ជំពូកទី ៣៤
ព្រះព្រមានមនុស្សនៃទីក្រុងស៊ីយ៉ូន
ខែ កក្កដា–ខែ សីហា ឆ្នាំ ១៨៣៣
ព្រះបានត្រាស់បង្គាប់ឲ្យពួកគេបរិសុទ្ធជាច្រើនទៀតទៅកាន់ឃុំចាកសុន រដ្ឋមិសសួរី ។ មនុស្សថ្មីៗជាច្រើនបានទៅដល់ទីនោះស្ទែរតែរៀងរាល់សប្តាហ៍ ហើយពួកគេបានសាងសង់ផ្ទះសម្បែង ហាង និងហាងបោះពុម្ព ។
ពួកបរិសុទ្ធនៅរដ្ឋមិសសួរីមានភាពសុខសាន្ត និងសុមង្គលអស់មួយរយៈ ។ ប៉ុន្តែមិនយូរប៉ុន្មានក្រោយមកបញ្ហាបានកើតឡើង ។ ពួកបរិសុទ្ធមួយចំនួនពុំបានគោរពប្រតិបត្តិ ហើយមានចិត្តអាក្រក់ ។ ពួកគេមួយចំនួនបានឈ្លោះប្រកែកជាមួយថ្នាក់ដឹកនាំរបស់ពួកគេ ។ មនុស្សដទៃទៀតដែលរស់នៅទីនោះបានចាប់ផ្តើមព្រួយបារម្ភអំពីពួកបរិសុទ្ធជាច្រើនដែលបានប្តូរទៅរស់នៅក្នុងតំបន់នោះ ។ ពួកមនុស្សទាំងនេះចង់ឲ្យពួកបរិសុទ្ធចាកចេញ ។
មនុស្សកំណាចមួយក្រុមដែលមានការខឹងសម្បារបានជួបជុំគ្នា ។ ពួកគេបានបញ្ជូនមនុស្សមួយចំនួនឲ្យប្រាប់អ្នកដឹកនាំសាសនាចក្រថា ពួកបរិសុទ្ធត្រូវតែចាកចេញពីឃុំចាកសុន ។ ប៉ុន្តែពួកអ្នកដឹកនាំបានដឹងថា ព្រះសព្វព្រះទ័យឲ្យពួកគេស្ថាបនាទីក្រុងស៊ីយ៉ូននៅក្នុងឃុំចាកសុន ។ ពួកគេបានប្រាប់ពួកមនុស្សទាំងនោះថា ពួកបរិសុទ្ធពុំអាចចាកចេញបានឡើយ ។
ពួកមនុស្សនៅក្នុងក្រុមមនុស្សកំណាចបានខឹងសម្បារ ។ ពួកគេបានទម្លាយចូលហាងបោះពុម្ពរបស់ពួកបរិសុទ្ធ ហើយបំផ្លាញវាចោល ។
បន្ទាប់មក ពួកមនុស្សកំណាចបានចាប់ ប៊ីស្សព ប៉ាទ្រិច និង ឆាលេស អាលែន ហើយប៉ាតជ័រកៅស៊ូ និងរោមសត្វលើខ្លួនរបស់ពួកគាត់ ។ ពួកមនុស្សកំណាចក៏បានវាយពួកបរិសុទ្ធផ្សេងទៀតផងដែរ ។
បីថ្ងៃក្រោយមក សមាជិកនៃក្រុមមនុស្សកំណាចបានជិះកាត់ទីក្រុងនោះ ហើយបានបាញ់អគារនានាដោយកាំភ្លើងរបស់ពួកគេ ។ ពួកគេបានស្រែកនូវពាក្យអាក្រក់ៗដាក់ពួកបរិសុទ្ធ ហើយនិយាយថា នឹងវាត់នរណាក៏ដោយនឹងខ្សែតីប្រសិនបើពួកគេចាប់បាន ។ ពួកគេបានដុតដំណាំ និងបំផ្លាញគេហដ្ឋាន ជង្រុកស្រុក ព្រមទាំងហាងនានា ។
អូលីវើរ ខៅឌើរីគឺជាថ្នាក់ដឹកនាំសាសនាចក្រម្នាក់នៅក្នុងរដ្ឋមិសសួរី ។ លោកត្រូវបានបញ្ជូនទៅទីក្រុងខឺតឡង់ ដើម្បីទៅមើល យ៉ូសែប ស៊្មីធ ។
នៅពេលអូលីវើរមកដល់ទីក្រុងខឺតឡង់ គាត់បានប្រាប់យ៉ូសែបនូវអ្វីដែលកំពុងកើតឡើងនៅឃុំចាកសុន ។ ពួកបរិសុទ្ធនៅទីនោះចង់ដឹងអំពីអ្វីដែលពួកគេគួរធ្វើ ។
យ៉ូសែបបានប្រាប់អូលីវើរអំពីវិវរណៈមួយចំនួនដែលលោកបានទទួល ។ ព្រះអម្ចាស់បានបើកសម្តែងថា ពួកបរិសុទ្ធគួរតែសាងសង់ព្រះវិហារបរិសុទ្ធមួយនៅក្នុងស៊ីយ៉ូន ។ ព្រះវិហារបរិសុទ្ធនឹងត្រូវចំណាយប្រាក់ដោយប្រើប្រាស់ដង្វាយមួយភាគក្នុងដប់ដែលមនុស្សបានបង់ ។ ព្រះយេស៊ូវបានមានបន្ទូលប្រាប់យ៉ូសែបថា ទីក្រុងស៊ីយ៉ូននឹងប្រែកាន់តែអស្ចារ្យឡើង ប្រសិនបើពួកបរិសុទ្ធគោរពប្រតិបត្តិ ។ ប៉ុន្តែពួកបរិសុទ្ធនឹងទទួលទណ្ឌកម្ម ប្រសិនបើពួកគេមិនគោរពប្រតិបត្តិទេនោះ ។
ព្រះអម្ចាស់បានមានបន្ទូលថា ពួកបរិសុទ្ធត្រូវគោរពច្បាប់នៃប្រទេស ។ ពួកគេគួរតែបោះឆ្នោតឲ្យមនុស្សសុចរិតធ្វើជាអ្នកដឹកនាំដែនដី ។ នៅពេលមនុស្សទុច្ចរិតក្លាយជាអ្នកដឹកនាំ នោះមនុស្សនឹងមានទុក្ខ ។
ព្រះអម្ចាស់បានត្រាស់បង្គាប់ឲ្យពួកបរិសុទ្ធគោរពតាមព្រះបន្ទូលទាំងអស់របស់ទ្រង់ ។ ទ្រង់បានមានបន្ទូលថា ពួកគេពុំគួរខ្លាចខ្មាំងសត្រូវរបស់ពួកគេឡើយ ។ ផ្ទុយទៅវិញ ពួកបរិសុទ្ធគួរតែអភ័យទោសឲ្យខ្មាំងសត្រូវរបស់ពួកគេ ។ ពួកគេពុំគួរវាយប្រហារពួកខ្មាំងសត្រូវរបស់ពួកគេឡើយ លើកលែងតែព្រះត្រាស់បង្គាប់ឲ្យពួកគេវាយប្រហារប៉ុណ្ណោះ ។ ព្រះអម្ចាស់បានមានបន្ទូលថា ទ្រង់នឹងដាក់ទោសមនុស្សទុច្ចរិត ។
ពីរបីសប្តាហ៍ក្រោយមក ព្រះយេស៊ូវមានបន្ទូលថា ពួកបរិសុទ្ធនៅក្នុងទីក្រុងស៊ីយ៉ូននឹងមានក្តីអំពល់មួយរយៈពេល ដោយសារពួកគេពុំបានគោរពតាមបទបញ្ញត្តិទាំងឡាយ ។ ប៉ុន្តែព្រះយេស៊ូវបានសន្យាថា ថ្ងៃណាមួយ ទ្រង់នឹងជួយពួកបរិសុទ្ធឲ្យស្ថាបនាទីក្រុងស៊ីយ៉ូនឡើង ។