Jisōs ej jutak ilo āne jem̧aden

Ilo Āne Jem̧aden, jān Eva Koleva Timothy

Jānwōde 30–Pāpode 5

Mat 4; Luk 4–5

“Jetōb in Irooj ej Ioō”

Jino kepooj eok n̄an katak in n̄an riiti Matu 4 im Luk 4–5. Itok, Ļoor Eō—N̄an Kajjojo Armej im Baam̧le ko emaron̄ jipan̄ eok meļeļe jebta kein, im unin tōl in emaron̄ lewaj n̄an eok ļōmņak ko n̄an katakin.

pija ej bōk jikin kwaļo̧k

Kajjitōk bwe ren Kwaļo̧k

Kajjitōk ippān ajri ro n̄an leto-letak pija in Jisōs jān juon ajri n̄an eo juon. Ilo an kajjojo ajri kotak pija eo, kajjitōk ippān n̄an kwaļo̧k men eo me Jisōs ekar kōm̧m̧ane ke Ekar pād ioon laļin.

pija ej bōk jikin katakin

Katakin Katak eo: Ajri ro Reddikļo̧k

Matu 4:1–11; Luk 4:1–13

Imaron̄ kāālet jim̧we eo āinwōt kar Jisōs.

Ajri ro reddik “ejjeļo̧k aer jerawiwi” (Katak im Bujen Ko 29:47). Ijoke, bwebwenato an Jisōs anjo̧ jān kapo ko an Setan emaron̄ im̧we ajri ro n̄an kāālet jim̧we eo.

M̧akūtkūt ko Maron̄ Kōm̧m̧ani

• Kwaļo̧k bwebwenato in kapo eo an Jisōs jān Matu 4:1–11. (Bar lale “Jebta 11: Jesus Is Tempted,” ilo Bwebwenato ko ilo Kalim̧m̧ur Ekāāl, 30–31, ak bitio in jipan̄ eo ilo ChurchofJesusChrist.org.) Men eo ekkar ilo bwebwenato in, kajjitōk, “Ta eo kwoj ļōmņake Jisōs eaikuj kōm̧m̧ane?”

• Kwaļo̧k juon pija in Jisōs Kraist, innām kōmeļeļe kāālet ko juon ajri emaron̄ kōm̧m̧ane. Kajjitōk ippān ajri ro n̄an bōk juon bun̄ten nee m̧aanļo̧k kōn pija eo aolep iien am̧ kōmeļeļeiki juon kāālet. Kajjitōk ippān ajri ro n̄an kālikļo̧k kajjojo iien n̄e kwoj kōmeļeļeiki juon kāālet ebōd.

• Jipan̄ ajri ro ekkatak naan ko ilo al eo n̄an kōm̧m̧ani kāālet ko rem̧m̧an, āinwōt “Choose the Right Way” (Al ko Al in Ajri,, 160–61). Kōjerbal pija ko, kein ekkatak ko, ak m̧akūtkūt ko me rekkar n̄an naan ko ilo al eo.

Luk 4:18–19

Jisōs Kraist ej aō Rilo̧mo̧o̧r.

Luk 4:18–19 kōmeļeļeik mijen eo an Jisōs. Elmen am̧ maron̄ jipan̄ ajri ro kam̧m̧oolol e ta eo E ekar kōm̧m̧ane n̄an er?

M̧akūtkūt ko Maron̄ Kōm̧m̧ani

• Riiti Luk 4:18–19 n̄an ajri ro, im kōmeļeļeiki ta eo Jisōs Kraist ekar itok n̄an laļin n̄an kōm̧m̧ane (n̄an katakin kōj elmen ad ro̧o̧lļo̧k n̄an Jemedwōj Ilan̄, n̄an kaenōm̧m̧an kōj, im n̄an kōmour armej ro). Kwaļo̧k elmen An kar kōm̧m̧ane men kein n̄an eok.

• Kajjitōk ippān jet ajri n̄an arin wōt n̄e repok, būrom̧ōj, ak nan̄inmej. Kajjitōk ippān ajri ro jet n̄an ikkure kake ta eo remaron̄ kōm̧m̧ane n̄an jipan̄ er. Kam̧ool bwe Jisōs Kraist ekar itok n̄an katakin er, kaneōm̧m̧an, im kōmour kōj im bwe jej aikuj ļoor waanjon̄ak eo An.

• Kwaļo̧k pijain an Jisōs kakūrm̧ool mijen eo An (lale Gospel Art Book). Kajjitōk ippān ajri ro n̄an kōmeļeļeiki ta eo Jisōs ej kōm̧m̧an ilo kajjojo pija ko. Bar kwaļo̧k pija in armej ro rej kajjieon̄ in āinwōt Jisōs (komaron̄ lo jet ilo māākjin ko an Kabun̄ in).

Matu 4:18–22; Luk 5:1–11

Jisōs ej kajjitōk bwe jen “rieo̧n̄wōd armej.”

Rilo̧mo̧o̧r ej ikkūr, “Koṃwin ḷoor Eō, im Inaaj likūt koṃro ri eọñōd armej” (Matu 4:19), .ej jerbal n̄an aolep, ekoba ajri ro.

M̧akūtkūt ko Maron̄ Kōm̧m̧ani

• Kajjitōk ippān ruo ajri n̄an arin wōt n̄e er Simon Piter im Andrew ilo am̧ riiti Matu 4:18–22 Jipan̄ ajri ro kwaļo̧k ta eo em̧m̧aan rein rekar juļo̧ki n̄an ļoor Jisōs.

• Kōtļo̧k an ajri ro bōk kuņaer n̄an kwaļo̧k bwebwenato eo jān eoon kein kōjerbal pija kein ilaļ im ilo laajrak eo an wiik in ilo Itok, Ļoor Eō—N̄an Kajjojo Armej im Baam̧le Ko.

• Al ippān doon juon al kōn ļoor Jisōs Kraist, āinwōt “I Will Follow God’s Plan” (Children’s Songbook, 164). Jipan̄ ajri ro pukōt men ko kar kwaļo̧ki ilo al in me remaron̄ kōm̧m̧ani n̄an ļoor Jisōs.

• Kōjerbal peij in m̧akūtkūt eo an wiik in ippān ajri ro elmen aer maron̄ in “rieo̧nōd armej” n̄an ļoor Jisōs. Kwomaron̄ bar ikkure n̄an kōmājeej kōn peij in m̧akūtkūt in. Mwijiti ruo kape in kajjojo ek, kapedoiki, im kajjitōk ippān ajri ro n̄an būki juon ilo̧k juon n̄an kōmājeeji.

Jisōs ej kūr rikaļoor ro

Kraist ej Kūr Ruo Rijilōk, jān Gary Ernest Smith

pija ej bōk jikin katakin

Katakin Katak eo: Ajri ro Rerūttoļo̧k

Matu 4:1–11; Luk 4:1–13

Jisōs ekar kwaļo̧k juon waanjon̄ak n̄an eō bwe in jum̧ae kapo.

Men̄e Jisōs Kraist ekar kapo jān Setan, ak E ekar jab po. Elmen am̧ maron̄ jipan̄ ajri ro ļoor waanjon̄ak eo An?

M̧akūtkūt ko Maron̄ Kōm̧m̧ani

• Kōm̧m̧ane juon jaat ioon bo̧o̧t eo Kapo ko an Setan im Uwaak ko an Jisōs. Jipan̄ ajri ro kanne jaat in kōjerbal Matu 4:1–11 im Luk 4:1–13. Kajjitōk ippān ajri ro elmen aer maron̄ ļoor waanjon̄ak eo an Jisōs.

• Je jet iaan men ko me ajri eo emaron̄ in po n̄an kōm̧m̧ane juon kāālet ebōd. Kōtļo̧k an juon ajri bōk juon n̄an riiti, im kajjitōk ippān ajri ro n̄an kōnono elmen aer maron̄ jum̧ae kapo ilo jekjek in.

Matu 4:1–2

Jitlo̧k enaaj jipan̄ eō epaakeļo̧k Jemedwōj Ilan̄.

M̧okta jān jerbal in kwaļo̧k eo An, Jisōs ekar jitlo̧k im “kōm̧m̧ao ippān Anij” (Josep Smith Ukook, Matu 4:2 [ilo Matu 4:2, footnote c]). Jipan̄ ajri ro jeļā elmen an jitlo̧k maron̄ leļo̧k n̄an er jetōb in kajoor im jipan̄ er en̄jake epaakeļo̧k Jemedwōj Ilan̄.

M̧akūtkūt ko Maron̄ Kōm̧m̧ani

• Kūr juon ajri n̄an riiti Matu 4:1–2 kōjerbal Josep Smith Ukook loe ilo footnotes. Ta eo Jisōs ekar kōm̧m̧ane n̄an “pād ippān Anij”? Kwaļo̧k elmen an jitlo̧k kar jipan̄ kwe epaakeļo̧k Jemedwōj Ilan̄.

• Kajjitōk ippān ajri ro wōn ro em̧ōj aer kar jitlo̧k n̄an kwaļo̧k en̄jake ko aer. Elmen aer kōmeļeļeik jitlo̧k n̄an juon eo ejjan̄in kar jitlo̧k m̧okta?

• Je kajjitōk ko kōn jitlo̧k (āinwōt etke, n̄āāt, im elmen ad jitlo̧k) ioon jidik peba, im likūti ilowaan juon booļ. Kajjitōk ippān ajri ro n̄an bōk juon kajjitōk im kajjieon̄ in uwaake. Ta en̄jake ko kwomaron̄e ak ajri ro remaron̄ kwaļo̧ke kōn jitlo̧k?

Luk 4:16–22, 28–30

Jisōs Kraist ej aō Rilo̧mo̧o̧r.

Kōļmenļo̧kjeņ elmen an Rilo̧mo̧o̧r kar kōjeraam̧m̧an mour eo am̧. Elmen am̧ maron̄ jipan̄ ajri ro kile im̧we eo An ilo mour ko aer?

M̧akūtkūt ko Maron̄ Kōm̧m̧ani

• Kajjitōk ippān juon ajri n̄an pojaktok n̄an kūlaaj n̄an kwaļo̧k bwebwenato eo ilo Luk 4:16–30. Enaaj lukkuun jipan̄ n̄an kōjerbal “Jebta 17: Angry People in Nazareth” (ilo Bwebwenato ko ilo Kalim̧m̧ur Ekāāl, 42–43, ak bitio in jipan̄ eo ilo ChurchofJesusChrist.org). Kwomaron̄ barāinwōt kwaļo̧k pijaan alooj eo “Jesus Declares He Is the Messiah” (ChurchofJesusChrist.org

• Riiti Luke 4:18 ilo an ajri ro ļoore. Kajjitōk ippāer n̄an kōm̧m̧ane juon laajrak in men ko Rilo̧mo̧o̧r ekar ba E ekar itok n̄an kōm̧m̧ani. Kajjitōk ippān ajri ro n̄an kwaļo̧k waanjon̄ak ko in iien ko ke Kraist ekar kōm̧m̧ani men kein, men̄e ilo jeje ko rekwojarjar ak ilo mour ko aer.

• Je ioon peba eo kōn naan ko “Kōn Jisōs Kraist …” Leļo̧k juon peba n̄an kajjojo ajri, im kajjitōk ippāer n̄an je elmen aer maron̄ kadedeļo̧k naan in. Kōtļo̧k bwe ren kwaļo̧k ta eo rekar je.

Matu 4:18–22; Luk 5:1–11

Jisōs ej kaurwaineneik kōj n̄an ļoor E im bwe jen “rieo̧n̄wōd armej.”

Elōn̄ wāween ko ajri ro remaron̄ ļoor Rilo̧mo̧o̧r eo n̄an erom̧ “rieon̄wōd armej” (Matu 4:19). Elmen am̧ naaj jipan̄ er lo im̧we eo em̧m̧an bwe ren jerbal n̄an ro jet?

M̧akūtkūt ko Maron̄ Kōm̧m̧ani

• Kajjitōk ippāer n̄an riiti Matu 4:18–22 im Luk 5:1–11. Elmen an kar rikaļoor ro an Jisōs uwaake kūr eo An n̄an ļoor E? Ta eo jemaron̄ kōm̧m̧ane n̄an ļoor waanjon̄ok eo aer?

• Kwaļo̧k n̄an ajri ro jet kein eon̄wōd ak juon pijain rieon̄wōd. Ta meļeļein n̄an erom̧ “rieon̄wō armej”? Ta kein jerbal ko ewōr ippād n̄an jipan̄ kōj rieon̄wōd armej?

pija ej bōk jikin ekkatak

Kōketak Ekkatak ilo M̧weo

Kajjitōk ippān ajri ro n̄an kwaļo̧k n̄an baam̧le ko aer ta eo rekar ekkatak kōn rieon̄wōd armej.

Kōkōm̧anm̧anļo̧k Ad Katakin

Ajri ro remaron̄ kile im̧we eo an Jetōb eo. Katakin ajri ro bwe en̄jake in aenōm̧m̧an, iakwe, im okmāneen me rej en̄jake ilo aer kōnono ak al kōn Jisōs Kraist im gospel eo An ej itok jān Jetōb Kwojarjar. En̄jake kein remaron̄ kalōk naan in kam̧ool ko ad.

peij in m̧akūtkūt: Jisōs ej kajjitōk bwe jen rieo̧n̄wōd armej