ជំពូកទី ១០
អព្ភូតហេតុដំបូងនៅក្នុងសាសនាចក្រ
ខែ មេសា ឆ្នាំ ១៨៣០
ការប្រជុំបន្ទាប់របស់សាសនាចក្រគឺនៅថ្ងៃអាទិត្យទី ១១ ខែ មេសា ឆ្នាំ ១៨៣០ ។ ក្រៅពីសមាជិកសាសនាចក្រ មនុស្សជាច្រើនផ្សេងទៀតក៏បានចូលរួមការប្រជុំនោះផងដែរ ។
អូលីវើរបានបង្រៀនដំណឹងល្អរបស់ព្រះយេស៊ូវគ្រីស្ទ ។ មនុស្សមួយចំនួនបានជឿលើអូលីវើរ ហើយចង់ចូលជាសមាជិកសាសនាចក្រ ។ ពួកគេបានជ្រមុជទឹកបន្ទាប់ពីការប្រជុំនោះ ។
សាតាំងមិនចង់ឲ្យមនុស្សចូលជាសមាជិកសាសនាចក្រទេ ដូច្នេះវាបានព្យាយាមធ្វើឲ្យពួកគេមានអារម្មណ៍មិនល្អ ។ មនុស្សម្នាក់ក្នុងចំណោមមនុស្សទាំងនោះគឺបុរសឈ្មោះ នូវែល ណៃត៍ ។
យ៉ូសែបបានសូមឲ្យនូវែល អាធិស្ឋាននៅក្នុងការប្រជុំមួយ ហើយនូវែលបាននិយាយថា គាត់នឹងអធិស្ឋាន ។
ប៉ុន្តែសាតាំងពុំចង់ឲ្យនូវែលអធិស្ឋានឡើយ ។ នៅពេលនូវែលបានទៅការប្រជុំនោះ គាត់បាននិយាយថា គាត់ខ្លាចពុំហ៊ានអធិស្ឋានឲ្យឮៗឡើយ ។
នៅព្រឹកបន្ទាប់មក នូវែល ណៃត៍ បានចូលទៅក្នុងព្រៃ ដើម្បីគាត់អាចអធិស្ឋានតែម្នាក់ឯង ។ នូវែលបានព្យាយាមអធិស្ឋាន ប៉ុន្តែសាតាំងពុំចង់ឲ្យគាត់អធិស្ឋានឡើយ ហើយគាត់ពុំអាចនិយាយបានទេ ។ គាត់បានធ្លាក់ខ្លួនឈឺ ហើយភ័យខ្លាច ហើយគាត់បានត្រឡប់ទៅផ្ទះវិញ ។
ភរិយារបស់នូវែលមានការព្រួយចិត្តអំពីគាត់ ហើយបានសូមឲ្យយ៉ូសែប ស៊្មីធ ជួយ ។ យ៉ូសែបបានប្រើបព្វជិតភាពប្រសិទ្ធពរនូវែល ហើយបណ្តេញសាតាំងចេញពីគាត់ ។ បន្ទាប់ពីការប្រសិទ្ធពរនោះ នូវែលមានអារម្មណ៍ល្អប្រសើរឡើង ។ ក្រោយមកគាត់បានទទួលបុណ្យជ្រមុជទឹក ។