« ថ្ងៃទី ៣–៩ ខែ ឧសភា ។ គោលលទ្ធិ និងសេចក្ដីសញ្ញា ៤៦–៤៨ ៖ ‹ អ្នករាល់គ្នាត្រូវព្យាយាមស្វែងរកអំណោយទាននានាដែលវិសេសបំផុតចុះ ›» ចូរមកតាមខ្ញុំ—សម្រាប់ថ្នាក់បឋមសិក្សា ៖ គោលលទ្ធិ និង សេចក្ដីសញ្ញា ឆ្នាំ ២០២១ ( ឆ្នាំ ២០២០ )

« ថ្ងៃទី ៣–៩ ខែ ឧសភា ។ គោលលទ្ធិ និង សេចក្តីសញ្ញា ៤៦–៤៨ » ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០២១

ការប្រជុំបោះជំរុំ ដោយ វ៉ស៊ីងថុន វីតត្រីដ

ថ្ងៃទី ៣–៩ ខែ ឧសភា

គោលលទ្ធិ និង សេចក្តីសញ្ញា ៤៦–៤៨

« អ្នករាល់គ្នាត្រូវព្យាយាមស្វែងរកអំណោយទាននានាដែលវិសេសបំផុតចុះ »

សូមគិតដល់កុមារដែលអ្នកបង្រៀន កាលអ្នកអានខគម្ពីរទាំងនេះ គោលលទ្ធិ និង សេចក្តីសញ្ញា ៤៦–៤៨ ។ សូមមើល « ការបំពេញតាមតម្រូវការរបស់កុមារតូចៗ » នៅខាងដើមនៃធនធាននេះ សម្រាប់គំនិតបន្ថែមទៀតដើម្បីពិចារណា ។

កត់ត្រាចំណាប់អារម្មណ៍របស់អ្នក

អញ្ជើញឲ្យចែកចាយ

សូមឲ្យកុមារគូររូបភាពពីអ្វីដែលពួកគេបានរៀននៅក្នុងមេរៀនកាលពីសប្ដាហ៍មុន ឬរៀននៅផ្ទះកាលពីសប្ដាហ៍កន្លងទៅ ។ ប្រសិនបើចាំបាច់ សូមរំឭកពួកគេ ។ បន្ទាប់មកឲ្យពួកគេនិយាយអំពីរូបភាពរបស់ពួកគេ ។

បង្រៀនគោលលទ្ធិ ៖ កុមារតូចៗ

គោលលទ្ធិ និង សេចក្តីសញ្ញា ៤៦:២–៦

ខ្ញុំអាចជួយមនុស្សដទៃឲ្យមានអារម្មណ៍ស្វាគមន៍នៅព្រះវិហារ ។

យើងទាំងអស់គ្នា រួមទាំងកុមារ ចង់មានអារម្មណ៍ថាគេស្វាគមន៍ និងទទួលយក ។ តើអ្នកអាចប្រើខទាំងនេះដើម្បីជួយកុមារធ្វើឲ្យអ្នកដទៃមានអារម្មណ៍ថាគេស្វាគមន៍នៅព្រះវិហារដោយរបៀបណា ?

សកម្មភាពដែលអាចជ្រើសរើស

សូមអាន គោលលទ្ធិ និង សេចក្ដីសញ្ញា ៤៦:៥ ឮៗ ហើយប្រាប់កុមារតាមសម្ដីរបស់អ្នកផ្ទាល់ថាតើខនេះមានន័យយ៉ាងណា ។ បង្ហាញរូបភាពនៃមនុស្សនៅជុំវិញពិភពលោក ។ សូមសួរកុមារថា តើមនុស្សណាខ្លះក្នុងចំណោមមនុស្សទាំងនេះ ដែលព្រះវរបិតាសួគ៌មានព្រះទ័យចង់ឲ្យយើងអញ្ជើញមកឯការប្រជុំនៅព្រះវិហាររបស់យើង ។ ជួយកុមារឲ្យអនុវត្ត ដោយអញ្ជើញអ្នក ឬអញ្ជើញគ្នាទៅវិញទៅមកដើម្បីមកឯការប្រជុំ ឬសកម្មភាពនៅព្រះវិហារ ។
សូមឲ្យកុមារស្រមៃថា មិត្តភក្ដិម្នាក់មកព្រះវិហារជាលើកដំបូង ។ សូមជួយពួកគេឲ្យគិតអំពីរបៀបនានា ដែលពួកគេអាចជួយមិត្តរបស់ពួកគេមានអារម្មណ៍ថាទទួលការស្វាគមន៍ ។ សូមឲ្យពួកគេអនុវត្តនូវអ្វីដែលពួកគេនឹងនិយាយ ឬធ្វើ ប្រសិនបើពួកគេបានឃើញមិត្តម្នាក់ដើរចូលក្នុងរោងជំនុំ ឬក្នុងថ្នាក់រៀនជាលើកទីមួយ ។

គោលលទ្ធិ និង សេចក្តីសញ្ញា ៤៦:១៣–២៦

ព្រះវរបិតាសួគ៌ប្រទានពរខ្ញុំឲ្យមានអំណោយទានរបស់ទ្រង់ ។

កុមារម្នាក់ៗដែលអ្នកបង្រៀនគឺជាបុត្រាបុត្រីរបស់ព្រះវរបិតាសួគ៌ ហើយទ្រង់បានប្រទានពរដល់ពួកគេឲ្យមានអំណោយទានខាងវិញ្ញាណ ។

សកម្មភាពដែលអាចជ្រើសរើស

សូមប្រើ គោលលទ្ធិ និង សេចក្តីសញ្ញា ៤៦:១៣–២៦ ឬ « ជំពូកទី ២០ ៖ អំណោយទានទាំងឡាយនៃព្រះវិញ្ញាណ » ( ដំណើររឿងព្រះគម្ពីរគោលលទ្ធិ និង សេចក្ដីសញ្ញា ទំព័រ ៧៧–៨០ ) ដើម្បីពន្យល់ដល់កុមារនូវអំណោយទានមួយចំនួនដែលព្រះវរបិតាសួគ៌ប្រទានដល់យើង តាមរយៈព្រះវិញ្ញាណរបស់ទ្រង់ និងមូលហេតុដែលទ្រង់ប្រទានឲ្យ ។ បើអាចធ្វើទៅបាន សូមបង្ហាញវត្ថុ ឬរូបភាពដែលតំណាងឲ្យអំណោយទាននីមួយៗ ។ ផ្អាកម្តងម្កាលដើម្បីសួរដល់កុមារថាតើអំណោយទានទាំងនេះអាចផ្ដល់ពរដល់មនុស្សម្នាក់យ៉ាងដូចម្ដេច ។
សូមផ្ដល់ដល់កុមារម្នាក់នូវអ្វីមួយដែលអាចចែកចាយបាន ដូចជានំប៉័ងមួយដុំ ឬរបស់លេងពីរ ។ សូមឲ្យកុមារចែកចាយនូវអ្វីដែលអ្នកបានឲ្យគេ ជាមួយនឹងសមាជិកថ្នាក់ម្នាក់ទៀត ។ សូមពន្យល់ថា ព្រះវរបិតាសួគ៌ប្រទានអំណោយទានដល់យើង ហើយទ្រង់មានព្រះទ័យចង់ឲ្យយើងប្រើវាដើម្បីជួយដល់មនុស្សដទៃ ។ សូមប្រាប់កុមារអំពីគ្រាមួយ ដែលអ្នកបានទទួលពរ ដោយសារមនុស្សម្នាក់បានចែកចាយអំណោយទានខាងវិញ្ញាណរបស់គាត់ ។

បង្រៀនគោលលទ្ធិ ៖ កុមារធំៗ

គោលលទ្ធិ និង សេចក្ដីសញ្ញា ៤៦:៨–២៦

ព្រះវរបិតាសួគ៌ប្រទានអំណោយទានខាងវិញ្ញាណដល់ខ្ញុំ ដើម្បីផ្ដល់ពរដល់អ្នកដទៃទៀត ។

អំណោយទានទាំងឡាយដែលបានពិពណ៌នានៅក្នុង គោលលទ្ធិ និង សេចក្ដីសញ្ញា ៤៦—និងអំណោយទានខាងវិញ្ញាណជាច្រើនផ្សេងទៀត—គឺមកពីព្រះតាមរយៈព្រះវិញ្ញាណបរិសុទ្ធ ។ អ្នកអាចជួយកុមាររកមើលអំណោយទាំងឡាយដែលពួកគេត្រូវបានប្រទានឲ្យ—និងអំណោយទានផ្សេងទៀតដែលពួកគេអាចស្វែងរកបាន—ពេលអ្នកសិក្សា គោលលទ្ធិ និង សេចក្ដីសញ្ញា ៤៦ ជាមួយគ្នា ។

សកម្មភាពដែលអាចជ្រើសរើស

សរសេរអំណោយទាននៃព្រះវិញ្ញាណមួយចំនួនដែលមាននៅក្នុង គោលលទ្ធិ និង សេចក្ដីសញ្ញា ៤៦:១៣–២៦ និង មាត្រានៃសេចក្ដីជំនឿ ១:៧ នៅលើចម្រៀកក្រដាសទាំងឡាយ ហើយលាក់វានៅកន្លែងផ្សេងៗក្នុងបន្ទប់ ។ សូមឲ្យកុមារម្នាក់ៗស្វែងរកក្រដាសទាំងនោះ ហើយរកមើលខទាំងនោះ ថាតើអំណោយទាននោះស្ថិតនៅកន្លែងណានៅក្នុងព្រះគម្ពីរ ។ បន្ទាប់មក សូមអាន គោលលទ្ធិ និង សេចក្ដីសញ្ញា ៤៦:៨–៩, ១២ ជាមួយគ្នា ។ ហេតុអ្វីព្រះវរបិតាសួគ៌ប្រទានអំណោយទានខាងវិញ្ញាណដល់យើង ?
សូមជួយកុមារសរសេរនៅលើក្ដារខៀននូវអំណោយទាននៃព្រះវិញ្ញាណដែលបានលើកឡើងនៅក្នុង គោលលទ្ធិ និង សេចក្ដីសញ្ញា ៤៦ ។ កាលដែលបានសរសេរអំណោយទាននីមួយៗហើយ សូមនិយាយអំពីរបៀបដែលអំណោយទាននោះអាចត្រូវបានប្រើប្រាស់ដើម្បីផ្ដល់ពរដល់អ្នកដទៃទៀត ។ ការពិពណ៌នានៅក្នុង « ជំពូកទី ២០ ៖ អំណោយទានទាំងឡាយនៃព្រះវិញ្ញាណ » ( ដំណើររឿងព្រះគម្ពីរគោលលទ្ធិ និង សេចក្ដីសញ្ញា ទំព័រ ៧៧–៨០ ) អាចជួយ ។ សូមប្រាប់កុមារថា ពួកគេម្នាក់ៗមានអំណោយទានខាងព្រះវិញ្ញាណ ។ សូមលើកទឹកចិត្តពួកគេឲ្យសូមដល់ព្រះវរបិតាសួគ៌ដើម្បីជួយពួកគេស្គាល់អំណោយទានរបស់ពួកគេ ហើយប្រើវាដើម្បីជួយដល់មនុស្សដទៃទៀត ។

គោលលទ្ធិ និង សេចក្ដីសញ្ញា ៤៧:១, ៣

ខ្ញុំអាចកត់ត្រាប្រវត្តិសាស្ត្ររបស់ខ្ញុំ ។

ព្រះអម្ចាស់បានហៅ យ៉ូហាន វិតមើរ ឲ្យរក្សាប្រវត្តិសាស្ត្រសាសនាចក្រ ។ ថ្ងៃនេះយើងមានពរក្រៃលែង ដោយសារតែប្រវត្តិសាស្ត្រសាសនាចក្រដែលបានរក្សាទុកជាច្រើនឆ្នាំមកនេះ ។

សកម្មភាពដែលអាចជ្រើសរើស

សូមអាន គោលលទ្ធិ និង សេចក្ដីសញ្ញា ៤៧:១, ៣ ជាមួយគ្នា ហើយសុំឲ្យកុមាររកមើលអ្វីដែលព្រះអម្ចាស់បានមានព្រះទ័យចង់ឲ្យ យ៉ូហាន វិតមើរ ធ្វើ ។ តើពាក្យ « ជានិច្ច » នៅក្នុង ខទី ៣ មានន័យយ៉ាងណា ? តើយើងមានពរជ័យដោយរបៀបណាដោយការដឹងពីប្រវត្តិសាស្ត្រសាសនាចក្រ ?
ប្រសិនបើកុមារដែលអ្នកបង្រៀនសរសេរក្នុងទិនានុប្បវត្តិ សុំឲ្យពួកគេនិយាយអំពីអ្វីដែលពួកគេសរសេរនៅក្នុងទិនានុប្បវត្តិរបស់ពួកគេ ។ កុមារអាចរីករាយនឹងស្ដាប់រឿងរ៉ាវពីទិនានុប្បវត្តិពីកុមារភាពរបស់អ្នក ឬពីទិនានុប្បវត្តិរបស់ដូនតាម្នាក់ ។
បង្ហាញកុមារពីឧទាហរណ៍នៃរបៀបដែលពួកគេអាចរក្សាប្រវត្តិសាស្ត្រនៃជីវិតរបស់ពួកគេ ។ ឧទាហរណ៍ ពួកគេអាចសរសេរនៅក្នុងសៀវភៅមួយ ប្រមូលផ្ដុំរូបភាពក្នុងសៀវភៅមួយ វាយបញ្ចូលក្នុងកុំព្យូរទ័រ ឬថតជាសម្លេង ឬវីដេអូ ។ សូមជួយកុមារឲ្យធ្វើបញ្ជីមួយនៃអ្វីៗដែលល្អដើម្បីបញ្ចូលទៅក្នុងប្រវត្តិសាស្ត្រផ្ទាល់ខ្លួនរបស់ពួកគេ ដូចជាទីបន្ទាល់របស់ពួកគេអំពីព្រះយេស៊ូវគ្រីស្ទ ។ សូមអញ្ជើញកុមារឲ្យធ្វើផ្ទាំងប័ណ្ណប្រកាសមួយដើម្បីយកទៅផ្ទះ ដោយមាននូវគំនិតទាំងនេះដើម្បីរំឭកពួកគេឲ្យកត់ត្រាប្រវត្តិសាស្ត្រផ្ទាល់ខ្លួនរបស់ពួកគេ ។

ទិនានុប្បវត្តិគឺជារបៀបមួយដែលយើងអាចធ្វើដើម្បីរក្សាប្រវត្តិសាស្ត្រមួយ ។

គោលលទ្ធិ និង សេចក្ដីសញ្ញា ៤៨:១–៤

ខ្ញុំអាចជួយមនុស្សដទៃដោយការចែករំលែកនូវអ្វីដែលខ្ញុំបានទទួល ។

ព្រះអម្ចាស់បានលើកទឹកចិត្តពួកបរិសុទ្ធនៅអូហៃអូ ឲ្យជួយពួកបរិសុទ្ធផ្សេងៗទៀត ដោយការចែករំលែកដី និងប្រាក់កាសរបស់ពួកគេ ។ តើអ្នកអាចប្រើខគម្ពីរទាំងនេះដើម្បីជួយកុមារស្វែងរករបៀបដើម្បីចែកចាយជាមួយអ្នកដទៃទៀតនូវអ្វីដែលព្រះប្រទានដល់ពួកគេដោយរបៀបណា ?

សកម្មភាពដែលអាចជ្រើសរើស

បង្ហាញផែនទីរដ្ឋញូវយ៉ក និងរដ្ឋអូហៃអូដល់កុមារ ( សូមមើល គម្រោងមេរៀនខែមេសា ទី ១២–១៨ នៅក្នុង ចូរមកតាមខ្ញុំ—សម្រាប់បុគ្គល និងក្រុមគ្រួសារ ) ។ សូមពន្យល់ថាព្រះអម្ចាស់បានបញ្ជាពួកបរិសុទ្ធនៅទីក្រុងញូវយ៉ក និងតំបន់ផ្សេងទៀតដើម្បីប្រមូលផ្ដុំគ្នានៅរដ្ឋអូហៃអូ ប៉ុន្តែពួកគេជាច្រើនពុំមានប្រាក់គ្រប់គ្រងដើម្បីសង់ផ្ទះពេលពួកគេទៅដល់ទីនោះទេ ។ សូមជួយកុមារឲ្យរកមើលនៅក្នុង គោលលទ្ធិ និងសេចក្ដីសញ្ញា ៤៨:១-៤ ពីអ្វីដែលព្រះបានសុំដល់ពួកបរិសុទ្ធនៅរដ្ឋអូហៃអូឲ្យធ្វើដើម្បីជួយ ។ សូមសួរកុមារថា តើពួកគេនឹងចង់ធ្វើអ្វីដើម្បីជួយ ប្រសិនបើពួកគេរស់នៅរដ្ឋអូហៃអូនៅជំនាន់នោះ ។ តើយើងបានទទួលអ្វីខ្លះនៅសព្វថ្ងៃនេះ ដែលយើងអាចប្រើប្រាស់ដើម្បីជួយអ្នកដទៃទៀត ? ឧទាហរណ៍ សូមមើល « The Coat » ( វីដេអូ ChurchofJesusChrist.org ) ។
សូមអាន គោលលទ្ធិ និង សេចក្ដីសញ្ញា ៤៨:៤ ជាមួយគ្នា ហើយសុំឲ្យកុមាររកមើលអ្វីដែលព្រះអម្ចាស់បានសុំឲ្យពួកបរិសុទ្ធធ្វើដើម្បីជួយដល់កិច្ចការរបស់ទ្រង់ ។ សូមពន្យល់ថា ការសន្សំប្រាក់នឹងអនុញ្ញាតឲ្យពួកគេទិញដី ហើយសង់ព្រះវិហារបរិសុទ្ធមួយនៅថ្ងៃណាមួយ ។ តើយើងអាចសន្សំប្រាក់ ដើម្បីយើងអាចជួយនៅក្នុងកិច្ចការរបស់ព្រះអម្ចាស់អ្វីខ្លះ ? សូមបង្ហាញវីដេអូ « First Things First » ( ChurchofJesusChrist.org ) ហើយពិភាក្សាពីរបៀបដែលកុមារនៅក្នុងវីដេអូបានបំពេញបទបញ្ញត្តិរបស់ព្រះអម្ចាស់ដែលឲ្យសន្សំប្រាក់នោះ ។

លើកទឹកចិត្តឲ្យមានការរៀនសូត្រនៅឯគេហដ្ឋាន

សូមលើកទឹកចិត្តឲ្យកុមារសួរសមាជិកគ្រួសារនៅផ្ទះ អំពីអំណោយទានខាងវិញ្ញាណដែលពួកគេមានអារម្មណ៍ថាពួកគេត្រូវបានប្រទានឲ្យ ។ សូមលើកទឹកចិត្តកុមារឲ្យអធិស្ឋាន និងស្វែងរកអំណោយទាននៃព្រះវិញ្ញាណដែលពួកគេចង់អភិវឌ្ឍផងដែរ ។

ការកែលម្អការបង្រៀនរបស់យើង

សូមជួយកុមារឲ្យរៀនចេញពីព្រះគម្ពីរ ។ កុមារតូចៗ ប្រហែលជាពុំអាចអានបានច្រើនទេ ប៉ុន្តែអ្នកនៅតែអាចជួយពួកគេនៅក្នុងការរៀនសូត្រចេញមកពីបទគម្ពីរ ។ ឧទាហរណ៍ ពួកគេអាចអានវគ្គបទគម្ពីរមួយ រួចអញ្ជើញពួកគេឲ្យក្រោកឈរឡើង ហើយលើកដៃនៅពេលពួកគេឮពាក្យ ឬឃ្លាជាក់លាក់មួយ ។

ទំព័រសកម្មភាព ៖ ព្រះបានប្រទានអំណោយទានព្រះវិញ្ញាណដល់ខ្ញុំ