Ko ha tatau ʻo e fuofua ngaahi peesi ʻo e Tohi ʻa Molomoná.

1–7 Fēpueli

Tokāteline mo e Ngaahi Fuakava 10–11

“Koeʻuhí Ke Ke Lava ʻo Ikuna”

Lau ʻi he faʻa lotu ʻa e Tokāteline mo e Ngaahi Fuakava 10–11, pea fakalaulauloto ki he founga te ke lava ai ʻo tokoni ki he fānaú ke mahino kiate kinautolu ʻa e ngaahi moʻoni ʻi he ongo vahe ko ʻení. ʻE ala tokoni ʻa e ngaahi fakakaukau ʻi he fokotuʻutuʻu fakanounou ko ʻení—ʻo tatau pē ki he fānau iiki angé pea mo e fānau lalahi angé.

Lekooti Hoʻo Ngaahi Ongó

Fakaafeʻi e Feʻinasiʻakí

Kole ki he fānaú ke nau vahevahe ʻa e meʻa ʻoku nau manatuʻi mei ha lēsoni kimuʻa kau kia Māteni Hālisi mo e ngaahi peesi ʻo e Tohi ʻa Molomoná naʻe liliu pea molé. Vahevahe ha ngaahi fakaikiiki ʻoku ʻikai ke nau manatuʻi. Mahalo te ke fie vakai ki he “Vahe 4: Ko Māteni Hālisi mo e Ngaahi Peesi Naʻe Molé” (Ngaahi Talanoa ʻo e Tokāteline mo e Ngaahi Fuakavá, 18–21).

Akoʻi e Tokāteliné: Fānau Iiki Angé

Tokāteline mo e Ngaahi Fuakava 10:5

ʻI heʻeku lotu maʻu peé, ʻe tāpuekina au ʻe he Tamai Hēvaní.

Ko e taimi ʻe niʻihi ʻoku fakakaukau ʻa e fānaú te nau toki lava pē ʻo lotu ʻi he taimi mo e feituʻu pau, pea ʻe toki lava pē ia kapau ʻoku nau tuʻulutui pe kuikui honau matá. Te ke lava fēfē ke tokoniʻi kinautolu ke nau ako ʻa e founga ke “lotu maʻu ai peé”?

Ngaahi ʻEkitivitī ʻe Ala Fakahokó

• Fakaʻaliʻali ha ʻū fakatātā ʻo e ngaahi meʻa ʻoku tau faʻa fakahokó, hangē ko e kaí, mohé, pe vaʻingá. ʻOku tokoniʻi fēfē kitautolu ʻe he ngaahi meʻá ni? Fakaʻaliʻali ha fakatātā ʻo ha tamasiʻi/taʻahine ʻoku lotu lolotonga iá ʻokú ke lau ki he fānaú ʻa e ngaahi foʻi lea mei he Tokāteline mo e Ngaahi Fuakava 10:5 ko e “lotu maʻu ai pē.” Kole ki he fānaú ke nau toutou lea ʻaki tuʻo lahi ʻa e ngaahi lea ko ʻení. ʻE tokoniʻi fēfē nai kitautolu ʻe he lotu maʻu peé?

• Fakaʻaongaʻi ʻa e peesi ʻekitivitī ʻo e uike ní ke tokoni ki he fānaú ke nau fakakaukau ki he ngaahi feituʻu kehekehe mo e taimi lahi te tau lava ai ke fai ha lotú.

• Fakaafeʻi ʻa e fānaú ke nau tā ha ʻū fakatātā ʻo kinautolu pe ko honau fāmilí, ʻoku nau fai ha lotu ʻi ha ngaahi taimi mo e feituʻu kehekehe, hangē ko e ʻi he lotú, kimuʻa he akó, pe ʻi he taimi mohé. Fakamatalaʻi ange ʻe lava ke ʻuhinga ʻa e lotu maʻu peé ke faʻa lotu he ʻahó kotoa. ʻE lava fēfē ke tau lotu ʻi he taimi ʻoku tau ʻi he lotolotonga ai ʻo ha kakai, hangē ko e ʻi he akó pe feohi mo hotau ngaahi kaungāmeʻá?

  

  ʻE tokoniʻi kitautolu ʻe he ʻEikí ʻi he taimi ʻoku tau lotu aí.

Tokāteline mo e Ngaahi Fuakava 11:12–13

ʻOku tataki au ʻe he Laumālie Māʻoniʻoní ke u fai lelei.

ʻE malava pē ʻe he fānaú ʻi heʻenau kei īkí ʻo kamata ke fakatokangaʻi ʻa e taimi ʻoku lea ai ʻa e Laumālié kiate kinautolú.

Ngaahi ʻEkitivitī ʻe Ala Fakahokó

• Fufuuʻi ha foʻi ʻuhila pe kasa pea mo ha fakatātā ʻo ha fofonga fiefia ʻi ha feituʻu pē ʻi he lokí. Kole ki he fānaú ke nau kumi ʻa e ngaahi meʻá ni. Lau ʻa e Tokāteline mo e Ngaahi Fuakava 11:13, pea tokoni ki he fānaú ke nau fakahaaʻi ʻa e ngaahi foʻi lea ʻoku felāveʻi mo e ʻū meʻa ne nau maʻú. Ko e hā e meʻa ʻoku akoʻi mai ʻe he ngaahi foʻi lea ko ʻení fekauʻaki mo e founga ʻoku tokoniʻi ai ʻe he Laumālie Māʻoniʻoní kitautolú?

• ʻOange ha ngaahi fakatātā kehekehe ki he fānaú ʻa ia ʻe fie maʻu ai ke nau fai ha fili ʻi he vahaʻa ʻo e totonú mo e halá—hangē ko e fili ke tala ʻa e moʻoní pe loí, pe ko e fili ke angaleleí pe angakoví. Te tau ʻiloʻi fēfē ko fē ʻa e fili ʻoku totonú? Lau fakataha ʻa e Tokāteline mo e Ngaahi Fuakava 11:12, pea fakamoʻoni ʻe tokoniʻi kitautolu ʻe he Laumālie Māʻoniʻoní ke tau fai ʻa e fili totonú kapau te tau fakafanongo kiate Ia.

• Hivaʻi ha foʻi hiva fekauʻaki mo e tataki ʻa e Laumālie Māʻoniʻoní, hangē ko e “Listen, Listen” (Childrenʻs Songbook, 107). ʻEke ki he fānaú pe ko e hā ʻoku akoʻi kiate kinautolu ʻe he foʻi hivá fekauʻaki mo e founga ʻoku tokoniʻi ai kitautolu ʻe he Laumālie Māʻoniʻoní.

Akoʻi e Tokāteliné: Fānau Lalahi Angé

Tokāteline mo e Ngaahi Fuakava 10:5

ʻI heʻeku lotu maʻu peé, te u lava ʻo ikunaʻi e ngaahi ʻahiʻahi ʻa Sētané.

Te ke lava ʻo tokoni ke mahino ki he fānaú ʻoku hoko ʻa e faʻa lotú ke nau maʻu ai ʻa e mālohi ke ikunaʻi ʻa e ʻahiʻahí.

Ngaahi ʻEkitivitī ʻe Ala Fakahokó

• Hiki ʻa e ngaahi foʻi lea pe ngaahi kupuʻi lea mei he Tokāteline mo e Ngaahi Fuakava 10:5 ʻi ha fanga kiʻi laʻipepa, pea kole ki he fānaú ke nau fokotuʻutuʻu ia ke hokohoko lelei. Poupouʻi kinautolu ke nau kumi ʻa e vēsí ʻo kapau ʻoku nau fie maʻu tokoni. Fakatatau ki he veesi ko ʻení, ko e hā ʻa e ngaahi tāpuaki ʻoku tau maʻu ʻi he taimi ʻoku tau lotu maʻu ai peé? ʻOku tokoni fēfē ʻa e manatuʻi ke lotu ʻi he kotoa ʻo hotau ʻahó, tautautefito ki he taimi ʻoku ʻahiʻahiʻi ai kitautolu ke tau fai ha meʻa halá, ʻo tokoniʻi kitautolu?

• Fakaafeʻi ʻa e fānaú ke nau hiki ha lisi ʻo e ngaahi taimi te tau lava ai ke fai ha lotú mo e ngaahi feituʻu te tau lava ʻo lotu aí. Ki ha toe ngaahi fakakaukau, poupouʻi ke nau vakai ki he ʻAlamā 34:17–27.

• Tokoni ki he fānaú ke nau faʻu ha kiʻi fakaʻilonga pe fakatātā te ne fakamanatu kiate kinautolu ke nau lotu maʻu pē. Fakaafeʻi ke nau tautau ʻenau ʻū fakaʻilongá ʻi honau ʻapí ʻi ha feituʻu te nau lava ʻo toutou sio ki aí.

Tokāteline mo e Ngaahi Fuakava 11:12–13

ʻOku tataki au ʻe he Laumālie Māʻoniʻoní ke u fai lelei.

ʻOku faʻa fifili ʻa e kakai kei talavoú pe ʻoku fēfē nai ʻa e fakahinohino ʻa e Laumālie Māʻoniʻoní. Te ke lava ʻo fakaʻaongaʻi ʻa e Tokāteline mo e Ngaahi Fuakava 11 ke akoʻi ki he fānaú ʻa e founga ke fakatokangaʻi ai ʻa e “Laumālie ko ia ʻoku tākiekina ke faileleí” (veesi 12).

Ngaahi ʻEkitivitī ʻe Ala Fakahokó

• Tokoni ki he fānaú ke nau hiki ha lisi ʻo e kakai ʻoku nau ō ki ai ʻi he taimi ʻoku nau fie maʻu tokoni aí pe ʻi ai haʻanau fehuʻí. Ko e hā ʻoku tau falala ai ʻe tokoniʻi kitautolu ʻe he kakai ko ʻení? Fakaafeʻi ʻa e fānaú ke nau lau ʻa e Tokāteline mo e Ngaahi Fuakava 11:12 pea fekumi ki he meʻa naʻe tala kia Hailame Sāmita ke ne falala ki aí. Ko e hā ʻoku tau ako mei he veesi ko ʻení fekauʻaki mo e ʻuhinga ʻoku totonu ke tau falala ai ki he tataki ʻa e Laumālie Māʻoniʻoní?

• ʻEke ki he fānaú pe ko e hā te nau talaange ki ha kaungāmeʻa naʻá ne ʻeke ange pe ʻoku ongo fēfē ʻa e taimi ʻoku lea ai ʻa e Laumālie Māʻoniʻoní kiate kinautolú. Fakaafeʻi ʻa e fānaú ke nau lau ʻa e Tokāteline mo e Ngaahi Fuakava 11:12–13 ke maʻu ha ngaahi tali.

• Vahevahe mo e fānaú ha ngaahi aʻusia ne tataki ai koe ʻe he Laumālie Māʻoniʻoní ke ke fai ʻa e ngaahi meʻa ʻoku leleí. Fakaafeʻi ʻa e fānaú ke nau fakalaulauloto ki ha taimi ne nau ngali aʻusia ai ha meʻa tatau pea vahevahe leva ʻenau ngaahi aʻusiá ʻo kapau ʻoku nau ongoʻi fiemālie ke fai ia. Fakamoʻoni ʻoku finangalo ʻa e Tamai Hēvaní ke tataki kitautolu ʻo fakafou ʻi he Laumālie Māʻoniʻoní. Poupouʻi ʻa e fānaú ke nau fakatokangaʻi ʻi he uike ka hoko maí ʻa e taimi te nau maʻu ai ha ngaahi ongo ʻoku tatau mo ia ʻoku fakamatalaʻi ʻi he Tokāteline mo e Ngaahi Fuakava 11:12–13.

Tokāteline mo e Ngaahi Fuakava 11:21, 26

ʻOku fie maʻu ke u ʻiloʻi ʻa e ongoongoleleí kae lava ke u tokoni ki he niʻihi kehé ke nau maʻu ʻa e moʻoní.

ʻE maʻu ʻe he fānau ʻokú ke akoʻí ha ngaahi faingamālie lahi ke vahevahe ʻa e ongoongoleleí. ʻE lava ʻe he ongo veesi ko ʻení ke akoʻi kiate kinautolu ʻa e founga ke mateuteu ai ki he ngaahi faingamālie ko ʻení.

Ngaahi ʻEkitivitī ʻe Ala Fakahokó

• Fakaafeʻi ʻa e fānaú ke nau fakatātaaʻi ʻa e founga te nau talanoa ai fekauʻaki mo e ongoongoleleí mo ha taha kuo teʻeki ke ne fanongo ai kimuʻa. Hangē ko ʻení, te nau tali fēfē ha ngaahi fehuʻi fekauʻaki mo e Tohi ʻa Molomoná? Te nau fakamatalaʻi fēfē nai pe ko hai ʻa Sīsū Kalaisi? Lau mo e fānaú ʻa e Tokāteline mo e Ngaahi Fuakava 11:21, 26. Ko e hā naʻe folofola ʻe he ʻEikí kia Hailame Sāmita, naʻe fie maʻu ke ne fai kae lava ke ne akoʻi ʻa e ongoongoleleí? ʻOku ʻuhinga ki he hā ke “maʻu” ʻa e folofola ʻa e ʻOtuá, pea te tau fakahoko fēfē ʻeni? Te tau “mataʻikoloa [fēfē] ʻaki” ʻa e folofola ʻa e ʻOtuá ʻi hotau lotó?

• Fakaafeʻi ʻa e fānaú ke nau vahevahe ha potufolofola ʻoku nau saiʻia ai pea fakamatalaʻi ʻa e ʻuhinga ʻoku nau saiʻia ai ʻi aí. Tuku ke nau fakamatala ki he founga ʻoku tāpuekina ai ʻe he folofolá ʻa ʻenau moʻuí pea mo e meʻa ʻoku nau fai ke ako ʻa e folofola ʻa e ʻOtuá ʻi ʻapí. Poupouʻi kinautolu ke nau fokotuʻu ha ngaahi taumuʻa ke nau toutou lau ke lahi ange ʻa e folofola ʻa e ʻOtuá.

• Hivaʻi fakataha ha hiva fekauʻaki mo hono vahevahe ʻo e ongoongoleleí, hangē ko e “ ʻOku Ou Fie Hoko Leva ko ha Faifekau” (Tohi Hiva ʻa e Fānaú, 90). Ko e hā ʻoku akoʻi mai ʻe he foʻi hiva ko ʻení fekauʻaki mo e founga ʻe lava ke tau hoko ai ko ha kau faifekau he ʻaho kotoa peé?

• Vahevahe ha meʻa mei he “ ʻAmanakiʻanga ʻo ʻIsilelí” naʻe fai ʻe Palesiteni Lāsolo M. Nalesoni mo Sisitā Uenitī W. Nalesoni (fakataha lotu fakamāmanilahi maʻá e toʻu tupú, 3 Sune, 2018, ChurchofJesusChrist.org) ke ueʻi ʻa e fānaú ke nau tokoni ki hono tānaki ʻa e fānau ʻa e ʻOtuá ʻaki hano vahevahe ʻo e ongoongoleleí.

Poupouʻi e Ako ʻi ʻApí

Fakaafeʻi ʻa e fānaú ke nau fepōtalanoaʻaki mo ha mēmipa ʻi he fāmilí fekauʻaki mo ha meʻa ne nau ako he ʻahó ni mei he Tokāteline mo e Ngaahi Fuakava 10 pe 11. Hangē ko ʻení, te nau lava ʻo vahevahe ʻenau palani ke lotu maʻu peé.

Ko Hono Fakaleleiʻi ʻEtau Founga Akoʻí

Fekumi fakaʻaho ki ha fakahā. ʻI hoʻo teuteu ke akoʻí, lotu mo fakalaulauloto ki he folofolá he uiké kakato. Te ke ʻiloʻi ai ʻe hanga ʻe he Laumālié ʻo “fakamāmaʻi ho ʻatamaí” (Tokāteline mo e Ngaahi Fuakava 11:13). ʻE lava ke ke maʻu ʻa e ngaahi fakakaukau mo e ongo ki he founga ke akoʻí ʻi ha faʻahinga taimi pē mo ha feituʻu pē—ʻi hoʻo ʻalu ki he ngāué, fai e ngaahi ngāue fakaʻapí, pe talanoa mo e niʻihi kehé.