« ថ្ងៃទី ១៥–២១ ខែ វិច្ឆិកា ។ គោលលទ្ធិ និង សេចក្ដីសញ្ញា ១៣៣–១៣៤ ៖ ‹ ចូររៀបចំសម្រាប់ការយាងមកនៃប្ដីថ្មោងថ្មីចុះ › » ចូរមកតាមខ្ញុំ—សម្រាប់ថ្នាក់បឋមសិក្សា ៖ គោលលទ្ធិ និង សេចក្ដីសញ្ញា ឆ្នាំ ២០២១ ( ឆ្នាំ ២០២០ )

« ថ្ងៃទី ១៥–២១ ខែ វិច្ឆិកា ។ គោលលទ្ធិ និង សេចក្តីសញ្ញា ១៣៣–១៣៤ » ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០២១

ការយាងមកនៃប្តីថ្មោងថ្មី ដោយអេលីស្សាប៊ែត ហ្គីបប៊ុន

ថ្ងៃទី ១៥–២១ ខែ វិច្ឆិកា

គោលលទ្ធិ និង សេចក្តីសញ្ញា ១៣៣–១៣៤

« ចូររៀបចំសម្រាប់ការយាងមកនៃប្ដីថ្មោងថ្មីចុះ »

សូមពិចារណាសេចក្តីត្រូវការរបស់កុមារដែលអ្នកបង្រៀន—ទាំងអ្នកដែលកំពុងសិក្សានៅក្នុងថ្នាក់ និងកំពុងរៀននៅឯផ្ទះ ហើយនឹងអ្នកដែលប្រហែលមិនធ្វើទាំងពីរ ។ តើអ្នកអាចជួយពួកគេបង្រៀនគ្នាទៅវិញទៅមកអំពីអ្វីដែលពួកគេកំពុងរៀនយ៉ាងដូចម្តេច ?

កត់ត្រាចំណាប់អារម្មណ៍របស់អ្នក

អញ្ជើញឲ្យចែកចាយ

សូមបង្ហាញរូបភាពមួយដែលអ្នកបានប្រើនៅក្នុងមេរៀនថ្នាក់បឋមសិក្សានាពេលថ្មីៗនេះ ហើយអញ្ជើញកុមារឲ្យចែកចាយអ្វីដែល ពួកគេចងចាំពីមេរៀននេះ ។

បង្រៀនគោលលទ្ធិ ៖ កុមារតូចៗ

គោលលទ្ធិ និង សេចក្ដីសញ្ញា ១៣៣:១៩–២១, ២៥

ព្រះយេស៊ូវគ្រីស្ទនឹងយា ងមកម្ដងទៀត ។

នៅក្នុង កណ្ឌទី ១៣៣ ព្រះអម្ចាស់បានពិពណ៌នាពីការយាងមកជាលើកទីពីរ និងអញ្ជើញរាស្រ្តរបស់ទ្រង់ឲ្យរៀបចំខ្លួនសម្រាប់ព្រឹត្តិការណ៍ដ៏រុងរឿងនោះ ។ តើអ្នកអាចជួយកុមារឲ្យទន្ទឹងរង់ចាំការយាងមកវិញរបស់ព្រះអង្គសង្រ្គោះយ៉ាងដូចម្តេច ?

សកម្មភាពដែលអាចជ្រើសរើស

សូមលាក់រូបភាពនៃការយាងមកជាលើកទីពីររបស់ព្រះអង្គសង្រ្គោះនៅពីក្រោយផ្ទាំងក្រណាត់ សូមធ្វើដូចជាផ្ទាំងក្រណាត់នោះគឺជាវាំងនន ( អ្នកអាចប្រើប្រាស់រូបភាពនៅក្នុង គម្រោងមេរៀនប្រចាំសប្តាហ៍នេះ នៅក្នង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ឬ សៀវភៅរូបភាពសិល្បៈដំណឹងល្អ ល.រ ៦៦ ) ។ សូមអញ្ជើញកុមារឲ្យប្តូរវេនគ្នាបើក « វាំងនន » ទៅមួយចំហៀង ហើយសម្តែងថាពួកគេកំពុងមើលតាមបង្អួចទៅខាងក្រៅ ។ សូមឲ្យពួកគេចែកចាយថាតើពួកគេនឹងមានអារម្មណ៍យ៉ាងណា ប្រសិនបើពួកគេមើលតាមបង្អួចទៅខាងក្រៅ ហើយបានឃើញព្រះយេស៊ូវ កំពុងយាងចុះពីស្ថានសួគ៌នោះ ។ សូមអានឃ្លានេះ « ចូរចេញទៅទទួលលោកចុះ » ( ខទី ១៩ ) ហើយជួយកុមារឲ្យអានឃ្លានេះឡើងវិញ ។
នៅខាងក្រោមកៅអ៊ីរបស់កុមារម្នាក់ សូមលាក់រូបភាពដែលពិពណ៌នាពីអ្វីមួយដែលយើងអាចធ្វើបាន ដើម្បីរៀបចំសម្រាប់ការយាងមកជាលើកទីពីររបស់ព្រះយេស៊ូវគ្រីស្ទ ( ដូចជា ការអានព្រះគម្ពីរ ចែកចាយដំណឹងល្អ ឬបម្រើក្រុមគ្រួសាររបស់យើង ) ។ សូមឲ្យកុមារស្វែងរករូបភាព ហើយនិយាយអំពីរបៀបដែលការធ្វើរឿងទាំងនេះជួយយើងឲ្យត្រៀមខ្លួនជាស្រេចដើម្បីជួបព្រះអង្គសង្រ្គោះ នៅពេលទ្រង់យាងត្រឡប់មកវិញ ។
សូមច្រៀងអំពីការយាងមកជាលើកទីពីរ ដូចជាបទ « ពេលទ្រង់យាងមកម្តងទៀត » សៀវភៅចម្រៀងកុមារ ទំព័រ ៤៦–៤៧ ) ។ សូមចែកចាយសេចក្តីស្រឡាញ់របស់អ្នកចំពោះព្រះអង្គសង្រ្គោះ និងអារម្មណ៍របស់អ្នកអំពីការយាងមកវិញរបស់ទ្រង់នៅលើផែនដីនេះ ។ សូមអញ្ជើញកុមារឲ្យចែកចាយអារម្មណ៍របស់ពួកគេផងដែរ ។

គោលលទ្ធិ និង សេចក្តីសញ្ញា ១៣៣:៥២–៥៣

ព្រះយេស៊ូវគ្រីស្ទមានសេចក្តីស្រឡាញ់ និងមានសេចក្តីសណ្ដោស ។

ខគម្ពីរទាំងនេះពិពណ៌នានូវវិធីមួយចំនួនដែលព្រះអម្ចាស់បានបង្ហាញ « សេចក្ដីស្រឡាញ់របស់ទ្រង់ និងដោយសេចក្ដីមេត្តាករុណា » របស់ទ្រង់ចំពោះប្រជារាស្រ្តរបស់ទ្រង់ ។ តើអ្នកអាចធ្វើអ្វីខ្លះដើម្បីជួយកុមារឲ្យទទួលអារម្មណ៍នៃសេចក្តីស្រឡាញ់របស់ព្រះអង្គសង្រ្គោះសម្រាប់ពួកគេ ?

សកម្មភាពដែលអាចជ្រើសរើស

សូមបង្ហាញរូបភាពដែលបង្ហាញថាព្រះយេស៊ូវ មានសេចក្តីស្រឡាញ់ និងមានសេចក្តីសណ្ដោស ( សូមមើល សៀវភៅរូបភាពដំណឹងល្អ ល.រ ៤២,៤៧ ) ។ សូមឲ្យកុមារចែកចាយរឿងផ្សេងទៀត ដែលព្រះយេស៊ូវបានធ្វើដើម្បីបង្ហាញសេចក្តីស្រឡាញ់របស់ទ្រង់ និងសេចក្តីសណ្ដោសរបស់ទ្រង់ ។ សូមអានឃ្លា « ពួកគេនឹងថ្លែងប្រាប់ពីសេចក្ដីសប្បុរសរបស់ព្រះអម្ចាស់របស់គេ » ( ខទី ៥២ ) ហើយជួយកុមារឲ្យគិតពីរបៀបដែលពួកគេអាចប្រាប់អ្នកដទៃអំពីសេចក្តីស្រឡាញ់របស់ព្រះអង្គសង្រ្គោះ ។
សូមច្រៀងចម្រៀងអំពីសេចក្តីស្រឡាញ់របស់ព្រះអង្គសង្រ្គោះ ដូចជាបទ « ព្រះយេស៊ូវជាសម្លាញ់យើង » ( សៀវភៅចម្រៀងកុមារ ទំព័រ ៣៧ ) ។ សូមចែកចាយទីបន្ទាល់របស់អ្នកពីរបៀបដែលព្រះអង្គសង្រ្គោះបានបង្ហាញសេចក្តីស្រឡាញ់របស់ទ្រង់ចំពោះអ្នក ។

គោលលទ្ធិ និង សេចក្តីសញ្ញា ១៣៤:៥

ព្រះអម្ចាស់មានព្រះទ័យចង់ឲ្យខ្ញុំគោរពតាមក្រិត្យវិន័យ ។

កុមារតូចៗជាញឹកញាប់មានវិន័យដើម្បីធ្វើតាមនៅឯផ្ទះ ឯសាលារៀន និងកន្លែងផ្សេងទៀត ។ អ្នកអាចជួយពួកគេឲ្យយល់ថា ព្រះអម្ចាស់រំពឹងឲ្យយើងធ្វើតាមវិន័យ និងក្រិត្យវិន័យទាំងឡាយនៅក្នុងសហគមន៍ និងប្រទេសជាតិរបស់យើង ។

សកម្មភាពដែលអាចជ្រើសរើស

សូមអញ្ជើញកុមារឲ្យលេងល្បែងសាមញ្ញមួយដោយពុំចាំបាច់ធ្វើតាមវិន័យណាមួយឡើយ ហើយបន្ទាប់មក សូមឲ្យពួកគេលេងដោយមានការដាក់វិន័យ ។ តើវិន័យជួយយើងយ៉ាងដូចម្តេចខ្លះ ? សូមបង្ហាញអំណរគុណរបស់អ្នកចំពោះច្បាប់ក្នុងប្រទេស ។
សូមជួយកុមារឲ្យសូត្រមាត្រានៃសេចក្តីជំនឿ ។ សូមបញ្ជាក់ពាក្យគន្លឹះ ដូចជា « ការគោរព ការប្រតិបត្តិ និងការគាំទ្រ » ហើយជជែកជាមួយកុមារអំពីអត្ថន័យនៃពាក្យទាំងនោះ ។ សូមចែកចាយជាមួយពួកគេពីមូលហេតុដែលវាមានសារៈសំខាន់ដើម្បីគោរពតាមច្បាប់ ។

បង្រៀនគោលលទ្ធិ ៖ កុមារធំៗ

គោលលទ្ធិ និង សេចក្ដីសញ្ញា ១៣៣:៤–៥, ១៤–១៥

ព្រះអម្ចាស់សព្វព្រះទ័យឲ្យខ្ញុំមានភាពស្អាតបាត ។

គោលលទ្ធិ និង សេចក្តីសញ្ញា ១៣៣ អាច ជួយកុមារឲ្យយល់ពីរបៀបដើម្បីធ្វើឲ្យខ្លួនពួកគេស្អាតពីឥទ្ធិពលខាងលោកិយដែលនៅជុំវិញខ្លួនពួកគេ ។

សកម្មភាពដែលអាចជ្រើសរើស

សូមអញ្ជើញកុមារឲ្យអាន « បាបិល, បាប៊ីឡូន » នៅក្នុងសេចក្តីណែនាំដល់បទគម្ពីរទាំងឡាយ ( scriptures.ChurchofJesusChrist.org ) ដើម្បីស្វែងរកថាតើអ្វីទៅជាបាប៊ីឡូន ហើយវាតំណាងឲ្យអ្វី ។ បន្ទាប់មក សូមអាន គោលលទ្ធិ និង សេចក្ដីសញ្ញា ១៣៣:៤–៥, ១៤–១៥ ជាមួយគ្នា ។ តើវាមានន័យយ៉ាងណា « ចូរចេញពីក្រុងបាប៊ីឡូន » ? ( ខទី ៥ ) ។ តើកន្លែងណា និងស្ថានភាពណាខ្លះដែលព្រះអម្ចាស់មានព្រះទ័យចង់ឲ្យយើងនៅឲ្យឆ្ងាយពីវា ? តើយើងអាចធ្វើអ្វីដើម្បីជៀសវាងពីវា ?
សូមបិទសញ្ញាមួយនៅមួយចំហៀងបន្ទប់ដែលនិយាយថា « ស៊ីយ៉ូន » ហើយមួយ ចំហៀងបន្ទប់ទៀតបិទសញ្ញាដែលនិយាយថា « បាប៊ីឡូន » ។ សូមសរសេរពាក្យផ្សេងៗនៅលើស្លាកក្រដាសចេញពី គោលលទ្ធិ និង សេចក្ដីសញ្ញា ១៣៣:៤–៥, ១៤–១៥ ដែលពិពណ៌នាអំពីស៊ីយ៉ូន ឬបាប៊ីឡូន ( ដូចជា « អំពើទុច្ចរិត » , « ជ្រះស្អាត » ឬ « សេចក្តីបំផ្លិចបំផ្លាញ » ) ហើយសូមអញ្ជើញកុមារឲ្យដាក់ក្រដាសនីមួយៗនៅតាមសញ្ញាដែលត្រឹមត្រូវ ។

គោលលទ្ធិ និង សេចក្ដីសញ្ញា ១៣៣:១៩–២៥, ៤៦–៥២

ព្រះយេស៊ូវគ្រីស្ទនឹងសោយរាជ្យនៅលើផែនដីនេះ ។

អែលឌើរ ឌី ថត គ្រីស្ទូហ្វឺសុន បានមានប្រសាសន៍ថា ៖ « វាសំខាន់ខ្លាំងណាស់ដើម្បីរៀបចំពិភពលោកនេះសម្រាប់ការយាងមកជាលើកទីពីររបស់ព្រះអម្ចាស់យេស៊ូវគ្រីស្ទ » ( « ការត្រៀមខ្លួនសម្រាប់ការយាងត្រឡប់មកវិញរបស់ព្រះអម្ចាស់ » Ensign ឬ Liahona ខែ ឧសភា ឆ្នាំ ២០១៩ ទំព័រ ៨១ ) ។ តើអ្នកនឹងជួយកុមារឲ្យយល់ពីរបៀបដែលពួកគេអាចចូលរួមនៅក្នុងកិច្ចការដ៏សំខាន់នេះយ៉ាងដូចម្តេច ?

សកម្មភាពដែលអាចជ្រើសរើស

សូមបង្ហាញរូបភាពចេញពី គម្រោងមេរៀនសប្ដាហ៍នេះនៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ហើយសូមអញ្ជើញកុមារឲ្យធ្វើបញ្ជីនៃអ្វីៗដែលពួកគេដឹងអំពីការយាងមកជាលើកទីពីររបស់ព្រះយេស៊ូវគ្រីស្ទ ។ បន្ទាប់មក សូមប្រើ គោលលទ្ធិ និង សេចក្ដីសញ្ញា ១៣៣:១៩–២៥, ៤៦–៥២ សូមអញ្ជើញពួកគេឲ្យបន្ថែមរឿងទាំងនេះទៅនឹងបញ្ជីរបស់ពួកគេ ។ សូមចែកចាយទីបន្ទាល់របស់អ្នកថាការយាងមកជាលើកទីពីរនឹងជាថ្ងៃដ៏រីករាយមួយសម្រាប់ពួកសុចរិត ។
ដើម្បីជួយកុមារឲ្យយល់ខទី ១៩ សូមនិយាយជាមួយពួកគេអំពីរបៀបកូនក្រមុំអាចរៀបចំខ្លួនសម្រាប់ថ្ងៃអាពាហ៍ពិពាហ៍របស់ពួកគេ ( ប្រហែលនរណាម្នាក់ដែលទើបរៀបការថ្មីៗនេះអាចជួយនៅក្នុងការសន្ទនានេះ ) ។ តើយើងដូចជាកូនក្រមុំដែលរៀបចំខ្លួន « សម្រាប់ការយាងមកនៃប្ដីថ្មោងថ្មី » ដែលជាព្រះយេស៊ូវគ្រីស្ទយ៉ាងដូចម្តេច ? ប្រសិនបើអ្នកគិតថាវាអាចមានប្រយោជន៍ សូមរម្លឹកជាមួយកុមារនូវរឿងប្រៀបប្រដូចនៃក្រមុំព្រហ្មចារីយទាំងដប់នាក់ ( សូមមើល ម៉ាថាយ ២៥:១–១៣ ) ។ ហេតុអ្វីវាសំខាន់ដែលយើងត្រូវត្រៀមខ្លួនសម្រាប់ការយាងមកជាលើកទីពីររបស់ព្រះអង្គសង្គ្រោះ ? តើយើងអាចធ្វើអ្វីខ្លះដើម្បីរៀបចំខ្លួន ?

គោលលទ្ធិ និង សេចក្ដីសញ្ញា ១៣៤:១–២

ព្រះអម្ចាស់មានព្រះទ័យចង់ឲ្យខ្ញុំគោរពតាមក្រិត្យវិន័យ ។

ទោះបីជារដ្ឋាភិបាលមានទម្រង់ខុសៗគ្នានៅជុំវិញពិភពលោកក្តី ក៏ព្រះអម្ចាស់មានព្រះទ័យចង់ឲ្យយើង « ទ្រទ្រង់រដ្ឋាភិបាល ដែល [ យើង ] អាស្រ័យនៅ » ដែរ ( គោលលទ្ធិ និង សេចក្ដីសញ្ញា ១៣៤:៥ ) ។

សកម្មភាពដែលអាចជ្រើសរើស

សូមអញ្ជើញកុមារឲ្យសរសេរវិន័យ ឬច្បាប់ដែលពួកគេគោរពតាម ។ តើជីវិតនេះនឹងទៅជាបែបណា ប្រសិនបើគ្មាននរណាម្នាក់គោរពតាមច្បាប់ទាំងនេះ ? សូមអាន គោលលទ្ធិ និង សេចក្ដីសញ្ញា ១៣៤:១–២ ជាមួយកុមារ ដោយជួយពួកគេឲ្យយល់រាល់ពាក្យ ឬឃ្លាណាដែលពួកគេអាចមិនយល់ ។ ហេតុអ្វីព្រះអម្ចាស់មានព្រះទ័យចង់ឲ្យយើងមានរដ្ឋាភិបាល និងច្បាប់ទាំងឡាយ ?
សូមសរសេរពាក្យ ឬ ឃ្លាចេញពី មាត្រានៃសេចក្តីជំនឿទីដប់មួយ និង ទីដប់ពីរ នៅលើក្រដាសមួយសន្លឹក ។ សូមច្របល់ក្រដាសចូលគ្នា ហើយសូមឲ្យកុមារធ្វើការជាមួយគ្នាដើម្បីរៀបក្រដាសនោះឲ្យត្រូវតាមលំដាប់លំដោយ ។ តើយើងអាចបង្ហាញថា យើងជឿលើអ្វីដែលមាត្រានៃសេចក្តីជំនឿទាំងនេះបង្រៀនតាមរបៀបណា ?

លើកទឹកចិត្តឲ្យមានការរៀនសូត្រនៅឯគេហដ្ឋាន

សូមឲ្យសំណួរមួយទៅកុមារម្នាក់ៗទៅសួរសមាជិកគ្រួសារម្នាក់នៅឯផ្ទះ ។ ឧទាហរណ៍ ប្រសិនបើអ្នករៀនអំពីការយាងមកជាលើកទីពីររបស់ព្រះអង្គសង្រ្គោះ កុមារអាចសួរថា « តើយើងអាចធ្វើអ្វីដើម្បីរៀបចំសម្រាប់ការយាងមកម្តងទៀតរបស់ព្រះយេស៊ូវ ? »

ការកែលម្អការបង្រៀនរបស់យើង

ព្យាយាមយល់ពីកុមារដែលអ្នកបង្រៀន ។ អ្នកស្គាល់កុមារដែលអ្នកបង្រៀន ។ គំនិតនៅក្នុងគម្រោងមេរៀនទាំងនេះអាចត្រូវកែសម្រួលដើម្បីឲ្យត្រូវតាមតម្រូវការរបស់ពួកគេ ។ ដើម្បីជួយអ្នក សូមយោងទៅសកម្មភាពទាំងអស់ដែលបានដាក់នៅក្នុងគម្រោងមេរៀននេះ មិនត្រឹមតែសកម្មភាពដែលបានលើកឡើងតាមអាយុកុមារដែលអ្នកបង្រៀននោះទេ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ៧ ) ។

ទំព័រសកម្មភាព ៖ ព្រះអម្ចាស់សព្វព្រះទ័យឲ្យខ្ញុំគោរពតាមក្រិត្យវិន័យ