« ថ្ងៃទី ២៤–៣០ ខែ ឧសភា ។ គោលលទ្ធិ និងសេចក្ដីសញ្ញា ៥៨-៥៩ ៖ ‹ ត្រូវឧស្សាហ៍ចូលរួមក្នុងប្រយោជន៍ល្អ ›» ចូរមកតាមខ្ញុំ—សម្រាប់ថ្នាក់បឋមសិក្សា ៖ គោលលទ្ធិ និង សេចក្ដីសញ្ញា ឆ្នាំ ២០២១ ( ឆ្នាំ ២០២០ )

« ថ្ងៃទី ២៤–៣០ ខែ ឧសភា ។ គោលលទ្ធិ និង សេចក្តីសញ្ញា ៥៨-៥៩ » ចូរមកតាមខ្ញុំ—សម្រាប់ថ្នាក់បឋមសិក្សា

អ៊ិនឌីប៉ែនដែនស៍ មិសសួរី ដោយ អាល រ៉ោនស៍

ថ្ងៃទី ២៤–៣០ ខែ ឧសភា

គោលលទ្ធិ និង សេចក្ដីសញ្ញា ៥៨–៥៩

« ត្រូវឧស្សាហ៍ចូលរួមក្នុងប្រយោជន៍ល្អ »

នៅពេលអ្នកអាន គោលលទ្ធិ និង សេចក្ដីសញ្ញា ៥៨–៥៩សូមកត់ត្រាចំណាប់អារម្មណ៍ដែលអ្នកបានទទួល ។ ចំណាប់អារម្មណ៍ទាំងនេះអាចជួយអ្នករៀបចំផែនការដើម្បីបង្រៀនគោលលទ្ធិ ដែលអ្នកបានរៀនទៅកាន់កុមារ ។ អ្នកក៏អាចរកគំនិតខ្លះៗនៅក្នុង គម្រោងមេរៀនប្រចាំសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គល និងក្រុមគ្រួសារ ឬ នៅក្នុងទស្សនាវដ្តីសាសនាចក្រ ។

កត់ត្រាចំណាប់អារម្មណ៍របស់អ្នក

អញ្ជើញឲ្យចែកចាយ

សូមអញ្ជើញកុមារពីរបីនាក់ចែកចាយអ្វីមួយដែលពួកគេបានធ្វើនៅក្នុងសប្តាហ៍នេះដើម្បីរៀនពីព្រះគម្ពីរ ។

បង្រៀនគោលលទ្ធិ ៖ កុមារតូចៗ

គោលលទ្ធិ និង សេចក្ដីសញ្ញា ៥៨:២៧–២៨

ព្រះវរបិតាសួគ៌បានប្រទានអំណាចឲ្យយើងជ្រើសរើស ។

សូមជួយកុមារយល់ថា ព្រះវរបិតាសួគ៌ ចង់ឲ្យយើងធ្វើការជ្រើសរើសល្អ ដែលនាំមកនូវសុភមង្គលដល់ជីវិតយើង និងអ្នកដទៃ ។

សកម្មភាពដែលអាចជ្រើសរើស

សូមអានឃ្លាចេញពី គោលលទ្ធិ និងសេចក្ដីសញ្ញា ៥៨:២៧ -២៨ ដើម្បីជួយកុមារយល់ថា ពួកគេអាចជ្រើសរើសធ្វើល្អបាន ។ សូមបិទរូបរីករាយនៅម្ខាងបន្ទប់ និងមុខក្រៀមក្រំនៅម្ខាងទៀត ។ តើយើងមានអារម្មណ៍យ៉ាងណា នៅពេលជ្រើសរើសធ្វើល្អ ? សូមរៀបរាប់ពីស្ថានភាពជាច្រើន រួមជាមួយនឹងការជ្រើសរើសល្អ ឬអាក្រក់ពីចំណុចនីមួយៗ ។ បន្ទាប់ពីការរៀបរាប់ស្ថានភាព និងការជ្រើសរើសនីមួយៗ សូមឲ្យកុមារឈរជិតមុខរីករាយ ប្រសិនបើជាការជ្រើសរើសគឺល្អ ហើយឈរជិតមុខក្រៀមក្រំ បើសិនជាវាមិនល្អ ។
សូមបង្ហាញដល់កុមារនូវប្រអប់ដែលមានខ្មៅដៃពណ៌ដែលមានពណ៌ខុសៗគ្នា ។ សូមបង្ហាញប្រអប់ទីពីរដល់ពួកគេដែលមានខ្មៅដៃពណ៌តែមួយ ។ សូមសួរកុមារថាតើប្រអប់ណាមួយនៃប្រអប់ទាំងនេះដែលពួកគេចង់ប្រើ ។ ហេតុអ្វី ? សូមពន្យល់ថា ការអាចធ្វើការជ្រើសរើសបាន គឺជាពរជ័យមកពីព្រះវរបិតាសួគ៌ ។ សូមថ្លែងទីបន្ទាល់ថា ព្រះវរបិតាសួគ៌ និងព្រះយេស៊ូវ គ្រីស្ទ ស្រឡាញ់យើង ហើយចង់ឲ្យយើងធ្វើការជ្រើសរើសល្អ ។
សូមប្រាប់កុមារអំពីគ្រានៅពេលអ្នកបានធ្វើការជ្រើសរើសល្អ ហើយរៀបរាប់ពីអារម្មណ៍របស់អ្នក ។ សូមអញ្ជើញកុមារឲ្យគូររូបភាពពីសាច់រឿងរបស់អ្នក ឬសាច់រឿងរបស់ពួកគេ ។ បន្ទាប់មក សូមឲ្យពួកគេចែកចាយរូបភាពរបស់ពួកគេនៅក្នុងថ្នាក់រៀន ហើយប្រាប់ពីអ្វីដែលពួកគេបានរៀនចេញពីរឿងនោះ ។

គោលលទ្ធិ និង សេចក្ដីសញ្ញា ៥៩:៧

ព្រះវរបិតាសួគ៌ចង់ឲ្យខ្ញុំមានអំណរគុណ ។

តើអ្នកអាចជួយកុមារយល់ពីសារសំខាន់នៃការថ្លែងអំណរគុណដល់ព្រះវរបិតាសួគ៌សម្រាប់ពរជ័យរបស់ពួកគេយ៉ាងដូចម្តេច ?

សកម្មភាពដែលអាចជ្រើសរើស

សូមប្រាប់កុមារពីអ្វីមួយដែលអ្នកមានអំណរគុណ ហើយសូមឲ្យពួកគេចែកចាយរឿងដែលពួកគេមានអំណរគុណនោះផងដែរ។ សូមអាន គោលលទ្ធិ និង សេចក្ដីសញ្ញា ៥៩:៧ ហើយជួយកុមារគិតពីវិធីមួយចំនួនដែលពួកគេអាចថ្លែងអំណរគុណដល់ព្រះវរបិតាសួគ៌ចំពោះពរជ័យដែលពួកគេបានទទួល ។ តើពួកគេអាចធ្វើអ្វីយកទៅផ្ទះ ដើម្បីរំលឹកពួកគេឲ្យអរគុណដល់ព្រះវរបិតាសួគ៌សម្រាប់ពរជ័យដែលពួកគេបានទទួល ?
សូមច្រៀងជាមួយគ្នាអំពីចម្រៀងដែលមានអំណរគុណ ដូចជា « សម្រាប់សុខភាពរឹងមាំសៀវភៅចម្រៀងកុមារទំព័រ ១៨ ) ។ សូមអញ្ជើញកុមារឲ្យជំនួសពាក្យនៅក្នុងចម្រៀងជាមួយអ្វីៗដែល ពួកគេមានអំណរគុណ ។
សូមឲ្យកុមារគូររូបភាពនៃអ្វីៗដែលពួកគេមានអំណរគុណចំពោះ ។

គោលលទ្ធិ និង សេចក្ដីសញ្ញា ៥៩:៩-១២

ថ្ងៃឈប់សម្រាកគឺជាថ្ងៃរបស់ព្រះអម្ចាស់ ។

នៅពេលអ្នកចែកចាយអំណរដែលអ្នកបានទទួល តាមរយៈការរក្សាថ្ងៃឈប់សម្រាកឲ្យបរិសុទ្ធ នោះអ្នកអាចជួយកុមារមើលឃើញថ្ងៃឈប់សម្រាកថាជាថ្ងៃដែលយើងថ្វាយបង្គំព្រះអម្ចាស់ ។

សកម្មភាពដែលអាចជ្រើសរើស

សូមយករូបភាព ឬ វត្ថុដែលពិពណ៌នាពីរឿងល្អដែលយើងអាចធ្វើនៅថ្ងៃអាទិត្យដើម្បីថ្វាយបង្គំព្រះអម្ចាស់ និងទទួលបានអំណរ ។ គំនិតមួយចំនួនគឺមាននៅក្នុង គោលលទ្ធិ និង សេចក្ដីសញ្ញា ៥៩:៩–១២ និង «ការគោរពប្រតិបត្តិថ្ងៃឈប់សម្រាក» ។ (ដើម្បីកម្លាំងនៃយុវជន ទំព័រ ៣០–៣១ ) ។ ឧទាហរណ៍ ដើម្បីតំណាងឲ្យសាក្រាម៉ង់ អ្នកគួរបង្ហាញ រូបភាព ១០៨ នៅក្នុង សៀវភៅរូបភាពដំណឹងល្អ ឬពែងសាក្រាម៉ង់ និងដុំនំបុ័ង ។ តើរឿងនីមួយៗទាំងនេះជួយយើងនៅជិតព្រះវរបិតាសួគ៌ និងព្រះយេស៊ូវ គ្រីស្ទ នៅថ្ងៃឈប់សម្រាកយ៉ាងដូចម្តេច ?
សូមបំពេញទំព័រសកម្មភាពប្រចាំសប្តាហ៍ជាមួយនឹងកុមារដើម្បីផ្តល់គំនិតខ្លះៗដល់ពួកគេក្នុងការធ្វើឲ្យថ្ងៃឈប់សម្រាកជាថ្ងៃបរិសុទ្ធ ។

ការទទួលទានសាក្រាម៉ង់ជួយយើងគោរពថ្ងៃឈប់សម្រាក ។

បង្រៀនគោលលទ្ធិ ៖ កុមារធំៗ

គោលលទ្ធិ និង សេចក្ដីសញ្ញា ៥៨:២៧–២៨

សិទ្ធិជ្រើសរើសគឺជាអំណាចដើម្បីរើសយក ។

ព្រះប្រទានដល់យើងនូវអំណាចដើម្បីជ្រើសរើស ហើយជាមួយអំណាចនោះយើងអាច « នាំមកនូវសេចក្ដីសុចរិតដ៏ច្រើន » (ខទី ២៧) ។ តើអ្នកអាចជួយកុមារដែលអ្នកបង្រៀនឲ្យមើលឃើញថា ទោះបីជាមានសេចក្តីទុច្ចរិតក្នុងពិភពលោកនេះ « អំណាចគឺមាននៅក្នុងខ្លួនគេ » ដើម្បី « ប្រព្រឹត្តអំពើល្អ » ? (ខទី ២៨) ។

សកម្មភាពដែលអាចជ្រើសរើស

សូមបង្ហាញកុមារក្រដាសមួយសន្លឹកដែលមានពាក្យការជ្រើសរើសសរសេរនៅម្ខាង ហើយពាក្យផលនៅលើក្រដាសម្ខាងទៀត ។ សូមពន្យល់ថា ការជ្រើសរើសវាមានផលរបស់វា ឬ លទ្ធផលដែលកើតឡើងតាមសកម្មភាពរបស់យើងដោយឯកឯង។ សូមអញ្ជើញកុមារម្នាក់ឲ្យរើសយកក្រដាសដើម្បីបង្ហាញថា នៅពេលអ្នករើសក្រដាសឡើង នោះអ្នកទទួលបានការជ្រើសរើស ព្រមទាំងផលពីការជ្រើសរើសនោះផងដែរ ។ សូមឲ្យកុមារម្នាក់អាន គោលលទ្ធិ និង សេចក្ដីសញ្ញា ៥៨:២៧-២៨។ តើការជ្រើសរើសអ្វីដែលយើងអាចធ្វើដែលនឹង « នាំមកនូវសេចក្ដីសុចរិតដ៏ច្រើន » ឬផលល្អនោះ ? (ខទី ២៧) ។ តើនៅពេលណាខ្លះដែលយើងធ្វើការជ្រើរើសល្អ ដែលហុចផលជាការប្រទានពរជ័យដល់អ្នកដទៃ ?
សូមសរសេរឃ្លាចេញមកពី គោលលទ្ធិ និង សេចក្តីសញ្ញា ៥៨:២៧–២៨ នៅលើចម្រៀកក្រដាស ហើយចែកឲ្យកុមារម្នាក់ៗ ។ សូមអញ្ជើញពួកគេឲ្យអាន-ខគម្ពីរដោយស្ងាត់ៗ ហើយសញ្ជឹងគិតពីឃ្លារបស់ពួកគេ ។ សូមអញ្ជើញកុមារឲ្យអង្គុយតាមលំដាប់លំដោយ ដែលឃ្លារបស់ពួកគេបានប្រាកដឡើងខទី ២៧-២៨ហើយចែកចាយជាមួយគ្នានូវអ្វីដែលពួកគេបានរៀន ។ តើព្រះអម្ចាស់បញ្ជូនសារអ្វីមកកាន់យើងនៅក្នុងខគម្ពីរទាំងនេះ ?
សូមច្រៀងចម្រៀងអំពីការជ្រើសរើស ដូចជា « ជ្រើសរើសផ្លូវត្រូវសៀវភៅចម្រៀងកុមារទំព័រ ៨២ ) ។ សូមសួរសំណួរដែលជួយកុមារសញ្ជឹងគិតនូវពាក្យពេចន៍ក្នុងបទចម្រៀង — ឧទាហរណ៍ តើនរណាដែលជួយដឹកនាំអ្នកឲ្យធ្វើការជ្រើសរើសត្រឹមត្រូវ ? តើនរណាព្យាយាមធ្វើឲ្យអ្នកធ្វើការជ្រើសរើសខុស ? តើការជ្រើសរើសត្រឹមត្រូវធ្វើឲ្យអ្នកមានអារម្មណ៍យ៉ាងណា ?

គោលលទ្ធិ និង សេចក្ដីសញ្ញា ៥៩:៩-១៦

ថ្ងៃឈប់សម្រាកគឺជាថ្ងៃរបស់ព្រះអម្ចាស់ ។

ព្រះអម្ចាស់បានមានបន្ទូលថាការរក្សាថ្ងៃឈប់សម្រាកជួយយើង « កុំឲ្យប្រឡាក់[ ខ្លួនយើង ]ពីលោកិយ ( គោលលទ្ធិ និងសេចក្ដីសញ្ញា ៥៩:៩ ) ។ តើអ្នកអាចជួយកុមារដែលអ្នកបង្រៀនឲ្យគោរពថ្ងៃឈប់សម្រាក ហើយធ្វើវាឲ្យក្លាយជាសញ្ញានៃសេចក្តីស្រឡាញ់របស់ពួកគេចំពោះព្រះវរបិតាសួគ៌ និងព្រះយេស៊ូវ គ្រីស្ទ យ៉ាងដូចម្តេច ?

សកម្មភាពដែលអាចជ្រើសរើស

សូមអញ្ជើញកុមារឲ្យអាន គោលលទ្ធិ និង សេចក្តីសញ្ញា ៥៩:៩-១៦ ជាគូៗ ហើយសុំឲ្យគូនីមួយៗសរសេរអ្វីមួយដែលពួកគេបានរៀនអំពីថ្ងៃឈប់សម្រាកចេញពីខគម្ពីរនីមួយៗ ។ ពីរបីនាទីក្រោយមក សូមឲ្យគូនីមួយៗចែកចាយជាមួយថ្នាក់នូវអ្វីដែលពួកគេបានសរសេរ ។ តើយើងនឹងធ្វើអ្វីខុសពីមុននៅថ្ងៃឈប់សម្រាក ពីព្រោះតែអ្វីដែលយើងបានរៀន ?
សូមរៀបចំល្បែងផ្គូរផ្គងងាយៗដោយដកស្រង់ឃ្លាចេញពី គោលលទ្ធិ និង សេចក្ដីសញ្ញា ៥៩:៩-១៦ទៅ-ខគម្ពីរដែលត្រឹមត្រូវ ។ សូមជ្រើសរើសឃ្លាដែលព្រះអម្ចាស់ចង់ឲ្យយើងធ្វើនៅថ្ងៃឈប់សម្រាក ។ សូមពិភាក្សាពីអ្វីដែលឃ្លាទាំងនេះបង្រៀនអំពីថ្ងៃរបស់ព្រះអម្ចាស់ និងរបៀបដែលយើងអាចខិតកាន់តែជិតទ្រង់ ។
ថ្ងៃឈប់សម្រាកគឺជា « ថ្ងៃរបស់ព្រះអម្ចាស់ » (គោលលទ្ធិ និងសេចក្តីសញ្ញា ៥៩:១២)—គឺជាថ្ងៃដែលបង្ហាញថា យើងចងចាំកិច្ចការជាច្រើនរបស់ព្រះអម្ចាស់ នៅពេលយើងថ្វាយបង្គំទ្រង់ ( សូមមើល Bible Dictionary «Sabbath» ) ។ សូមជួយកុមារសញ្ជឹងគិតកិច្ចការទាំងឡាយ ដោយការអញ្ជើញពួកគេឲ្យអានវគ្គបទគម្ពីរខាងក្រោម ហើយដោយការបង្ហាញដល់ពួកគេនូវបទគម្ពីរដែលទាក់ទង ៖ លោកុប្បត្តិ ២:១–៣ ( សូមមើល សៀវភៅរូបភាពដំណឹងល្អ លេខ ៣); យ៉ូហាន ២០:១–១៩ ( សូមមើល សៀវភៅរូបភាពដំណឹងល្អ លេខ ៥៩) ។ តើមានកិច្ចការដ៏អស្ចារ្យណាខ្លះរបស់ព្រះអម្ចាស់ដែលយើងអាចចងចាំនៅថ្ងៃឈប់សម្រាក ? តើមានអ្វីខ្លះទៀតដែលយើងរៀនអំពីថ្ងៃឈប់សម្រាកចេញពី គោលលទ្ធិ និង សេចក្តីសញ្ញា ៥៩:៩-១៦ ?

លើកទឹកចិត្តឲ្យមានការរៀនសូត្រនៅឯគេហដ្ឋាន

អញ្ជើញកុមារឲ្យចែកចាយជាមួយក្រុមគ្រួសាររបស់ពួកគេនូវអ្វីមួយដែលពួកគេអាចធ្វើដើម្បីរក្សាថ្ងៃឈប់សម្រាកឲ្យបរិសុទ្ធ ។

ការកែលម្អការបង្រៀនរបស់យើង

សូមកសាងទំនុកចិត្តលើកុមារ ។ កុមារមួយចំនួនពុំមានអារម្មណ៍ថា មានសមត្ថភាពរៀនដំណឹងល្អដោយខ្លួនឯងនោះទេ ។ សូមសន្យាជាមួយកុមារថា ព្រះវិញ្ញាណបរិសុទ្ធនឹងជួយពួកគេរៀន ។

ទំព័រសកម្មភាព ៖ ថ្ងៃឈប់សម្រាកជាថ្ងៃដ៏រីករាយ