ជំពូកទី ១៨
ក្រឹត្យវិន័យនៃសាសនាចក្រ
ថ្ងៃទី ៩ ខែ កុម្ភៈ ឆ្នាំ ១៨៣១
ព្រះអម្ចាស់បានមានព្រះបន្ទូលថា ពួកបរិសុទ្ធគួរតែបង្រៀនដំណឹងល្អដល់មនុស្សទាំងអស់ ។ ពួកបុរសដែលទៅបេសកកម្មគប្បីត្រូវបានតែងតាំងបព្វជិតភាពដោយពួកអ្នកដឹកនាំសាសនាចក្រ ។
អ្នកផ្សព្វផ្សាយសាសនាពីរនាក់គួរតែធ្វើការជាមួយគ្នា ។ ពួកគេគួរតែបង្រៀនចេញពីព្រះគម្ពីរប៊ីប និងព្រះគម្ពីរមរមន ។ ពួកគេគួរតែអធិស្ឋានទូលសូមឲ្យមានព្រះវិញ្ញាណបរិសុទ្ធគង់នៅជាមួយនឹងពួកគេ ។ ព្រះវិញ្ញាណបរិសុទ្ធនឹងប្រាប់ពួកគេនូវអ្វីដែលពួកគេត្រូវបង្រៀន ។
ពួកអ្នកផ្សព្វផ្សាយសាសនាគួរតែជ្រមុជទឹកមនុស្សដែលជឿលើដំណឹងល្អ ។
ព្រះអម្ចាស់បានមានបន្ទូលថា សមាជិកសាសនាចក្រគួរតែគោរពតាមក្រឹត្យវិន័យដប់ប្រការ ។ ពួកគេពុំគួរសម្លាប់មនុស្សទេ ។ ពួកគេពុំគួរនិយាយកុហកទេ ។ ពួកគេពុំគួរនិយាយអាក្រក់អំពីមនុស្សដទៃទៀត ។ ពួកគេពុំគួរធ្វើកិច្ចការអាក្រក់ដទៃទៀតឡើយ ។
ពួកបរិសុទ្ធគួរតែចែកចាយអ្វីដែលពួកគេមានជាមួយមនុស្សដទៃទៀត ។ ការចែកចាយជាមួយអ្នកដទៃគឺដូចជាការចែកចាយជាមួយព្រះយេស៊ូវដែរ ។
ព្រះយេស៊ូវបានប្រទានបទបញ្ញត្តិផ្សេងទៀតដល់ពួកបរិសុទ្ធ ។ ពួកបរិសុទ្ធពុំគួរគិតថា ខ្លួនល្អប្រសើរជាងបុគ្គលណាម្នាក់ផ្សេងទៀតឡើយ ។ ពួកបរិសុទ្ធគួរតែស្អាតបាត ។ ពួកគេគួរតែខិតខំធ្វើការ ។
ពួកបរិសុទ្ធគួរតែមើលថែទាំសមាជិកដែលឈឺ ។ ពួកបុរសដែលមានបព្វជិតភាពគួរតែប្រសិទ្ធពរដល់អ្នកឈឺ ។ អស់អ្នកដែលមានសេចក្តីជំនឿអាចត្រូវបានព្យាបាលឲ្យជា ។ ពួកគេនឹងពុំស្លាប់ឡើយ ប្រសិនបើវាពុំទាន់ដល់ពេលដែលពួកគេត្រូវស្លាប់ ។
ពួកបរិសុទ្ធដែលសុចរិតពុំគួរខ្លាចសេចក្តីស្លាប់ឡើយ ។ សេចក្តីស្លាប់គឺជារឿងអស្ចារ្យសម្រាប់មនុស្សសុចរិត ។
ព្រះយេស៊ូវបានមានបន្ទូលថា ទ្រង់នឹងបើកសម្តែងការណ៍ជាច្រើនដល់សមាជិកដែលសុចរិត ។ វិវរណៈទាំងនេះនឹងនាំមកនូវអំណរ ។ ព្រះអម្ចាស់បានមានបន្ទូលប្រាប់ពួកបរិសុទ្ធឲ្យគោរពតាមក្រឹត្យវិន័យនៃសាសនាចក្រ ។