15–21 Fēpueli

Tokāteline mo e Ngaahi Fuakava 14–17

“Tuʻu ko e Fakamoʻoni”

Te ke tokoniʻi fēfē ʻa e fānaú ke nau tuʻu ko e kau fakamoʻoni ʻo e ongoongoleleí? ʻE ala ʻoatu ʻe he ngaahi ʻekitivitī ʻi he fokotuʻutuʻu fakanounou ko ʻení ha ngaahi fakakaukau.

Lekooti Hoʻo Ngaahi Ongó

Fakaafeʻi e Feʻinasiʻakí

Fakakaukauʻi hano fakaafeʻi ha niʻihi ʻo e fānaú ke nau vahevahe ha meʻa ne nau ako he uiké ni, ʻi ʻapi pe ʻi he Palaimelí, ʻa ia ʻoku nau tui ʻoku moʻoni.

Akoʻi e Tokāteliné: Fānau Iiki Angé

Tokāteline mo e Ngaahi Fuakava 14:1–7

Te u lava ʻo tokoni ki he ʻEikí ke fai ʻEne ngāué.

Fakakaukau pe ʻe tokoni fēfē nai e folofola ʻa e ʻEikí kia Tēvita Uitemaá ke mahino ki he fānaú ʻa e founga te nau lava ai ʻo kau atu ki he ngāue ʻa e ʻOtuá?

Ngaahi ʻEkitivitī ʻe Ala Fakahokó

• Vahevahe ha ngaahi fakaikiiki fekauʻaki mo e fāmili Uitemaá (vakai, Kau Māʻoniʻoní, 1:68–71 pe ko e fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Hangē ko ʻení, vahevahe pe ko hai ʻa Tēvita Uitemā pea mo e founga naʻá ne tokoni ai mo hono fāmilí kia Siosefa Sāmita lolotonga ʻene liliu e Tohi ʻa Molomoná.

• Tokoni ke mahino ki he fānaú ʻa e fehokotaki ʻo e ngāue ʻi ha ngoueʻangá mo e kau atu ki he “ngāue maʻongoʻonga mo fakaofo” ʻa e ʻOtuá (veesi 1). Hangē ko ʻení, ʻe lava ke fakataipe ʻe he ututaʻú ʻa hono ʻomi e ngaahi laumālié kia Kalaisí. Te ke lava ʻo fakaʻaliʻali ha fakatātā ʻo ha tangata faama, ʻomi ha vala ʻo ha tangata faama ke tui ʻe he fānaú, pe aleaʻi e ngaahi ngāue fakaʻaho ʻoku fai ʻe he kau tangata fāmá. Fakamatalaʻi ange ko Tēvita Uitemaá ko ha tangata faama naʻá ne fakaʻamu ke ʻiloʻi e founga ʻe lava ke ne tokoni ai ki he ʻEikí. Lau ʻa e Tokāteline mo e Ngaahi Fuakava 14:3–4 ki he fānaú, pea tokoni ke nau ʻiloʻi e meʻa naʻe folofola ʻaki ʻe he ʻEikí kia Tēvita Uitemā ke ne faí. Te tau lava fēfē ʻo tokoni ki he ngāue ʻa e ʻEikí?

• Fakaʻaongaʻi ha meʻaʻofa ke akoʻi ki he fānaú ʻa e meʻaʻofa ʻa e ʻOtuá ki he moʻui taʻengatá. Hangē ko ʻení, fakaʻaliʻali ki he fānaú ha meʻaʻofa ʻoku faʻo ʻi loto ha laʻipepa ʻoku tohiʻi ai e, “Moʻui Taʻengata” (Tokāteline mo e Ngaahi Fuakava 14:7). ʻAi ha tokotaha ke ne fakaava e kofukofú, peá ne lau leʻolahi e Tokāteline mo e Ngaahi Fuakava 14:7. Fakamatalaʻi ange ʻoku ʻuhinga ʻa e moʻui taʻengatá ke moʻui ʻo ʻikai hano ngataʻanga fakataha mo e ʻOtuá pea hoko ʻo hangē ko Iá. Vahevahe hoʻo fakamoʻoni ki he ngaahi tāpuaki ʻo e tauhi ʻa e ngaahi fekaú mo maʻu ʻa e moʻui taʻengatá.

  

  Ko e ngāue fakafaifekaú ko ha founga ia ʻe taha te tau lava ai ʻo tokoni ki he ʻEikí ke fai ʻEne ngāué.

Tokāteline mo e Ngaahi Fuakava 15:6; 16:6

Te u lava ʻo tokoniʻi e niʻihi kehé ke nau ofi ange kia Sīsū Kalaisi.

Ko Sione Uitemā mo Pita Uitemā ko e Siʻí ko ha ongo tokoua ia ʻo Tēvita Uitemā. Ne na loto ke na ʻiloʻi e founga ke na tokoni ai ki he ʻEikí, ʻo hangē ko Tēvitá. Naʻá Ne folofola ange ke na tokoni ke “ʻomai ʻa e ngaahi laumālié kiate” Ia.

Ngaahi ʻEkitivitī ʻe Ala Fakahokó

• Kole ki he fānaú ke nau fakamatalaʻi ha meʻa ʻoku mahuʻinga kiate kinautolu (hangē ko ha meʻavaʻinga, tohi, pe keimi). Lau ʻa e Tokāteline mo e Ngaahi Fuakava 15:6 pe 16:6, pea kole ki he fānaú ke hiki honau nimá ʻi heʻenau fanongo ki he meʻa ʻoku folofola ʻaki ʻe he ʻEikí ʻoku “mahuʻinga tahá.”

• Faʻu mo e fānaú ha lisi ʻo e ngaahi founga te nau lava ai ʻo tokoniʻi ha taha ke muimui kia Sīsū Kalaisí, hangē ko haʻanau anga fakakaumeʻa ki he niʻihi kehé, vahevahe ʻa e folofolá mo ha kaungāmeʻa, pe lotua ha taha ʻoku faingataʻaʻia. Te ke lava ʻo fakaʻaliʻali ha ʻū tā mahuʻinga ʻe niʻihi mei he ngaahi makasini ʻo e Siasí pe ko e Tohi Fakatātā ʻo e Ongoongoleleí ke ʻoatu ai ha ngaahi fakakaukau ki he fānaú. Pe ʻe lava ke tā ʻe he fānaú haʻanau fakatātā pē ʻanautolu. Fakaafeʻi ke nau fai ha meʻa mei heʻenau lisí ʻi he lolotonga ʻa e uiké.

Tokāteline mo e Ngaahi Fuakava 17

Te u lava ʻo hoko ko ha fakamoʻoni ki he ngaahi meʻa kuo fai ʻe he ʻOtuá maʻakú.

Naʻe hoko ʻa Tēvita Uitemā ko e taha ʻo e Kau Fakamoʻoni ʻe Toko Tolu ʻo e Tohi ʻa Molomoná, pea naʻe kau ʻa e toko fā ʻo hono ngaahi tokouá ʻi he Kau Fakamoʻoni ʻe Toko Valú. Te tau lava ʻo takitaha “tuʻu ko e fakamoʻoni” ki he moʻoní hangē ko Tēvita mo hono ngaahi tokouá (Tokāteline mo e Ngaahi Fuakava 14:8).

Ngaahi ʻEkitivitī ʻe Ala Fakahokó

• Talanoa ki he fānaú fekauʻaki mo e Kau Fakamoʻoni ʻe Toko Tolú mo e Toko Valú (vakai, “Vahe 7: Ko e Mamata ʻa e Kau Fakamoʻoní ki he ʻŪ Lauʻi Peleti Koulá” [Ngaahi Talanoa ʻo e Tokāteline mo e Ngaahi Fuakavá, 31–33], pe ko e vitiō ʻoku fekauʻaki mo ia ʻi he ChurchofJesusChrist.org). Fakaafeʻi ʻa e fānaú ke nau tā ha fakatātā ʻo e mamata ʻa e kau fakamoʻoní ki he ʻū lauʻi peletí.

• Fakaafeʻi e fānaú ke nau valivali ʻa e peesi ʻekitivitī ki he uike ní, pea fakaʻaongaʻi ia ke talanoa kau ki he Kau Fakamoʻoni ʻe Toko Tolú.

• Puke hake ha tatau ʻo e Tohi ʻa Molomoná, pea lau ki he fānaú ʻa e laine fakaʻosi ʻo e Tokāteline mo e Ngaahi Fuakava 17:6: “Pea hangē ʻoku moʻui ʻa homou ʻEikí mo homou ʻOtuá ʻoku moʻoni ia.” Talanoa ki he fānaú ʻa e founga ʻokú ke ʻilo ai ʻoku moʻoni ʻa e Tohi ʻa Molomoná. Fakaafeʻi ʻa e fānaú ke nau hoko ko ha kau fakamoʻoni ʻo e Tohi ʻa Molomoná ʻaki ʻenau lau ia mo lotua ke ʻiloʻi pe ʻoku moʻoni nai pea vahevahe leva ʻenau fakamoʻoní mo e niʻihi kehé.

Akoʻi e Tokāteliné: Fānau Lalahi Angé

Tokāteline mo e Ngaahi Fuakava 14–16

Te u lava ʻo tokoni ki he ʻEikí ke fai ʻEne ngāué.

ʻI hoʻomou aleaʻi ʻa e ngaahi fakahā naʻe fai ki he ongo tautehina Uitemaá, te ke lava ʻo vahevahe ha niʻihi ʻo e ngaahi founga ʻoku fakaafeʻi ai kitautolu ʻe he ʻEikí ke tau tokoni kiate Ia ʻi Heʻene ngāué.

Ngaahi ʻEkitivitī ʻe Ala Fakahokó

• Vahevahe ha ngaahi talanoa fekauʻaki mo Tēvita Uitemā mo hono fāmilí ʻa ia ʻokú ke ongoʻi te ne ueʻi fakalaumālie ʻa e fānaú (vakai, Kau Māʻoniʻoní, 1:68–71). Naʻe ngāue ʻaki fēfē nai ʻe he ʻEikí ʻa e fāmili Uitemaá ke tokoni ki hono langa Hono puleʻangá?

• Hiki ʻi ha ʻū laʻipepa ha ngaahi fehuʻi faingofua mo ha ngaahi veesi folofola ʻoku nau fekauʻaki mei he Tokāteline mo e Ngaahi Fuakava 14–16. Hangē ko ʻení: ʻOku fēfē nai ʻa e folofola ʻa e ʻOtuá? (14:2). Ko e hā ʻa e meʻaʻofa maʻongoʻonga taha ʻa e ʻOtuá? (14:7). Ko e hā naʻe folofola ʻaki ʻe he ʻEikí ʻoku mahuʻinga tahá? (15:6; 16:6). Fakaafeʻi takitaha ʻa e fānaú ke nau fili ha fehuʻi pea fekumi ki hono talí ʻi he ngaahi vēsí.

• Hiki ha ongo ʻuluʻitohi ʻi he palakipoé: Ngāue ʻi he Ngoueʻangá mo e Ko e Ngāue ʻa e ʻEikí. Tokoniʻi e fānaú ke nau fekumi ʻi he Tokāteline mo e Ngaahi Fuakava 14:3–4 ki ha ngaahi kupuʻi lea ʻoku kaunga ki he ngāue ʻi he ngoueʻangá, pea hiki kinautolu ʻi lalo ʻi he ʻuluʻitohi ʻuluakí. Ko e hā ʻoku akoʻi mai ʻe he ngaahi kupuʻi lea ko ʻení fekauʻaki mo e ngāue ʻa e ʻOtuá? Hiki e ngaahi tali ʻa e fānaú ʻi lalo ʻi he ʻuluʻitohi hono uá. Te tau tokoni fēfē nai ki he ngāue ʻa e ʻEikí?

Tokāteline mo e Ngaahi Fuakava 17

Te u lava ʻo hoko ko ha fakamoʻoni ki he ngaahi meʻa kuo fai ʻe he ʻOtuá maʻakú.

ʻI he Tokāteline mo e Ngaahi Fuakava 17, naʻe folofola ʻe he ʻEikí kia ʻŌliva Kautele, Tēvita Uitemā, mo Māteni Hālisi, te nau hoko ko e Kau Fakamoʻoni ʻe Toko Tolu ʻo e Tohi ʻa Molomoná. Tokoniʻi e fānaú ke nau ako ki he founga ʻe lava ke nau hoko ai mo kinautolu foki ko ha fakamoʻoni ki he moʻoní.

• Fakaafeʻi ha taha ʻi he fānaú ke haʻu mateuteu ke ne vahevahe ʻa e talanoa ʻo e Kau Fakamoʻoni ʻe Toko Tolú (vakai, “Vahe 7: Ko e Mamata ʻa e Kau Fakamoʻoní ki he ʻŪ Lauʻi Peleti Koulá” [Ngaahi Talanoa ʻo e Tokāteline mo e Ngaahi Fuakavá, 31–33], pe ko e vitiō ʻoku fekauʻaki mo iá ʻi he ChurchofJesusChrist.org). Ko e hā te tau lava ʻo ako mei he talanoa ko ʻení fekauʻaki mo e founga ke tau hoko ai ko e kau fakamoʻoni loto-toʻa? Te ke ala fakaʻaliʻali foki ha ngaahi meʻa kuó ke fili mei he foʻi vitiō ko e “A Day for the Eternities” (ChurchofJesusChrist.org; ʻa e konga ʻoku fekauʻaki mo e Kau Fakamoʻoni ʻe Toko Tolú ʻoku kamata ʻi he 15:00).

• Lau fakataha ʻa e talaʻofa ʻa e ʻEikí ʻi he Tokāteline mo e Ngaahi Fuakava 17:1–3, pea tokoniʻi e fānaú ke nau ʻiloʻi ʻa hono fakahoko ʻo e talaʻofa ko iá ʻi he “Ko e Fakamoʻoni ʻa e Kau Fakamoʻoni ʻe Toko Tolú” ʻi he Tohi ʻa Molomoná.

• Lau fakataha ʻa e Tokāteline mo e Ngaahi Fuakava 17:3–5 ke ʻiloʻi e meʻa naʻe kole ange kia ʻŌliva Kautele, Māteni Hālisi, mo Tēvita Uitemā ke nau fai hili ʻenau mamata ki he ʻū lauʻi peleti koulá. Ko e hā ha ngaahi moʻoni ʻe niʻihi te tau lava ʻo fakamoʻoniʻi? Talanoa kau ki he anga hoʻo vahevahe hoʻo fakamoʻoní mo e niʻihi kehé, pea fakaafeʻi ʻa e fānaú ke nau vahevahe ha faʻahinga meʻa pē kuo nau aʻusia.

Poupouʻi e Ako ʻi ʻApí

Fakaafeʻi ʻa e fānaú ke nau tuʻu ko ha fakamoʻoni ʻo ha meʻa ne nau ako ʻi he kalasí he ʻahó ni. Kole ange ke nau vahevahe e founga ne nau fai ai iá ʻi he kalasi he uike kahaʻú.

Ko Hono Fakaleleiʻi ʻEtau Founga Akoʻí

ʻAi ke longomoʻui e fānaú. Te ke lava ʻo fakatupulaki e natula longomoʻui ʻa e fānaú ʻaki hano fakaafeʻi ke nau fakatātaaʻi ha talanoa pe fai ha ngaahi ngāue ʻoku fehokotaki mo ha foʻi hiva pe veesi folofola. (Vakai, Ko e Faiako ʻi he Founga ʻa e Fakamoʻuí, 25–26.)