ជំពូកទី ៦
យ៉ូសែប និង អូលីវើរទទួលបព្វជិតភាព
ខែ ឧសភា ឆ្នាំ ១៨២៩
យ៉ូសែប ស្ម៊ីធ និង អូលីវើរ ខៅឌើរីកំពុងបកប្រែព្រះគម្ពីរមរមន ។ ពួកលោកបានអានអំពីបុណ្យជ្រមុជទឹក ហើយចង់ដឹងបន្ថែមទៀតអំពីរឿងនេះ ។
យ៉ូសែប និង អូលីវើរបានសម្រេចចិត្តទូលសូមដល់ព្រះ ។ ពួកលោកមានសេចក្តីជំនឿថា ទ្រង់នឹងជួយពួកលោកឲ្យរៀនសេចក្តីពិត ។ នៅថ្ងៃទី ១៥ ខែ ឧសភា ឆ្នាំ ១៨២៩ ពួកលោកបានចូលទៅក្នុងព្រៃ ហើយអធិស្ឋាន ។
ពួកទូតស្ថានសួគ៌បានមកជួបយ៉ូសែប និង អូលីវើរ ។ ទូតនោះឈ្មោះយ៉ូហាន បាទីស្ទ ដែលបានជ្រមុជទឹកថ្វាយព្រះយេស៊ូវកាលពីយូរយារណាស់មកហើយ ។ មានពន្លឺភ្លឺចែងចាំងនៅហ៊ុមព័ទ្ធនៅជុំវិញលោក ។
យ៉ូហាន បាទីស្ទ បានមកដើម្បីប្រគល់បព្វជិតភាពអើរ៉ុនឲ្យដល់យ៉ូសែប និង អូលីវើរ ។ បព្វជិតភាពគឺជាអំណាចរបស់ព្រះ ។ បព្វជិតភាពអើរ៉ុនរួមមានសិទ្ធិអំណាចដើម្បីធ្វើបុណ្យជ្រមុជទឹកឲ្យមនុស្ស ។
យ៉ូហាន បាទីស្ទបានប្រាប់យ៉ូសែប និង អូលីវើរឲ្យជ្រមុជទឹកគ្នាទៅវិញទៅមក ។ យ៉ូសែបបានជ្រមុជទឹកអូលើវើរ ហើយបន្ទាប់មកអូលីវើរបានជ្រមុជទឹកយ៉ូសែបវិញ ។ ពួកលោកបានលិចកប់ចូលទៅក្នុងទឹក ពេលពួកលោកបានជ្រមុជទឹក ។
ជាយូរយារណាស់មកហើយ យ៉ូហាន បាទីស្ទបានជ្រមុជទឹកថ្វាយព្រះយេស៊ូវតាមរបៀបដូចគ្នានេះផងដែរ ។ ព្រះយេស៊ូវបានមុជចូលទៅក្នុងទឹក នៅពេលទ្រង់ទទួលបុណ្យជ្រមុជទឹក ។
យ៉ូសែប និង អូលីវើរ បានពោរពេញទៅដោយព្រះវិញ្ញាណបរិសុទ្ធ បន្ទាប់ពីពួកលោកបានទទួលបុណ្យជ្រមុជទឹក ។ ព្រះវិញ្ញាណបរិសុទ្ធប្រាប់ពួកលោកថា សាសនាចក្រពិតរបស់ព្រះយេស៊ូវគ្រីស្ទនឹងមាននៅលើផែនដីម្តងទៀតក្នុងពេលដ៏ឆាប់ ។
យ៉ូសែប និង អូលីវើរ បានប្រាប់មិត្តភក្តិល្អៗរបស់ពួកលោកថា ពួកលោកបានទទួលបុណ្យជ្រមុជទឹករួចហើយ ។ ពួកលោកក៏បានប្រាប់ពួកគេអំពីបព្វជិតភាពផងដែរ ។ ប៉ុន្តែ យ៉ូសែប និង អូលីវើរពុំបានប្រាប់មនុស្សដទៃទៀតភ្លាមៗនោះទេ ។ ពួកលោកបានដឹងថា មនុស្សមួយចំនួននឹងពុំជឿពួកលោក ហើយនឹងធ្វើទុក្ខដល់ពួកលោក ។
ក្រោយមកទៀត សារទូតស្ថានសួគ៌បីរូបផ្សេងទៀតបានមក ។ ពួកលោកគឺ ពេត្រុស យ៉ាកុប និង យ៉ូហាន ដែលជាសាវកដំបូងបីរូបរបស់ព្រះយេស៊ូវគ្រីស្ទ ។ ពេត្រុស យ៉ាកុប និងយ៉ូហានបានប្រគល់បព្វជិតភាពមិលគីស្សាដែកឲ្យដល់យ៉ូសែប ស្ម៊ីធ និង អូលីវើរ ខៅឌើរី ។ នេះក៏ត្រូវបានហៅថាជាបព្វជិតភាព « ដ៏ធំជាង » ផងដែរ ។
នៅពេលដែលបព្វជិតភាពត្រូវបានស្តារឡើងវិញ បុរសសុចរិតអាចត្រូវបានប្រគល់សិទ្ធិអំណាចនេះដើម្បីជួយធ្វើកិច្ចការរបស់ព្រះនៅលើផែនដីនេះ ។ ពួកបុរសដែលមានបព្វជិតភាពមិលគីស្សាដែកអាចធ្វើជាថ្នាក់ដឹកនាំសាសនាចក្របាន ។ ពួកលោកអាចផ្តល់ការប្រសិទ្ធពរដល់មនុស្ស ។ ពួកលោកក៏អាចផ្តល់អំណោយទាននៃព្រះវិញ្ញាណបរិសុទ្ធផងដែរ ។ ការស្តារឡើងវិញនៃបព្វជិតភាពគឺជាពរជ័យមួយដ៏អស្ចារ្យ ។