ជំពូកទី ៨
ការប្រុងប្រៀបសម្រាប់សាសនាចក្រនៃព្រះយេស៊ូវគ្រីស្ទ
ខែ មេសា ឆ្នាំ ១៨៣០
វាជិតដល់ពេលដែលសាសនាចក្រនៃព្រះយេស៊ូវគ្រីស្ទមាននៅលើផែនដីម្តងទៀតហើយ ។ ព្រះយេស៊ូវបានប្រទានវិវរណៈមួយដល់យ៉ូសែប ស៊្មីធ ដើម្បីឲ្យមនុស្សប្រុងប្រៀបខ្លួនសម្រាប់សាសនាចក្ររបស់ទ្រង់ ។ ព្រះយេស៊ូវបានបើកសម្តែងបន្ថែមទៀតអំពីដំណឹងល្អរបស់ទ្រង់ និងកិច្ចការដទៃផ្សេងទៀតដល់មនុស្សដែលចាំបាច់ត្រូវដឹង ពីមុនសាសនាចក្ររបស់ទ្រង់ត្រូវបានរៀបចំឡើង ។
ព្រះយេស៊ូវបានមានបន្ទូលថា ព្រះគម្ពីរមរមនបង្រៀនដំណឹងល្អរបស់ទ្រង់ ហើយថ្លែងទីបន្ទាល់អំពីព្រះ និងកិច្ចការរបស់ទ្រង់ ។ ព្រះយេស៊ូវបានសន្យានូវពរជ័យដល់អស់អ្នកដែលទទួលព្រះគម្ពីរនេះដោយសេចក្តីជំនឿ—ហើយដាក់ទោសដល់អស់អ្នកដែលបដិសេធវា ។
ព្រះយេស៊ូវប្រាប់អំពីជីវប្រវត្តិរបស់ទ្រង់នៅលើផែនដី ។ ព្រះវរបិតាសួគ៌បានបញ្ជូនទ្រង់មកទីនេះដើម្បីធ្វើជាព្រះអង្គសង្គ្រោះរបស់យើង ។ សាតាំងបានល្បួងទ្រង់ ប៉ុន្តែព្រះយេស៊ូវពុំស្តាប់តាមវាឡើយ ។
ព្រះយេស៊ូវបានទទួលអារម្មណ៍នៃក្តីសោកស្តាយយ៉ាងខ្លាំងចំពោះអំពើអាក្រក់ដែលមនុស្សធ្វើ ។ ឈានចូលទៅដល់ចុងបំផុតនៃព្រះជន្មរបស់ទ្រង់ ទ្រង់បានរងទុក្ខ និងច្រួចលោហិតសម្រាប់មនុស្សទាំងអស់ ។ មនុស្សនឹងពុំរងទុក្ខដូចជាទ្រង់បានរងទុក្ខឡើយ ប្រសិនបើពួកគេប្រែចិត្ត ។
មនុស្សទុច្ចរិតបានឆ្កាងព្រះយេស៊ូវនៅលើឈើឆ្កាង ហើយធ្វើគុតទ្រង់ ។
មិត្តភក្ដិរបស់ព្រះយេស៊ូវបានបញ្ចុះព្រះសពរបស់ទ្រង់នៅក្នុងផ្នូរ ។
បីថ្ងៃក្រោយមក ព្រះយេស៊ូវបានមានព្រះជន្មរស់ឡើងវិញ ។ ទ្រង់បានមានព្រះជន្មរស់ឡើងវិញម្តងទៀត !
ដោយសារព្រះយេស៊ូវបានមានព្រះជន្មរស់ឡើងវិញ នោះមនុស្សទាំងអស់នឹងរស់ឡើងវិញផងដែរ ។ ដោយសារទ្រង់បានរងទុក្ខ ហើយសុគតជំនួសអំពើបាបរបស់មនុស្សទាំងអស់គ្នា នោះយើងអាចត្រូវបានអភ័យទោសប្រសិនបើយើងប្រែចិត្ត ។ យើងនឹងត្រឡប់ទៅរស់នៅជាមួយព្រះវរបិតាសួគ៌វិញ ប្រសិនបើយើងមានសេចក្តីជំនឿ ប្រែចិត្ត ទទួលបុណ្យជ្រមុជទឹក ហើយធ្វើឲ្យអស់ពីសមត្ថភាពរបស់យើងដើម្បីគោរពតាមបទបញ្ញាត្តិទាំងឡាយ ។
ព្រះយេស៊ូវក៏បានបង្រៀនមនុស្សអំពីបុណ្យជ្រមុជទឹកផងដែរ ។ ទ្រង់បានមានបន្ទូលថា ពួកគេត្រូវតែទទួលបុណ្យជ្រមុជទឹកទើបពួកគេអាចក្លាយជាសមាជិកក្នុងសាសនាចក្ររបស់ទ្រង់ ។ អស់អ្នកដែលចង់ធ្វើបុណ្យជ្រមុជទឹកគឺត្រូវតែប្រែចិត្ត ។ ពួកគេត្រូវតែស្រឡាញ់ ហើយធ្វើតាមព្រះយេស៊ូវ ។ យ៉ាងហោចណាស់ពួកគេត្រូវតែមានអាយុប្រាំបីឆ្នាំ ។
ព្រះយេស៊ូវបានបង្រៀនរបៀបត្រឹមត្រូវដើម្បីធ្វើបុណ្យជ្រមុជទឹក ។ ទ្រង់បានមានបន្ទូលថា សង្ឃម្នាក់នៅក្នុងបព្វជិតភាពអើរ៉ុន ឬបុរសម្នាក់ដែលមានបព្វជិតភាពមិលគីស្សាដែកអាចធ្វើបុណ្យជ្រមុជទឹកឲ្យបុគ្គលម្នាក់បាន ។ បុរសនោះយកបុគ្គលដែលជ្រមុជទឹកចូលទៅក្នុងទឹក ហើយនិយាយការអធិស្ឋានពិសេសមួយ ។
បុរសដែលកំពុងធ្វើបុណ្យជ្រមុជទឹកពន្លិចបុគ្គលនោះចូលទៅក្នុងទឹក ។ បន្ទាប់មក គាត់លើកបុគ្គលនោះឡើងចេញពីទឹកមកវិញ ។
នៅពេលមនុស្សធ្វើបុណ្យជ្រមុជទឹក ពួកគេសន្យាថានឹងធ្វើតាមព្រះយេស៊ូវ ។ ពួកគេក៏សន្យាថានឹងនិយាយ ហើយធ្វើកិច្ចការល្អៗផងដែរ ។
ព្រះយេស៊ូវបានប្រាប់អំពីការប្រសិទ្ធពរដល់ទារក ។ ពួកបុរសដែលមានបព្វជិតភាពមិលគីស្សាដែកអាចប្រសិទ្ធពរដល់ទារកបាន ។ ពួកបុរសទាំងនោះបីទារកនោះនៅលើដៃរបស់ពួកគេ ហើយបុរសម្នាក់ផ្តល់ការដាក់ឈ្មោះ និងការប្រសិទ្ធពរ ។
ព្រះយេស៊ូវបានប្រាប់អំពីសាក្រាម៉ង់ ។ ទ្រង់បានមានបន្ទូលថា យើងគួរតែទទួលទានសាក្រាម៉ង់ឲ្យបានញឹកញាប់ ។ ប៉ុន្តែប្រសិនបើយើងធ្វើអ្វីមួយអាក្រក់ នោះយើងពុំគួរទទួលទានសាក្រាម៉ង់ឡើយ លុះត្រាណាយើងប្រែចិត្តជាមុនសិន ។
យើងទទួលទានសាក្រាម៉ង់ដើម្បីចងចាំអំពីព្រះយេស៊ូវ ។ នំបុ័ងជួយយើងឲ្យគិតអំពីព្រះកាយរបស់ទ្រង់ ។ យើងចងចាំថា ទ្រង់បានសុគតនៅលើឈើឆ្កាងសម្រាប់យើង ។
ទឹកជួយយើងឲ្យគិតអំពីព្រះលោហិតរបស់ព្រះយេស៊ូវ ។ យើងចងចាំថា ទ្រង់បានរងទុក្ខ ហើយច្រួចព្រះលោហិតសម្រាប់យើងនៅក្នុងសួរច្បារគែតសេម៉ានី ។
យើងចុះសេចក្តីសញ្ញានៅពេលយើងទទួលទានសាក្រាម៉ង់ ។ សេចក្តីសញ្ញាគឺជាការសន្យាមួយ ។ យើងសន្យាថា យើងនឹងព្យាយាមក្លាយដូចជាព្រះយេស៊ូវ ។ យើងសន្យាថា យើងនឹងចងចាំទ្រង់ជានិច្ច ។ យើងក៏សន្យាផងដែរថា យើងនឹងគោរពតាមព្រះបញ្ញត្តិរបស់ទ្រង់ ។ ប្រសិនបើយើងគោរពសេចក្តីសញ្ញារបស់យើង នោះយើងត្រូវបានសន្យាថា ព្រះវិញ្ញាណទ្រង់នឹងគង់នៅជាមួយយើង ។