ជំពូកទី ៤៤
ដង្វាយមួយភាគក្នុងដប់
ខែ កក្កដា ឆ្នាំ ១៨៣៨
ព្រះអម្ចាស់បានមានបន្ទូលប្រាប់ យ៉ូសែប ស្ម៊ីធ ថា សមាជិកសាសនាចក្រគួរតែថ្វាយដង្វាយមួយភាគក្នុងដប់ ។ អំឡុងពេលយ៉ូសែបនៅទីក្រុងហ្វារវែស្ទរដ្ឋមិសសួរី លោកបានអធិស្ឋានទូលសូមថា តើពួកបរិសុទ្ធគួរតែថ្វាយដង្វាយមួយភាគក្នុងដប់ប៉ុន្មាន ។ ព្រះអម្ចាស់បានបើកសម្តែងថា ពួកបរិសុទ្ធគួរតែថ្វាយមួយភាគក្នុងដប់នៃអ្វីៗទាំងអស់ដែលពួកគេមានសម្រាប់ដង្វាយមួយភាគក្នុងដប់ ។
ប្រសិនបើពួកគេរកបាន ១០ សេន នោះពួកគេគួរតែថ្វាយមួយសេនសម្រាប់ដង្វាយមួយភាគក្នុងដប់ ។ ប្រសិនបើពួកគេរកបាន ១០០ សេន នោះពួកគេគួរតែថ្វាយ ១០ សេន ។
ពួកបរិសុទ្ធបានថ្វាយដង្វាយមួយភាគក្នុងដប់តាមរបៀបផ្សេងទៀតផងដែរ ។ ពួកគេថ្វាយដង្វាយមួយភាគក្នុងដប់នៃដំណាំដែលពួកគេដាំ ដូចជាគ្រាប់ធុញ្ញជាតិ និងកក់ ។ ពួកគេក៏បានថ្វាយដង្វាយមួយភាគក្នុងដប់នៃមាន់ និងសត្វផ្សេងទៀតរបស់ពួកគេ ។ ពួកគេក៏បានថ្វាយដង្វាយមួយភាគក្នុងដប់នូវទឹកដោះគោ និងបន្លែផងដែរ ។
ដង្វាយមួយភាគក្នុងដប់ត្រូវបានប្រើប្រាស់ដើម្បីសាងសង់ និងថែទាំព្រះវិហារបរិសុទ្ធ សាលាប្រជុំ និងអគារដទៃទៀតនៃសាសនាចក្រ ។ ដង្វាយមួយភាគក្នុងដប់ក៏ត្រូវបានប្រើប្រាស់ដើម្បីជួយកិច្ចការផ្សព្វផ្សាយសាសនាផងដែរ ។ ក្រៅពីនេះ ដង្វាយមួយភាគក្នុងដប់ត្រូវបានប្រើប្រាស់ដើម្បីជួយបង់ថ្លៃការបកប្រែ និងការបោះពុម្ពព្រះគម្ពីរ និងសម្ភារដទៃទៀតរបស់សាសនាចក្រ ។
ដង្វាយមួយភាគក្នុងដប់ត្រូវបានប្រើប្រាស់ដើម្បីជួយសមាជិកជាច្រើនក្នុងសាសនាចក្រ ។ ដង្វាយមួយភាគក្នុងដប់ និងដង្វាយផ្សេងៗទៀតត្រូវបានប្រើប្រាស់ដើម្បីជួយទិញអាហារ និងសម្លៀកបំពាក់សម្រាប់មនុស្សខ្វះខាត ។
ព្រះអម្ចាស់រំពឹងឲ្យយើងម្នាក់ៗថ្វាយដង្វាយមួយភាគក្នុងដប់ពេញលេញ ។ យើងប្រគល់ដង្វាយមួយភាគក្នុងដប់របស់យើងទៅឲ្យប៊ីស្សព ។ លោកបញ្ជូនដង្វាយមួយភាគក្នុងដប់ទៅកាន់ការិយាល័យកណ្ដាលរបស់សាសនាចក្រ ជាកន្លែងដែលព្យាការី និងថ្នាក់ដឹកនាំដទៃទៀតនៃសាសនាចក្រសម្រេចចិត្តប្រកបដោយការអធិស្ឋានទៅលើរបៀបដែលគួរតែប្រើប្រាស់ដង្វាយមួយភាគក្នុងដប់នោះ ។
ព្រះវរបិតាសួគ៌ប្រទានពរជ័យដ៏អស្ចារ្យដល់ពួកបរិសុទ្ធដែលថ្វាយដង្វាយមួយភាគក្នុងដប់ ។ ពួកបរិសុទ្ធដែលមិនថ្វាយដង្វាយមួយភាគក្នុងដប់ពុំអាចបានពរជ័យទាំងអស់នេះឡើយ ។ ព្រះគម្ពីរប៊ីបចែងថា ពួកបរិសុទ្ធដែលពុំថ្វាយដង្វាយមួយភាគក្នុងដប់គឺកំពុងលួចព្រះ ។