« ថ្ងៃទី ១១–១៧ ខែ មីនា ។ ម៉ាថាយ ១០–១២, ម៉ាកុស ២, លូកា ៧, ១១ ៖ ‹ ព្រះយេស៊ូវទ្រង់ចាត់ពួក ១២ នាក់នេះឲ្យទៅ › » ចូរមកតាមខ្ញុំ—សម្រាប់ថ្នាក់បឋមសិក្សា ៖ ព្រះគម្ពីរសញ្ញាថ្មី ឆ្នាំ ២០១៩ ( ២០១៩ )

« ថ្ងៃទី ១១–១៧ ខែ មីនា ។ ម៉ាថាយ ១០–១២, ម៉ាកុស ២, លូកា ៧, ១១ » ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០១៩

ថ្ងៃទី ១១–១៧ ខែ មីនា

ម៉ាថាយ ១០–១២; ម៉ាកុស ២; លូកា ៧; ១១

« ព្រះយេស៊ូវទ្រង់ចាត់ពួក ១២ នាក់នេះឲ្យទៅ »

កាលអ្នកអាន ម៉ាថាយ ១០–១២; ម៉ាកុស ២ និង លូកា ៧; ១១ អ្នកនឹងទទួលបានការបំផុសនានាមកពីព្រះវិញ្ញាណបរិសុទ្ធ ដែលនឹងជួយអ្នកឲ្យរៀបចំ ។ ការបំផុសទាំងនេះ រួមជាមួយនឹង ចូរមកតាមខ្ញុំ—សម្រាប់បុគ្គល និងក្រុមគ្រួសារ ព្រមទាំងគម្រោងមេរៀននេះ អាចជួយអ្នកក្នុងការរៀបចំមេរៀន ។

កត់ត្រាចំណាប់អារម្មណ៍របស់អ្នក

អញ្ជើញឲ្យចែកចាយ

សូមលើកទឹកចិត្តកុមារឲ្យចែកចាយពីរបៀបដែលពួកគេរក្សាថ្ងៃសម្រាកទុកជាបរិសុទ្ធ ។

បង្រៀនគោលលទ្ធិ

កុមារតូចៗ

ម៉ាថាយ ១០:១–១០

ព្រះយេស៊ូវបានហៅពួកសាវកដប់ពីរនាក់ និងប្រទានដល់ពួកគេនូវអំណាចដើម្បីធ្វើកិច្ចការរបស់ទ្រង់ ។

តើកុមារដែលអ្នកបង្រៀនដឹងថា យើងមានពួកសាវកដប់ពីរនាក់នាសព្វថ្ងៃនេះដែរឬទេ ? តើអ្នកអាចប្រើបទគម្ពីរទាំងនេះដើម្បីបង្រៀនពួកគេអំពីសារៈសំខាន់ក្នុងការមានពួកសាវកនាសម័យទំនើបដោយរបៀបណា ហើយថាតើពួកសាវកត្រូវបានហៅឲ្យបម្រើកិច្ចការអ្វីខ្លះ ?

សកម្មភាពដែលអាចជ្រើសរើស

សូមសង្ខេប ម៉ាថាយ ១០:១–១០ ជាពាក្យសាមញ្ញ ។ ( សូមមើល ព្រះគ្រីស្ទតែងតាំងពួកសាវក,សៀវភៅរូបភាពដំណឹងល្អ ល.រ. ៣៨ ) ។ សូមពន្យល់ថា ព្រះយេស៊ូវហៅពួកសាវកឲ្យជួយទ្រង់ក្នុងការស្ថាបនាសាសនាចក្ររបស់ទ្រង់ ។
សូមឲ្យកុមាររាប់ពួកសាវកនៅក្នុងរូបភាពព្រះគ្រីស្ទតែងតាំងពួកសាវក( សៀវភៅរូបភាពដំណឹងល្អ ល.រ. ៣៨ ) និងនៅក្នុងរូបភាពកូរ៉ុមនៃពួកសាវកដប់ពីរនាក់នាពេលបច្ចុប្បន្ន ( សូមមើល LDS.org ឬ ទស្សនាវដ្ដី Ensign ឬ លីអាហូណា សម្រាប់ការចេញផ្សាយសន្និសីទទូទៅមួយ ) ។ សូមពន្យល់ថា យើងមានពួកសាវកដប់ពីរនាក់នាសព្វថ្ងៃនេះ គឺដូចជានៅជំនាន់របស់ព្រះយេស៊ូវដែរ ។
សូមលាក់រូបភាពពួកសាវកសម័យទំនើបនៅក្នុងថ្នាក់ ( សម្រាប់រូបភាព សូមមើលនៅក្នុងការចេញផ្សាយសន្និសីទទូទៅនាពេលថ្មីៗនេះមួយនៃទស្សនាវដ្ដី Ensign ឬ លីអាហូណា ) ។ សូមឲ្យកុមារស្វែងរករូបភាពទាំងនោះ និងប្រាប់ពួកគេដោយសង្ខេបអំពីសាវកនីមួយៗ ( សូមមើល « Meet Today’s Prophets and Apostles » នៅលើគេហទំព័រ LDS.org ) ។
សូមឲ្យកុមារម្នាក់កាន់រូបភាពមួយនៃគណៈប្រធានទីមួយ និងរូបភាពមួយនៃកូរ៉ុមនៃពួកសាវកដប់ពីរនាក់ ។ សូមឲ្យកុមារម្នាក់នោះដឹកនាំកុមារផ្សេងទៀតនៅក្នុងថ្នាក់ដើរទៅកាន់រូបភាពរបស់ព្រះយេស៊ូវ ។ សូមថ្លែងទីបន្ទាល់ថា ពួកព្យាការី និងពួកសាវកដឹកនាំយើងទៅរកព្រះយេស៊ូវគ្រីស្ទ ។
សូមចែកចាយទីបន្ទាល់របស់អ្នកអំពីពួកសាវករបស់ព្រះអង្គសង្គ្រោះ ។

កូរ៉ុមនៃពួកដប់ពីរនាក់ — ពួកសាវកដប់ពីរនាក់ធ្វើកិច្ចការរបស់ព្រះអង្គសង្គ្រោះនាសព្វថ្ងៃនេះ ។

ម៉ាថាយ ១១:២៨–៣០

ព្រះយេស៊ូវនឹងជួយខ្ញុំ កាលខ្ញុំមករកទ្រង់ ។

កុមារអាចមានអារម្មណ៍សុខសាន្ដដែលដឹងថា ព្រះយេស៊ូវនឹងជួយពួកគេឲ្យស្បើយពីបន្ទុករបស់គេ នៅពេលពួកគេមករកទ្រង់ ។

សកម្មភាពដែលអាចជ្រើសរើស

សូមអាន ម៉ាថាយ ១១:២៨–៣០ ហើយបង្ហាញរូបភាពនឹមគោនៅក្នុង គម្រោងសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គល និងក្រុមគ្រួសារ ។ សូមបង្ហាញថា នឹមគោអាចទាញរបស់ធ្ងន់ៗរួមគ្នា ជាជាងទាញរបស់ធ្ងន់ដាច់ដោយឡែកពីគ្នា ។ សូមថ្លែងទីបន្ទាល់ថា នៅពេលយើងមានអារម្មណ៍ក្រៀមក្រំ ព្រួយបារម្ភ ឬភ័យខ្លាច នោះយើងអាចស្វែងរកព្រះយេស៊ូវ ហើយទ្រង់នឹងជួយយើង ។
សូមឲ្យកុមារម្នាក់លើករបស់ធ្ងន់មួយ ។ នៅពេលគេព្យាយាមលើកវា សូមជួយដល់គាត់ ។ តើព្រះយេស៊ូវជួយយើងឲ្យធ្វើរឿងលំបាកៗតាមរបៀបណា ? តើកុមារធ្លាប់មានអារម្មណ៍ដឹងពីជំនួយរបស់ទ្រង់ដែរឬទេ ?

ម៉ាថាយ ១២:១–១៣

ខ្ញុំអាចរក្សាថ្ងៃឈប់សម្រាកឲ្យបរិសុទ្ធ ។

តើមានវិធីសប្បាយៗណាខ្លះ ដែលអ្នកអាចបង្រៀនដល់កុមារអំពីថ្ងៃឈប់សម្រាក និងពីមូលហេតុដែលយើងរក្សាវាឲ្យបរិសុទ្ធ ?

សកម្មភាពដែលអាចជ្រើសរើស

សូមអាន ម៉ាថាយ ១២:១០–១៣ ឮៗ ។ សូមឲ្យកុមារក្រោកឈរ ហើយអង្គុយចុះរាល់ពេលអ្នកនិយាយថា « ថ្ងៃឈប់សម្រាក » ហើយបន្ទាប់មកថាសារឡើងវិញជាមួយនឹងកុមារនូវឃ្លា « មាន [ ច្បាប់ ] ឲ្យធ្វើការល្អនៅថ្ងៃឈប់សម្រាកដែរ » ( ម៉ាថាយ ១២:១២ ) ។ តើពួកគេគិតថា វាមានន័យយ៉ាងដូចម្ដេច ?
សូមបង្ហាញប្រតិទិនមួយដល់កុមារ ហើយគូសពណ៌លើថ្ងៃឈប់សម្រាកឲ្យពួកគេ ។ តើយើងធ្វើកិច្ចការអ្វីខ្លះនៅថ្ងៃផ្សេងទៀតក្នុងសប្ដាហ៍ ? តើយើងអាចធ្វើអ្វីបាននៅថ្ងៃឈប់សម្រាក ដើម្បីធ្វើឲ្យថ្ងៃនេះខុសពីថ្ងៃដទៃទៀត ? ( សូមមើល អេសាយ ៥៨:១៣–១៤ ) ។
សូមឲ្យកុមារគូរអ្វីល្អៗដែលពួកគេអាចធ្វើបាននៅថ្ងៃឈប់សម្រាក ( សូមមើលទំព័រសកម្មភាពនាសប្ដាហ៍នេះ ) ។
សូមឲ្យកុមាររកនឹកធ្វើកាយវិការដើម្បីជួយពួកគេឲ្យចាំពីរបៀបដែលយើងត្រៀមខ្លួនសម្រាប់ថ្ងៃឈប់សម្រាក កាលពួកគេច្រៀងបទ « ថ្ងៃសៅរ៍ » សៀវភៅចម្រៀងកុមារ ទំព័រ ១០៥ ។
សូមគូររូបភ្នែក ត្រចៀក មាត់ និងដៃនៅលើក្ដារខៀន ។ សូមឲ្យកុមារប្រាប់ដល់អ្នកពីអ្វីដែលផ្នែកនៃអវៈយវៈនីមួយៗទាំងនេះនៅលើរាងកាយយើងអាចធ្វើដើម្បីរក្សាថ្ងៃឈប់សម្រាកឲ្យបរិសុទ្ធ ។

បង្រៀនគោលលទ្ធិ

កុមារធំៗ

ម៉ាថាយ ១០:១–១០; ម៉ាកុស ៣:១៣–១៩

ពួកសាវកដប់ពីរនាក់អាចបង្រៀនខ្ញុំអំពីព្រះយេស៊ូវ ។

តើការរៀនសូត្រអំពីពួកសាវកដប់ពីរនាក់នៅក្នុងជំនាន់របស់ព្រះគ្រីស្ទអាចជួយកុមារឲ្យយល់កាន់តែច្បាស់អំពីអ្វីដែលពួកសាវកដប់ពីរនាក់ធ្វើនាពេលសព្វថ្ងៃនេះដោយរបៀបណា ?

សកម្មភាពដែលអាចជ្រើសរើស

សូមបង្ហាញរូបភាពពួកសាវកនៅជំនាន់របស់ព្រះយេស៊ូវ និងនៅជំនាន់របស់យើង ( សូមមើល ព្រះគ្រីស្ទតែងតាំងពួកសាវក សៀវភៅរូបភាពដំណឹងល្អ ល.រ. ៣៨ និងការចេញផ្សាយសន្និសីទនាពេលថ្មីៗនេះនៅក្នុងទស្សនាវដ្ដីសាសនាចក្រ ) ។ សូមឲ្យកុមារអាន ម៉ាថាយ ១០:១–១០ និង ម៉ាកុស ៣:១៤–១៥ រួចរកមើលអ្វីដែលពួកសាវកធ្វើ ។
សូមឲ្យកុមារពីរបីនាក់រៀបចំឡើងមកចែកចាយរឿងមួយ ដែលបានតំណាលដោយពួកសាវកនៅរស់ម្នាក់ ។ តើពួកសាវកដែលនៅរស់កំពុងជួយពួកយើងឲ្យក្លាយកាន់តែដូចជាព្រះអង្គសង្គ្រោះដោយរបៀបណា ?
សូមសរសេរឈ្មោះពួកសាវកនាសម័យទំនើបនៅលើក្រដាសមួយសន្លឹក ។ សូមឲ្យកុមារផ្គូផ្គងឈ្មោះរបស់សាវកម្នាក់ៗទៅនឹងរូបភាពរបស់លោក ( LDS.org ) ។ សកម្មភាពនេះអាចធ្វើសារឡើងវិញបីបួនដងបាន ។
សូមចែកចាយឧទាហរណ៍បីបួននៃទីបន្ទាល់អំពីព្រះគ្រីស្ទរបស់ពួកសាវកនាសម័យទំនើបដល់កុមារ ( សូមមើលសារលិខិតពីសន្និសីទទូទៅនាពេលថ្មីៗនេះ ឬ « ព្រះគ្រីស្ទដ៏មានព្រះជន្មរស់ ៖ ទីបន្ទាល់នៃពួកសាវក » Ensign ឬ លីអាហូណា ខែ មេសា ឆ្នាំ ២០០០ ទំព័រ ២ ) ។
សូមជួយកុមារឲ្យទន្ទេញចាំ និងយល់ពី មាត្រានៃសេចក្ដីជំនឿ ១:៦ ។

ម៉ាថាយ ១១:២៨–៣០

ព្រះយេស៊ូវនឹងជួយខ្ញុំ កាលខ្ញុំមករកទ្រង់ ។

តើអ្នកអាចជួយកុមារឲ្យយល់ថា ព្រអង្គសង្គ្រោះនឹងប្រទានដល់ពួកគេនូវការសម្រាកពីឧបសគ្គនានា កាលពួកគេមករកទ្រង់ដោយរបៀបណា ?

សកម្មភាពដែលអាចជ្រើសរើស

សូមឲ្យកុមារចែកចាយពីគ្រាមួយដែលពួកគេបានព្រួយបារម្ភ ឬអន្ទះសាអំពីរឿងអ្វីមួយ ។ សូមឲ្យពួកគេស្រាវជ្រាវក្នុង ម៉ាថាយ ១១:២៨–៣០ រកមើលការប្រឹក្សាដែលអាចជួយដល់ពួកគេនៅក្នុងកាលៈទេសៈស្រដៀងគ្នានេះ ។
សូមឲ្យកុមារគូររូបភាពរឿងអ្វីដែលពួកគេកំពុងធ្វើដើម្បីមករកព្រះយេស៊ូវ ហើយរៀនសូត្រអំពីទ្រង់ ។ មាត្រានៃសេចក្ដីជំនឿទីបួនអាចផ្ដល់ជាគំនិតដល់ពួកគេខ្លះៗ ។

ម៉ាថាយ ១២:១–១៤

ថ្ងៃឈប់សម្រាកគឺជាថ្ងៃមួយដើម្បីធ្វើកិច្ចការល្អៗ ដែលនាំឲ្យខ្ញុំទៅកាន់តែជិតព្រះ ។

កុមារដែលអ្នកបង្រៀននឹងត្រូវបានពង្រឹងឡើង កាលអ្នកបញ្ជាក់ប្រាប់ពីគោលបំណង និងពរជ័យនានាក្នុងការរក្សាថ្ងៃឈប់សម្រាកឲ្យបរិសុទ្ធ ។

សកម្មភាពដែលអាចជ្រើសរើស

សូមឲ្យកុមារម្នាក់ដើរតួជាបុរសម្នាក់ដែលព្រះអង្គសង្គ្រោះបានព្យាបាលដៃរបស់លោក ( សូមមើល ម៉ាថាយ ១២:១០–១៣ ) ។ កុមារម្នាក់ទៀតអាចសម្ភាសន៍គាត់អំពីបទពិសោនធន៍នេះ ។
សូមអាន ម៉ាថាយ ១២:១២ រួមគ្នា ។ តើមានកិច្ចការល្អៗណាខ្លះដែលយើងអាចធ្វើបាននៅថ្ងៃឈប់សម្រាក ? សូមឲ្យកុមារគូររូបភាពអំពីគំនិតរបស់ពួកគេនៅលើទំព័រសកម្មភាពនាសប្ដាន៍នេះ រួចកាត់វាចេញជាបំណែកតូចៗ ហើយប្ដូរវេនគ្នាដាក់តម្រៀបបំណែកទាំងឡាយរួមគ្នា ។
សូមលាក់រូបភាពមនុស្សបីបួននាក់ដែលធ្វើកិច្ចការនានាដែលបង្ហាញពីសេចក្ដីស្រឡាញ់ចំពោះព្រះវរបិតាសួគ៌នៅថ្ងៃឈប់សម្រាក ។ សូមឲ្យកុមាររកមើលរូបភាពនោះ ហើយចែកចាយពីរបៀបដែលការធ្វើកិច្ចការនៅក្នុងរូបភាពនោះបង្ហាញសេចក្ដីស្រឡាញ់របស់យើងដល់ព្រះ ។
សូមឲ្យថង់មួយដល់កុមារម្នាក់ៗ ដែលក្នុងនោះមានពេញទៅដោយគំនិតក្នុងការធ្វើកិច្ចការល្អៗដើម្បីធ្វើតាមនៅថ្ងៃឈប់សម្រាក ។ ពួកគេអាចស្វែងរកគំនិតបន្ថែមទៀតពី « ការគោរពថ្ងៃឈប់សម្រាក »នៅក្នុង ដើម្បីកម្លាំងនៃយុវជន ទំព័រ ៣០–៣១ ។

លើកទឹកចិត្តឲ្យរៀនសូត្រនៅផ្ទះ

សូមឲ្យកុមារចែកចាយជាមួយនឹងក្រុមគ្រួសាររបស់ពួកគេអំពីគំនិតនានាដើម្បីរក្សាថ្ងៃឈប់សម្រាកឲ្យបរិសុទ្ធ ។

កែលម្អការបង្រៀនរបស់យើង

លើកទឹកចិត្តឲ្យមានគារវភាព ។ សូមជួយកុមារឲ្យយល់ថា ផ្នែកមួយនៃគារវភាពដ៏សំខាន់គឺការគិតដល់ព្រះវរបិតាសួគ៌ និងព្រះយេស៊ូវគ្រីស្ទ ។ អ្នកអាចរំឭកកុមារឲ្យមានគារវភាពបាន ដោយការច្រៀង ឬច្រៀងរហ៊ឹមបន្ទរបទចម្រៀងមួយដោយស្ងាត់ស្ងៀម ឬការបង្ហាញរូបភាពព្រះយេស៊ូវមួយសន្លឹក ។

ទំព័រសកម្មភាព ៖ ខ្ញុំនឹងរក្សាថ្ងៃឈប់សម្រាកឲ្យបរិសុទ្ធ