« ថ្ងៃទី ២៦ ខែ ធ្នូ–ថ្ងៃទី ១ ខែ មករា ។ ពួកយើងមានការទទួលខុសត្រូវចំពោះការរៀនសូត្រផ្ទាល់ខ្លួនរបស់យើង » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )

« ថ្ងៃទី ២៦ ខែ ធ្នូ–ថ្ងៃទី ១ ខែ មករា ។ ពួកយើងមានការទទួលខុសត្រូវចំពោះការរៀនសូត្រផ្ទាល់ខ្លួនរបស់យើង » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣

ថ្ងៃទី ២៦ ខែ ធ្នូ–ថ្ងៃទី ១ ខែ មករា

ពួកយើងមានការទទួលខុសត្រូវចំពោះការរៀនសូត្រផ្ទាល់ខ្លួនរបស់យើង

កាលបងប្អូនអានបទគម្ពីរនៅក្នុងគម្រោងមេរៀននេះ សូមកត់ត្រាចំណាប់អារម្មណ៍ខាងវិញ្ញាណនានាដែលបងប្អូនទទួលបាន ។ បងប្អូននឹងកត់សម្គាល់ឃើញថា គម្រោងមេរៀននីមួយៗនៅក្នុងសៀវភៅសិក្សានេះ មាននូវសកម្មភាពសម្រាប់កុមារតូចៗ និងកុមារធំៗ ប៉ុន្ដែបងប្អូនអាចសម្របសម្រួលសកម្មភាពណាមួយសម្រាប់ថ្នាក់រៀនរបស់បងប្អូនបាន ។

អញ្ជើញឲ្យចែកចាយ

នៅពេលចាប់ផ្ដើមថ្នាក់រៀននីមួយៗ សូមផ្ដល់ឱកាសដល់កុមារឲ្យចែកចាយនូវអ្វីដែលពួកគេកំពុងរៀនអំពីដំណឹងល្អ ។ ឧទាហរណ៍ នៅសប្ដាហ៍នេះបងប្អូនអាចអញ្ជើញឲ្យពួកគេចែកចាយដំណើររឿង ដែលពួកគេចូលចិត្តអំពីព្រះយេស៊ូវគ្រីស្ទ ។

បង្រៀនគោលលទ្ធិ ៖ កុមារតូចៗ

ព្រះយេស៊ូវគ្រីស្ទសព្វព្រះទ័យឲ្យខ្ញុំធ្វើតាមទ្រង់ ។

បងប្អូន និងកុមារនឹងអានដំណើររឿងជាច្រើនអំពីព្រះជន្មរបស់ព្រះយេស៊ូវគ្រីស្ទនៅឆ្នាំនេះ ។ សូមជួយកុមារឲ្យយល់ថា ហេតុផលដែលយើងរៀនអំពីដំណើររឿងទាំងនេះគឺដើម្បីឲ្យយើងអាចដើរតាមគំរូដ៏ឥតខ្ចោះរបស់ព្រះយេស៊ូវគ្រីស្ទបានកាន់តែប្រសើរ ។

សកម្មភាពដែលអាចធ្វើបាន

សូមប្រាប់កុមារអំពីការអញ្ជើញរបស់ព្រះអង្គសង្រ្គោះឲ្យ « ចូរមកតាមខ្ញុំ » ដែលមាននៅក្នុង ម៉ាថាយ ៤:១៨–២២ ។ សូមធ្វើសកម្មភាពមួយ ដែលមានកុមារម្នាក់ធ្វើកាយវិការ រួចហើយប្រាប់ដល់កុមារផ្សេងទៀតថា « សូមធ្វើតាមខ្ញុំ » ។ សូមអញ្ជើញកុមារផ្សេងទៀតឲ្យធ្វើសកម្មភាពនេះសាឡើងវិញ ។
សូមបង្ហាញរូបភាពមនុស្សដែលដើរតាមព្រះអង្គសង្គ្រោះតាមរបៀបខុសៗគ្នា អំឡុងការងារបម្រើក្នុងព្រះជន្មរមែងស្លាប់របស់ទ្រង់ និងនៅជំនាន់របស់យើង ។ បងប្អូនអាចស្វែងរករូបភាពនានានៅក្នុង សៀវភៅរូបភាពដំណឹង ឬក្នុង ទស្សនាវដ្តីនៃសាសនាចក្របាន ។ បងប្អូនក៏អាចបង្ហាញវីដេអូ « Light the World » ( នៅលើគេហទំព័រ ChurchofJesusChrist.org ) ។ សូមអនុញ្ញាតឲ្យកុមាររកមើលរបៀបដែលប្រជាជនដើរតាមព្រះអង្គសង្គ្រោះ ។
សូមជួយកុមារឲ្យគិតអំពីអ្វីៗដែលពួកគេកំពុងធ្វើ ដើម្បីដើរតាមព្រះអង្គសង្គ្រោះ ។ ការច្រៀងបទ « ស្វែងរកព្រះអម្ចាស់ពីក្មេង » ( សៀវភៅចម្រៀងកុមារ ទំព័រ ៦៧ ) អាចផ្ដល់គំនិតមួយចំនួនដល់ពួកគេ ។ សូមអនុញ្ញាតឲ្យពួកគេគូររូបភាពខ្លួនឯងដែលកំពុងធ្វើរឿងទាំងនេះ ។

កុមារអាចទទួលបានទីបន្ទាល់ផ្ទាល់ខ្លួនរបស់ពួកគេអំពីសេចក្ដីពិតនៃព្រះគម្ពីរ ។

ព្រះគម្ពីរគឺពិត ។

កុមារអាចទទួលបានទីបន្ទាល់មួយថា ព្រះគម្ពីរគឺពិត តាំងពីមុនពួកគេអាចអានបានទៅទៀត ។ កាលបងប្អូនសិក្សាព្រះគម្ពីរជាមួយនឹងកុមារនាឆ្នាំនេះ បងប្អូនអាចជួយពួកគេឲ្យដឹងដោយខ្លួនឯងថា ព្រះគម្ពីរគឺពិត ។

សកម្មភាពដែលអាចធ្វើបាន

សូមអញ្ជើញកុមារឲ្យប្រាប់អំពីអំណោយដែលពួកគេពេញចិត្ត ដែលពួកគេបានទទួលសម្រាប់ថ្ងៃខួបកំណើត ឬក្នុងឱកាសផ្សេងទៀត ។ សូមយកព្រះគម្ពីរមួយក្បាលដែលខ្ចប់ជាកាដូ ហើយឲ្យកុមារម្នាក់បើកកាដូនោះ រួចសូមថ្លែងទីបន្ទាល់ថា ព្រះគម្ពីរគឺជាអំណោយមួយសម្រាប់យើងមកពីព្រះវរបិតាសួគ៌ ។
សូមបង្ហាញកុមារនូវសៀវភៅខ្លះៗដែលមាននូវដំណើររឿងប្រឌិត ហើយសួរពួកគេថា តើដំណើររឿងមួយណាដែលពួកគេចូលចិត្តជាងគេ ។ សូមបង្ហាញពួកគេព្រះគម្ពីរនេះ ហើយថ្លែងទីបន្ទាល់ថា ព្រះគម្ពីរនេះមាននូវព្រះបន្ទូលរបស់ព្រះសម្រាប់យើង ។ ព្រះគម្ពីរទាំងនេះប្រាប់អំពីប្រជាជនដែលពិតជាបានមានជីវិត និងរឿងរ៉ាងទាំងទាំងឡាយ ដែលពិតជាបានកើតឡើងពិតប្រាកដមែន ។
សូមចែកចាយសារលិខិតដែលមាននៅក្នុង ធីម៉ូថេ ទី២ ៣:១៥ និង មរ៉ូណៃ ១០:៣–៥ ដោយជួយកុមារឲ្យអានឡើងវិញពីរបីឃ្លា ។ សូមជួយពួកគេឲ្យយល់ថា ពួកគេអាចដឹងដោយខ្លួនឯងបានថា ព្រះគម្ពីរគឺពិត ។
សូមលាក់រូបភាពរបស់ព្រះអង្គសង្គ្រោះមួយ ហើយសូមផ្ដល់នូវតម្រុយខ្លះៗដល់កុមារដើម្បីជួយពួកគេឲ្យរកវាឃើញ ។ សូមជួយកុមារឲ្យយល់ពីរបៀបដែលការស្រាវជ្រាវព្រះគម្ពីរអាចជួយយើងឲ្យស្គាល់ព្រះយេស៊ូវគ្រីស្ទបាន ។ សូមអនុញ្ញាតឲ្យកុមារប្ដូរវេនគ្នាលាក់រូបភាពនោះ ហើយប្រាប់តម្រុយដល់កុមារផ្សេងទៀត ។
សូមច្រៀងជាមួយគ្នានូវបទចម្រៀងអំពីការរៀនសូត្រដំណឹងល្អ ដូចជាបទ « ស្វែងរក គិត អធិស្ឋាន » ( សៀវភៅចម្រៀងកុមារ ទំព័រ ៦៦ ) ហើយជួយកុមារឲ្យបង្កើតកាយវិការឲ្យដូចនឹងពាក្យទំនុកបទ ។ សូមចែកចាយបទគម្ពីរដែលបងប្អូនចូលចិត្តមួយ ឬពីរជាមួយនឹងកុមារ ហើយប្រាប់ពួកគេពីរបៀបដែលបងប្អូនដឹងថា ព្រះគម្ពីរគឺពិត ។ ប្រសិនបើកុមារមានបទគម្ពីរ ឬដំណើររឿងមកពីព្រះគម្ពីរដែលពួកគេចូលចិត្តណាមួយ សូមអញ្ជើញឲ្យពួកគេចែកចាយ ។

បង្រៀនគោលលទ្ធិ ៖ កុមារធំៗ

ព្រះយេស៊ូវគ្រីស្ទសព្វព្រះទ័យឲ្យខ្ញុំរៀនអំពីទ្រង់ និងដើរតាមទ្រង់ ។

សូមគិតអំពីរបៀបដែលបងប្អូនបានស្គាល់ព្រះយេស៊ូវគ្រីស្ទ ។ តើបងប្អូនអាចធ្វើអ្វីខ្លះដើម្បីជួយដល់កុមារឲ្យរៀនសូត្រអំពីទ្រង់ ហើយដើរតាមទ្រង់ ?

សកម្មភាពដែលអាចធ្វើបាន

សូមអញ្ជើញកុមារឲ្យរៀបរាប់អំពីមិត្តភក្ដិដ៏ជិតដិតម្នាក់ដែលពួកគេស្គាល់ ហើយប្រាប់ពីរបៀបដែលបុគ្គលរូបនេះបានក្លាយជាមិត្តម្នាក់ ។ សូមអាន និងពិភាក្សា យ៉ូហាន ៥:៣៩ និង យ៉ូហាន ១៤:១៥ ដើម្បីស្វែងរករបៀបដែលយើងអាចមានអារម្មណ៍ខិតជិតទៅព្រះយេស៊ូវ ។ សូមឲ្យកុមារចែកចាយពេលវេលាដែលពួកគេបានមានអារម្មណ៍ថាខិតជិតទៅទ្រង់ ។
សូមនាំសិស្សក្នុងថ្នាក់របស់បងប្អូនឲ្យដើរជុំវិញអគារប្រជុំ ។ សូមអញ្ជើញឲ្យកុមារលើកដៃឡើង នៅពេលពួកគេឃើញអ្វីមួយនៅតាមផ្លូវដែលរំឭកពួកគេអំពីរបៀបមួយ ដែលពួកគេអាចដើរតាមព្រះអង្គសង្គ្រោះបាន ( ដូចជាអាងជ្រមុជទឹក ឬរូបភាពមួយ ) ។
សូមច្រៀងជាមួយកុមារនូវបទចម្រៀងមួយបទអំពីការដើរតាមព្រះយេស៊ូវគ្រីស្ទ ដូចជាបទ « ចូរមកតាមខ្ញុំ » ( ទំនុកតម្កើង ល.រ. ៦៣ ) ។ សូមឲ្យសិស្សចែកចាយពីគ្រាដែលពួកគេបានដើរតាមគំរូរបស់ព្រះអង្គសង្គ្រោះ ។

ខ្ញុំអាចសិក្សាព្រះគម្ពីរសម្រាប់ខ្លួនខ្ញុំ ។

កាលបងប្អូនអានព្រះគម្ពីរជាមួយនឹងកុមារ ហើយសួរសំណួរពួកគេ នោះបងប្អូនអាចស្ថាបនាទំនុកចិត្តពួកគេថា ពួកគេអាចរៀនចេញពីព្រះគម្ពីរ ហើយរកឃើញនូវរតនសម្បត្តិដ៏មានតម្លៃ ពោលគឺចំណេះដឹងនេះឯង ។

សកម្មភាពដែលអាចធ្វើបាន

សូមអានជាមួយគ្នា យ៉ូហាន ៥:៣៩ និង កិច្ចការ ១៧:១០–១១ហើយសួរកុមារពីអ្វីដែលពួកគេរៀនអំពីរបៀបសិក្សាព្រះគម្ពីរ ។
សូមជ្រើសរើសយកបទគម្ពីរសាមញ្ញ ដ៏មានអានុភាពពីរបីចេញពីព្រះគម្ពីរសញ្ញាថ្មី ហើយសរសេរបទគម្ពីរនីមួយៗនៅលើក្រដាសមួយសន្លឹក បន្ទាប់មកលាក់ក្រដាសនោះទុក ។ សូមបង្ហើបតម្រុយដែលដឹកនាំកុមារទៅរក « ការប្រមាញ់រករតនសម្បត្តិ » នៅក្នុងបរិវេណថ្នាក់រៀន ឬអគារសាសនាចក្រដើម្បីស្វែងរកបទគម្ពីរទាំងនេះ ។ ក្រោយពីពួកគេរកឃើញបទគម្ពីរនីមួយៗហើយ សូមពិភាក្សាពីអត្ថន័យនៃបទគម្ពីរនោះ និងពីមូលហេតុដែលវាគឺជារតនសម្បត្តិមួយ ។
សូមចែកចាយបទគម្ពីរពីរបីដែលបងប្អូនស្រឡាញ់ រួចពន្យល់ពីមូលហេតុដែលបទគម្ពីរនោះមានអត្ថន័យចំពោះបងប្អូន ។ នៅក្នុងថ្នាក់រៀនទាំងមូល សូមរក្សាទុកនូវបញ្ជីបទគម្ពីរដែលជារតនសម្បត្តិ ដែលកុមារបានរកឃើញនៅក្នុងព្រះគម្ពីរសញ្ញាថ្មីនាឆ្នាំនេះ—នៅឯគេហដ្ឋាន ឬអំឡុងអង្គការបឋមសិក្សា ។
សូមពិភាក្សាជាមួយនឹងកុមារអំពីមូលហេតុដែលពេលខ្លះវាពិបាកនឹងអានព្រះគម្ពីរ ។ សូមស្នើសុំឲ្យកុមារចែកចាយដំបូន្មានដល់គ្នាទៅវិញទៅមកអំពីការសិក្សាព្រះគម្ពីរ ។ សូមឲ្យពួកគេចែកចាយនូវបទពិសោធន៍វិជ្ជមាននានា ដែលពួកគេបានមានក្នុងការសិក្សាព្រះគម្ពីរផងដែរ ។
សូមជួយកុមារឲ្យបង្កើតប្រតិទិនសាមញ្ញដែលពួកគេអាចប្រើបាន ដើម្បីគូសចំណាំថា តើពួកគេបានអានព្រះគម្ពីរញឹកញាប់ប៉ុណ្ណា ។ ប្រតិទិនទាំងនេះអាចរំឭកពួកគេឲ្យអានព្រះគម្ពីរជារៀងរាល់ថ្ងៃ ។

ខ្ញុំត្រូវការទីបន្ទាល់ផ្ទាល់ខ្លួនខ្ញុំ ។

កុមារដែលបងប្អូនបង្រៀននឹងត្រូវការទីបន្ទាល់ផ្ទាល់ខ្លួនរបស់ពួកគេអំពីព្រះវរបិតាសួគ៌ និងព្រះយេស៊ូវគ្រីស្ទ ។ តើបងប្អូនអាចធ្វើអ្វីខ្លះដើម្បីបំផុសគំនិតដល់ពួកគេឲ្យរៀនពីសេចក្ដីពិតដោយខ្លួនឯង ?

សកម្មភាពដែលអាចធ្វើបាន

សូមចែកចាយដំណើររឿងអំពីស្រ្តីព្រហ្មចារីដប់នាក់ ( សូមមើល ម៉ាថាយ ២៥:១–១៣; សូមមើលផងដែរ « ជំពូកទី ៤៧ ៖ ស្រ្តីព្រហ្មចារីដប់នាក់ » នៅក្នុង ដំណើររឿងព្រះគម្ពីរសញ្ញាថ្មី ទំព័រ ១១៨–២០ ឬវីដេអូដែលដូចគ្នានេះនៅលើគេហទំព័រ ChurchofJesusChrist.org ) ។ សូមសួរកុមារនូវសំណួរបែបនេះ ៖ តើទីបន្ទាល់របស់យើងដូចជាចង្កៀងយ៉ាងដូចម្ដេច ? ហេតុអ្វីក៏វាសំខាន់ដើម្បីមានទីបន្ទាល់ផ្ទាល់ខ្លួនរបស់យើង ?
សូមពិភាក្សាពីអ្វីដែលយើងអាចធ្វើបានដើម្បីពង្រឹងទីបន្ទាល់របស់យើង ។ សម្រាប់គំនិតបន្ថែម សូមឲ្យកុមារស្រាវជ្រាវ យ៉ូហាន ៧:១៧ និង មរ៉ូណៃ ១០:៣–៥ ។ សូមឲ្យពួកគេចែកចាយអ្វីដែលពួកគេដឹងថាពិត ។
សូមស្នើសុំឲ្យកុមារជួយបងប្អូនតម្រៀបដុំឈើដើម្បីសង់អគារមួយ ដោយប្រើសេចក្តីពិតដែលបង្កើតបានជាទីបន្ទាល់របស់យើង ( សូមមើល សេចក្ដីណែនាំដល់បទគម្ពីរទាំងឡាយ « ទីបន្ទាល់ » នៅលើគេហទំព័រ scriptures.ChurchofJesusChrist.org ) ។ សូមឲ្យកុមារប្រើដុំឈើនោះ ដើម្បីសង់អគារទាំងមូលដែលតំណាងឲ្យទីបន្ទាល់មួយ ។

លើកទឹកចិត្តឲ្យមានការរៀនសូត្រនៅឯគេហដ្ឋាន

តើបងប្អូនអាចលើកទឹកចិត្តកុមារ និងឪពុកម្ដាយរបស់ពួកគេឲ្យរៀនសូត្រពីព្រះគម្ពីរសញ្ញាថ្មីនៅផ្ទះដោយរបៀបណា ? ឧទាហរណ៍ បងប្អូនអាចអញ្ជើញកុមារឲ្យទន្ទេញបទគម្ពីរមួយ ដែលបងប្អូនបានពិភាក្សានៅក្នុងថ្នាក់ ( វាអាចមានប្រយោជន៍ក្នុងការបំបែកបទគម្ពីរនោះទៅជាឃ្លាខ្លីៗ ) ហើយចែកចាយខគម្ពីរនោះជាមួយនឹងក្រុមគ្រួសាររបស់ពួកគេ ។

ការកែលម្អការបង្រៀនរបស់យើង

កែប្រែសកម្មភាពនានាឲ្យសមស្របតាមអាយុ និងសមត្ថភាពរបស់កុមារដែលបងប្អូនបង្រៀន ។ កុមារតូចៗត្រូវការការពន្យល់លម្អិត ហើយរៀនសូត្រពីវិធីសាស្ដ្របង្រៀនផ្សេងៗគ្នា ។ កាលកុមារនោះធំទៅ ពួកគេអាចចូលរួមចំណែកបានច្រើនជាងមុន ហើយអាចចែកចាយគំនិតរបស់ពួកគេបានប្រសើរជាង ។ សូមផ្តល់ឱកាសឲ្យពួកគេចែកចាយ ថ្លែងទីន្ទាល់ និងចូលរួម ។ សូមផ្ដល់ជំនួយតាមតម្រូវការ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ២៥–២៦ ) ។

ទំព័រសកម្មភាព ៖ ខ្ញុំព្យាយាមក្លាយដូចព្រះយេស៊ូវ