ជំពូកទី ១៦
យ៉ូសែប ស៊្មីធ និង ស៊ីឌនី រិកដុន រៀនអំពីស៊ីយ៉ូន
ឆ្នាំ ១៨៣០
អំឡុងពេល អូលីវើរ ខៅឌើរី និងមិត្តភក្តិរបស់លោកបម្រើបេសកកម្ម ពួកគេបានឈប់នៅក្បែរទីក្រុងខឺតឡង់ រដ្ឋអូហៃអូ ។ ពួកគេបានជួបបុរសម្នាក់ឈ្មោះ ស៊ីឌនី រិកដុន ដែលជាអ្នកដឹកនាំព្រះវិហារមួយផ្សេងទៀត ។
ពួកអ្នកផ្សព្វផ្សាយសាសនាបានឲ្យព្រះគម្ពីរមរមនទៅស៊ីឌនី រិកដុនមួយក្បាល ហើយបានបង្រៀនគាត់អំពីដំណឹងល្អ ។ ស៊ីឌនីបានអានព្រះគម្ពីរមរមន ហើយបានអធិស្ឋានអំពីវា ។ ព្រះវរបិតាសួគ៌បានប្រាប់គាត់ថា ដំណឹងល្អនេះគឺពិត ហើយស៊ីឌនី រិកដុនបានទទួលបុណ្យជ្រមុជទឹក ។
ស៊ីឌនី រិកដុនបានប្រាប់សមាជិកនៃព្រះវិហារគាត់ឲ្យស្តាប់ពួកអ្នកផ្សព្វផ្សាយសាសនា ហើយពួកគេជាច្រើននាក់បានស្តាប់ ។ មិនយូរប៉ុន្មានក្រោយមកមានមនុស្ស ១០០០ នាក់បានទទួលបុណ្យជ្រមុជទឹកនៅទីក្រុង ខឺតឡង់ ។
ស៊ីឌនី រិកដុនចង់ជួបយ៉ូសែប ស៊្មីធ ដូច្នេះគាត់បានទៅទីក្រុង នូវ យ៉ោក ។ បន្ទាប់ពីស៊ីឌនីបានទៅដល់ទីនោះ យ៉ូសែប ស៊្មីធបានទទួលវិវរណៈសម្រាប់លោក ។ នៅក្នុងវិវរណៈនោះ ព្រះយេស៊ូវបានមានបន្ទូលថា ស៊ីឌនី រិកដុន នឹងធ្វើកិច្ចការដ៏អស្ចារ្យជាច្រើន ។ គាត់នឹងបង្រៀនដំណឹងល្អដល់មនុស្សជាច្រើន ។ គាត់នឹងធ្វើបុណ្យជ្រមុជទឹក ហើយផ្តល់អំណោយទាននៃព្រះវិញ្ញាណបរិសុទ្ធដល់ពួកគេ ។
ព្រះយេស៊ូវក៏បានប្រាប់យ៉ូសែប និងស៊ីឌនីថា ផ្នែកមួយចំនួននៃព្រះគម្ពីរប៊ីបត្រូវបានផ្លាស់ប្តូរកាលពីយូរយារណាស់មកហើយ ។ ផ្នែកសំខាន់ៗផ្សេងទៀតត្រូវបានដកយកចេញ ។ ព្រះយេស៊ូវបានមានបន្ទូលថា ទ្រង់នឹងបើកសម្តែងដល់ព្យាការីយ៉ូសែប ស្ម៊ីធ នូវផ្នែកនៃព្រះគម្ពីរប៊ីបដែលគួរតែត្រឹមត្រូវ ។ ស៊ីឌនីត្រូវកត់ត្រានូវការកែតម្រូវនោះ ពេលយ៉ូសែបបាននិយាយវា ។
រឿងមួយដែលពុំមានពេញលេញនៅក្នុងព្រះគម្ពីរប៊ីបនោះគឺរឿងអំពីហេណុក លោកគឺជាព្យាការីដ៏អស្ចារ្យមួយរូប ។ ប្រជាជនរបស់លោកសុចរិតជាខ្លាំង រហូតដល់ព្រះអម្ចាស់បានហៅពួកគេថា ស៊ីយ៉ូន ។ ប្រជាជនហេណុកក៏បានសាងសង់ទីក្រុងមួយឈ្មោះស៊ីយ៉ូនផងដែរ ។ នៅទីក្រុងស៊ីយ៉ូន ប្រជាជនស្រឡាញ់គ្នា ហើយមើលថែគ្នាទៅវិញទៅមក ។ គ្មាននរណាក្រ ឬមិនសប្បាយចិត្តឡើយ ។
មនុស្សគ្រប់រូបនៅទីក្រុងស៊ីយ៉ូនបានគោរពតាមបទបញ្ញត្តិរបស់ព្រះវរបិតាសួគ៌ ។ ប្រជាជនសុចរិតយ៉ាងខ្លាំងរហូតដល់ព្រះអម្ចាស់បានគង់នៅជាមួយពួកគេ ។ បន្ទាប់មក ទ្រង់បានយកប្រជាជនទីក្រុងស៊ីយ៉ូនទៅស្ថានសួគ៌ដើម្បីរស់នៅជាមួយទ្រង់ ។
ព្រះយេស៊ូវបានប្រាប់យ៉ូសែប ស្ម៊ីធថា ពួកបរិសុទ្ធគួរតែសាងសង់ទីក្រុងមួយផ្សេងទៀតដាក់ឈ្មោះថា ស៊ីយ៉ូន ។ ទីក្រុងនោះនឹងមានភាពស្រស់ស្អាត ។ គ្មានមនុស្សអាក្រក់នឹងរស់នៅទីនោះឡើយ ។ អស់អ្នកដែលរស់នៅក្នុងទីក្រុងនោះ នឹងស្រឡាញ់គ្នាទៅវិញទៅមក ហើយមានចិត្តសប្បាយរីករាយ ។ ព្រះយេស៊ូវបានមានបន្ទូលថា ទ្រង់នឹងយាងមក ហើយរស់នៅជាមួយពួកគេ ។
គោលលទ្ធិ និង សេចក្តីសញ្ញា ៤៥:៦៤–៧១ សូមមើលផងដែរ ម៉ូសេ ៧:៦២–៦៤