ជំពូកទី ៩
ការរៀបចំសាសនាចក្រនៃព្រះយេស៊ូវគ្រីស្ទ
ថ្ងៃទី ៦ ខែ មេសា ឆ្នាំ ១៨៣០
នៅថ្ងៃទី ៦ ខែ មេសា ឆ្នាំ ១៨៣០ យ៉ូសែបបានធ្វើការប្រជុំមួយឲ្យរៀបចំសាសនាចក្រ ។ អូលីវើរ ខៅឌើរី, ហៃរុម ស៊្មីធ, សាំយូអែល ស៊្មីធ, ដាវិឌ វិតមើរ និង ពេត្រុស វិតមើរ បានមកជួយលោក ។ ពួកលោកទាំងអស់គ្នាបានទទួលបុណ្យជ្រមុជទឹករួចហើយ ។ មនុស្សដទៃទៀតក៏បានមកការប្រជុំនោះផងដែរ ។
ពួកបុរសទាំងនោះបានអធិស្ឋានទៅកាន់ព្រះវរបិតាសួគ៌ ។ យ៉ូសែបបានតែងតាំងអូលីវើរជាអែលឌើរនៅក្នុងសាសនាចក្រ ។ បន្ទាប់មក អូលីវើរបានតែងតាំងយ៉ូសែប ។
យ៉ូសែប និង អូលីវើរបានប្រសិទ្ធពរសាក្រាម៉ង់ ។ ពួកលោកបានឲ្យសាក្រាម៉ង់នោះទៅកាន់បុរសទាំងនោះ ។
យ៉ូសែប និង អូលីវើរ ដាក់ដៃរបស់ពួកលោកលើក្បាលរបស់បុរសម្នាក់ៗដើម្បីបញ្ចាក់ពួកគេថា ជាសមាជិកសាសនាចក្រនៃព្រះយេស៊ូវគ្រីស្ទ ហើយបានផ្តល់អំណោយទានជាព្រះវិញ្ញាណបរិសុទ្ធដល់ពួកគេ ។
យ៉ូសែប និង អូលីវើរបានតែងតាំងបព្វជិតភាពដល់បុរសមួយចំនួនផ្សេងទៀត ។ ពួកបុរសទាំងនេះសប្បាយចិត្តយ៉ាងខ្លាំង ។ ពួកគេបាននិយាយថា ពួកគេស្រឡាញ់ព្រះ ហើយបានប្រាប់អំពីរបៀបដែលទ្រង់បានប្រទានពរដល់ពួកគេ។
ព្រះយេស៊ូវបានប្រទានវិវរណៈដល់យ៉ូសែប ស្ម៊ីធ នៅឯការប្រជុំនោះ ។ ព្រះយេស៊ូវបានមានបន្ទូលថា យ៉ូសែបគឺជាព្យាការី ។ ព្យាការីពិតមួយរូបថ្លែងជំនួសព្រះយេស៊ូវ ។ នៅពេលព្យាការីថ្លែងជំនួសព្រះយេស៊ូវ នោះសមាជិកសាសនាចក្រគួរតែស្តាប់លោក ហើយធ្វើតាមលោក ។
បន្ទាប់ពីការប្រជុំនោះ មនុស្សជាច្រើនបានទទួលបុណ្យជ្រមុជទឹក រួមទាំងម្តាយ និងឪពុករបស់យ៉ូសែប ស្ម៊ីធ ផងដែរ ។ ឱ វាជាថ្ងៃដ៏អស្ចារ្យអ្វីម៉្លេះ ! សាសនាចក្រនៃព្រះយេស៊ូវគ្រីស្ទត្រូវបានស្តារឡើងវិញនៅលើផែនដីម្តងទៀត ។