ជំពូកទី ២២
ពួកបរិសុទ្ធចាប់ផ្តើមតាំងទីលំនៅនៅក្នុងរដ្ឋមិសសួរី
ខែ កក្កដា–ខែ សីហា ឆ្នាំ ១៨៣១
ព្យាការី យ៉ូសែប ស្ម៊ីធ, ស៊ីឌនី រិកដុន និង អែតវឹត ប៉ាទ្រិច និងអ្នកដទៃទៀតបានទៅរដ្ឋមិសសួរី ។ ពួកលោកមានចិត្តរីករាយដើម្បីទៅទីនោះ ដោយសារពួកលោកចង់រៀនបន្ថែមទៀតអំពីការស្ថាបនាទីក្រុងស៊ីយ៉ូន ។
ពួកលោកបានជិះទូកដែលជាផ្នែកមួយនៃការធ្វើដំណើរនោះ ។ នៅពេលពួកលោកបានទៅដល់រដ្ឋមិសសួរី យ៉ូសែបចង់ដើរ ។ លោកបានដឹងថា ដែនដីរដ្ឋមិសសួរីពិសិដ្ឋ ហើយលោកចង់ឃើញវា ។
យ៉ូសែប និងមិត្តភក្តិរបស់លោកបានដើរអស់ចម្ងាយ ៤៨៣ គីឡូម៉ែត្រកាត់រដ្ឋមិសសួរីទៅឃុំចាកសុន ។
ពីរបីថ្ងៃក្រោយមក បន្ទាប់ពី យ៉ូសែប ស្ម៊ីធ និងមិត្តភក្តិរបស់លោកបានទៅដល់ភូមិចាកសុន ពួកបរិសុទ្ធមកពីរដ្ឋ នូវ យ៉ោក បានទៅដល់ទីនោះដែរ ។
ពួកអ្នកផ្សព្វផ្សាយសាសនាមកពីទីក្រុងខឺតឡង់ ក៏បានមកដល់ឃុំចាកសុនផងដែរ ។
យ៉ូសែប ស៊្មីធ និង ប៊ីស្សព អែតវឺត ប៉ាទ្រិច បានប្រាប់សមាជិកទាំងឡាយអំពីអ្វីដែលត្រូវធ្វើ ។ ពួកបរិសុទ្ធមួយចំនួនមានបំណងចង់ទិញដីនៅក្នុងរដ្ឋមិសសួរី ។ អូលីវើរ ខៅឌើរី និង វិលលាម ដ័បបុលយូ ហ្វែប្ស បានរៀបនឹងចាប់ផ្តើមបង្កើតសាលារៀន ។ ពួកគាត់ក៏ត្រូវជ្រើសរើស និងសរសេរសៀវភៅសម្រាប់ក្មេងៗឲ្យអាននៅក្នុងសាលាផងដែរ ។
យ៉ូសែបចង់ដឹងពីទីកន្លែងដែលគួរតែស្ថាបនាទីក្រុងស៊ីយ៉ូន ។ លោកបានអធិស្ឋានទៅកាន់ព្រះវរបិតាសួគ៌ ហើយលោកបានទទួលចម្លើយ ។
គោលលទ្ធិ និង សេចក្តីសញ្ញា ៥៧ ក្បាលកណ្ឌ
ព្រះអម្ចាស់បានបើកសម្ដែងថា ទីក្រុងស៊ីយ៉ូននឹងត្រូវមានទីតាំងនៅឃុំចាកសុនរដ្ឋមិសសួរី ។ លោកក៏បានបើកសម្តែងថា ព្រះវិហារបរិសុទ្ធមួយនឹងត្រូវសាងសង់នៅទីក្រុងអ៊ីនឌីប៉ែនដែនស៍ ជាទីក្រុងមួយនៅឃុំចាកសុន ( សូមមើលផែនទីនៅ ទំព័រ ៨៩) ។ ព្រះអម្ចាស់ក៏បានសន្យាថា អស់អ្នកដែលគោរពបទបញ្ញត្តិរបស់ទ្រង់ ហើយស៊ូទ្រាំនឹងការសាកល្បងដោយស្មោះត្រង់នឹងត្រូវបានទទួលនូវសិរីរុងរឿង ។
ព្រះអម្ចាស់បានមានបន្ទូលប្រាប់ពួកបរិសុទ្ធនៅក្នុងរដ្ឋមិសសួរីថា ពួកគេគួរតែគោរពតាមច្បាប់នៃដែនដី ។ ពួកគេគួរតែធ្វើកិច្ចការល្អៗដោយពុំចាំបាច់ត្រូវប្រាប់ឡើយ ។ ព្រះអម្ចាស់ក៏បានសន្យាផងដែរថា នៅពេលមនុស្សប្រែចិត្ត នោះទ្រង់នឹងពុំចាំអំពើបាបរបស់ពួកគេទៀតឡើយ ។
ព្រះអម្ចាស់បានមានបន្ទូលថា ស៊ីឌនី រិកដុន គួរតែឧទ្ទិសឆ្លងដីនោះ ។ ស៊ីឌនី រិកដុន បានសួរពួកបរិសុទ្ធថា តើពួកគេទទួលដីនោះដោយដួងចិត្តដែលពោរពេញដោយអំណរគុណ ហើយថា តើពួកគេបានសន្យាគោរពតាមបទបញ្ញត្តិទាំងឡាយឬ ។ ពួកគេបានឆ្លើយថា « ព្រម » ។ បន្ទាប់មក ស៊ីឌនី បានអធិស្ឋាន ហើយឧទ្ទិសដីនោះ ។
នៅថ្ងៃបន្ទាប់ យ៉ូសែប ស៊្មីធ, អូលីវើរ ខៅឌើរី, ស៊ីឌនី រិកដុន និងអ្នកដឹកនាំផ្សេងទៀតបានធ្វើការប្រជុំនៅកន្លែងពិសេសមួយនៅក្នុងទីក្រុងអ៊ីនឌីប៉ែនដែនស៍ ។ ពួកលោកបានអានព្រះគម្ពីរ និងអធិស្ឋាន ។ បន្ទាប់មក យ៉ូសែប ស្ម៊ីធ បានឧទ្ទិសឆ្លងកន្លែងនោះសម្រាប់ការសាងសង់ព្រះវិហារបរិសុទ្ធ ។
នៅថ្ងៃបន្ទាប់ ពួកបរិសុទ្ធទាំងអស់នៅក្នុងរដ្ឋមិសសួរីបានទៅសន្និសីទមួយ ។ ពួកគេបានពោរពេញទៅដោយព្រះវិញ្ញាណបរិសុទ្ធ ហើយពួកគេមានចិត្តរីករាយ ។ យ៉ូសែបបានប្រាប់ពួកអ្នកដឹកនាំថា ព្រះនឹងប្រទានពរដល់ពួកគេប្រសិនបើពួកគេស្មោះត្រង់ ។
ពីរបីថ្ងៃក្រោយមក ព្រះយេស៊ូវបានប្រទានវិវរណៈមួយដល់យ៉ូសែបអំពីថ្ងៃឈប់សម្រាក ឬថ្ងៃអាទិត្យ ។ ព្រះយេស៊ូវបានមានបន្ទូលថា ថ្ងៃអាទិត្យគឺជាថ្ងៃបរិសុទ្ធរបស់ទ្រង់ ។ នៅថ្ងៃអាទិត្យយើងគួរតែធ្វើកិច្ចការនានាដែលជួយយើងឲ្យចងចាំដល់ទ្រង់ ។ យើងគួរតែសម្រាកពីការងាររបស់យើង ។ យើងគួរតែទៅព្រះវិហារ ហើយទទួលទានសាក្រាម៉ង់ ។ យើងគួរតែប្រែចិត្តពីអំពើបាបរបស់យើង ។ យើងគួរតែតមអាហារ និងអធិស្ឋាន ។ យើងគួរតែមានអំណរគុណចំពោះពរជ័យទាំងអស់របស់យើង ។
ពួកបរិសុទ្ធដែលធ្វើកិច្ចការទាំងនេះនឹងជួបរឿងល្អៗទាំងអស់ដែលពួកគេត្រូវការ ។ ពួកគេនឹងរីករាយ ពួកគេនឹងមានភាពសុខសាន្ត ហើយពួកគេនឹងទទួលជីវិតអស់កល្បជានិច្ច ។