« ថ្ងៃទី ២៥ ខែ កុម្ភៈ–ថ្ងៃទី ៣ ខែ មីនា ។ ម៉ាថាយ ៦–៧ ៖ ‹ ទ្រង់បង្រៀនដូចជាមានអំណាច › » ចូរមកតាមខ្ញុំ—សម្រាប់ថ្នាក់បឋមសិក្សា ៖ ព្រះគម្ពីរសញ្ញាថ្មី ឆ្នាំ ២០១៩ ( ២០១៩ )
« ថ្ងៃទី ២៥ ខែ កុម្ភៈ–ថ្ងៃទី ៣ ខែ មីនា ។ ម៉ាថាយ ៦–៧ » ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០១៩
ព្រះយេស៊ូវបង្រៀនប្រជាជននៅមាត់សមុទ្រ ដោយ ជេមស៍ ធីសុទ្ធ
ថ្ងៃទី ២៥ ខែ កុម្ភៈ–ថ្ងៃទី ៣ ខែ មីនា
ម៉ាថាយ ៦–៧
« ទ្រង់បង្រៀនដូចជាមានអំណាច »
សូមចាប់ផ្ដើមដោយអាន ម៉ាថាយ ៦–៧ កាលអ្នកគិតអំពីកុមារដែលអ្នកបង្រៀន ។ តើពួកគេត្រូវការស្ដាប់សារលិខិតអ្វីខ្លះចេញពីជំពូកទាំងនេះ ? ចូរមកតាមខ្ញុំ—សម្រាប់បុគ្គល និងក្រុមគ្រួសារ និងគម្រោងមេរៀននេះ អាចជួយផ្ដល់គំនិតបង្រៀនដល់អ្នកតាមតម្រូវការ ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
សូមឲ្យកុមារតូចៗចែកចាយអ្វីដែលពួកគេបានធ្វើ កាលពីសប្ដាហ៍មុនដើម្បីក្លាយជាពន្លឺ ឬគំរូមួយដល់នរណាម្នាក់ ។
បង្រៀនគោលលទ្ធិ
កុមារតូចៗ
ខ្ញុំអាចអធិស្ឋានទៅកាន់ព្រះវរបិតាសួគ៌ដូចព្រះយេស៊ូវបានធ្វើដែរ ។
កុមារអាចរៀនអធិស្ឋានដោយការស្ដាប់តាមការអធិស្ឋានរបស់អ្នកដទៃ ។ តើអ្នកអាចជួយពួកគេឲ្យរៀនពីការអធិស្ឋានរបស់ព្រះយេស៊ូវគ្រីស្ទនៅក្នុងខគម្ពីរទាំងនេះដោយរបៀបណា ?
សកម្មភាពដែលអាចជ្រើសរើស
-
សូមរំឭកការបង្រៀនរបស់ព្រះយេស៊ូវអំពីការអធិស្ឋានដែលមាននៅក្នុង ម៉ាថាយ ៦:៥–១៣ ។ អ្នកអាចប្រើ « ជំពូកទី ២០ ៖ ព្រះយេស៊ូវបង្រៀនអំពីការអធិស្ឋាន » រឿងព្រះគម្ពីរសញ្ញាថ្មី ទំព័រ ៥១–៥២ ឬវីដេអូដូចគ្នានេះនៅលើ ( LDS.org ) ។
-
សូមប្រើទំព័រសកម្មភាពសប្ដាហ៍នេះ ដើម្បីជួយកុមារឲ្យចងចាំនូវផ្នែកខុសៗគ្នានៃការអធិស្ឋាន ។
-
សូមដានរូបដៃរបស់កុមារម្នាក់ៗនៅលើក្រដាសមួយសន្លឹក ។ សូមនិយាយអំពីអ្វីដែលប្រអប់ដៃ និងដៃរបស់យើងគួរធ្វើ កាលយើងអធិស្ឋាន ។ នៅលើគំរូដៃដាននីមួយៗ សូមសរសេរអ្វីមួយដែលយើងធ្វើដើម្បីបង្ហាញគារវភាព កាលយើងអធិស្ឋាន ( ឧទាហរណ៍ ឱនក្បាលរបស់យើងចុះ បិទភ្នែកយើង ។ល ។ ) ។
-
សូមជួយកុមារឲ្យធ្វើបដា ឬតារាងដែលនឹងជួយពួកគេឲ្យចងចាំដើម្បីអធិស្ឋានរាល់ព្រឹក និងល្ងាច ហើយអញ្ជើញឲ្យពួកគេចែកចាយវាដល់ក្រុមគ្រួសាររបស់ពួកគេ ។
-
សូមច្រៀងចម្រៀងអំពីការអធិស្ឋានជាមួយនឹងកុមារ ( ដូចជា « យើងបន្ទន់កេសា » សៀវភៅចម្រៀងកុមារ ទំព័រ ១៨ ) ហើយសូមថ្លែងទីបន្ទាល់របស់អ្នកអំពីអំណាចនៃការអធិស្ឋាន ។ អ្នកក៏អាចឲ្យកុមារចែកចាយបទពិសោធន៍របស់ពួកគេអំពីការអធិស្ឋានផងដែរ ។
ខ្ញុំអាចអធិស្ឋានទៅកាន់ព្រះវរបិតាសួគ៌ដូចព្រះយេស៊ូវបានធ្វើដែរ ។
ខ្ញុំគួរប្រព្រឹត្តនឹងមនុស្សដទៃតាមរបៀបដែលខ្ញុំចង់ឲ្យគេប្រព្រឹត្តដាក់ខ្ញុំ ។
ការបង្រៀនរបស់ព្រះយេស៊ូវនៅក្នុង ម៉ាថាយ ៧:១២—ក៏ត្រូវបានស្គាល់ថាជាច្បាប់មាស—ផ្ដល់នូវការដឹកនាំដ៏សាមញ្ញមួយអំពីរបៀបប្រព្រឹត្តនឹងមនុស្សដទៃ ។ តើមានអ្វីខ្លះដែលនឹងជួយកុមារដែលអ្នកបង្រៀនឲ្យរស់នៅតាមគោលការណ៍នេះ ?
សកម្មភាពដែលអាចជ្រើសរើស
-
សូមអាន ម៉ាថាយ ៧:១២ ហើយសម្រាយខគម្ពីរនេះជាពាក្យសាមញ្ញដែលកុមារអាចយល់បាន ។ សូមជួយកុមារឲ្យគិតអំពីរបៀបជាច្រើនដើម្បីបំពេញប្រយោគមួយដូចតទៅនេះ ៖ « ខ្ញុំពេញចិត្ត ពេលមនុស្សដទៃ ដាក់ខ្ញុំ » ។ បន្ទាប់ពីបំពេញប្រយោគនីមួយៗហើយ សូមឲ្យពួកគេថាឡើងវិញតាមអ្នក « ដូច្នេះខ្ញុំគួរតែ ដាក់មនុស្សដទៃ » ។
-
សូមច្រៀងជាមួយនឹងកុមារនូវបទ « ព្រះយេស៊ូវមានបន្ទូលស្រឡាញ់មនុស្សគ្រប់រូប » សៀវភៅចម្រៀងកុមារ ទំព័រ ៣៩ ហើយធ្វើកាយវិការតាមការគួរអមនឹងចម្រៀងនេះ ។ សូមសួរកុមារថា តើពួកគេអាចរៀនអ្វីខ្លះអំពីរបៀបដែលយើងគួរប្រព្រឹត្តនឹងមនុស្សដទៃ តាមរយៈគំរូរបស់ព្រះអង្គសង្គ្រោះ ។
-
សូមឲ្យកុមារសរសេរនូវរឿងដែលឪពុកម្ដាយរបស់ពួកគេ ឬសមាជិកគ្រួសារផ្សេងទៀតបានធ្វើដាក់ពួកគេដោយសន្ដានចិត្តល្អ ។ សូមអាន ម៉ាថាយ ៧:១២ ហើយសូមឲ្យកុមារសរសេររឿងដែលពួកគេអាចធ្វើសម្រាប់ក្រុមគ្រួសាររបស់ពួកគេដោយសន្ដានចិត្តល្អ ។
ខ្ញុំអាចកសាងគ្រឹះដ៏រឹងមាំមួយដោយការធ្វើតាមព្រះយេស៊ូវ ។
ការប្រើរឿងប្រៀបប្រដូចរបស់ព្រះអង្គសង្គ្រោះអំពីការសង់ផ្ទះនៅលើខ្សាច់ ឬនៅលើថ្មអាចជារបៀបមួយដ៏ល្អដើម្បីបង្រៀនកុមារឲ្យចងចាំអំពីសារៈសំខាន់នៃការធ្វើតាមអ្វីដែលពួកគេរៀនសូត្រ ។
សកម្មភាពដែលអាចជ្រើសរើស
-
សូមច្រៀងជាមួយនឹងកុមារនូវបទ « មនុស្សប្រាជ្ញា និងមនុស្សល្ងង់ » សៀវភៅចម្រៀងកុមារ ទំព័រ ១៣២ ហើយធ្វើកាយវិការតាមទំនុកចម្រៀង ។
-
សូមប្រើ ម៉ាថាយ ៧:២៤ ដើម្បីបង្រៀនអំពីភាពខុសគ្នារវាងមនុស្សប្រាជ្ញា និងមនុស្សល្ងង់ ។ សូមអញ្ជើញកុមារឲ្យធ្វើជាកំពុងសាងសង់ផ្ទះ ។ តើយើងអាចក្លាយដូចជាមនុស្សមនុស្សប្រាជ្ញា ដោយរបៀបណា ?
-
សូមឲ្យកុមារគូររូបភាពរឿងប្រៀបប្រដូចអំពីមនុស្សប្រាជ្ញា និងមនុស្សល្ងង់ ។
បង្រៀនគោលលទ្ធិ
កុមារធំៗ
ទេសនកថានៅលើភ្នំរួមមាននូវសារលិខិតសម្រាប់រូបខ្ញុំ ។
ជំពូកទាំងនេះមានសារលិខិតជាច្រើនដែលអាចអនុវត្តដល់កុមារដែលអ្នកបង្រៀន ។ សូមអានវាដោយស្ងាត់ស្ងៀមជាមួយនឹងកុមារ ។ តើមានអ្វីខ្លះលេចធ្លោដល់អ្នក ?
សកម្មភាពដែលអាចជ្រើសរើស
-
សូមរំឭកកុមារថា ពួកគេកំពុងរៀនអំពីអ្វីដែលព្រះយេស៊ូវបានបង្រៀនអំឡុងទេសនកថានៅលើភ្នំ ។ តើពួកគេអាចចងចាំសេចក្ដីពិតអ្វីខ្លះមកពីមេរៀនសប្ដាហ៍មុន?
-
សូមសរសេរឃ្លាមួយចំនួនមកពីទេសនកថានៅលើភ្នំ និងឃ្លាផ្សេងទៀតខ្លះដែលមិនមែនមកពីព្រះគម្ពីរដាក់នៅលើក្ដារខៀន ។ សូមឲ្យកុមាររកមើលថា តើឃ្លាណាចេញពីទេសនកថានៅលើភ្នំ ហើយចែកចាយអ្វីដែលពួកគេរៀនចេញពីឃ្លាទាំងនោះ ។
-
សូមជ្រើសរើសបទគម្ពីរបីបួនចេញពី ម៉ាថាយ ៦–៧ ដែលអ្នកយល់ថាមានអត្ថន័យចំពោះកុមារ ។ សូមសរសេរព្រះគម្ពីរយោងនៅលើកាត ហើយលាក់វាក្នុងថ្នាក់ ។ សូមឲ្យកុមារដើររកកាតទាំងនោះ អានបទគម្ពីរទាំងនោះ ហើយពន្យល់ពីមូលហេតុដែលការបង្រៀនទាំងនេះមានសារៈសំខាន់ចំពោះពួកគេ ។
-
សូមចែកចាយបទគម្ពីរចំណូលចិត្តរបស់អ្នកមួយមកពី ម៉ាថាយ ៦–៧ ហើយពន្យល់ពីមូលហេតុដែលអ្នកចូលចិត្ត ។ ប្រសិនបើកុមារមានបទគម្ពីរមួយដែលពួកគេចូលចិត្ត សូមឲ្យពួកគេចែកចាយពីមូលហេតុ និងអ្វីដែលពួកគេចូលចិត្តរៀនចេញបទគម្ពីរនោះ ។
-
សូមច្រៀងបទ « ខ្ញុំព្យាយាមក្លាយដូចព្រះយេស៊ូវ » សៀវភៅចម្រៀងកុមារ ទំព័រ ៤០ ជាមួយនឹងកុមារ ហើយឈប់ច្រៀងនៅពេលអ្នកច្រៀងដល់ឃ្លាមួយដែលទាក់ទងនឹងគោលការណ៍ដែលបានបង្រៀននៅក្នុង ម៉ាថាយ ៦–៧ ( ដូចជា « រៀនបម្រើដល់មិត្តខ្ញុំ » ) ។ សូមជួយកុមារឲ្យបង្កើតទំនាក់ទំនងទៅនឹងរឿងដែលពួកគេកំពុងរៀនចេញពីជំពូកទាំងនេះ ។
ព្រះវរបិតាសួគ៌ព្រះសណ្ដាប់ ហើយឆ្លើយតបនឹងខ្ញុំ កាលខ្ញុំអធិស្ឋាន ។
កាលអ្នកសិក្សា ម៉ាថាយ ៦:៥–១៣; ៧:៧–១១ តើអ្នកមានអារម្មណ៍អ្វីខ្លះអំពីការដែលកុមារត្រូវយល់ដឹងអំពីការអធិស្ឋាននោះ ?
សកម្មភាពដែលអាចជ្រើសរើស
-
សូមឲ្យកុមារអានឮៗក្នុង ម៉ាថាយ ៦:៩–១៣ រួចហើយសរសេរនូវរឿងដែលព្រះអង្គសង្គ្រោះបានមានបន្ទូលនៅក្នុងការអធិស្ឋានរបស់ទ្រង់ ។ តើយើងអាចធ្វើតាមគំរូរបស់ទ្រង់ កាលយើងអធិស្ឋានដោយរបៀបណា ?
-
សូមច្រៀងចម្រៀងអំពីការអធិស្ឋានជាមួយនឹងកុមារដូចជាបទ « តើបានអធិស្ឋានទេ ? » ទំនុកតម្កើង ល.រ. ៧៩ ។ សូមជួយកុមារឲ្យស្រាវជ្រាវរកទំនុកចម្រៀង ដើម្បីរកហេតុផលដែលយើងត្រូវអធិស្ឋាន និងពរជ័យដែលបានមកពីការអធិស្ឋាន ។
-
សូមជួយកុមារឲ្យទន្ទេញចាំ ម៉ាថាយ ៧:៧ ដោយការលេងល្បែងកម្សាន្តដូចតទៅ ៖ កុមារម្នាក់ទន្ទេញពាក្យ ឬឃ្លាទីមួយមកពីខគម្ពីរនេះ រួចហើយបោះបាល់ទៅកុមារផ្សេងទៀត ដែលត្រូវទន្ទេញចាំពាក្យ ឬឃ្លាបន្ទាប់ ។
-
សូមសម្ដែងរឿងតាម ម៉ាថាយ ៧:៩–១០ ជាមួយនឹងកុមារដោយប្រើឈើធម្មតា ។ សូមឲ្យកុមារចែកចាយអ្វីដែលបទគម្ពីរនេះបង្រៀនពួកគេអំពីការអធិស្ឋាន ។
-
សូមចែកចាយបទពិសោធន៍មួយ ដែលការអធិស្ឋានរបស់អ្នកត្រូវបានឆ្លើយតប ។
ខ្ញុំអាចស្វែងរកបាននូវរតនសម្បត្តិដ៏អស់កល្ប ជាជាងតាមរករតនសម្បត្តិខាងលោកិយ ។
តើអ្នកនឹងជួយកុមារដែលអ្នកបង្រៀនឲ្យផ្ដល់តម្លៃខ្ពស់លើរឿងដ៏អស់កល្ប ជាងលើរឿងខាងលោកិយដោយរបៀបណា ?
សកម្មភាពដែលអាចជ្រើសរើស
-
សូមយកប្រអប់ « រតនសម្បត្តិ » មួយដែលដាក់នូវវត្ថុ ឬរូបភាពដែលតំណាងឲ្យរឿងដែលពិភពលោកនេះឲ្យតម្លៃ—ឧទាហរណ៍ លុយកាក់ ឬប្រដាប់លេង ។ សូមអាន ម៉ាថាយ ៦:១៩–២១ រួមគ្នា បន្ទាប់មកសូមឲ្យកុមារជួយអ្នកគិតអំពីរតនសម្បត្តិនៅស្ថានសួគ៌ដែលអាចជំនួសបាននូវរបស់របរខាងលោកិយនៅក្នុងប្រអប់នេះ ។
-
សូមឲ្យកុមារប្រាប់ ឬគូររឿងមួយចំនួនដែលពួកគេអាចធ្វើដើម្បី « ប្រមូលទ្រព្យសម្បតិ្ត…នៅឯស្ថានសួគ៌វិញ » ( ម៉ាថាយ ៦:២០ ) ។
លើកទឹកចិត្តឲ្យរៀនសូត្រនៅផ្ទះ
សូមអញ្ជើញកុមារឲ្យចែកចាយនឹងគ្រួសាររបស់ពួកគេនូវការបង្រៀនដែលពួកគេចូលចិត្តចេញពីទេសនកថានៅលើភ្នំ ។
កែលម្អការបង្រៀនរបស់យើង
សូមស្វែងយល់ពីសមាជិកថ្នាក់របស់អ្នក ។ អ្នកស្គាល់កុមារដែលអ្នកបង្រៀន ។ គំនិតនៅក្នុងគម្រោងមេរៀនទាំងនេះគួរសម្របតាមតម្រូវការសិស្សរបស់អ្នកឲ្យបានល្អបំផុត ។ ដើម្បីស្វែងរកគំនិតនានាសម្រាប់សិស្ស អ្នកអាចរំឭកសកម្មភាពទាំងឡាយដែលមាននៅក្នុងគម្រោងនេះទាំងអស់ មិនមែនគ្រាន់តែសកម្មភាពដែលចាត់តាមអាយុរបស់កុមារដែលអ្នកបង្រៀនប៉ុណ្ណោះទេ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ៧ ) ។