ជំពូកទី ៥
យ៉ូសែប ស៊្មីធ និង អូលីវើរ ខៅឌើរី
ខែ កុម្ភៈ–មេសា ឆ្នាំ ១៨២៩
យ៉ូសែប និងអិមម៉ា ស្ម៊ីធបានរស់នៅលើដីចម្ការតូចមួយនៅក្បែរភូមិហាម៉ូនី រដ្ឋ ផេនស៊ីវើរញ៉ា ។ ឪពុករបស់យ៉ូសែបបានមកសួរសុខទុក្ខពួកលោក ។ ពួកលោករីករាយដែលបានឃើញគាត់ ។ ឪពុករបស់យ៉ូសែបគឺជាមនុស្សល្អម្នាក់ ។
ព្រះយេស៊ូវបានប្រទានវិវរណៈមួយដល់ឪពុករបស់យ៉ូសែប ។ វិវរណៈនោះប្រាប់អំពីរបៀបដែលមនុស្សអាចជួយព្រះយេស៊ូវ ។ ពួកគេគួរតែស្រឡាញ់ព្រះយេស៊ូវ ។ ពួកគេគួរតែខំប្រឹងប្រែងបង្រៀនដំណឹងល្អ ។ ពួកគេគួរតែស្រឡាញ់ ហើយជួយមនុស្សដទៃទៀត ។
មនុស្សដែលចង់ជួយព្រះយេស៊ូវគួរតែអធិស្ឋាន ហើយមានសេចក្តីជំនឿផងដែរ ។ ព្រះយេស៊ូវបានមានបន្ទូលថា អស់អ្នកដែលជួយទ្រង់នឹងត្រូវបានប្រទានពរ ។
ឪពុករបស់យ៉ូសែបបានត្រឡប់ទៅផ្ទះវិញ ហើយបានព្យាយាមធ្វើអ្វីដែលព្រះយេស៊ូវបានមានបន្ទូលឲ្យគាត់ធ្វើ ។ គាត់បានចែកចាយដំណឹងល្អជាមួយសមាជិកគ្រួសាររបស់គាត់ជាច្រើននាក់ ។
យ៉ូសែបត្រូវធ្វើការនៅចម្ការរបស់លោក ។ លោកក៏ត្រូវបកប្រែផ្ទាំងចំណារមាសផងដែរ ។ កិច្ចការទាំងនោះច្រើនខ្លាំងណាស់ដែលលោកត្រូវធ្វើតែម្នាក់ឯង ដូច្នោះលោកបានអធិស្ឋានទូលសូមជំនួយពីព្រះវរបិតាសួគ៌ ។
ព្រះវរបិតាសួគ៌បានឆ្លើយតបការអធិស្ឋានរបស់យ៉ូសែប ។ ទ្រង់បានបញ្ជូនមនុស្សម្នាក់ឈ្មោះ អូលីវើរ ខៅឌើរី មកជួបយ៉ូសែប ។ អូលីវើរចង់ដឹងអំពីផ្ទាំងចំណារមាស ។ យ៉ូសែបបានប្រាប់គាត់អំពីទេវតាមរ៉ូណៃ ផ្ទាំងចំណារមាស និងព្រះគម្ពីរមរមន ។
អូលើវើរ បានជឿលើយ៉ូសែប ហើយបាននិយាយថា គាត់នឹងជួយបកប្រែផ្ទាំងមាសនោះ ។ នៅពេលយ៉ូសែបបានអានពាក្យពេចន៍ទាំងនោះឮៗ នោះអូលីវើរបានសរសេរពាក្យទាំងនោះនៅលើក្រដាស ។ យ៉ូសែប និងអូលីវើរបានប្រឹងប្រែងធ្វើការនេះ ។
ព្រះយេស៊ូវបានបង្រៀនយ៉ូសែប និងអូលីវើរ នូវកិច្ចការជាច្រើន ។ ទ្រង់បានមានបន្ទូលថា ពួកគេគួរតែស្វែងរកប្រាជ្ញា និងជីវិតអស់កល្បជានិច្ច ពុំមែនទ្រព្យសម្បត្តិនោះទេ ។ ទ្រង់ក៏បានមានបន្ទូលផងដែរថា ពួកលោកគួរតែរៀនអំពីព្រះ ហើយជួយមនុស្សឲ្យរៀនដំណឹងល្អ ។ ពួកលោកគួរតែស្មោះត្រង់ ហើយធ្វើកិច្ចការល្អៗ ។ ប្រសិនបើពួកលោកធ្វើដូច្នោះ នោះពួកលោកអាចរស់នៅជាមួយព្រះវរបិតាសួគ៌ជារៀងរហូត ។
ព្រះយេស៊ូវបានមានបន្ទូលថា អូលីវើរគួរតែធ្វើជាមិត្តភក្តិរបស់យ៉ូសែបជានិច្ច ហើយជួយលោកនៅក្នុងគ្រាលំបាកៗ ។ ព្រះយេស៊ូវក៏បានមានបន្ទូលផងដែរថា អូលីវើរអាចរៀនបកប្រែដូចជាយ៉ូសែប ។ ព្រះវិញ្ញាណបរិសុទ្ធនឹងជួយអូលីវើរឲ្យបកប្រែប្រសិនបើអូលីវើរមានសេចក្តីជំនឿគ្រប់គ្រាន់ ។
អូលីវើរបានព្យាយាមបកប្រែ ។ គាត់បានគិតថា វាមានភាពងាយស្រួល ប៉ុន្តែគាត់ពុំអាចបកប្រែបានឡើយ ។
ព្រះយេស៊ូវបានមានបន្ទូលថា អូលីវើរពុំបានទូលសូមជំនួយពីព្រះនៅក្នុងរបៀបត្រឹមត្រូវឡើយ ។ ព្រះយេស៊ូវបានប្រាប់យ៉ូសែប ស្ម៊ីធ អំពីរបៀបដែលអូលីវើរ និងមនុស្សទាំងអស់អាចទទួលបានជំនួយពីព្រះ ។
នៅពេលមនុស្សត្រូវការជំនួយ ពួកគេគួរតែគិតដោយយកចិត្តទុកដាក់អំពីអ្វីដែលត្រូវធ្វើ ។ ពួកគេគួរតែសម្រេចចិត្តអំពីអ្វីដែលពួកគេគិតថា ជារឿងត្រឹមត្រូវដើម្បីធ្វើ ។
បន្ទាប់មក ពួកគេទូលសូមដល់ព្រះថាតើវាជារឿងត្រឹមត្រូវដែរឬទេ ។ ប្រសិនបើវាជារឿងត្រឹមត្រូវ នោះពួកគេនឹងមានអារម្មណ៍ល្អនៅក្នុងចិត្តរបស់ពួកគេ ។ ពួកគេនឹងដឹងថា វាជារឿងត្រឹមត្រូវ ។
ប្រសិនបើវាជារឿងខុសឆ្គង នោះពួកគេនឹងគ្មានអារម្មណ៍ល្អនៅក្នុងចិត្តរបស់ពួកគេឡើយ ។
អូលីវើរពុំបានព្យាយាមបកប្រែព្រះគម្ពីរមរមនម្តងទៀតឡើយ ។ ផ្ទុយទៅវិញ គាត់បានកត់ត្រានូវពាក្យទាំងនោះ ពេលយ៉ូសែបបានបកប្រែវា ។ ព្រះយេស៊ូវបានមានបន្ទូលថា អូលីវើរនឹងបានពរក្នុងការជួយដល់យ៉ូសែប ។