ជំពូកទី ៤៩
ពួកអ្នកផ្សព្វផ្សាយសាសនានៅក្នុងដែនដីផ្សេងទៀត
ខែ មិថុនា ឆ្នាំ ១៨៣៧–ខែ តុលា ឆ្នាំ ១៨៤១
ព្រះអម្ចាស់សព្វព្រះទ័យឲ្យមនុស្សនៅលើដែនដីផ្សេងទៀតរៀនអំពីដំណឹងល្អ ។ នៅក្នុងឆ្នាំ ១៨៣៧ អំឡុងពេលដែលពួកបរិសុទ្ធជាច្រើននៅទីក្រុងខឺតឡង់ ព្រះអម្ចាស់បានមានបន្ទូលប្រាប់យ៉ូសែប ស្ម៊ីធ ថា អែលឌើរ ហ៊ីប៊ើរ ស៊ី ឃិមបឹល គួរតែទៅបេសកកម្មនៅប្រទេសអង់គ្លេស ។ អែលឌើរ ឃិមបឹលគឺជាសាវកម្នាក់ក្នុងពួកដប់ពីរនាក់ ហើយលោក និងពួកអ្នកផ្សព្វផ្សាយសាសនាប្រាំមួយនាក់ផ្សេងទៀតបានធ្វើដំណើរតាមកប៉ាល់ទៅប្រទេសអង់គ្លេស ។
ពួកអ្នកផ្សព្វផ្សាយសាសនាបានជួបអ្នកដឹកនាំព្រះវិហារមួយផ្សេងទៀត ដែលបានអនុញ្ញាតឲ្យប្រកាសនៅក្នុងព្រះវិហាររបស់គាត់ ។ មនុស្សជាច្រើនបានជឿលើអ្នកផ្សព្វផ្សាយសាសនា ហើយបានចង់ទទួលបុណ្យជ្រមុជទឹក ។ ពួកអ្នកដឹកនាំបានខឹងសម្បារ ហើយនិយាយថា ពួកអ្នកផ្សព្វផ្សាយសាសនាពុំអាចប្រកាសនៅក្នុងព្រះវិហារគាត់តទៅទៀតឡើយ ។
ពួកអ្នកផ្សព្វផ្សាយសាសនាបានប្រកាសនៅក្នុងផ្ទះប្រជាជន ។ មនុស្សជាច្រើនបានចូលជាសមាជិកសាសនាចក្រ ។
នៅក្នុងឆ្នាំ ១៨៣៩ បន្ទាប់ពីពួកបរិសុទ្ធបានចាប់ផ្តើមសាងសង់ទីក្រុងណៅវូ នោះពួកសាវកដប់ពីរនាក់ត្រូវបានហៅទៅប្រទេសអង់គ្លេសដើម្បីបន្តប្រកាសដំណឹងល្អនៅទីនោះ ។ ពីមុនពួកគេទៅ នោះយ៉ូសែប ស៊្មីធ បានមកជួបជាមួយពួកគេ ហើយបានប្រាប់ពួកគេនូវអ្វីដែលពួកគេគួរតែបង្រៀន ។
យ៉ូសែបបានប្រាប់ពួកអ្នកផ្សព្វផ្សាយសាសនាឲ្យគោរពបទបញ្ញត្តិរបស់ព្រះ ។ លោកបាននិយាយទៅកាន់ពួកគេអំពីបព្វជិតភាព ។ លោកបានថ្លែងថា មានសាសនាចក្រនៃព្រះយេស៊ូវគ្រីស្ទពិតតែមួយគត់ដែលមានបព្វជិតភាព ។
ពួកបុរសបានត្រៀមខ្លួនរួចជាស្រេចដើម្បីទៅបេសកកម្មរបស់ពួកគេ ។ វាជារឿងដ៏ពិបាកដើម្បីចាកចេញ ដោយសារពួកគេគ្មានប្រាក់ច្រើនទេ ពួកគេភាគច្រើនមានជំងឺ ហើយភរិយារបស់ពួកគេ និងកូនៗរបស់ពួកគេក៏ឈឺផងដែរ ។ ប៉ុន្តែពួកបុរសទាំងនោះមានសេចក្តីជំនឿថា ព្រះវរបិតាសួគ៌នឹងជួយពួកគេ ហើយនឹងប្រទានពរដល់ក្រុមគ្រួសាររបស់ពួកគេ ។
ពួកអ្នកផ្សព្វផ្សាយសាសនាបានទៅប្រទេសអង់គ្លេស ហើយប្រកាសនៅក្នុងទីក្រុងជាច្រើន ។ មនុស្សរាប់ពាន់អ្នកបានជឿ ហើយចូលជាសមាជិកសាសនាចក្រ ។ មនុស្សជាច្រើនដែលបានទទួលបុណ្យជ្រមុជទឹកនោះបានមកប្រទេសអាមេរិក ហើយជាកម្លាំងដ៏រឹងមាំបំផុតដល់សាសនាចក្រ ។
អួរសុន ហៃឌ គឺជាសាវកមួយរូប ។ យ៉ូសែប ស៊្មីធ បានថ្លែងថា អួរសុន មានកិច្ចការដ៏ពិសេសមួយដើម្បីធ្វើសម្រាប់ប្រជាជនសាសន៍យូដា ។ បន្ទាប់ពីបួនប្រាំខែក្រោយមកនៅក្នុងទ្វីបអឺរ៉ុប អែលឌើរ ហៃឌបានទៅដែនដីបរិសុទ្ធ ជាកន្លែងដែលព្រះយេស៊ូវបានយាងទៅអំឡុងកាលទ្រង់នៅលើផែនដី ។ នៅថ្ងៃទី ២៤ ខែ តុលា ឆ្នាំ ១៨៤១ អែលឌើរ ហៃឌ បានអធិស្ឋានដើម្បីឧទ្ទិសដែនដីបរិសុទ្ធនោះ ។
នៅក្នុងការអធិស្ឋានរបស់លោក អែលឌើរ ហៃឌ បានទូលសូមព្រះឲ្យប្រទានពរដល់ដែនដីនោះសម្រាប់ការប្រមូលផ្តុំនៃសាសន៍យូដា ។ លោកបានថ្លែងថា ព្រះបានប្រទានដែនដីនេះដល់អ័ប្រាហាំ និងកូនចៅរបស់លោក ហើយថាកូនចៅទាំងនោះត្រូវបានខ្ចាត់ព្រាត់ ហើយថាពួកគេទន្ទឹងរង់ចាំដើម្បីបំពេញការសន្យារបស់ព្រះ ។ អែលឌើរ ហៃឌ ក៏បានប្រសិទ្ធពរដែនដី ប្រយោជន៍ឲ្យវាមានទឹកដើម្បីឲ្យអាចដាំដំណាំបាន ។
នៅប៉ុន្មានឆ្នាំចាប់តាំងពីការអធិស្ឋានរបស់អែលឌើរ ហៃឌមក ពួកសាសន៍យូដា និងកូនចៅដទៃទៀតនៃអ័ប្រាហាំបានប្រមូលគ្នានៅក្នុងដែនដីបរិសុទ្ធនោះ ។ នៅឆ្នាំ ១៩៧៩ ប្រធាន ស្ពែនស៊ើរ ដបុលយូ ឃឹមបឹល បានអធិស្ឋានឧទ្ទិសសួនច្បារមួយនៅទីនោះ ។ គេហៅវាថា សួនច្បាររំឭកដល់់អួរសុន ហៃឌ ។