« ថ្ងៃទី ២–៨ ខែ មករា ។ ម៉ាថាយ ១; លូកា ១ ៖ ‹ សូមឲ្យបានសម្រេចដូចពាក្យលោកចុះ › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )

« ថ្ងៃទី ២–៨ ខែ មករា ។ ម៉ាថាយ ១; លូកា ១ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣

ថ្ងៃទី ២–៨ ខែ មករា

ម៉ាថាយ ១; លូកា ១

« សូមឲ្យបានសម្រេចដូចពាក្យលោកចុះ »

សូមចាប់ផ្តើមដោយការអាន ម៉ាថាយ ១ និង លូកា ១ ។ ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ អាចជួយបងប្អូនឲ្យយល់ពីជំពូកទាំងនេះ ហើយគម្រោងមេរៀននេះអាចផ្ដល់នូវគំនិតបង្រៀននានាដល់បងប្អូនបាន ។ ប្រសិនបើបងប្អូនត្រូវការជំនួយបន្ថែមក្នុងការបង្រៀនដល់កុមារតូចៗ សូមមើល « ការបំពេញតាមតម្រូវការរបស់កុមារតូចៗ » នៅខាងដើមនៃធនធាននេះ ។

អញ្ជើញឲ្យចែកចាយ

សូមឲ្យកុមារអង្គុយជារង្វង់ រួចហើយសូមឲ្យកុមារម្នាក់ចែកចាយអ្វីមួយដែលគាត់ ឬនាងបានរៀនចេញពីព្រះគម្ពីរនាពេលថ្មីៗនេះ ។ បន្ទាប់មក កុមារនោះអាចបោះកូនបាល់ ឬចង្អុលទៅកុមារម្នាក់ទៀតនៅក្នុងរង្វង់នោះ ដែលនឹងត្រូវចែកចាយបន្ទាប់ ។

បង្រៀនគោលលទ្ធិ ៖ កុមារតូចៗ

ម៉ាថាយ ១:១៨–២៥; លូកា ១:២៦–៣៨

ទេវតាប្រកាសអំពីការប្រសូតរបស់ព្រះយេស៊ូវ ។

ទេវតាមួយអង្គបានយាងមកជួប ម៉ារា និងយ៉ូសែប ដែលទ្រង់បានប្រកាសអំពីការប្រសូតរបស់ព្រះយេស៊ូវគ្រីស្ទ ។ បទពិសោធន៍ទាំងនេះអាចជួយឲ្យកុមារឃើញពីសារៈសំខាន់នៃការប្រសូតរបស់ព្រះគ្រីស្ទ ។

សកម្មភាពដែលអាចធ្វើបាន

សូមអញ្ជើញឪពុកម្ដាយរបស់កុមារម្នាក់ឲ្យមកក្នុងថ្នាក់រៀន ដោយតុបតែងខ្លួនជាម៉ារា និងយ៉ូសែប ។ សូមឲ្យពួកគាត់ចែកចាយបទពិសោធន៍ដែលបានកត់ត្រានៅក្នុង ម៉ាថាយ ១:១៨–២៥ និង លូកា ១:២៦–៣៨ ។
សូមតំណាលរឿងដែលទេវតាបានបង្ហាញព្រះកាយមកឯម៉ារា និងយ៉ូសែប ដូចដែលបានកត់ត្រានៅក្នុងខគម្ពីរទាំងនេះ ។ ( សូមមើលផងដែរ « ជំពូក ២ ៖ ម៉ារា និងទេវតា » និង « ជំពូក ៤ ៖ យ៉ូសែប និងទេវតា » នៅក្នុង ដំណើររឿងព្រះគម្ពីរសញ្ញាថ្មី ទំព័រ ៨–៩, ១២ ឬវីដេអូដូចគ្នានេះនៅលើគេហទំព័រ ChurchofJesusChrist.org ) ។ បងប្អូនអាចបង្ហាញរូបភាពនៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ បាន ។ សូមអញ្ជើញកុមារឲ្យតំណាលរឿងនេះសាឡើងវិញប្រាប់បងប្អូន ។
សូមអញ្ជើញកុមារឲ្យគូររូបភាពអំពីដំណើររឿងទាំងនេះដែលមាននៅក្នុង ម៉ាថាយ ១:១៨–២៥ និង លូកា ១:២៦–៣៨ ។

ការជូនដំណឹង ដោយ ចន ស្កត

លូកា ១:៥–២៥, ៥៧–៦៣

ព្រះវរបិតាសួគ៌ឆ្លើយតបការអធិស្ឋានរបស់ខ្ញុំ ។

សាការី និងអេលីសាបិត ប្រហែលជាបានអធិស្ឋានសូមកូនម្នាក់អស់រយៈពេលជាច្រើនឆ្នាំមកហើយ ។ នៅទីបំផុត ព្រះវរបិតាសួគ៌បានឆ្លើយតបនឹងការអធិស្ឋានរបស់ពួកលោក ដោយប្រទានកូនប្រុសម្នាក់ឈ្មោះ យ៉ូហាន បាទីស្ទ ឲ្យពួកលោក ។ តើបងប្អូនអាចប្រើរឿងនេះដើម្បីបង្រៀនដល់កុមារថា ព្រះវរបិតាសួគ៌ឆ្លើយតបនឹងការអធិស្ឋានដោយរបៀបណា ?

សកម្មភាពដែលអាចធ្វើបាន

សូមចែកចាយដំណើររឿងនេះដែលមាននៅក្នុង លូកា ១:៥–២៥, ៥៧–៦៣តាមពាក្យពេចន៍របស់បងប្អូនផ្ទាល់ ។ បងប្អូនអាចសុំកុមារឲ្យតំណាលរឿងនេះសាឡើងវិញពីរបីដងបាន ។ សូមចាត់ឲ្យកុមារដើរតួធ្វើជា សាការី អេលីសាបិត និងទេវតា ហើយសម្តែងតាមសាច់រឿងនេះ ។ សូមគូសបញ្ជាក់ព្រះបន្ទូលរបស់ទេវតាទៅកាន់ សាការី ៖ « ពាក្យដែលលោកទូលអង្វរ នោះបានទទួលហើយ » ( លូកា ១:១៣ ) ។ សូមចែកចាយបទពិសោធន៍ដែលព្រះវរបិតាសួគ៌បានឆ្លើយតបការអធិស្ឋានរបស់បងប្អូន ។
សូមប្រើបទ « យើងបន្ទន់កេសា » ( សៀវភៅចម្រៀងកុមារ ទំព័រ ១៨ ) ឬបទចម្រៀងផ្សេងទៀតដើម្បីបង្រៀនកុមារឲ្យចេះអធិស្ឋាន ។ រាល់ពេលដែលកុមារច្រៀងដល់ពាក្យ « អធិស្ឋាន » ឬ « ការអធិស្ឋាន » សូមឲ្យពួកគេឱនក្បាលរបស់ពួកគេចុះ ហើយឱបដៃ ។
សូមឲ្យកុមារម្នាក់ៗធ្វើកាយវិការ ដែលតំណាងឲ្យអ្វីមួយដែលគេអាចអធិស្ឋានទូលសូមបាន ។ សូមអញ្ជើញកុមារផ្សេងទៀតឲ្យទស្សន៍ទាយថា តើកាយវិការនោះតំណាងឲ្យអ្វី ។ ពួកគេអាចរកឃើញគំនិតនានានៅលើទំព័រសកម្មភាពសប្ដាហ៍នេះ ។

លូកា ១:៣០–៣៥

ព្រះយេស៊ូវគ្រីស្ទគឺជាព្រះរាជបុត្រានៃព្រះ ។

ព្រះយេស៊ូវគ្រីស្ទគឺជាព្រះរាជបុត្រារបស់ព្រះវរបិតាសួគ៌ និងម៉ារា ។ តើបងប្អូនអាចធ្វើអ្វីខ្លះ ដើម្បីជួយកុមារឲ្យរៀនសូត្របន្ថែមទៀតអំពីទ្រង់ ?

សកម្មភាពដែលអាចធ្វើបាន

សូមប្រាប់កុមារថា ទេវតាបានមានបន្ទូលទៅម៉ារាថា ទារករបស់នាងនឹងត្រូវបានហៅថា ព្រះរាជបុត្រានៃព្រះ ( សូមមើល លូកា ១:៣៥ ) ។ សូមជួយកុមារឲ្យថាឃ្លា « ព្រះយេស៊ូវគ្រីស្ទគឺជាព្រះរាជបុត្រានៃព្រះ » សាឡើងវិញ ។ សូមជួយកុមារឲ្យស្គាល់ថា នរណាជាឪពុកម្ដាយរបស់ព្រះយេស៊ូវ ដោយឲ្យពួកគេគូររូបឪពុកម្ដាយរបស់ពួកគេផ្ទាល់ ។ កាលពួកគេធ្វើដូច្នេះ សូមប្រាប់ពួកគេថា ព្រះយេស៊ូវក៏មានឪពុកម្ដាយដែរ—គឺម៉ារា និងព្រះវរបិតាសួគ៌ ។ លើសពីនេះ យ៉ូសែប ត្រូវបានបង្គាប់ឲ្យការពារ និងមើលថែដល់ព្រះយេស៊ូវ កាលទ្រង់បានរស់នៅលើផែនដីនេះ ។
សូមចែកចាយទីបន្ទាល់របស់បងប្អូនថា ដោយសារព្រះយេស៊ូវគឺជាព្រះរាជបុត្រារបស់ព្រះ នោះទ្រង់អាចសុគតសម្រាប់អំពើបាបរបស់យើង ហើយទទួលបានព្រះជន្មជាថ្មីបាន ។ សូមបង្ហាញរូបភាពព្រះយេស៊ូវនៅលើឈើឆ្កាង និងការមានព្រះជន្មរស់ឡើងវិញ ( សូមមើល សៀវភៅរូបភាពដំណឹងល្អ ល.រ. ៥៧, ៥៩ ) ។

បង្រៀនគោលលទ្ធិ ៖ កុមារធំៗ

ម៉ាថាយ ១:១៨–២៥; លូកា ១:៥–៣៧

ការអ្វីដែលព្រះទ្រង់ធ្វើពុំបាននោះ គ្មានសោះឡើយ ។

ការប្រសូតរបស់ព្រះយេស៊ូវ និងកំណើតរបស់យ៉ូហាន បាទីស្ទ អាចធ្វើទៅបានតែតាមរយៈព្រះចេស្ដានៃព្រះប៉ុណ្ណោះ ។ ការរៀនសូត្រអំពីអព្ភូតហេតុទាំងនេះអាចពង្រឹងដល់សេចក្ដីជំនឿរបស់កុមារថា ព្រះមានអំណាចធ្វើអព្ភូតហេតុនៅក្នុងជីវិតរបស់ពួកគេ ។

សកម្មភាពដែលអាចធ្វើបាន

កាលបងប្អូន និងកុមាររំឭកឡើងវិញក្នុង ម៉ាថាយ ១:១៨–២៥ និង លូកា ១:៥–៣៧ សូមសួរដល់កុមារនូវសំណួរដូចជា « តើប្អូនៗនឹងនិយាយអ្វី ប្រសិនបើប្អូនគឺជាម៉ារានោះ ? » ឬ « តើប្អូនៗនឹងមានអារម្មណ៍យ៉ាងណា ប្រសិនបើប្អូនជាសាការីនោះ ? »
សូមប្រាប់ដំណើររឿងដែលបានពិពណ៌នានៅក្នុង ម៉ាថាយ ១:១៨–២៥ និង លូកា ១:៥–៣៧ជាពាក្យសម្តីសាមញ្ញៗ ។ សូមឲ្យកុមារលើកដៃឡើង នៅពេលពួកគេស្ដាប់ឮអ្វីមួយដែលមើលទៅមិនអាចកើតឡើងបាន បើគ្មានអំណាចរបស់ព្រះទេនោះ ។ តើមានរឿងផ្សេងទៀតណាខ្លះ ដែលកុមារអាចចែកចាយបាន ដែលក្នុងរឿងនោះព្រះបានធ្វើអ្វីមួយដែលមើលទៅហាក់ដូចជាមិនអាចទៅរួច ?
សូមជួយកុមារឲ្យទន្ទេញ លូកា ១:៣៧ ។ ដើម្បីទន្ទេញវាចាំ បងប្អូនអាចសរសេរខគម្ពីរនេះនៅលើក្ដារខៀន ហើយឲ្យកុមារសូត្រវាបីបួនដង ។ បន្ទាប់ពីសូត្របានម្ដងៗ សូមលុបពាក្យមួយចោល ។

ម៉ាថាយ ១:២១–២៥; លូកា ១:៣០–៣៥, ៤៦–៤៧

ព្រះយេស៊ូវគ្រីស្ទគឺជាព្រះរាជបុត្រានៃព្រះ ។

ព្រះយេស៊ូវគ្រីស្ទគឺជាព្រះរាជបុត្រារបស់ព្រះវរបិតាសួគ៌ និងម៉ារា ។ តើបងប្អូនអាចជួយកុមារឲ្យរៀនពីសេចក្ដីពិតនេះតាមរបៀបណា ?

សកម្មភាពដែលអាចធ្វើបាន

សូមឲ្យកុមារអាន លូកា ១:៣០–៣៥ ហើយរកមើលចម្លើយចំពោះសំណួរទាំងនេះ ៖ « តើនរណាជាមាតារបស់ព្រះយេស៊ូវ ? » និង « តើនរណាជាព្រះបិតារបស់ព្រះយេស៊ូវ ? » សូមជួយពួកគេឲ្យយល់ថា ព្រះយេស៊ូវគ្រីស្ទគឺជាអង្គតែមួយគត់ដែលមានមាតាជានាងម៉ារា ដែលមានជីវិតរមែងស្លាប់ និងព្រះវរបិតាមានព្រះជន្មអមតៈ ដែលជាព្រះវរបិតាសួគ៌ ( សូមមើលផងដែរ នីហ្វៃទី១ ១១:១៨–២១ ) ។
កាលបងប្អូនអានខគម្ពីរទាំងនេះ សូមឲ្យកុមារស្វែងរកព្រះនាម ឬព្រះបរមងាររបស់ព្រះយេស៊ូវគ្រីស្ទ ។ តើព្រះនាមទាំងនេះមានន័យដូចម្ដេច ហើយតើវាបង្រៀនយើងអ្វីខ្លះអំពីព្រះយេស៊ូវ ?
សូមចែកចាយទីបន្ទាល់របស់បងប្អូនអំពីព្រះយេស៊ូវគ្រីស្ទ ហើយសូមអញ្ជើញកុមារឲ្យចែកចាយទីបន្ទាល់របស់ពួកគេផងដែរ ។

លូកា ១:៥–២៥, ៥៧–៦៦

ព្រះវរបិតាសួគ៌ទ្រង់ព្រះសណ្ដាប់ ហើយឆ្លើយតបការអធិស្ឋានរបស់ខ្ញុំ ។

ព្រះឆ្លើយតបការអធិស្ឋាន ប៉ុន្ដែវាមិនតាមរបៀបដែលយើងរំពឹងទុកជានិច្ចនោះទេ ។ តើបងប្អូនអាចប្រើដំណើររឿងរបស់សាការី និងអេលីសាបិត បង្រៀនដល់កុមារអំពីសេចក្ដីពិតនេះដោយរបៀបណា ?

សកម្មភាពដែលអាចធ្វើបាន

សូមសួរកុមារថា តើពួកគេនឹងប្រាប់អ្វីខ្លះដល់នរណាម្នាក់ ដែលបានអធិស្ឋានសូមពរជ័យ ប៉ុន្ដែមិនទាន់បានទទួលពរជ័យនោះនៅឡើយ ។ សូមឲ្យពួកគេគិតអំពីសំណួរនេះ កាលពួកគេអានរួមគ្នាក្នុង លូកា ១:៥–២៥, ៥៧–៦៦ ។ ( សូមមើលផងដែរ « ជំពូក ១ ៖ អេលីសាបិត និងសាការី » និង « ជំពូក ៣ ៖ យ៉ូហាន បាទីស្ទបានចាប់កំណើត » នៅក្នង ដំណើររឿងព្រះគម្ពីរសញ្ញាថ្មី ទំព័រ ៦–៧, ១០–១១ ឬវីដេអូដូចគ្នានេះនៅលើគេហទំព័រ ChurchofJesusChrist.org ) ។ តើសាការី និងអេលីសាបិត អាចប្រាប់នរណាម្នាក់ដែលបានមានអារម្មណ៍ថា ការអធិស្ឋានរបស់ពួកគេមិនបានទទួលចម្លើយសោះយ៉ាងដូចម្ដេច ?
ពីមុនថ្នាក់ចាប់ផ្ដើម សូមអញ្ជើញកុមារបីបួននាក់ឲ្យចែកចាយបទពិសោធន៍នានា នៅពេលដែលព្រះវរបិតាសួគ៌បានឆ្លើយតបការអធិស្ឋានរបស់ពួកគេ ។ សូមចែកចាយគ្រាមួយដែលបងប្អូនបានមានអារម្មណ៍ថា ការអធិស្ឋានរបស់បងប្អូនទទួលបានចម្លើយតាមរបៀបដែលមិនបានរំពឹងទុកមួយ ។
សូមអញ្ជើញកុមារឲ្យគូររូបភាពមួយនៃគ្រាដែលព្រះវរបិតាសួគ៌បានឆ្លើយតបការអធិស្ឋាន—ជាពិសេសចំពោះការអធិស្ឋានមួយរបស់ពួកគេផ្ទាល់ ។ សូមឲ្យពួកគេចែកចាយគំនូររបស់ពួកគេជាមួយនឹងសិស្សនៅក្នុងថ្នាក់ ។

លើកទឹកចិត្តឲ្យមានការរៀនសូត្រនៅឯគេហដ្ឋាន

សូមអញ្ជើញកុមារឲ្យចែកចាយជាមួយក្រុមគ្រួសាររបស់ពួកគេ នូវរាល់រូបភាពដែលពួកគេបានគូរនៅក្នុងថ្នាក់ ។ សូមលើកទឹកចិត្តពួកគេឲ្យសួរទៅសមាជិកគ្រួសាររបស់ពួកគេ អំពីគ្រាដែលព្រះបានឆ្លើយតបការអធិស្ឋានរបស់ពួកគាត់ ។

ការកែលម្អការបង្រៀនរបស់យើង

ជួយកុមារតូចៗឲ្យរៀនចេញពីព្រះគម្ពីរ ។ ដើម្បីជួយកុមារតូចៗឲ្យរៀនចេញពីព្រះគម្ពីរ សូមផ្ដោតលើខគម្ពីរតែមួយ ឬតែឃ្លាគន្លឹះមួយឃ្លាប៉ុណ្ណោះ ។ បងប្អូនអាចឲ្យកុមារក្រោកឈរ ឬលើកដៃឡើង នៅពេលពួកគេឮពាក្យ ឬឃ្លានោះ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ២១ ) ។

ទំព័រសកម្មភាព ៖ ព្រះវរបិតាសួគ៌ឆ្លើយតបការអធិស្ឋានរបស់ខ្ញុំ