ជំពូកទី ២៦
នគរទាំងបីនៃស្ថានសួគ៌
ថ្ងៃទី ១៦ ខែ កុម្ភៈ ឆ្នាំ ១៨៣២
ខណៈដែល យ៉ូសែប និង ស៊ីឌនី កំពុងគិតអំពីរឿងនេះ នោះព្រះវរបិតាសួគ៌បានប្រទានការនិមិត្តដ៏អស្ចារ្យមួយដល់ពួកលោក ។ នៅក្នុងការនិមិត្តនេះពួកលោកបានឃើញស្ថានសួគ៌ ។ ពួកលោកបានឃើញព្រះវរបិតាសួគ៌ និងព្រះយេស៊ូវមានពន្លឺនៅព័ទ្ធជុំវិញពួកទ្រង់ ។ បន្ទាប់មក ពួកលោកបានឃើញពួកទេវតាថ្វាយបង្គំព្រះវរបិតាសួគ៌ និងព្រះយេស៊ូវ ។
នៅពេលយ៉ូសែប និង ស៊ីឌនី បានសរសេរអំពីការនិមិត្តនេះ ពួកលោកបានថ្លែងទីបន្ទាល់ថា ព្រះយេស៊ូវមានព្រះជន្មរស់ ។ ពួកលោកបានឃើញទ្រង់ ! ហើយពួកលោកបានស្តាប់ឮសំឡេងមួយដែលមានបន្ទូលថា ទ្រង់ជាព្រះរាជបុត្រានៃព្រះ ។ សំឡេងនោះក៏បានប្រាប់ពួកលោកថា ព្រះយេស៊ូវបានយាងមកផែនដី ដើម្បីអាចធ្វើឲ្យមនុស្សទាំងអស់ត្រឡប់ទៅរស់នៅជាមួយព្រះវរបិតាសួគ៌ម្តងទៀត ។
នៅផ្នែកបន្ទាប់ទៀតនៃការនិមិត្ត យ៉ូសែប និង ស៊ីឌនីបានឃើញកន្លែងដែលមនុស្សទៅ បន្ទាប់ពីពួកគេរស់ឡើងវិញ ។ មានកន្លែងបី ឬនគរបីសម្រាប់មនុស្សទៅនៅក្នុងស្ថានសួគ៌ ។ ពួកបរិសុទ្ធដ៏សុចរិតទៅនគរសេឡេស្ទាលនៅស្ថានសួគ៌ បន្ទាប់ពីពួកគេរស់ឡើងវិញ ។ នគរសេឡេស្ទាលគឺជាកន្លែងដែលព្រះវរបិតាសួគ៌ និងព្រះយេស៊ូវគង់នៅ ។
អស់អ្នកដែលនៅក្នុងនគរសេឡេស្ទាលបានជឿលើព្រះយេស៊ូវគ្រីស្ទ អំឡុងពេលពួកគេរស់នៅលើផែនដី ។ ពួកគេបានទទួលបុណ្យជ្រមុជទឹក ហើយទទួលព្រះវិញ្ញាណបរិសុទ្ធ ។
អស់អ្នកដែលនៅក្នុងនគរសេឡេស្ទាលមានការសាកល្បងជាច្រើន អំឡុងពេលពួកគេរស់នៅលើផែនដី ប៉ុន្តែពួកគេបានយកឈ្នះលើការសាកល្បងទាំងនោះដោយមានសេចក្តីជំនឿលើព្រះយេស៊ូវគ្រីស្ទ ។ ពួកគេបានខិតខំយ៉ាងខ្លាំងដើម្បីគោរពបទបញ្ញត្តិទាំងឡាយរបស់ព្រះ ហើយពួកគេបានប្រែចិត្តនៅពេលពួកគេពុំបានគោរពតាម ។
ពួកបរិសុទ្ធសុចរិតនឹងក្លាយដូចជាព្រះវរបិតាសួគ៌ និងព្រះយេស៊ូវ ។ អ្វីៗគ្រប់យ៉ាងនឹងក្លាយជារបស់ផងពួកគេ ។ ពួកគេនឹងរស់នៅជាមួយព្រះវរបិតាសួគ៌ និងព្រះយេស៊ូវជារៀងរហូត ។
បន្ទាប់មក យ៉ូសែប និង ស៊ីឌនី បានឃើញនគរទេរេសស្ទ្រាលនៃស្ថានសួគ៌ ។
មនុស្សនៅក្នុងនគរទេរេសស្ទ្រាលគឺជាមនុស្សល្អដែលរស់នៅលើផែនដី ប៉ុន្តែពួកគេត្រូវបានមនុស្សអាក្រក់បោកបញ្ឆោត ។ ពួកគេបានគោរពតាមបទបញ្ញត្តិមួយចំនួន ប៉ុន្តែពុំក្លាហាននៅក្នុងទីបន្ទាល់ពីព្រះយេស៊ូវឡើយ ។
នគរទេរេសស្ទ្រាលក៏មានមនុស្សដែលពុំជឿលើដំណឹងល្អនៅពេលពួកគេឮអំពីវានៅលើផែនដីនេះផងដែរ ហើយក្រោយមកពួកគេបានជឿលើដំណឹងល្អ នៅពេលពួកគេបានឮវាបន្ទាប់ពីពួកគេស្លាប់ ។
មនុស្សនៅក្នុងនគរទេរេសស្ទ្រាលនឹងឃើញព្រះយេស៊ូវ ។ ប៉ុន្តែពួកគេពុំអាចរស់នៅជាមួយព្រះវរបិតាសួគ៌ និងព្រះយេស៊ូវបានទេ ។
បន្ទាប់មក យ៉ូសែប និង ស៊ីឌនី បានឃើញនគរទេឡេស្ទាលនៃស្ថានសួគ៌ ។ មនុស្សដែលទៅនគរទេឡេស្ទាលគឺជាមនុស្សដែលពុំសុចរិតកាលរស់នៅលើផែនដីនេះ ។
មនុស្សទាំងនេះពុំបានជឿលើព្រះយេស៊ូវ ឬដំណឹងល្អរបស់ទ្រង់ឡើយ ។ ពួកគេពុំជឿលើពួកព្យាការី ហើយពុំគោរពតាមបទបញ្ញត្តិរបស់ព្រះឡើយ ។
មនុស្សនៅក្នុងនគរទេឡេស្ទាលនឹងពុំឃើញព្រះយេស៊ូវ ឬព្រះវរបិតាសួគ៌ឡើយ ហើយពុំអាចរស់នៅជាមួយទ្រង់បានផងដែរ ។ ប៉ុន្តែ ពួកទេវតានឹងទៅសួរសុខទុក្ខមនុស្សទាំងនេះ ហើយព្រះវិញ្ញាណបរិសុទ្ធនឹងបង្រៀនពួកគេ ។
មនុស្សដែលនឹងទៅនគរសេឡេស្ទាល និងនគរទេរេសស្ទ្រាលនឹងរស់ឡើងវិញ នៅពេលព្រះយេស៊ូវយាងមកកាន់ផែនដីម្តងទៀត ។ មនុស្សដែលនឹងទៅនគរទេឡេស្ទាលនឹងពុំត្រូវបានរស់ឡើងវិញឡើយ រហូតដល់ ១០០០ ឆ្នាំ បន្ទាប់ពីព្រះយេស៊ូវបានយាងមកម្តងទៀត ។
នៅក្នុងការនិមិត្តនេះ យ៉ូសែប និង ស៊ីឌនីក៏បានឃើញកន្លែងដែលមនុស្សអាក្រក់បំផុតនឹងទៅផងដែរ ។ ពួកគេនឹងនៅជាមួយសាតាំង ។ ពួកគេពុំអាចរស់នៅជាមួយព្រះវរបិតាសួគ៌ ព្រះយេស៊ូវ ឬព្រះវិញ្ញាណបរិសុទ្ធឡើយ ។
មនុស្សដែលនឹងនៅជាមួយសាតាំងបានរៀនអំពីព្រះយេស៊ូវ និងដំណឹងល្អរបស់ទ្រង់អំឡុងពេលពួកគេរស់នៅលើផែនដី ។ ព្រះវិញ្ញាណបរិសុទ្ធបានថ្លែងទីបន្ទាល់ដល់ពួកគេអំពីព្រះយេស៊ូវគ្រីស្ទ ។ ពួកគេបានដឹងថា ទ្រង់បានរស់នៅ ហើយទ្រង់បានសុគតជំនួសពួកគេ ។
ប៉ុន្តែមនុស្សទាំងនេះបានធ្វើរឿងដ៏អាក្រក់បំផុត ។ ពួកគេបានបដិសេធសេចក្តីពិត ហើយបដិសេធព្រះចេស្តារបស់ព្រះ ។ ពួកគេបានបដិសេធព្រះវិញ្ញាណបរិសុទ្ធ ។ ពួកគេបាននិយាយថា ពួកគេលែងជឿលើព្រះយេស៊ូវគ្រីស្ទទៀតហើយ ។ មនុស្សទាំងនេះនឹងរងទុក្ខជារៀងរហូត ។
យ៉ូសែប និង ស៊ីឌនី បានឃើញរឿងផ្សេងទៀតនៅក្នុងការនិមិត្តរបស់ពួកគេ ប៉ុន្តែព្រះយេស៊ូវបានមានបន្ទូលប្រាប់ពួកគេកុំឲ្យសរសេរនូវអ្វីៗដែលពួកគេបានឃើញ ។ តាមរយៈព្រះចេស្តានៃព្រះវិញ្ញាណបរិសុទ្ធ នោះពួកបរិសុទ្ធដែលសុចរិតអាចឃើញ និងដឹងនូវរឿងទាំងនេះដោយខ្លួនពួកគេផ្ទាល់ ។ យ៉ូសែប និង ស៊ីឌនី ថ្លែងអំណរគុណចំពោះព្រះសម្រាប់ការនិមិត្តដ៏អស្ចារ្យនេះ ។