ជំពូកទី ៣៣
វិវរណៈអំពីព្រះយេស៊ូវគ្រីស្ទ
ខែ ឧសភា ឆ្នាំ ១៨៣៣
នៅក្នុងវិវរណៈមួយទៅកាន់ព្យាការី យ៉ូសែប ស្ម៊ីធ ព្រះយេស៊ូវបានមានបន្ទូលអំពីព្រះអង្គទ្រង់ ។ ទ្រង់បានមានបន្ទូលថា មនុស្សអាចមើលឃើញព្រះភក្ត្រទ្រង់ ហើយស្គាល់ទ្រង់ ប្រសិនបើពួកគេនឹងគោរពតាមបទបញ្ញត្តិរបស់ទ្រង់ ហើយអធិស្ឋាន ។
ព្រះយេស៊ូវបានមានបន្ទូលថា ទ្រង់ជាពន្លឺនៃពិភពលោក ។ ទ្រង់បង្ហាញយើងអំពីរបៀបត្រឹមត្រូវដើម្បីរស់នៅ ។
ព្រះយេស៊ូវបានគង់នៅជាមួយនឹងព្រះវរបិតាសួគ៌ពីមុនទ្រង់បានបង្កើតផែនដី ។ ព្រះយេស៊ូវគ្រីស្ទបានបង្កើតផែនដីនេះ និងគ្រប់របស់ទាំងអស់ដែលនៅលើនោះផង ។
មុនដំបូង ព្រះយេស៊ូវពុំដូចជាព្រះវរបិតាគង់នៅស្ថានសួគ៌របស់ទ្រង់ឡើយ ។ ទ្រង់ពុំដឹងនូវរឿងគ្រប់យ៉ាងដែលព្រះវរបិតាទ្រង់ជ្រាបដឹងឡើយ ហើយទ្រង់ក៏ពុំមាននូវអស់ទាំងព្រះចេស្តា និងអស់ទាំងសិរីល្អដែលព្រះវរបិតាទ្រង់មានដែរ ។ ព្រះយេស៊ូវគ្រីស្ទបានខំប្រឹងប្រែងយ៉ាងខ្លាំងដើម្បីក្លាយដូចព្រះវរបិតារបស់ទ្រង់ ។ ទ្រង់បានទទួលអំណាច និងសិរីល្អនៃព្រះវរបិតារបស់ទ្រង់ដោយសន្សឹមៗ ។
ព្រះយេស៊ូវបានមានបន្ទូលថា យើងគួរតែគោរពតាមព្រះបញ្ញត្តិទាំងឡាយរបស់ព្រះ ។ នៅពេលយើងគោរពតាម នោះយើងអាចដឹងនូវរឿងគ្រប់យ៉ាងទាំងអស់ ។ យើងអាចប្រែដូចជាព្រះ ហើយទទួលពរជ័យទាំងស្រុងរបស់ទ្រង់ ។
ព្រះយេស៊ូវមានបន្ទូលថា សាតាំងពុំចង់ឲ្យមនុស្សដឹងអំពីសេចក្តីពិត ហើយក្លាយដូចជាព្រះឡើយ ។ ព្រះយេស៊ូវបានមានបន្ទូលប្រាប់យ៉ូសែបឲ្យបង្រៀនក្រុមគ្រួសាររបស់លោកអំពីសេចក្តីពិត ។
ព្រះយេស៊ូវក៏បានមានបន្ទូលទៅកាន់ ហ្វ្រែឌើរិក ជី វិលលាម្ស និង ស៊ីឌនី រិកដុន ឲ្យបង្រៀនគ្រួសាររបស់ពួកលោកនូវសេចក្តីពិត ហើយឲ្យគោរពតាមបទបញ្ញត្តិទាំងឡាយ ។ នោះសាតាំងពុំអាចមានអំណាចលើពួកគេឡើយ ។