ជំពូកទី ៣៨
មុក្តាដ៏មានតម្លៃមហិមា
មុក្ដាដ៏មានតម្លៃមហិមាគឺជាព្រះគម្ពីរដែលត្រូវបានសរសេរឡើងដោយពួកព្យាការី ។ មានប្រាំផ្នែកនៅក្នុងព្រះគម្ពីរមុក្តាដ៏មានតម្លៃមហិមា ។ វាមានគម្ពីរម៉ូសេ, គម្ពីរអ័ប្រាហាំ, យ៉ូសែប ស្ម៊ីធ—ម៉ាថាយ, យ៉ូសែប ស៊្មីធ—ប្រវត្តិ និង មាត្រានៃសេចក្ដីជំនឿ ។
គម្ពីរម៉ូសេ
ផ្នែកទីមួយនៃព្រះគម្ពីរមុក្តាដ៏មានតម្លៃមហិមាគឺជាវិវរណៈមួយដែលបានប្រទានដល់យ៉ូសែប ស្ម៊ីធ ។ វាមានឈ្មោះថា ព្រះគម្ពីរម៉ូសេ ។ ម៉ូសេគឺជាព្យាការីម្នាក់ដែលបានរស់នៅជាយូរលង់ណាស់មកហើយ ។
គម្ពីរម៉ូសេប្រាប់នូវអ្វីដែលព្រះបានមានបន្ទូលទៅកាន់ម៉ូសេនៅលើភ្នំដ៏ខ្ពស់មួយ ។ ម៉ូសេបានឃើញព្រះ ហើយបានទូលជាមួយទ្រង់ ។ ព្រះបានមានបន្ទូលថា ទ្រង់មានកិច្ចការមួយឲ្យម៉ូសេធ្វើ ។
ព្រះបានបង្ហាញម៉ូសេនូវពិភពលោក និងអ្វីៗគ្រប់យ៉ាងដែលនឹងកើតឡើងនៅលើពិភពលោកនេះ ។ ម៉ូសេក៏បានឃើញបុត្រាបុត្រីទាំងអស់របស់ព្រះដែលនឹងរស់នៅក្នុងពិភពលោកនេះផងដែរ ។
ព្រះបានយាងចេញពីម៉ូសេ ហើយសាតាំងបានមក និងប្រាប់ម៉ូសេឲ្យថ្វាយបង្គំវា ។ ម៉ូសេពុំបានថ្វាយបង្គំសាតាំងឡើយ ហើយបានប្រាប់វាឲ្យចេញទៅឆ្ងាយ ។ នៅពេលសាតាំងពុំព្រមចេញ ម៉ូសេបានទូលសូមជំនួយពីព្រះ ។ ដោយទទួលបានកម្លាំងមកពីព្រះ ម៉ូសេបានប្រាប់សាតាំងឲ្យចេញម្តងទៀត ។ ទីបំផុត សាតាំងបានចេញទៅទាំងបង្ហាញការខឹងសម្បារយ៉ាងខ្លាំងដោយសារម៉ូសេពុំបានថ្វាយបង្គំវា ។
ម៉ូសេបានពោរពេញដោយព្រះវិញ្ញាណបរិសុទ្ធ ។ លោកបានអធិស្ឋាន ហើយព្រះបានយាងមក ហើយបានមានបន្ទូលជាមួយលោកម្តងទៀត ។ ព្រះបានមានបន្ទូលប្រាប់ម៉ូសេថា មានពិភពជាច្រើន—ច្រើនជាងដែលយើងអាចរាប់បាន ។ ទ្រង់បានមានបន្ទូលថា ព្រះយេស៊ូវបានបង្កើតពិភពទាំងនេះ ហើយនឹងបង្កើតកាន់តែច្រើនថែមទៀត ដោយសារគ្មានទីបញ្ចប់នៃកិច្ចការរបស់ព្រះឡើយ ។
ម៉ូសេបានរៀនថា កិច្ចការរបស់ព្រះគឺដើម្បីជួយបុត្រាបុត្រីរបស់ទ្រង់ឲ្យពួកគេត្រឡប់ទៅរស់នៅជាមួយទ្រង់វិញជារៀងរហូត ។ គម្ពីរម៉ូសេក៏បានប្រាប់អំពីការបង្កបង្កើតផែនដី, អ័ដាម និងអេវ៉ា និងក្រុមគ្រួសាររបស់ពួកគេ, ព្យាការីអេណុក និងទីក្រុងស៊ីយ៉ូន ព្រមទាំងព្យាការីដទៃទៀតដែលបានរស់នៅយូរយារណាស់មកហើយ ។
គម្ពីរអ័ប្រាហាំ
ផ្នែកទីពីរនៃព្រះគម្ពីរមុក្តាដ៏មានតម្លៃមហិមាគឺជាគម្ពីរអ័ប្រាហាំ ។ នៅក្នុងខែ កក្កដា ឆ្នាំ ១៨៣៥ បុរសម្នាក់ឈ្មោះលោកចានលើរបានមកទីក្រុងខឺតឡង់ ។ លោកបានបង្ហាញសពរុំក្នុងក្រណាត់មួយចំនួនមកពីប្រទេសអេស៊ីព្ទដល់ពួកបរិសុទ្ធ ។ យូរលង់ណាស់មកហើយ ប្រជាជននៅប្រទេសអេស៊ីព្ទបានប្រើក្រណាត់ដើម្បីរុំសពមនុស្សដែលស្លាប់ ។ សាកសពទាំងនេះហៅថាសពរុំក្នុងក្រណាត់ ។
រមូរសន្លឹកចាស់ៗមួយចំនួនបាននៅជាប់ជាមួយសពរុំក្នុងក្រណាត់នោះ ។ មានអក្សរចម្លែកមួយចំនួនសរសេរនៅលើក្រដាសនោះ ហើយលោកចានលើរកំពុងស្វែងរកនរណាម្នាក់ដែលអាចអានវាបាន ។ លោកបានឮថា យ៉ូសែប ស៊្មីធ អាចបកប្រែការសរសេរនោះបាន ។
យ៉ូសែបបានមើលការសរសេរនោះ ។ ព្រះអម្ចាស់បានបើកសម្តែងដល់លោកនូវអត្ថន័យមួយចំនួនរបស់វា ហើយលោកបានប្រាប់ដល់លោកចានលើរ ។ ពួកបរិសុទ្ធមួយចំនួនបានទិញរមូរសន្លឹកនោះពីលោកចានលើរ ។
យ៉ូសែប ស៊្មីធ បានចាប់ផ្តើមសិក្សាការសរសេរនោះ ហើយព្រះបានបើកសម្តែងការបកប្រែដល់លោក ។ អូលីវើរ ខៅឌើរី និង វិលលាម ហ្វែប្ស បានសរសេរនូវអ្វីដែលយ៉ូសែបបានបកប្រែ ។ ការសរសេរនោះត្រូវបានសរសេរដោយព្យាការីអ័ប្រាហាំដ៏អស្ចារ្យដែលបានរស់នៅក្នុងប្រទេសអេស៊ីព្ទជាយូរយារណាស់មកហើយ ។
ព្រះយេស៊ូវបានមានបន្ទូលជាមួយអ័ប្រាហាំ ហើយបានមានបន្ទូលប្រាប់លោកអំពីជីវិតរបស់យើងពីមុនយើងមកកាន់ផែនដីនេះ ។ ព្រះយេស៊ូវបានមានបន្ទូលថា យើងបានរស់នៅជាមួយនឹងព្រះវរបិតាសួគ៌ពីមុនយើងបានកើតមក ។ គម្ពីរអ័ប្រាហាំក៏បានប្រាប់អំពីការបង្កបង្កើតផែនដី, ព្រះអាទិត្យ, ព្រះចន្ទ និងផ្កាយទាំងឡាយ ព្រមទាំងការបង្កបង្កើតនៃរុក្ខជាតិ សត្វ និងមនុស្សផងដែរ ។
អ័ប្រាហាំចង់ទទួលពរជ័យនៃសុភមង្គល និងភាពសុខសាន្ត ។ ដោយសារអ័ប្រាហាំមានចិត្តស្មោះត្រង់ នោះព្រះយេស៊ូវបានប្រទានសេចក្តីសញ្ញាមួយដល់លោក ។ សេចក្តីសញ្ញាគឺជាការសន្យាដ៏ពិសិដ្ឋមួយរវាងព្រះ និងបុត្រាបុត្រីរបស់ទ្រង់ ។
នៅក្នុងសេចក្តីសញ្ញានេះ ព្រះបានសន្យានឹងអ័ប្រាហាំថា លោកនឹងមានបព្វជិតភាព និងគ្រួសារដ៏ធំមហិមាមួយ ។ ព្រះក៏បានសន្យានឹងអ័ប្រាហាំថា នាពេលខាងមុខសមាជិកគ្រួសាររបស់លោកនឹងត្រូវបានប្រទានឲ្យនូវដំណឹងល្អ និងបព្វជិតភាពប្រសិនបើពួកគេស្មោះត្រង់ ។ គ្រួសាររបស់អ័ប្រាហាំនឹងយកដំណឹងល្អទៅកាន់មនុស្សទាំងអស់នៃផែនដី ។
យ៉ូសែប ស្ម៊ីធ—ម៉ាថាយ និង យ៉ូសែប ស៊្មីធ—ប្រវត្តិ
យ៉ូសែប ស្ម៊ីធ—ម៉ាថាយ មាននូវការកែដ៏បំផុសគំនិតដែលព្យាការីបានធ្វើនៅក្នុងផ្នែកនៃគម្ពីរម៉ាថាយនៅក្នុងព្រះគម្ពីរប៊ីប ។ យ៉ូសែប ស៊្មីធ—ប្រវត្តិ មាននូវការសរសេររបស់ព្យាការីអំពីការនិមិត្តដំបូង ផ្ទាំងចំណារមាស ព្រះគម្ពីរមរមន និងការស្តារឡើងវិញនៃបព្វជិតភាព ។
មាត្រានៃសេចក្ដីជំនឿ
ផ្នែកចុងក្រោយនៃគម្ពីរមុក្ដាដ៏មានតម្លៃមហិមាគឺជាមាត្រានៃសេចក្ដីជំនឿ ។ ថ្ងៃមួយមានបុរសម្នាក់ដែលមានមិត្តភក្តិកំពុងសរសេរសៀវភៅបានមកជួប យ៉ូសែប ស៊្មីធ ។ បុរសនោះចង់បានអ្វីៗមួយចំនួនអំពីសាសនាចក្រសរសេរចូលនៅក្នុងសៀវភៅនោះ ដូច្នេះគាត់បានសូមយ៉ូសែបឲ្យប្រាប់អំពីរបៀបដែលសាសនាចក្របានចាប់ផ្តើម ។
យ៉ូសែប ស៊្មីធ បានសរសេរអំពីការចាប់ផ្តើមនៃសាសនាចក្រ ។ ជាមួយនឹងជំនួយមកពីព្រះ លោកក៏បានសរសេរសេចក្តីថ្លែងការណ៍សំខាន់ចំនួន ១៣ អំពីអ្វីដែលសមាជិកសាសនាចក្រជឿ ។ យ៉ូសែបបានហៅសេចក្តីថ្លែងការណ៍នេះថា មាត្រានៃសេចក្ដីជំនឿ ។
នៅថ្ងៃទី ១ ខែ មីនា ឆ្នាំ ១៨៤២ មាត្រានៃសេចក្ដីជំនឿត្រូវបានបោះពុម្ពនៅក្នុងសារព័ត៌មានសាសនាចក្រ ។ ពួកបរិសុទ្ធអានមាត្រានៃសេចក្ដីជំនឿ ហើយជឿលើអ្វីដែលយ៉ូសែបបានសរសេរ ។
មាត្រានៃសេចក្ដីជំនឿ
យ៉ូសែប ស៊្មីធ
១
យើងខ្ញុំជឿ
ដល់ព្រះ គឺព្រះវរបិតាដ៏គង់នៅអស់កល្បជានិច្ច និងដល់ព្រះរាជបុត្រាទ្រង់ គឺព្រះយេស៊ូវគ្រីស្ទ ហើយដល់ព្រះវិញ្ញាណបរិសុទ្ធ ។
២
យើងខ្ញុំជឿថា
មនុស្សទាំងអស់នឹងត្រូវទទួលទោសចំពោះអំពើបាបរបស់ខ្លួនផ្ទាល់ គឺមិនមែនចំពោះអំពើរំលងរបស់លោកអ័ដាមទេ ។
៣
យើងខ្ញុំជឿថា
តាមរយៈដង្វាយធួននៃព្រះគ្រីស្ទ នោះមនុស្សលោកទាំងអស់អាចបានសង្គ្រោះ ដោយសារការគោរពតាមក្រឹត្យវិន័យ និងពិធីបរិសុទ្ធទាំងឡាយនៃដំណឹងល្អ ។
៤
យើងខ្ញុំជឿថា
គោលការណ៍ទីមួយ និងពិធីបរិសុទ្ធទាំងឡាយនៃដំណឹងល្អគឺ ៖ ទីមួយ សេចក្ដីជំនឿជឿដល់ព្រះអម្ចាស់យេស៊ូវគ្រីស្ទ ទីពីរ ការប្រែចិត្ត ទីបី បុណ្យជ្រមុជទឹក ដោយការពន្លិចសម្រាប់ការផ្ដាច់បាប ទីបួន ការដាក់ដៃលើសម្រាប់អំណោយទានជាព្រះវិញ្ញាណបរិសុទ្ធ ។
៥
យើងខ្ញុំជឿថា
មនុស្សត្រូវតែបានហៅពីព្រះ ដោយការព្យាករ និងដោយការដាក់ដៃលើ ដោយអស់អ្នកណាដែលមានសិទ្ធិអំណាច ដើម្បីនឹងផ្សាយដំណឹងល្អ ហើយប្រព្រឹត្តពិធីបរិសុទ្ធទាំងឡាយនៃដំណឹងល្អ ។
៦
យើងខ្ញុំជឿ
ចំពោះការរៀបចំដូចគ្នា ដូចដែលមាននៅក្នុងសាសនាចក្រពីអតីតកាលដូចជា ពួកសាវក ពួកព្យាការី ពួកគ្រូគង្វាល ពួកគ្រូ ពួកគ្រូផ្សាយដំណឹងល្អជាដើម ។
៧
យើងខ្ញុំជឿ
ដល់អំណោយទានខាងភាសា ការព្យាករ វិវរណៈ ការនិមិត្ត ការប្រោសឲ្យជា ការបកប្រែភាសាជាដើម ។
៨
យើងខ្ញុំជឿថា
ព្រះគម្ពីរប៊ីបគឺជាព្រះបន្ទូលនៃព្រះ បើសិនជាបានបកប្រែត្រឹមត្រូវ យើងខ្ញុំក៏ជឿដែរថា ព្រះគម្ពីរមរមនជាព្រះបន្ទូលនៃព្រះ ។
៩
យើងខ្ញុំជឿ
ចំពោះការណ៍ទាំងអស់ ដែលទ្រង់បានបើកសម្ដែងមក និងការណ៍ទាំងអស់ ដែលទ្រង់បើកសម្ដែងនៅពេលឥឡូវនេះ ហើយយើងខ្ញុំជឿថា ទ្រង់នឹងបើកសម្ដែងនូវការណ៍ដ៏ធំ និងសំខាន់ៗជាច្រើន ដែលទាក់ទងទៅនឹងនគរនៃព្រះ ។
១០
យើងខ្ញុំជឿ
ចំពោះការប្រមូលដ៏ពិតប្រាកដនៃសាសន៍អ៊ីស្រាអែល និងចំពោះការសាងឡើងវិញនូវពូជទាំង ១០ អំបូរ ថាក្រុងស៊ីយ៉ូន ( ក្រុងយេរូសាឡិមថ្មី ) នឹងត្រូវបានស្ថាបនានៅលើទ្វីបអាមេរិក ថាព្រះគ្រីស្ទនឹងគ្រងរាជ្យនៅលើផែនដីផ្ទាល់ ហើយថាផែនដីនឹងបានផ្លាស់ប្ដូរសារជាថ្មី ហើយនឹងទទួលសិរីល្អដ៏ប្រកបដោយភាពបរមសុខ ។
១១
យើងខ្ញុំសូមអះអាង
យកសិទ្ធិក្នុងការថ្វាយបង្គំព្រះដ៏មានមហិទ្ធិឫទ្ធិ ស្របតាមការណែនាំនៃសម្បជញ្ញៈរបស់យើងខ្ញុំ ហើយសូមបណ្ដោយឲ្យមនុស្សទាំងអស់មានសិទ្ធិដូចគ្នា ចូរឲ្យគេថ្វាយបង្គំតាមរបៀបណា នៅទីណា ឬអ្វីក៏ដោយដែលគេប្រាថ្នា ។
១២
យើងខ្ញុំជឿ
ចំពោះការនៅក្រោមអំណាចស្ដេច ប្រធានាធិបតី អ្នកគ្រប់គ្រង និងចៅក្រមទាំងឡាយ ក្នុងការគោរព ការប្រតិបត្តិ និងការគាំទ្រច្បាប់ ។
១៣
យើងខ្ញុំជឿ
លើការប្រព្រឹត្តដោយទៀងត្រង់ ត្រឹមត្រូវ បរិសុទ្ធ សប្បុរស គុណធម៌ ហើយលើការធ្វើល្អដល់មនុស្សទាំងអស់ ពិតមែនហើយ យើងខ្ញុំអាចនិយាយបានថា យើងខ្ញុំដើរតាមសេចក្ដីដាស់តឿនរបស់ប៉ុល—យើងខ្ញុំជឿដល់អ្វីៗទាំងអស់ យើងខ្ញុំសង្ឃឹមដល់អ្វីៗទាំងអស់ យើងខ្ញុំបានទ្រាំទ្រអ្វីៗជាច្រើន ហើយសង្ឃឹមថានឹងអាចទ្រាំទ្រអ្វីៗទាំងអស់បានដែរ ។ ហើយបើសិនជាមានអ្វីណាមួយ ដែលប្រកបដោយគុណធម៌ គួរស្រឡាញ់ ឬឈ្មោះល្អ ឬក៏គួរឲ្យសរសើរ នោះយើងខ្ញុំស្វែងរករបស់ផងទាំងនេះហើយ ។