ជំពូកទី ៣១
ពាក្យសម្ដីនៃប្រាជ្ញាវាងវៃ
ខែ កុម្ភៈ ឆ្នាំ ១៨៣៣
យ៉ូសែបចាប់ផ្តើមសាលាមួយសម្រាប់ពួកបុរសនៅក្នុងសាសនាចក្រ ។ វាត្រូវបានហៅថាសាលារបស់ពួកព្យាការី ។
សាលារៀននោះធ្វើឡើងនៅក្នុងបន្ទប់មួយនៅក្នុងហាងរបស់ នូវល វីតនី នៅទីក្រុងខឺតឡង់រដ្ឋអូហៃអូ ។ នៅក្នុងសាលានេះ យ៉ូសែប និងថ្នាក់ដឹកនាំដទៃទៀតនៃសាសនាចក្របានបង្រៀនគ្នាទៅវិញទៅមកអំពីបព្វជិតភាព ព្រះគម្ពីរ និងអ្វីជាច្រើនទៀត ។ សាលានោះគឺជួយរៀបចំពួកបុរសសម្រាប់ភាពជាអ្នកដឹកនាំសាសនាចក្រ និងការបម្រើជាអ្នកផ្សព្វផ្សាយសាសនា ។
ពួកបុរសជាច្រើននាក់បានជក់ខ្សៀ ឬស៊ីហ្គា ដែលធ្វើឲ្យបន្ទប់នោះមានសុទ្ធតែផ្សែង ។ បុរសមួយចំនួនចុកថ្នាំជក់ ហើយស្តោះវាដាក់លើកម្រាលឥដ្ឋ ដែលធ្វើឲ្យវាកខ្វក់ជាខ្លាំង ។
អិមម៉ា ស៊្មីធ ភរិយារបស់យ៉ូសែបបានសម្អាតបន្ទប់នោះបន្ទាប់ពីការប្រជុំនីមួយៗ ។ គាត់ និងយ៉ូសែបបានមានកង្វល់អំពីការប្រើប្រាស់ថ្នាំជក់របស់ពួកបងប្អូនប្រុស ។ យ៉ូសែបបានឆ្ងល់ថា តើមនុស្សគួរតែជក់ ឬចុកថ្នាំជក់ដែរឬទេ ។
យ៉ូសែបបានអធិស្ឋានដើម្បីដឹងអំពីអ្វីដែលត្រឹមត្រូវ ។ ព្រះយេស៊ូវបានប្រទានវិវរណៈមួយដល់លោកដែលហៅថា ពាក្យសម្តីនៃប្រាជ្ញាវាងវៃ ។ ព្រះយេស៊ូវមានបន្ទូលថា មនុស្សមួយចំនួនចង់ឲ្យមនុស្សដទៃទៀតធ្វើរឿងមិនល្អដល់រូបកាយរបស់ពួកគេ ។ ព្រះយេស៊ូវមានបន្ទូលប្រាប់ពួកបរិសុទ្ធអំពីសារធាតុដែលមិនល្អសម្រាប់រូបកាយរបស់ពួកគេនៅក្នុងពាក្យសម្តីនៃប្រាជ្ញាវាងវៃ ។ ទ្រង់ក៏បានមានបន្ទូលប្រាប់ពួកគេអំពីសារធាតុដែលល្អសម្រាប់រូបកាយរបស់ពួកគេផងដែរ ។
ព្រះយេស៊ូវបានមានបន្ទូលថា គ្រឿងស្រវឹងមិនល្អសម្រាប់មនុស្សឡើយ ។ ពួកគេពុំគួរផឹកភេសជ្ជៈមានគ្រឿងស្រវឹងនៅក្នុងវាឡើយ ។ គ្រឿងស្រវឹងគួរតែប្រើប្រាស់នៅខាងក្រៅរូបកាយប៉ុណ្ណោះ ។
ព្រះយេស៊ូវបានមានបន្ទូលថា ថ្នាំជក់មិនល្អសម្រាប់មនុស្សទេ ។ ពួកគេពុំគួរជក់បារី ជក់ស៊ីហ្គា ឬជក់ខ្សៀទេ ។ ពួកគេពុំគួរចុកថ្នាំជក់ទេ ។
ព្រះយេស៊ូវមានបន្ទូលថា ពួកបរិសុទ្ធពុំគួរផឹកភេសជ្ជៈក្តៅដូចជា ទឹកតែ និងកាហ្វេទេ ។ ភេជ្ជសៈទាំងនេះមិនល្អសម្រាប់រូបកាយឡើយ ។
ព្រះយេស៊ូវបានមានបន្ទូលថា រុក្ខជាតិ និងសត្វជាច្រើនគឺល្អសម្រាប់ឲ្យមនុស្សបរិភោគ ។ មនុស្សគួរតែថ្លែងអំណរគុណដល់ព្រះវរបិតាសួគ៌សម្រាប់អាហារល្អៗ ។
ព្រះយេស៊ូវបានមានបន្ទូលថា មនុស្សពុំគួរបរិភោគសាច់ច្រើនពេកទេ ។
ព្រះអម្ចាស់បានមានបន្ទូលថា គ្រាប់ធុញ្ញជាតិល្អសម្រាប់រូបកាយ ។ គ្រាប់ធុញ្ញជាតិមួយចំនួនមានដូចជាស្រូវសាលី ពោត និងស្រូវអូដ ។ ផ្លែឈើ និងបន្លែក៏ល្អសម្រាប់រូបកាយផងដែរ ។
ព្រះយេស៊ូវបានសន្យានូវពរជ័យដ៏មហិមាដល់អស់អ្នកដែលគោរពតាមពាក្យសម្តីនៃប្រាជ្ញាវាងវៃ ។ រូបកាយរបស់ពួកគេនឹងកាន់តែរឹងមាំ និងមានសុខភាពកាន់តែល្អឡើងជាងពេលពួកគេមិនគោរពតាមច្បាប់នេះ ។ គំនិតរបស់ពួកគេក៏នឹងល្អប្រសើរឡើង ហើយពួកគេនឹងទទួលបានប្រាជ្ញា និងចំណេះវិជ្ជាជាសម្បត្តិ ។