Jen Nōbar E, jān Dana Mario Wood

Jānwōde 9–15

Matu 2; Luk 2

Kōmij Itōn Kabun̄ n̄an E

Ajri ro kwoj katakin rej ļaddik ro im leddik ro reaorōk nejin Jemedwōj Ilan̄j. Kajjitōk Ippān n̄an jipan̄ eok ilo am̧ kappukot n̄an katakin er jān jeje ko rekwojarjar. E emaron̄ tōl eok n̄an pedped ko kwoj aikuj in katakin im maron̄ im̧we eok kōn m̧akūtkūt in ļōmņak ko me kwonaaj tōl ajri ro Nejin.

Kajjitōk bwe ren Kwaļo̧k

Kajjitōk ippān ajri ro n̄an kwaļo̧k ta eo rejeļā kōn ļotak eo an Kraist. Ta m̧ōttan ko in bwebwenato eo em̧m̧an ippāer?

Katakin Katak eo: Ajri ro Reddikļo̧k

Luk 2:1–14

Jisōs ekar ļotak.

Jisōs ekar likūt An kapijuknen ippān Jemedwōj Ilan̄ bwe en ļotak ilo laļ in bwe En maron̄ ad Rilo̧mo̧o̧r. Elmen am̧ maron̄ jipan̄ ajri ro keememej bwebwenato in ļotak eo an Kraist?

M̧akūtkūt ko Maron̄ Kōm̧m̧ani

• Ilo am̧ riiti bwebwenato in ļotak eo an Kraist, kajjitōk ippān ajri ro n̄an kōm̧m̧an arin bwebwenato eo kōn er make, ak kōjerbal peij in m̧akūtkūt eo an wiik in n̄an etale. (Bar lale “Jebta 5: Jesus Christ Is Born,” ilo Bwebwenato ko ilo Kalim̧m̧ur Ekāāl, 13–15, ak pija in alooj in jipan̄ eo ilo ChurchofJesusChrist.org.)

• N̄e ewōr juon, bōktok set in juon Nativity, im kajjitōk ippān ajri ro n̄an karōk m̧ōttan men ko ilo ijoko jikier rejim̧we ilo am̧ kwaļo̧k bwebwenato in ļotak eo an Jisōs Kraist. Kwaļo̧k juon pija in juon Nativity (lale, n̄an waanjon̄ak, unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko). Jitōn̄ļo̧k armej ro jet ilo Nativity eo, im kajjitōk ippān ajri ro n̄an kwaļo̧k ta eo rejeļā kōn kajjojo iaan armej ro.

• Al ippān doon al eo em̧m̧an ippān ajri ro kōn ļotak eo an Jisōs. Ilo am̧ kōm̧m̧an āindein, pukōt iien ko rem̧m̧an n̄an kwaļo̧k am̧ naan in kam̧ool kōn Rilo̧mo̧o̧r. Kajjitōk ippāer n̄an kwaļo̧k etke rej iakwe Jisōs

Matu 2:1–12

Imaron̄ leļo̧k menin leļo̧k ko rem̧m̧an n̄an Jisōs.

Ri Kanpil ro raar leļo̧k menin leļo̧k ko an kooļ, ijur, im m̧ōr. Elmen am̧ maron̄ kōjerbal bwebwenato in n̄an katakin ajri ro ke remaron̄ leļo̧k menin leļo̧k ko bar n̄an Jisōs—menin leļo̧k ko āinwōt iakwe, jerbal in jipan̄, im pokake?

M̧akūtkūt ko Maron̄ Kōm̧m̧ani

• Kwaļo̧k juon pija in Ri Kanpil ro ilo am̧ kwaļo̧k bwebwenato eo aer, loe ilo Matu 2:1–12, ippān ajri ro. Kwomaron̄ kwaļo̧k pija in Wise Men Present Gifts (ChurchofJesusChrist.org).

• Leļo̧k pija ko em̧ōj limi ak men ko jet me rej pinej jenkwan menin leļo̧k ko jemaron̄ liļo̧k n̄an Jisōs. Kajjitōk ippān ajri ro n̄an jipan̄ eok kōpeļļo̧k menin letok ko, im kōnono elmen ad liļo̧k menin leļo̧k kein n̄an Rilo̧mo̧o̧r.

• Jipan̄ kajjojo ajri jin̄aiki ak je juon laajrak in menin leļo̧k ko remaron̄ leļo̧k n̄an Jisōs, āinwōt “juon m̧ōttā eo em̧m̧an” ak “jar.” Kajjitōk ippān ajri ro n̄an kwaļo̧k laajrak ko aer n̄an kūlaaj eo im kālete juon “menin leļo̧k” renaaj leļo̧k n̄an Jisōs rainin.

Luk 2:40–52

Jisōs ekar juon ajri āinwōt n̄a.

Ekkatak kōn tōre eo Rilo̧mo̧o̧r ekar ajri emaron̄ jipan̄ ajri ro kwoj katakin jeļā kōn E. Kajjitōk ippān ajri ro ta eo rekar ekkatak jān eoon kein elmen aer maron̄ āinwōt Jisōs kiiō.

M̧akūtkūt ko Maron̄ Kōm̧m̧ani

• Kūrtok juon jodikdik in ward eo n̄an lotok kūlaaj eo am̧ im kwaļo̧k bwebwenato in an Jisōs kwaļo̧k ilo tampeļ eo ke Ekar likao em̧m̧an ded.

• Kajjitōk m̧oktaļo̧k ippān ajri ro n̄an bōktok pijaier make ke rej nin̄nin̄ n̄an kwaļo̧ke. Kajjitōk ippāer eo wāween aer kar rūttotak. Kwaļo̧k jet wāween ko Jisōs ekar rūttoļo̧k ie (lale Luk 2:40, 52). Al ippān ajri ro “Jesus Once Was a Little Child” (Children’s Songbook, 55) ak bar juon al kōn Rilo̧mo̧o̧r.

• Riiti Luk 2:52, im kōmeļeļeiki ta meļeļein “jeļāļo̧kjeņ” im “kekemooj.” Kwomaron̄ kajjitōk ippān ajri ro n̄an kōm̧m̧ani m̧akūtkūt ko me rej kwaļo̧k ta meļeļein n̄an kōļapļo̧k jeļāļo̧kjeņ im em̧m̧an ippān Anij im armej ro jet. N̄an waanjon̄ak, remaron̄ arin āinwōt n̄e rej riiti juon bok ak jipan̄ juon eo epād ilo aikuj.

Katakin Katak eo: Ajri ro Rerūttoļo̧k

Luk 2:1–21; Matu 2:1–12

Rikanaan ro etto rekar kwaļo̧k kōn ļotak eo an Rilo̧mo̧o̧r.

Rikanaan ro im ritōmak ro raar reim̧aanļo̧k n̄an ļotak eo an Rilo̧mo̧o̧r elōn̄ iiō ko. Meļeļe m̧ool in emaron̄ jipan̄ ajri ro bōk juon kam̧oolol eo eļap kōn mour im mijen eo an Rilo̧mo̧o̧r.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an kōnono kōn men ko rej reim̧aanļo̧k kake, āinwōt iien kemeem ak holiday. Kōm̧m̧an bwe ajri ro ren riiti Hilamōņ 14:2–5 n̄an kappukot men ko rikanaan ro rekar reim̧aanļo̧k kake.

• Riit ippān doon jet kanaan ko kōn ļotak eo an Rilo̧mo̧o̧r (lale Aiseia 7:14; 9:6; 1 Nipai 11:18; Hilamōn 14:5). Jipan̄ ajri ro kōlaajraki kanaan kein im pukōt iien eo rekar kūrm̧ool ilo Luk 2:1–21 im Matu 2:1–12.

• Kajjitōk ippān ajri ro n̄an jin̄aiki juon pija in men ko jet jān Matu 2:1–12 ak Luk 2:1–21 im kwaļo̧k ta eo rej kam̧m̧oolol kake kōn ļotak eo an Jisōs.

Simeon Reverencing the Christ Child, jān Greg K. Olsen

Luk 2:40, 52

Jisōs ekar rūttoļo̧k “ilo mālōtlōt im kajoor, im em̧m̧an ippān armej im Anij.”

Āinwōt Jisōs, ajri ro kwoj katakin ewōr juon aer mijen eaorōk n̄an pojak n̄ane. Ta eo remaron̄ ekkatak jān waanjon̄ak eo an Jisōs?

M̧akūtkūt ko Maron̄ Kōm̧m̧ani

• Ilo am̧ riit Luk 2:40, 52, ba n̄an ajri ro n̄an ron̄jake men ko Jisōs ekar kōm̧m̧ani. Kajjitōk ippān ajri ro n̄an kwaļo̧k wāween ko rekar rūttotak kaki jān ke rekar ajri. Kwaļo̧k en̄jake eo am̧ make kōn ekkatak gospel in jidik kōn jidik. Kwaļo̧k naan in kam̧ool eo am̧ kōn Rilo̧mo̧o̧r.

• Kadedeļo̧k m̧akūtkūt in me ej kwaļo̧k naan ko ilo Luk 2:40, 52. N̄an waanjon̄ak, komaron̄ jon̄e aetokan kajjojo ajri (“Jisōs ekar ļapļo̧k ilo kajoor”) ak kajjitōk ippān ajri ro n̄an kwaļo̧k eoon eo em̧m̧an ippāer (“kajoor ilo jetōb”). Jipan̄ ajri ro kememej wāween ko rej rūttoļo̧k ie im kwaļo̧k n̄an baam̧le ko aer.

• Ālkin etale Luk 2:40, 52, kajjitōk ippān ajri ro n̄an kwaļo̧k ta eo rej ļōmņake n̄e Jisōs en Kar āinwōt iiō eo aer. Elmen An naaj kar kōm̧m̧an n̄an Jinen? Ro jein ak jatin m̧aan im kōrā?

Luk 2:41–52

Imaron̄ ļoor waanjon̄ak eo an Jisōs.

Men̄e āinwōt juon ļaddik, Jisōs ekar kwaļo̧k gospel eo ilo tampeļ eo. Ejjeļo̧k oktak, ajri ro ilo kūlaaj eo am̧ remaron̄ katakin ro ipeļaakier.

M̧akūtkūt ko Maron̄ Kōm̧m̧ani

• Kajjitōk ippān juon ajri n̄an pojaktok n̄an kōmeļeļeik ilo tukadu bwebwenato eo ilo Luk 2:41–52. N̄an jipan̄ ajri ro meļeļe bwebwenato eo, kwaļo̧k ta meļeļe “jerbal eo an Jemed” (eoon 49). N̄an waanjon̄ak, komaron̄ ba n̄an ajri ro ta eo kwe ak jinōm̧ im jem̧ōm̧ rej kōm̧m̧ane. Ta jerbal ak “eddo” eo an Josep, jemen Jisōs ilo laļ? (lale Matu 13:55). Ta jerbal eo An Jemedwōj Ilan̄ (lale Luk 2:46–49; bar lale Moses 1:39).

• Riit, ippān ajri ro Luk 2:46–49, im kajjitōk, “Elmen an Jisōs kōm̧m̧ane jerbal eo An ‘Jemen’?” Jipan̄ ajri ro laarake ak jin̄a ioon bo̧o̧t eo wāween ko remaron̄ kōm̧m̧ane n̄an barāinwōt jipan̄ jerbal eo an Jemedwōj.

• N̄an jipan̄ ajri ro kōļapļo̧k aer leke bwe rej, āinwōt nin̄nin̄ Jisōs, remaron̄ kwaļo̧k gospel in, jipan̄ er kaminene kwaļo̧k n̄an doon juon pedped in katak jān N̄an Kōkajoorļo̧k Jodikdik ro.

Kōketak Ekkatak ilo M̧weo

Kajjitōk ippān ajri ro n̄an katakin baam̧le eo aer men ko raar ekktak kōn ļotak eoan Jisōs Kraist.

Kōkōm̧anm̧anļo̧k Ad Katakin

Ajri ro rōkōņaan jeļā juon men im rej ekkatak ilo elōn̄ wāween ko. Ajri ro rej m̧ōņōņō ilo aer ekkatak jān en̄jake ko reokkotaktak. Kōjerbal makūtkūt ko me rej jipan̄ er itok limoer, kōjerbal aolep en̄jake ko, im kajjieon̄ kōjerbal men ko rekāāl. (Lale Teaching in the Savior’s Way, 25–26.)