« ថ្ងៃទី ១៥–២១ ខែ មេសា ។ បុណ្យអ៊ិស្ទើរ ៖ ‹ សេចក្តីស្លាប់អើយ ជ័យជំនះរបស់ឯងនៅឯណា ? › » ចូរមកតាមខ្ញុំ—សម្រាប់ថ្នាក់បឋមសិក្សា ៖ ព្រះគម្ពីរសញ្ញាថ្មី ឆ្នាំ ២០១៩ ( ២០១៩ )

« ថ្ងៃទី ១៥–២១ ខែ មេសា ។ បុណ្យអ៊ិស្ទើរ » ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០១៩

ថ្ងៃទី ១៥–២១ ខែ មេសា

បុណ្យអ៊ីស្ទើរ

« សេចក្តីស្លាប់អើយ ជ័យជំនះរបស់ឯងនៅឯណា ? »

សូមប្រើពេលវេលារបស់អ្នកជាមួយនឹងកុមារដើម្បីជួយពួកគេឲ្យមើលទៅបុណ្យអ៊ិស្ទើរថា ជារដូវមួយដើម្បីអបអរនៅក្នុងព្រះអង្គសង្គ្រោះ ហើយដើម្បីបង្កើនសេចក្ដីដឹងគុណរបស់ពួកគេចំពោះពលិកម្មរបស់ទ្រង់កាន់តែជ្រាលជ្រៅ ។ គំនិតនៅក្នុងគម្រោងមេរៀនទាំងនេះអាចត្រូវបានកែតម្រូវដើម្បីជួយអ្នកឲ្យបង្រៀនកុមារគ្រប់អាយុបាន ។

កត់ត្រាចំណាប់អារម្មណ៍របស់អ្នក

អញ្ជើញឲ្យចែកចាយ

ដើម្បីជួយកុមារឲ្យចែកចាយអ្វីដែលពួកគេដឹងអំពីព្រះយេស៊ូវគ្រីស្ទ និងដង្វាយធួនរបស់ទ្រង់ អ្នកអាចបង្ហាញរូបភាពព្រះអង្គសង្គ្រោះនៅសួនច្បារគែតសេម៉ានី នៅលើឈើឆ្កាង និងបន្ទាប់ពីការរស់ឡើងវិញរបស់ទ្រង់ ( សូមមើល រូបភាពនៅក្នុង គម្រោងនាសប្ដាហ៍នេះ នៅក្នុងចូរមកតាមខ្ញុំ—សម្រាប់បុគ្គល និងក្រុមគ្រួសារ និង សៀវភៅរូបភាពដំណឹងល្អល.រ. ៥៦, ៥៧, ៥៨, ៥៩ និង ៦០ ) ។

បង្រៀនគោលលទ្ធិ

កុមារតូចៗ

ព្រះយេស៊ូវគ្រីស្ទ គឺជាព្រះអង្គសង្រ្គោះរបស់ខ្ញុំ ។

ពេលអ្នកអានអំពីដង្វាយធួនរបស់ព្រះយេស៊ូវ សូមសញ្ជឹងគិតអំពីរបៀបដែលអ្នកអាចជួយដល់កុមារឲ្យមានអារម្មណ៍សេចក្ដីស្រឡាញ់ដ៏លើសលប់របស់ព្រះយេស៊ូវចំពោះពួកគេ ។

សកម្មភាពដែលអាចជ្រើសរើស

សូមបង្រៀនកុមារថា ដោយសារយើងទាំងអស់គ្នាមានបាប នោះយើងមិនអាចត្រឡប់ទៅរកព្រះដោយគ្មានព្រះអង្គសង្គ្រោះដែលបានរងទុក្ខដោយសារអំពើបាបរបស់យើងបានទេ ។ ព្រះយេស៊ូវគ្រីស្ទអាចសង្រ្គោះយើងចេញពីអំពើបាបរបស់យើងបាន ប្រសិនបើយើងប្រែចិត្ត ។ សូមលើកកញ្ចក់មួយឡើង ហើយឲ្យកុមារប្ដូរវេនគ្នាមើលកញ្ចក់នោះ ។ កាលកុមារម្នាក់ៗមើលហើយ សូមនិយាយថា « ព្រះយេស៊ូវស្រឡាញ់ [ ឈ្មោះរបស់កុមារ ] ហើយទ្រង់អាចជួយសង្គ្រោះ [ ឈ្មោះរបស់កុមារ ] បាន » ។
សូមបង្ហាញរូបភាព ព្រះយេស៊ូវអធិស្ឋាននៅក្នុងសួនច្បារគែតសេម៉ានី ( សៀវភៅរូបភាពដំណឹងល្អ ល.រ. ៥៦ ) កាលអ្នកតំណាលរឿងអំពីព្រះយេស៊ូវរងទុក្ខនៅឯសួនច្បារគែតសេម៉ានីសម្រាប់អំពើបាបទាំងឡាយរបស់ពិភពលោកនេះ ( សូមមើល ម៉ាថាយ ២៦:៣៦–៤៦; លូកា ២២:៣៩–៤៤ ) ។ សូមពន្យល់ថា ដោយសារតែការរងទុក្ខរបស់ទ្រង់ នោះយើងអាចត្រូវបានអភ័យទោសឲ្យ កាលបានធ្វើការជ្រើសរើសខុស ។ អ្នកក៏អាចប្រើ « ជំពូកទី ៥១ ៖ ព្រះយេស៊ូវរងទុក្ខនៅឯសួនច្បារគែតសេម៉ានី » រឿងព្រះគម្ពីរសញ្ញាថ្មី ទំព័រ ១២៩–៣២ ឬវីដេអូដូចគ្នានេះនៅលើ ( LDS.org ) ។
សូមច្រៀងរួមគ្នាបទ « ខ្ញុំស្គាល់ក្ដីស្នេហ៍ព្រះសង្គ្រោះ » សៀវភៅចម្រៀងកុមារ ទំព័រ ៤២ ។ តើមានពាក្យណាខ្លះនៅក្នុងចម្រៀងនេះរៀបរាប់ពីក្ដីស្នេហ៍របស់ព្រះអង្គសង្គ្រោះ ? សូមសួរកុមារថា តើពួកគេអាចជួយមនុស្សដទៃឲ្យយល់ពីក្ដីស្នេហ៍របស់ព្រះអង្គសង្គ្រោះដោយរបៀបណា ។

ដោយសារតែព្រះយេស៊ូវបានមានព្រះជន្មរស់ឡើងវិញ នោះខ្ញុំនឹងរស់នៅម្ដងទៀត ។

តើអ្នកអាចជួយកុមារឲ្យយល់ថា ដោយសារតែព្រអង្គសង្គ្រោះ នោះយើង និងមនុស្សជាទីស្រឡាញ់របស់យើងនឹងរស់នៅម្ដងទៀតនៅថ្ងៃណាមួយដោយរបៀបណា ?

សកម្មភាពដែលអាចជ្រើសរើស

សូមបង្រៀនកុមារអំពីរឿងបុណ្យអ៊ិស្ទើរដោយប្រើប្រាស់រូបភាពព្រះគ្រីស្ទនៅក្នុងសួនច្បារគែតសេម៉ានី នៅលើឈើឆ្កាង និងក្រោយពីការរស់ឡើងវិញរបស់ទ្រង់ ដែលមាននៅក្នុងសៀវភៅរូបភាពដំណឹងល្អ( ល.រ. ៥៦,៥៧,៥៨,៥៩ និង ៦០ ) ព្រមទាំងរូបភាពពេញមួយទំព័រនៅក្នុង គម្រោងសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គល និងក្រុមគ្រួសារ ។ ចូរឲ្យកុមារពីរបីនាក់កាន់រូបភាពទាំងនេះ ខណៈអ្នកតំណាលរឿង ។ សូមប្រាប់កុមារអំពីមនុស្សពីរបីនាក់ដែលបានឃើញព្រះយេស៊ូវបន្ទាប់ពីទ្រង់បានរស់ឡើងវិញ ដែលមានដូចជា ម៉ារា ( សូមមើល យ៉ូហាន ២០:១–១៨ ) ឬ ថូម៉ាស ( សូមមើល យ៉ូហាន ២០:២៤–២៩ ) ។
សូមសង្កេតមើល ប្រសិនបើកុមារដឹងថា ហេតុអ្វីបានជាយើងប្រារព្ធធ្វើបុណ្យអ៊ិស្ទើរ ។ សូមពន្យល់ថា នៅថ្ងៃបុណ្យអ៊ិស្ទើរយើងប្រារព្ធពិធីនៃថ្ងៃដ៏សំខាន់បំផុតនៅក្នុងប្រវត្តិសាស្ដ្រ—ជាថ្ងៃដែលព្រះយេស៊ូវគ្រីស្ទបានរស់ឡើងវិញ ។ សូមសួរ ប្រសិនបើមានកុមារណាចង់ចែកចាយអ្វីដែលគ្រួសាររបស់គេធ្វើដើម្បីរំឭកដល់ការរស់ឡើងវិញរបស់ព្រះយេស៊ូវគ្រីស្ទ ។
សូមពន្យល់ថា រស់ឡើងវិញ មានន័យថា រស់នៅម្ដងទៀតបន្ទាប់ពីយើងស្លាប់ ។ សូមថ្លែងទីបន្ទាល់របស់អ្នកថា ដោយសារតែព្រះយេស៊ូវគ្រីស្ទ នោះយើងនឹងរស់ឡើងវិញម្ដងទៀត—យើងនឹងរស់នៅម្ដងទៀតបន្ទាប់ពីយើងស្លាប់ទៅ ហើយយើងនឹងមិនស្លាប់ទៀតឡើយ ។
សូមប្រើស្រោមដៃមួយគូដើម្បីបង្រៀនកុមារថា យើងទាំងអស់គ្នាមានរូបកាយមួយ ( តំណាងដោយស្រោមដៃ ) និងវិញ្ញាណមួយ ( តំណាងដោយដៃយើង ) ។ នៅពេលយើងស្លាប់ទៅ នោះវិញ្ញាណរបស់យើងនឹងបន្ដរស់នៅ ប៉ុន្ដែរាងកាយរបស់យើងមិនរស់នៅទៀតឡើយ ។ នៅពេលយើងរស់ឡើងវិញ នោះវិញ្ញាណនិងរូបកាយរបស់យើងនឹងរួបរួមគ្នាឡើងវិញម្ដងទៀត ។ សូមអនុញ្ញាតឲ្យកុមារប្ដូរវេនគ្នាពាក់ស្រោមដៃ ហើយដោះវាចេញ ។
សូមច្រៀងរួមគ្នាចម្រៀងអ៊ិស្ទើរ ដូចជាបទ « តើព្រះយេស៊ូវរស់ឡើងវិញឬ » ឬ « ព្រះយេស៊ូវបានរស់ឡើងវិញ »សៀវភៅចម្រៀងកុមារទំព័រ ៤៥, ៤៤ ហើយសូមបង្ហាញដល់កុមារនូវរូបភាពព្រះយេស៊ូវបន្ទាប់ពីទ្រង់បានរស់ឡើងវិញ ( សៀវភៅរូបភាពដំណឹងល្អ ល.រ. ៥៩, ៦០, ៦១ ) ។
សូមបង្ហាញរូបភាពមួយអំពីនរណាម្នាក់ដែលអ្នកស្គាល់ ដែលបានស្លាប់ទៅហើយ ។ សូមចែកចាយទីបន្ទាល់របស់អ្នកថា គាត់នឹងរស់ឡើងវិញ ដោយសារតែដង្វាយធួន និង ការមានព្រះជន្មរស់ឡើងវិញរបស់ព្រះយេស៊ូវគ្រីស្ទ ។
សូមមើលវីដេអូ « Jesus Is Resurrected » ឬ « The Risen Lord Appears to the Apostles » រួមគ្នា ( LDS.org ) ។ សារលិខិតបុណ្យអ៊ិស្ទើរបន្ថែមនានាអាចរកបាននៅលើ mormon.org/easter ។

ព្រះគ្រីស្ទជាមួយនឹងម៉ារានៅឯផ្នូរទទេ — ទ្រង់មានព្រះជន្មរស់ឡើងវិញដោយ ហ្គេក អុលសិន

បង្រៀនគោលលទ្ធិ

កុមារធំៗ

ព្រះយេស៊ូវបានរងទុក្ខសម្រាប់ខ្ញុំនៅក្នុងសួនគែតសេម៉ានី និង នៅលើឈើឆ្កាង ។

កាលអ្នកសិក្សាអំពីដង្វាយធួនរបស់ព្រះអង្គសង្គ្រោះ សូមសញ្ជឹងគិតអំពីរបៀបដែលអ្នកអាចជួយដល់កុមារឲ្យរៀន និងចងចាំថា ព្រះគ្រីស្ទបានរងទុក្ខនៅសួនគែតសេម៉ានី និងនៅលើឈើឆ្កាងសម្រាប់អំពើបាប ជំងឺ និងទុក្ខសោកនានារបស់ពួកគេ ។

សកម្មភាពដែលអាចជ្រើសរើស

សូមអានជាមួយនឹងកុមារក្នុង លូកា ២២:៣៩–៤៤ ព្រមទាំងខគម្ពីរជម្រើសមកពី ម៉ាថាយ ២៧:២៩–៥០ ។ សូមឲ្យពួកគេរកមើលពាក្យដែលជួយពួកគេឲ្យយល់ពីអ្វីដែលព្រះអង្គសង្គ្រោះបានជួបនៅឯសួនគែតសេម៉ានី និងនៅលើឈើឆ្កាង ។
សូមជួយកុមារឲ្យទន្ទេញចាំមាត្រាទីបីនៃសេចក្ដីជំនឿ ។ សូមថ្លែងទីបន្ទាល់របស់អ្នកថា ព្រះយេស៊ូវគ្រីស្ទមានអំណាចដើម្បីសង្គ្រោះយើងចេញពីអំពើបាប និងចេញពីសេចក្ដីស្លាប់ ។
សូមជួយកុមារឲ្យរៀបចំការនិយាយខ្លីមួយអំពីដង្វាយធួនរបស់ព្រះយេស៊ូវគ្រីស្ទដែលពួកគេអាចចែកចាយជាមួយនឹងមនុស្សដទៃ ។ សូមលើកទឹកចិត្តពួកគេឲ្យដាក់បញ្ចូលនៅក្នុងការនិយាយរបស់ពួកគេនូវបទគម្ពីរ និងទីបន្ទាល់របស់ពួកគេ ។ ប្រសិនបើពួកគេត្រូវការជំនួយបន្ថែម នោះពួកគេអាចអាន « ដង្វាយធួននៃព្រះយេស៊ូវគ្រីស្ទ » នៅក្នុង ពិតចំពោះសេចក្ដីជំនឿ ( ទំព័រ ៧៩–៨៦ ) ។

ដោយសារព្រះយេស៊ូវបានសុគត ហើយបានមានព្រះជន្មរស់ឡើងវិញ នោះខ្ញុំនឹងរស់នៅម្ដងទៀត ។

ថ្ងៃមួយ កុមារដែលអ្នកបង្រៀននឹងជួបបទពិសោធន៍ការស្លាប់របស់មនុស្សជាទីស្រឡាញ់ម្នាក់ ប្រសិនបើពួកគេមិនទាន់បានជួបទេនោះ ។ សូមជួយពួកគេឲ្យដឹងថា ដោយសារព្រះយេស៊ូវគ្រីស្ទបានមានព្រះជន្មរស់ឡើងវិញ នោះយើងទាំងអស់គ្នានឹងរស់នៅម្ដងទៀត ។

សកម្មភាពដែលអាចជ្រើសរើស

សូមបង្ហាញ សៀវភៅរូបភាពដំណឹងល្អ ល.រ. ៥៧, ៥៨, និង ៥៩ ហើយសូមឲ្យកុមារផ្គូផ្គងរូបភាពទាំងនេះទៅនឹងវគ្គបទគម្ពីរខាងក្រោមនេះ ៖ ម៉ាថាយ ២៧:២៩–៣៨, ៥៩–៦០; យ៉ូហាន ២០:១០–១៨ ។
សូមឲ្យកុមារអានរៀងៗខ្លួននូវ « ការរស់ឡើងវិញ » នៅក្នុងវចនានុក្រមគម្ពីរប៊ីប ហើយសរសេរសំណួរសាកល្បងដែលពួកគេអាចសួរអំពីអ្វីដែលពួកគេបានអាន ។ សូមផ្ដល់ពេលវេលាឲ្យកុមារសួរសំណួរពួកគេដល់គ្នាទៅវិញទៅមក ហើយស្វែងរកចម្លើយរួមគ្នា ។
សូមជួយកុមារឲ្យមើលក្នុង លិបិក្រមប្រធានបទ នៅចុងសៀវភៅចម្រៀងកុមារ ដើម្បីស្វែងរកចម្រៀងមួយដែលពួកគេចង់រៀនអំពីព្រះយេស៊ូវគ្រីស្ទ ឬការរស់ឡើងវិញ ។ សូមច្រៀងចម្រៀងនោះពីរបីដងរួមគ្នា ។ សូមសួរកុមារថា តើពួកគេរៀនបានអ្វីខ្លះពីចម្រៀងនេះ ។
ពីមុនចាប់ផ្ដើមថ្នាក់ សូមឲ្យកុមារពីរបីនាក់រៀបចំឡើងមកចែកចាយទីបន្ទាល់របស់ពួកគេអំពីដង្វាយធួន និងការរស់ឡើងវិញរបស់ព្រះអង្គសង្គ្រោះ ។ សូមឲ្យកុមារសរសេរទុកនូវទីបន្ទាល់របស់ពួកគេដើម្បីចែកចាយនៅផ្ទះ ។

លើកទឹកចិត្តឲ្យរៀនសូត្រនៅផ្ទះ

ដើម្បីជួយកុមារឲ្យចែកចាយនូវអ្វីដែលពួកគេបានរៀនជាមួយនឹងក្រុមគ្រួសាររបស់ពួកគេ សូមលើកទឹកចិត្តពួកគេឲ្យច្រៀងចម្រៀងមួយអំពីព្រះយេស៊ូវគ្រីស្ទនៅផ្ទះនាសប្ដាហ៍នេះ ។

កែលម្អការបង្រៀនរបស់យើង

កុមារទទួលបានប្រយោជន៍ពីការធ្វើរឿងសារឡើងវិញ ។ សូមកុំខ្លាចនឹងធ្វើសកម្មភាពនានាច្រើនដងច្រើនសារឡើយ ជាពិសេសជាមួយនឹងកុមារតូចៗ ។ ការធ្វើសារឡើងវិញនឹងជួយកុមារឲ្យចងចាំអ្វីដែលអ្នកបង្រៀន ។