ជំពូកទី ១៩
ការយាងមកជាលើកទីពីរនៃព្រះយេស៊ូវគ្រីស្ទ
មនុស្សមួយចំនួននៅទីក្រុងខឺតឡង់រដ្ឋអូហៃអូ ពុំចង់រៀនដំណឹងល្អឡើយ ។ មនុស្សមួយចំនួនថែមទាំងបាននិយាយកុហកអំពីពួកបរិសុទ្ធ ដើម្បីព្យាយាមបញ្ឈប់មនុស្សដទៃទៀតកុំឲ្យរៀនអំពីដំណឹងល្អ ។
គោលលទ្ធិ និង សេចក្តីសញ្ញា ៤៥ ក្បាលកណ្ឌ
ព្រះយេស៊ូវបានមានបន្ទូលប្រាប់យ៉ូសែប ស្ម៊ីធ ថា ទ្រង់នឹងយាងមកកាន់ផែនដីម្តងទៀតក្នុងពេលដ៏ឆាប់ ។ ពីមុនទ្រង់យាងមក មនុស្សគ្រប់រូបនៅលើផែនដីត្រូវតែឮដំណឹងល្អ ។ ពួកបរិសុទ្ធគួរតែក្លាយជាអ្នកផ្សព្វផ្សាយសាសនាល្អ ហើយខិតខំចែកចាយដំណឹងល្អ ។
កាលព្រះយេស៊ូវរស់នៅលើផែនដី ទ្រង់បានមានបន្ទូលប្រាប់ពួកសាវករបស់ទ្រង់ នូវអ្វីដែលនឹងកើតឡើងពីមុនទ្រង់យាងមកម្តងទៀត ។
ព្រះយេស៊ូវបានមានបន្ទូលប្រាប់ពួកសាវកទ្រង់ថា ព្រះវិហារបរិសុទ្ធនៅទីក្រុងយេរូសាឡិមនឹងត្រូវបំផ្លាញចោល ។ ពួកសាសន៍យូដានឹងត្រូវខ្ចាត់ខ្ចាយទៅកាន់ប្រទេសជាច្រើន ហើយពួកគេជាច្រើននាក់នឹងត្រូវគេសម្លាប់ ។ នឹងមានសង្គ្រាមជាច្រើន ។ មនុស្សនឹងមិនស្រឡាញ់គ្នាឡើយ ហើយពួកគេនឹងបែរដួងចិត្តរបស់ពួកគេចេញពីព្រះ ។ នឹងមានជំងឺ និងរោគដ៏កាចសាហាវ ព្រមទាំងការរញ្ជួយដីដ៏ខ្លាំង ។ ព្រះអាទិត្យនឹងប្រែទៅជាងងឹត ព្រះចន្ទនឹងក្លាយទៅជាឈាម ហើយផ្កាយនានានឹងធ្លាក់ចុះមក ។
ព្រឹត្តិការណ៍សំខាន់មួយនៅក្នុងការរៀបចំសម្រាប់ការយាងត្រឡប់មកវិញរបស់ព្រះយេស៊ូវមកកាន់ផែនដីគឺ ការស្តារសាសនាចក្ររបស់ទ្រង់ឡើងវិញ ។ ព្រះយេស៊ូវបានមានបន្ទូលថា ដំណឹងល្អដែលបានស្តារឡើងវិញនឹងដូចជាពន្លឺនៅក្នុងទីងងឹត ។
រឿងជាច្រើនដែលព្រះយេស៊ូវបានមានបន្ទូលប្រាប់បានកើតឡើងរួចមកហើយ ។ រឿងផ្សេងទៀតកំពុងតែកើតឡើង ហើយរឿងផ្សេងទៀតនឹងកើតឡើងនាពេលអនាគត ។
នៅពេលរឿងទាំងនេះកើតឡើង នោះមនុស្សសុចរិតនឹងដឹងថា ព្រះយេស៊ូវកំពុងយាងមកក្នុងពេលដ៏ឆាប់ ។ ពួកគេចង់ឲ្យទ្រង់យាងមក ។ ពួកសាសន៍យូដាជាច្រើននឹងត្រឡប់ទៅទីក្រុងយេរូសាឡិមវិញ ។ ពួកគេនឹងឮដំណឹងល្អ ។
ពួកបរិសុទ្ធសុចរិតនឹងសាងសង់ទីក្រុងស៊ីយ៉ូនថ្មី ជាកន្លែងដែលពួកគេនឹងមានសុវត្ថិភាព ។ ពួកគេនឹងមិនប្រយុទ្ធគ្នាទៅវិញទៅមកទៀតឡើយ ។ ពួកគេនឹងរីករាយ ហើយច្រៀងចម្រៀងនៃអំណរ ។ មនុស្សដែលពុំសុចរិតនឹងពុំអាចចូលទៅក្នុងទីក្រុងស៊ីយ៉ូនបានឡើយ ។
ព្រះយេស៊ូវនឹងយាងមកកាន់ផែនដីនៅលើពពកដ៏ភ្លឺចែងចាំង ។ មនុស្សសុចរិតនឹងមើលឃើញទ្រង់ ។ មនុស្សសុចរិតទាំងអស់ដែលបានស្លាប់នឹងរស់ឡើងវិញ ។ ពួកគេនឹងជួបព្រះយេស៊ូវនៅលើពពក ហើយចុះមកកាន់ផែនដីជាមួយទ្រង់ ។
ព្រះយេស៊ូវនឹងយាងទៅទីក្រុងយេរូសាឡិម ។ ទ្រង់នឹងគង់នៅលើភ្នំនៅទីនោះ ហើយវានឹងបែកចេញជាពីរ ។ ស្ថានសួគ៌ និងផែនដីនឹងញ័រញ្ជួយ ។ មនុស្សទុច្ចរិតនឹងត្រូវបំផ្លាញចោល ។
មនុស្សនៅក្នុងទីក្រុងយេរូសាឡិមនឹងឃើញព្រះយេស៊ូវ ហើយសួរថា « ចុះតើរបួសអ្វីនុ៎ះនៅដៃអ្នក និងនៅជើងអ្នក » ។ ទ្រង់នឹងមានបន្ទូលថា ៖ « យើងជាព្រះយេស៊ូវដែលត្រូវគេឆ្កាង ។ យើងជាព្រះរាជបុត្រានៃព្រះ » ។ ខណៈនោះ ពួកគេនឹងយំដោយសារតែអំពើបាបរបស់ពួកគេ ហើយមានអារម្មណ៍កើតទុក្ខដោយសារព្រះយេស៊ូវគ្រីស្ទត្រូវបានគេបៀតបៀន ។
មនុស្សសុចរិតនឹងរីករាយជាខ្លាំងដែលបានឃើញព្រះយេស៊ូវ ។ ផែនដីទាំងមូលនឹងក្លាយជារបស់ផងពួកគេ ។ សាតាំងនឹងពុំអាចល្បួងពួកគេឡើយ ។ កូនៗរបស់ពួកគេនឹងធំឡើងដោយគ្មានអំពើបាប ។ ព្រះយេស៊ូវនឹងគង់នៅជាមួយពួកគេរយៈពេល ១០០០ ឆ្នាំ ហើយនឹងធ្វើជាស្តេចរបស់ពួកគេ ។
ព្រះយេស៊ូវបានមានបន្ទូលប្រាប់ យ៉ូសែប ស៊្មីធ ឲ្យបញ្ជូនពួកអ្នកផ្សព្វផ្សាយសាសនា ដើម្បីប្រាប់មនុស្សគ្រប់រូបឲ្យប្រែចិត្ត ហើយរៀបចំខ្លួនសម្រាប់ការយាងមកជាលើកទីពីរ ។ ព្រះយេស៊ូវបានមានបន្ទូលថា ពួកបរិសុទ្ធក៏គួរតែរៀបចំខ្លួនផងដែរ ។ ពួកគេគួរតែអធិស្ឋាន តមអាហារ និងបង្រៀនគ្នាទៅវិញទៅមកនូវបទបញ្ញត្តិទាំងឡាយ ។
ព្រះយេស៊ូវបានសន្យានឹងពួកបរិសុទ្ធថា ប្រសិនបើពួកគេនឹងខិតមកជិតទ្រង់ នោះទ្រង់នឹងខិតទៅជិតពួកគេដែរ ។ ទ្រង់បានមានបន្ទូលថា ពួកគេគួរតែអធិស្ឋាន ហើយទ្រង់បានសន្យាថា ព្រះនឹងឆ្លើយតបពួកគេ ។
ពួកបរិសុទ្ធគួរតែធ្វើអ្វីគ្រប់យ៉ាងដែលពួកគេអាចធ្វើដើម្បីជួយព្រះយេស៊ូវ ។ នៅពេលមនុស្សជួយព្រះយេស៊ូវ នោះពួកគេនឹងក្លាយដូចជាទ្រង់ ។ ពួកគេនឹងត្រៀមខ្លួនរួចជាស្រេចសម្រាប់ការយាងមកជាលើកទីពីររបស់ទ្រង់ ។