Մարտի 18-24-ը

Մատթեոս 13, Ղուկաս 8, 13

«Ով որ լսելու ականջ ունի՝ թող լսէ»

Առակները պարզ պատմություններ են, որոնք կարող են ուշագրավ լինել երեխաների համար: Այս ծրագիրն ու «Եկ, հետևիր ինձ» ուղերձի Անհատների և ընտանիքների համար բաժինը կարող են օգնել ձեզ կիրառել Փրկիչի առակները երեխաներին կարևոր ճշմարտություններ սովորեցնելիս:

Գրի առեք ձեր տպավորությունները

Հրավիրեք կիսվել

Ձեզ հետ բերեք մի քանի առարկաներ, որոնք կարող են օգնել երեխաներին հիշել Մատթեոս 13 գլխում նշված առակներից մի քանիսը՝ սերմ, մարգարիտ կամ գանձերի տուփ: Հրավիրեք երեխաներին կիսվել, թե ինչ են հիշում առակների մասին:

Ուսուցանեք վարդապետությունը

Փոքր երեխաներ

Մատթեոս 13.1–23

Ես պետք է պատրաստվեմ սովորել Հիսուսի ուսմունքները:

Փոքր երեխաները գուցե չկարողանան հասկանալ սերմնացանի առակի բոլոր խորհրդանիշերը, սակայն նրանք կարող են սովորել այն պարզ ճշմարտությունները, որոնք ուսուցանում է ավետարանը: Ինչպե՞ս կարող եք օգնել նրանց ավելի լավ հասկանալ, թե ինչպես է այս առակը վերաբերում իրենց:

Հնարավոր վարժություններ

• Մատթեոս 13.3-8 հատվածներն ամփոփելիս ցույց տվեք հողի տարբեր տեսակներ (կամ հողի նկարներ): Յուրաքանչյուր երեխայի սերմ տվեք, որպեսզի ցանեն հողում: Հարցրեք երեխաներին, թե ինչ կարող ենք անել, որպեսզի օգնենք, որ մեր սերմերը աճեն: Բացատրեք, որ Երկնային Հոր և Հիսուս Քրիստոսի հանդեպ հավատք ունենալը մի եղանակ է, որի միջոցով մենք օգնում ենք, որ մեր վկայության «սերմը» աճի:

• Օգտագործեք այս շաբաթվա գործնական աշխատանքների էջը, որպեսզի օգնեք երեխաներին հասկանալ, թե ինչ է ուսուցանում մեր սրտերի մասին Մատթեոս 13 գլխում նկարագրված ամեն տեսակի հողը: Հարցրեք երեխաներին, թե ըստ Հիսուսի, նրանք ինչպիսի սիրտ պետք է ունենան Նրա ուսմունքները սովորելու համար:

• Կարդացեք Մատթեոս 13.9, 15 հատվածները և հրավիրեք երեխաներին ցույց տալ իրենց մարմնի տարբեր մասերը, երբ լսեն դրանց անունները: Ինչպե՞ս կարող ենք օգտագործել այս մարմնի մասերը Հիսուսի ուսմունքները սովորելու համար:

Մատթեոս 13.24-30, 36-43, 47-48

Երկնային Հայրն ուզում է, որ ես ճիշտն ընտրեմ:

Հիսուսի ուսմունքներից մի քանիսն ուսուցանում են, որ վերջին օրը Աստված առանձնացնելու է ամբարիշտներին արդարներից: Ինչպե՞ս կարող եք օգտագործել առակները, որպեսզի ոգեշնչեք երեխաներին ընտրել ճիշտը:

Հնարավոր վարժություններ

• Թող երեխաները բեմականացնեն ցորենի և որոմների առակը (տես Մատթեոս 13.24–30): Բացատրեք, որ ցորենը ներկայացնում է այն մարդկանց, ովքեր արդար ընտրություններ են կատարում, իսկ որոմները (վնասակար մոլախոտերը) ներկայացնում են նրանց, ովքեր արդար ընտրություններ չեն կատարում: Մի օր Երկնային Հայրը կհավաքի արդար մարդկանց, որպեսզի Իր հետ ապրեն:

• Պատմեք մի քանի հասարակ պատմություններ երեխաների մասին, երբ նրանք ընտրություններ են կատարել: Խնդրեք նրանց ասել «ցորենի ընտրություն», երբ պատմության երեխաներն ընտրեն ճիշտը, և «որոմի ընտրություն», երբ երեխաները սխալ ընտրություն կատարեն:

• Ձեզ հետ բերեք ցորենի ցողունների նկարներ և թույլ տվեք երեխաներին այդ նկարների վրա նկարել որոշ եղանակներ, թե ինչպես կարող են արդար լինել:

• Հորինեք մի խաղ, որտեղ երեխաները պետք է համապատասխանեցնեն սերմնացանի առակի մանրամասները Մատթեոս 13.18-23 հատվածների մեկնաբանության հետ:

Մատթեոս 13.44–46

Իմ անդամակցությունը Հիսուս Քրիստոսի Վերջին Օրերի Սրբերի Եկեղեցում գանձ է:

Ինչպե՞ս կարող եք օգտագործել գանձերի ու թանկագին մարգարիտների պատկերները, որպեսզի օգնեք երեխաներին հասկանալ Քրիստոսի Եկեղեցուն պատկանելու արժեքը:

Հնարավոր վարժություններ

• Սենյակում թաքցրեք գանձերի տուփ ու մարգարիտ և թույլ տվեք, որ երեխաները գտնեն դրանք: Օգտագործեք նկարներ Մատթեոս 13.44-46 հատվածների առակներն ուսուցանելու համար: Երեխաներն ի՞նչ կտային գեղեցիկ մարգարիտ կամ գանձ ունենալու համար: Բացատրեք, որ երբեմն մենք պետք է հրաժարվեք մի լավ բանից՝ ավելի լավ բանի համար: Ասացեք երեխաներին, թե ինչու է ավետարանն արժեքավոր ձեզ համար:

• Տուփի կամ արկղի մեջ դրեք մի քանի առարկա կամ նկարներ, որոնք ներկայացնում են Հիսուս Քրիստոսի Վերջին Օրերի Սրբերի Եկեղեցու «գանձերը», ինչպես օրինակ՝ տաճարները կամ Մորմոնի Գիրքը: Խնդրեք յուրաքանչյուր երեխայի ընտրել մի առարկա կամ նկար ու խոսել այն մասին, թե ինչու է այն գանձ:

• Միասին երգեք «Հիսուս Քրիստոսի Եկեղեցին» երգը Մանկական երգարանից  էջ 77, և խնդրեք երեխաներին ուշադրություն դարձնել այն օրհնություններին, որոնք գալիս են Եկեղեցու անդամ լինելու արդյունքում: Վկայեք այն օրհնությունների մասին, որ ստացել եք Եկեղեցու անդամության շնորհիվ:

Ուսուցանեք վարդապետությունը

Մեծ երեխաներ

Մատթեոս 13.1–23

Ես պետք է նախապատրաստեմ իմ սիրտը Հիսուսի ուսմունքները ստանալու համար:

Ինչպե՞ս կարող եք օգնել երեխաներին հասկանալ մեղմ ու պատրաստակամ սիրտ ունենալու կարևորությունը, որպեսզի Հիսուսը կարողանա ուսուցանել նրանց:

Հնարավոր վարժություններ

• Հանձնարարեք յուրաքանչյուր երեխայի Մատթեոս 13.4-8 հատվածներից կարդալ չորս տեսակի հողերից ամեն մեկի մասին: Հրավիրեք նրանց ուշադրություն դարձնել ու կիսվել, թե ինչ է տեղի ունենում սերմի հետ այն հողում, որի մասին իրենք կարդում են: Ինչպե՞ս կարող են մեր սրտերը լինել հողի տարբեր տեսակների նման: (Տես Մատթեոս 13.19-23):

• Ամեն երեխայի տվեք երկու սերմ ու հրավիրեք նրանց տնկել իրենց սերմը փափուկ հողում ու քարերի մեջ: Ո՞ր սերմը կունենա աճելու ավելի մեծ հավանականություն: Ինչպե՞ս կարող ենք հավաստիանալ, որ մեր սրտերը նման են փափուկ հողին, որպեսզի կարողանանք ստանալ Փրկիչի ուսմունքները:

• Հրավիրեք երեխաներին կարդալ Մատթեոս 13․9-17 հատվածները։ Գրատախտակի վրա նկարեք աչք, ականջ և սիրտ։ Ինչպե՞ս կարող ենք օգտագործել այս մարմնի մասերից յուրաքանչյուրը Հիսուսի ուսմունքները սովորելու համար:

Մատթեոս 13.24–30, 36–43

Ես կարող եմ ընտրել ճիշտը, նույնիսկ երբ իմ շրջապատում մարդիկ այդպես չեն վարվում:

Երբ կարդում եք այս հատվածները` մտածելով երեխաների մասին, ինչպիսի՞ տպավորություններ եք ստանում:

Հնարավոր վարժություններ

• Հրավիրեք երեխաներին տարբեր տեսարաններ նկարել ցորենի ու որոմների առակի հիման վրա Մատթեոս 13.24–30 հատվածներից, և դրանցով կիսվել դասարանի հետ: Խնդրեք նրանց պիտակավորել իրենց նկարները` օգտագործելով Մատթեոս 13.36-43 հատվածներում գտնվող առակի մեկնաբանությունը: Բացատրեք, որ որոմները թունավոր մոլախոտեր են:

• Եթե հնարավոր է, ցույց տվեք ցորենի ու որոմների նկար: Բացատրեք, որ ցորենն ու որոմները միասին կաճեն մինչև աշխարհի վերջը: Սա մեզ ուսուցանում է, որ մեր շրջապատում կա և՛ չարը, և՛ բարին, և պետք է ուշադիր լինենք, որպեսզի ճիշտն ընտրենք: Խնդրեք երեխաներին կիսվել, թե ինչպես կարող են ասել, թե ինչ տարբերություն կա չարի ու բարու միջև:

Մատթեոս 13.44–46

Իմ անդամակցությունը Հիսուս Քրիստոսի Վերջին Օրերի Սրբերի Եկեղեցում գանձ է:

Արդյո՞ք ձեր ուսուցանած երեխաները համարում են իրենց անդամությունը Եկեղեցում արժեքավոր գանձ: Մատթեոս 13.44-46 հատվածներում տրված առակները կարող են օգնել նրանց:

Հնարավոր վարժություններ

• Հրավիրեք երեխաներին ինքնուրույն կարդալ Մատթեոս 13.44–46 հատվածները և, օգտագործելով իրենց սեփական բառերը` առակներով կիսվել իրենց դասընկերների հետ:

• Կտրեք շրջանաձև թերթիկներ, որոնք կներկայացնեն մետաղադրամ, և դրեք դրանք գանձերի տուփի մեջ: Հրավիրեք երեխաներին վերցնել մի մետաղադրամ և դրա վրա նկարել կամ գրել մի բան, որն իրենց դուր է գալիս Եկեղեցու անդամ լինելու մեջ: Խնդրեք երեխաներին կիսվել, թե ինչ են գրել կամ նկարել իրենց մետաղադրամի վրա:

• Հրավիրեք ծխի անդամներից մեկին երեխաների հետ կիսվել իր դարձի գալու մասին պատմությամբ և ասել, թե ինչ է նա զոհաբերել Հիսուս Քրիստոսի Վերջին Օրերի Սրբերի Եկեղեցուն միանալու համար:

Խրախուսեք տնային ուսումնասիրությունը

Հրավիրեք երեխաներին իրենց ընտանիքի անդամներին ուսուցանել առակներից մեկը, որ սովորել են Երեխաների Խմբում:

Բարելավենք մեր ուսուցումը

Երեխաներին դուր է գալիս կիսվել իրենց սովորածով: Չնայած երեխաները փոքր են, նրանք կարող են ամրացնել իրենց ընտանիքի անդամներին: Խրախուսեք նրանց իրենց ընտանիքի անդամների հետ կիսվել այն բաներով, ինչ սովորում են Երեխաների Խմբում: («Ուսուցանել Փրկիչի ձևով», էջ 30):