ជំពូកទី ២៧
ព្យាការីបន្តកិច្ចការរបស់ទ្រង់ ទោះបីជាមានការបៀតបៀនក្ដី
ខែ មីនា ឆ្នាំ ១៨៣២
យ៉ូសែប ស៊្មីធ ពុំយល់ផ្នែកមួយចំនួននៃព្រះគម្ពីរប៊ីប ។ លោកបានអធិស្ឋានទូលសូមការយល់ដឹង ហើយព្រះអម្ចាស់បានឆ្លើយតប ។ វិវរណៈជាច្រើននៅក្នុងព្រះគម្ពីរគោលលទ្ធិ និង សេចក្តីសញ្ញា បានទទួលមកជាចម្លើយចំពោះសំណួរនានាដែលព្យាការីបានសួរព្រះអម្ចាស់ អំឡុងពេលបកប្រែព្រះគម្ពីរប៊ីប ( ឧទាហរណ៍សូមមើល គ. និង ស. ៧៦, គ. និង ស. ៧៧, និង គ. និង ស. ១១៣) ។
ព្រះយេស៊ូវសព្វព្រះទ័យនឹងកិច្ចការរបស់យ៉ូសែបណាស់ ។ យ៉ូសែបគឺជាព្យាការីដ៏អស្ចារ្យម្នាក់ ។
អំឡុងគ្រានេះ យ៉ូសែប និង អិមម៉ា ស្ម៊ីធ មានកូនភ្លោះ ដែលបានរស់តែក្នុងរយៈពេលពីរបីម៉ោងប៉ុណ្ណោះ ។ មិត្តភក្ដិរបស់យ៉ូសែប និងអិមម៉ា ក៏មានកូនភ្លោះផងដែរ ។ ម្តាយរបស់កូនភ្លោះទាំងនោះបានស្លាប់ ហើយឪពុករបស់ពួកគេបានអនុញ្ញាតឲ្យយ៉ូសែប និង អិមម៉ា យកពួកគេទៅចិញ្ចឹម ។
នាយប់មួយ ពួកមនុស្សកំណាចដែលមានកំហឹងបានទៅផ្ទះរបស់យ៉ូសែប ។ ពួកគេបានទម្លាយទ្វារ ហើយចូលទៅក្នុងផ្ទះ ។ យ៉ូសែបកំពុងបីកូនតូចម្នាក់ដែលឈឺជាខ្លាំង ។
បុរសទាំងនោះបានចាប់យ៉ូសែប ហើយទាញគាត់ចេញមកក្រៅផ្ទះទាំងយប់ត្រជាក់ ។ កូននោះត្រូវបានទុកឲ្យនៅតែឯង ហើយប្រាំថ្ងៃក្រោយមកកូននោះបានស្លាប់ ។
ពួកបុរសទាំងនោះបានច្របាច់កយ៉ូសែប ហើយព្យាយាមច្រកថ្នាំពុលចូលទៅក្នុងមាត់របស់លោក ។ ដបនោះបានធ្វើឲ្យធ្មេញមួយរបស់លោកបាក់ ហើយថ្នាំពុលនោះបានធ្វើឲ្យលោករលាក ។
ពួកបុរសទាំងនោះបានហែកសម្លៀកបំពាក់របស់យ៉ូសែប ហើយប៉ាតជ័រកៅស៊ូលើខ្លួនរបស់លោក ។ ពួកគេបានយករោមសត្វមកប៉ាតពីលើជ័រកៅស៊ូនោះ ហើយវាយលោក ។
ពួកមនុស្សកំណាចបានចេញទៅបាត់ ដោយគិតថា យ៉ូសែបនឹងស្លាប់ ។ យ៉ូសែបបានព្យាយាមក្រោកឈរ ប៉ុន្តែពុំអាចក្រោកឈរបានឡើយ ។ លោកបានសម្រាកមួយរយៈ ហើយបន្ទាប់ពីមានកម្លាំងឡើងវិញល្មមដើម្បីលូនត្រឡប់ទៅផ្ទះរបស់លោកវិញ ។
មិត្តភក្ដិរបស់យ៉ូសែបបានសម្អាតជ័រកៅស៊ូនោះពីខ្លួនរបស់លោក ។ វាលំបាកដើម្បីយកជ័រកៅស៊ូនោះចេញ ។ ស្បែករបស់លោកបានរលាក និងឈឺចាប់ជាខ្លាំង ។
ថ្ងៃបន្ទាប់គឺជាថ្ងៃអាទិត្យ ។ យ៉ូសែបបានទៅព្រះវិហារ ហើយឡើងនិយាយទាំងឈឺផ្សារយ៉ាងខ្លាំង ។ ពួកបុរសមួយចំនួននៅក្នុងក្រុមមនុស្សកំណាចបានមកការប្រជុំនោះ ហើយបានមានការភ្ញាក់ផ្អើលដែលឃើញយ៉ូសែប ។ ព្យាការីពុំអនុញ្ញាតឲ្យពួកគេបញ្ឈប់លោកពីការធ្វើកិច្ចការរបស់ព្រះអម្ចាស់ឡើយ ។