« ថ្ងៃទី ១–១៤ ខែ មេសា ។ ម៉ាថាយ ១៦–១៧, ម៉ាកុស ៩, លូកា ៩ ៖ ‹ ទ្រង់ជាព្រះគ្រីស្ទ › » ចូរមកតាមខ្ញុំ—សម្រាប់ថ្នាក់បឋមសិក្សា ៖ ព្រះគម្ពីរសញ្ញាថ្មីឆ្នាំ ២០១៩ ( ២០១៩ )
« ថ្ងៃទី ១–១៤ ខែ មេសា ។ ម៉ាថាយ ១៦–១៧, ម៉ាកុស ៩, លូកា ៩ » ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០១៩
ភាពផ្លាស់ប្រែ ដោយ ខាល ហ៊ែនរិច ប្លច
ថ្ងៃទី ១–១៤ ខែ មេសា ។
ម៉ាថាយ ១៦–១៧; ម៉ាកុស ៩; លូកា ៩
« ទ្រង់ជាព្រះគ្រីស្ទ »
កាលអ្នកសញ្ជឹងគិតអំពីជំពូកនៅក្នុងព្រះគម្ពីរសញ្ញាថ្មីទាំងនេះ ហើយស្ដាប់តាមសារលិខិតអំឡុងសន្និសីទទូទៅ សូមយកចិត្តទុកដាក់លើសារលិខិតដែលអ្នកមានអារម្មណ៍ថាកុមារនៅក្នុងថ្នាក់របស់អ្នកត្រូវការ ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
ប្រសិនបើកុមារនៅក្នុងថ្នាក់របស់អ្នកបានស្ដាប់ ឬបានមើលសន្និសីទទូទៅ សូមឲ្យពួកគេចែកចាយនូវអ្វីមួយដែលពួកគេបានឮ ឬបានឃើញ ។
បង្រៀនគោលលទ្ធិ
កុមារតូចៗ
ខ្ញុំអាចទទួលបានទីបន្ទាល់មួយថា ព្រះយេស៊ូវគ្រីស្ទគឺជាព្រះរាជបុត្រារបស់ព្រះ ។
សូមពិចារណាពីរបៀបដែលអ្នកអាចប្រើទីបន្ទាល់របស់ពេត្រុស និងចម្លើយរបស់ព្រះយេស៊ូវដើម្បីបង្រៀនដល់កុមារអំពីទីបន្ទាល់ ហើយបំផុសគំនិតដល់ពួកគេឲ្យស្វែងរកទីបន្ទាល់ផ្ទាល់ខ្លួនមួយ ។
សកម្មភាពដែលអាចជ្រើសរើស
-
សូមឲ្យកុមារស្ដាប់រកអ្វីដែលពេត្រុសបានពោល កាលអ្នកអាននៅក្នុង ម៉ាថាយ ១៦:១៥–១៧ ។ ( សូមមើលផងដែរ « ជំពូកទី ៣២ ៖ ពេត្រុសថ្លែងទីបន្ទាល់អំពីព្រះគ្រីស្ទ » រឿងព្រះគម្ពីរសញ្ញាថ្មី ទំព័រ ៧៦–៧៧ ឬវីដេអូដូចគ្នានេះនៅលើ LDS.org ) ។ សូមពន្យល់ថា ពេត្រុសបានថ្លែងទីបន្ទាល់អំពីព្រះយេស៊ូវគ្រីស្ទ ។ សូមអានបទគម្ពីរទាំងនេះម្តងទៀត ។ ( ឬសូមបង្ហាញវីដេអូម្ដងទៀត ) ។ លើកនេះសូមឲ្យកុមារស្ដាប់រកមើលនរណាដែលបានប្រាប់ពេត្រុសថា ព្រះយេស៊ូវគ្រីស្ទគឺជាព្រះរាជបុត្រានៃព្រះ ។
-
សូមថ្លែងទីបន្ទាល់របស់អ្នកអំពីព្រះយេស៊ូវគ្រីស្ទ ហើយពន្យល់ពីរបៀបដែលអ្នកបានទទួលទីបន្ទាល់នោះ ។ សូមឲ្យកុមារស្វែងរកទីបន្ទាល់ផ្ទាល់ខ្លួនរបស់គេមកពីព្រះវរបិតាសួគ៌ ។
ព្រះយេស៊ូវគ្រីស្ទប្រទានដល់ពួកព្យាការី និងពួកសាវកនូវកូនសោបព្វជិតភាពដើម្បីដឹកនាំសាសនាចក្ររបស់ទ្រង់ ។
ព្រះអង្គសង្គ្រោះបានប្រៀបធៀបវិវរណៈទៅនឹងសិលាមួយ ហើយសិទ្ធិអំណាចបព្វជិតភាពទៅនឹងកូនសោ ។ តើអ្នកអាចប្រើរឿងប្រៀបធៀបទាំងនេះដើម្បីជួយកុមារឲ្យមានជំនឿទៅលើអស់អ្នកដែលដឹកនាំសាសនាចក្ររបស់ទ្រង់ដោយរបៀបណា ?
សកម្មភាពដែលអាចជ្រើសរើស
-
សូមបង្ហាញសិលាមួយដុំដល់កុមារ កាលអ្នកអាន ម៉ាថាយ ១៦:១៨ ជាមួយនឹងពួកគេ ។ សូមនិយាយសារឡើងវិញជាមួយនឹងពួកគេនូវឃ្លា « នៅលើសិលានេះ ខ្ញុំនឹងស្ថាបនាសាសនាចក្ររបស់ខ្ញុំ » ដោយបន្ថែមកាយវិការទៅនឹងពាក្យទាំងនេះ ។ សូមពន្យល់ថា សាសនាចក្រនេះត្រូវបានស្ថាបនាឡើងនៅលើ « សិលា » នៃវិវរណៈ ។
-
សូមបង្ហាញកុមារនូវកូនសោមួយចំនួន ហើយសួរថា តើយើងប្រើកូនសោដើម្បីធ្វើអ្វី ។ សូមពន្យល់ថា ពេត្រុស និងពួកសាវកផ្សេងទៀតបានទទួលកូនសោបព្វជិតភាពទាំងឡាយមកពីព្រះយេស៊ូវ ។ កូនសោទាំងនេះ « បើកសោ » យកពរជ័យនានាមកឲ្យយើង ហើយបើកផ្លូវទៅស្ថានសួគ៌ ។ ឧទាហរណ៍ កូនសោបព្វជិតភាពអនុញ្ញាតឲ្យយើងទទួលបានពិធីបុណ្យជ្រមុជទឹក ហើយទទួលយកពិធីសាក្រាម៉ង់ ។ សូមចែកកូនសោក្រដាសដល់កុមារ ហើយឲ្យពួកគេសរសេរពរជ័យនានាដែលកូនសោបព្វជិតភាពបាន « បើកសោ » យក ។
-
សូមបង្ហាញរូបភាពប្រធានសាសនាចក្រមួយ ហើយថ្លែងទីបន្ទាល់របស់អ្នកថា លោកកាន់នូវកូនសោបព្វជិតភាពទាំងអស់នាសព្វថ្ងៃនេះ គឺដូចជាពេត្រុសបានកាន់ដូច្នោះដែរ ។
ព្រះយេស៊ូវបានប្រទានកូនសោនៃបព្វជិតភាពដល់ពេត្រុស ។
សេចក្ដីជំនឿរបស់ខ្ញុំអាចធ្វើឲ្យមានអព្ភូតហេតុ ។
នៅពេលអ្នកអានសេចក្ដីសន្យារបស់ព្រះយេស៊ូវថា សេចក្ដីជំនឿដូចជាគ្រាប់ពូជស្ពៃខៀវអាចរំកិលភ្នំមួយបាន តើអ្នកទទួលបានចំណាប់អារម្មណ៍យ៉ាងណាអំពីកុមារដែលអ្នកបង្រៀន ?
សកម្មភាពដែលអាចជ្រើសរើស
-
សូមឲ្យកុមារប្ដូរវេនគ្នាគូររូបភ្នំធំៗ និងគ្រាប់ពូជតូចៗនៅលើក្ដារខៀន កាលអ្នកអាន ម៉ាថាយ ១៧:១៩–២០ ជាមួយនឹងពួកគេ ។ សូមពន្យល់ថា ភ្នំទាំងឡាយដែលយើងត្រូវរំកិលនោះជាធម្មតាគឺជារឿងដែលមើលទៅពិបាកធ្វើសម្រាប់យើង ។ តើមានរឿងមួយចំនួនអ្វីខ្លះដែលយើងមានអារម្មណ៍ថាដូចជាភ្នំនោះ ? សូមប្រើទំព័រសកម្មភាពសប្ដាហ៍នេះ ដើម្បីជួយកុមារឲ្យគិតអំពីរបៀបដែលសេចក្ដីជំនឿអាចជួយពួកគេឲ្យធ្វើរឿងនានាដែលព្រះសព្វព្រះទ័យឲ្យពួកគេធ្វើ ។
-
សូមដាក់រូបភាពភ្នំនៅម្ខាងនៃបន្ទប់រៀន ហើយសរសេរពាក្យដូចជា ភ័យខ្លាច សង្ស័យ ឬ ព្រួយបារម្ភ ។ សូមឲ្យកុមារសរសេរកិច្ចការមួយចំនួនដែលពួកគេអាចធ្វើបានដើម្បីទទួលបានសេចក្ដីជំនឿដ៏រឹងមាំជាងនេះទៅលើព្រះយេស៊ូវគ្រីស្ទ ។ សូមឲ្យកុមារម្នាក់ៗដែលលើកឡើងយោបល់អ្វីមួយនោះរំកិលរូបភ្នំខិតទៅម្ខាងទៀតនៃថ្នាក់រៀនបន្ដិច ។ សូមអាន ម៉ាថាយ ១៧:១៩–២០ ហើយថ្លែងទីបន្ទាល់អំពីអំណាចនៃសេចក្ដីជំនឿនៅក្នុងជីវិតរបស់អ្នក ។
-
សូមឲ្យកុមារច្រៀងបទ « ជំនឿ » សៀវភៅចម្រៀងកុមារ ទំព័រ ៥០ រួចហើយឲ្យគ្រាប់ពូជមួយដល់កុមារម្នាក់ៗឲ្យយកទៅផ្ទះ ។ សូមឲ្យពួកគេដាំគ្រាប់ពូជនោះ ហើយដាក់វានៅកន្លែងណាមួយដែលពួកគេអាចឃើញវាធំលូតលាស់ឡើង ដើម្បីជួយពួកគេឲ្យចងចាំដើម្បីមានសេចក្ដីជំនឿទៅលើព្រះវរបិតាសួគ៌ និងព្រះយេស៊ូវគ្រីស្ទ ។
បង្រៀនគោលលទ្ធិ
កុមារធំៗ
ទីបន្ទាល់របស់ព្រះយេស៊ូវគ្រីស្ទមកតាមរយៈវិវរណៈមកពីស្ថានសួគ៌ ។
តើទីបន្ទាល់របស់ពេត្រុសនៅក្នុង ម៉ាថាយ ១៦:១៣–១៧ អាចជួយដល់កុមារយ៉ាងដូចម្ដេច កាលពួកគេស្ថាបនាទីបន្ទាល់របស់ពួកគេ ?
សកម្មភាពដែលអាចជ្រើសរើស
-
សូមសួរកុមារថា តើពួកគេនឹងនិយាយយ៉ាងណា ប្រសិនបើនរណាម្នាក់បានសួរពួកគេថា « តើព្រះយេស៊ូវគឺជានរណា ? » សូមឲ្យកុមារអាន ម៉ាថាយ ១៦:១៣–១៧ រកមើលរបៀបដែលពេត្រុសបានឆ្លើយតបនឹងសំណួរនោះយ៉ាងណា ។ តើលោកបានទទួលទីបន្ទាល់របស់លោកអំពីព្រះយេស៊ូវដោយរបៀបណា ? តើយើងអាចធ្វើអ្វីខ្លះ ដើម្បីពង្រឹងសេចក្ដីជំនឿរបស់យើង ?
-
សូមជួយកុមារឲ្យប្រៀបធៀបរបៀបដែលយើងដឹងអំពីសេចក្ដីពិតខាងវិញ្ញាណតាមរបៀបដែលយើងដឹងអំពីសេចក្ដីពិតផ្សេងទៀត ។ ឧទាហរណ៍ តើយើងដឹងថា មនុស្សម្នាក់ម្នាក់ខ្ពស់ប៉ុណ្ណាដោយរបៀបណា ឬថាតើអាកាសធាតុមានសភាពយ៉ាងណា ? តើយើងដឹងថា ព្រះយេស៊ូវគ្រីស្ទគឺជាព្រះរាជបុត្រារបស់ព្រះដោយរបៀបណា ?
-
សូមថ្លែងទីបន្ទាល់របស់អ្នកអំពីព្រះយេស៊ូវគ្រីស្ទ ហើយសូមឲ្យកុមារតាំងចិត្តដើម្បីទទួលបាន ឬពង្រឹងទីបន្ទាល់ផ្ទាល់របស់ពួកគេ ។
សាសនាចក្រនៃព្រះយេស៊ូវគ្រីស្ទត្រូវបានដឹកនាំដោយអស់អ្នកដែលកាន់កូនសោបព្វជិតភាព ។
ការសិក្សា ម៉ាថាយ ១៦:១៥–១៩ អាចស្ថាបនាសេចក្ដីជំនឿរបស់កុមារថា សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយគឺជាការស្ដារឡើងវិញនៃសាសនាចក្រដូចគ្នានឹងកាលដែលព្រះយេស៊ូវបានស្ថាបនា ពេលទ្រង់បានរស់នៅលើផែនដីនេះដែរ ។
សកម្មភាពដែលអាចជ្រើសរើស
-
សូមសរសេរ ម៉ាថាយ ១៦:១៩ នៅលើក្ដារខៀន ហើយលុបពាក្យពីរបីចោលរួមមានពាក្យ « កូនសោ » ។ សូមឲ្យកុមាររកពាក្យដែលលុបនោះ ។
-
សូមបង្ហាញវីដេអូ « Priesthood Keys: The Restoration of Priesthood Keys » ( LDS.org ) ឬរំឭកព័ត៌មានអំពីកូនសោបព្វជិតភាពនៅក្នុងសៀវភៅ ពិតចំពោះសេចក្ដីជំនឿទំព័រ ១០៣–១០ ។ តើកូនសោបព្វជិតភាពគឺជាអ្វី ? តើកូនសោបព្វជិតភាពដូចជាកូនសោពិតដោយរបៀបណា ?
-
សូមជួយឲ្យកុមារសរសេរនៅលើក្ដារខៀនអំពីបុគ្គលដែលមានកូនសោបព្វជិតភាព ។ ( ពិតចំពោះសេចក្ដីជំនឿ ទំព័រ ១០៣–១០ មាននូវបញ្ជីមួយដែលអាចជួយដល់ពួកគេបាន ) ។ សូមឲ្យនរណាម្នាក់នៅក្នុងវួដរបស់អ្នកដែលកាន់កូនសោទាំងនេះ និយាយទៅកាន់សិស្សក្នុងថ្នាក់អំពីមូលហេតុដែលកូនសោបព្វជិតភាពពិតជាសំខាន់ ។
-
សូមលាក់កូនសោ ( ឬរូបភាពកូនសោ ) ជុំវិញបន្ទប់រៀន ហើយសូមឲ្យកុមារស្វែងរកវា ។ ក្រោយពីកុមាររកឃើញកូនសោនីមួយៗហើយ សូមជួយកុមារឲ្យគិតអំពីពរជ័យនានាដែលយើងពេញចិត្តដោយសារតែកូនសោបព្វជិតភាព ( ឧទាហរណ៍ ក្រុមគ្រួសារដ៏អស់កល្ប ពិធីបុណ្យជ្រមុជទឹក និងពិធីសាក្រាម៉ង់ ) ។
ព្រះយេស៊ូវគ្រីស្ទគឺជាព្រះរាជបុត្រានៃព្រះ ។
ភាពផ្លាស់ប្រែនៃព្រះគ្រីស្ទគឺជាពាក្យមួយដែលត្រូវបានលើកឡើងពីរបីដងនៅក្នុងព្រះគម្ពីរ នៅពេលគេឭសំឡេងនៃព្រះ ជាព្រះបិតាថ្លែងទីបន្ទាល់អំពីព្រះរាជបុត្រាសំណព្វរបស់ទ្រង់ ។ ការសិក្សាដំណើររឿងនេះជាមួយនឹងកុមារអាចស្ថាបនាសេចក្ដីជំនឿរបស់ពួកគេទៅលើព្រះយេស៊ូវគ្រីស្ទ ។
សកម្មភាពដែលអាចជ្រើសរើស
-
សូមឲ្យកុមារគូររូបភាពភាពផ្លាស់ប្រែនៃព្រះគ្រីស្ទ ដូចដែលមាននៅក្នុង ម៉ាថាយ ១៧:១–៩ ។ សូមឲ្យពួកគេពន្យល់ពីគំនូររបស់ពួកគេដល់គ្នាទៅវិញទៅមក ។ ( សូមមើលផងដែរ គម្រោងសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គល និងក្រុមគ្រួសារ ) ។
-
សូមឲ្យកុមារមានពេលវេលាសញ្ជឹងគិតអំពីអ្វីដែលរឿងនេះបង្រៀនពួកគេអំពីព្រះយេស៊ូវគ្រីស្ទ ។ សូមឲ្យពួកគេសរសេរគំនិតរបស់ពួកគេនៅលើក្ដារខៀន ។ សូមឲ្យកុមារពីរបីនាក់ចែកចាយពីរបៀបដែលពួកគេដឹងថា ព្រះយេស៊ូវគ្រីស្ទគឺជាព្រះរាជបុត្រារបស់ព្រះ ។
លើកទឹកចិត្តឲ្យរៀនសូត្រនៅផ្ទះ
សូមឲ្យកុមារសួរឪពុកម្ដាយរបស់ពួកគេ ឬសមាជិកគ្រួសារផ្សេងទៀតអំពីរបៀបដែលពួកគេបានទទួលទីបន្ទាល់របស់ពួកគេអំពីព្រះយេស៊ូវគ្រីស្ទ ។
កែលម្អការបង្រៀនរបស់យើង
សូមប្រើតន្ដ្រី ។ ចម្រៀងថ្នាក់បឋមសិក្សា និងទំនុកតម្កើងអាចជួយកុមារគ្រប់វ័យទាំងអស់ឲ្យយល់ និងចងចាំនូវសេចក្ដីពិតនៃដំណឹងល្អ ។ ការច្រៀងក៏អាចជួយឲ្យកុមារបន្ដសកម្មនៅក្នុងបទពិសោធន៍រៀនសូត្រផងដែរ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ២២ ) ។