការរបស់ពួកគេត្រូវបានគេបំផ្លិចបំផ្លាញចោល ។
បន្ទាប់ពី យ៉ូសែប និងមិត្តភក្តិរបស់លោកត្រូវបានឃុំនៅក្នុងគុកលីប៊ើធីអស់រយៈពេលជាងបួនខែមក ពួកទាហានមួយចំនួនបានយកពួកលោកទៅទីក្រុងមួយទៀតដើម្បីកាត់ទោស ។ យ៉ូសែប និងមិត្តភក្តិរបស់លោកបានទិញសេះចំនួនពីរពីទាហានទាំងនោះ ។ ពួលលោកបានឲ្យសម្លៀកបំពាក់មួយចំនួនទៅអ្នកយាមដើម្បីបង់ថ្លៃទិញសេះមួយ ហើយសន្យានឹងបង់ថ្លៃទិញសេះមួយទៀតនៅពេលក្រោយទៀត ។
នាយប់មួយ ពួកអ្នកយាមមួយចំនួនបានស្រវឹងស្រា ហើយបានដេកលក់ ។ អ្នកយាមម្នាក់ទៀតបានជួយយ៉ូសែប និងមិត្តភក្តិរបស់លោកឲ្យរត់គេចខ្លួន ។
យ៉ូសែប និងមិត្តភក្តិរបស់លោកបានប្តូរវេនគ្នាជិះសេះ ។ ១០ ថ្ងៃក្រោយមក ពួកលោកបានទៅដល់ទីក្រុងឃ្វីនស៊ី រដ្ឋអិលលីណោយ ជាកន្លែងដែលពួកលោកបានជួបនឹងក្រុមគ្រួសាររបស់ពួកលោកវិញ ។
យ៉ូសែប និងមិត្តភក្តិរបស់លោកមានចិត្តរីករាយដើម្បីនៅជាមួយក្រុមគ្រួសាររបស់ពួកលោកម្តងទៀត ។
ពួកបរិសុទ្ធចង់ស្វែងរកកន្លែងមួយនៅក្នុងរដ្ឋអិលលីណោយ ដើម្បីសាងសង់ទីក្រុងផ្ទាល់ខ្លួនពួកគេ ។ ពួកគេបានទិញដីសើម និងមានភក់នៅក្បែរទន្លេមិស៊ីស៊ីបពី ។ យ៉ូសែប និងពួកបរិសុទ្ធបានខំប្រឹងធ្វើការសម្ងួតដីនោះ ដើម្បីឲ្យពួកគេអាចសាងសង់ផ្ទះសម្បែង និងដាំសួនដំណាំ ។ ពួកគេបានចាប់ផ្តើមសាងសង់ទីក្រុងដ៏ស្រស់ស្អាតមួយ ដែលពួកគេដាក់ឈ្មោះថា ណៅវូ។ ណៅវូ មានន័យថា ស្រស់ស្អាត ។
អំឡុងពេលពួកបរិសុទ្ធបានចាប់ផ្តើមសាងសង់ទីក្រុងណៅវូ នោះយ៉ូសែប ស៊្មីធបានទៅជួបប្រធានាធិបតីនៃសហរដ្ឋអាមេរិក ។ យ៉ូសែបបានប្រាប់ប្រធានាធិបតីអំពីពួកមនុស្សកំណាចនៅក្នុងរដ្ឋមិសសួរី ។ លោកបានប្រាប់អំពីរបៀបដែលពួកមនុស្សកំណាចបានដុតបំផ្លាញផ្ទះសម្បែង និងលួចសត្វរបស់ពួកគេ ហើយបង្ខំឲ្យពួកគេចាកចេញពីទឹកដីរបស់ពួកគេ ។
យ៉ូសែបបានប្រាប់អំពីពួកបរិសុទ្ធមួយចំនួនដែលត្រូវបានគេសម្លាប់ ។ ពួកបរិសុទ្ធផ្សេងទៀតត្រូវបានចាប់ដាក់គុក ។ លោកបានបង្ហាញដល់ប្រធានាធិបតីនូវអ្វីដែលពួកបរិសុទ្ធបានសរសេរអំពីរឿងអាក្រក់ៗជាច្រើនដែលគេបានធ្វើទៅលើពួកគេ ។ យ៉ូសែបបានថ្លែងថា អ្នកដឹកនាំនៅក្នុងរដ្ឋមិសសួរីពុំបានជួយពួកបរិសុទ្ធទេ ។ លោកបានសូមឲ្យប្រធានាធិបតីជួយពួកគេ ។
ប្រធានាធិបតីបានថ្លែងថា លោកបានដឹងថា ពួកបរិសុទ្ធបានរងទុក្ខ ប៉ុន្តែលោកនឹងពុំធ្វើអ្វីដើម្បីជួយពួកគេឡើយ ។ ប្រសិនបើលោកជួយពួកបរិសុទ្ធ នោះប្រជាជននៅរដ្ឋមិសសួរីនឹងខឹងសម្បារ ។
យ៉ូសែបបានកើតទុក្ខ ដោយសារប្រធានាធិបតីពុំជួយពួកបរិសុទ្ធទេ ។ លោកបានត្រឡប់ទៅទីក្រុងណៅវូវិញ ។