« ថ្ងៃទី ២–៨ ខែ តុលា ។ អេភេសូរ ៖ ‹ ប្រយោជន៍នឹងនាំឲ្យពួកបរិសុទ្ធបានគ្រប់លក្ខណ៍ឡើង › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ២–៨ ខែ តុលា ។ អេភេសូរ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣
ថ្ងៃទី ២–៨ ខែ តុលា
អេភេសូរ
« ប្រយោជន៍នឹងនាំឲ្យពួកបរិសុទ្ធបានគ្រប់លក្ខណ៍ឡើង »
កាលដែលបងប្អូនសិក្សា សំបុត្រដល់ពួកអេភេសូរ សូមគិតថា តើគោលការណ៍អ្វីដែលបងប្អូនអាចសង្កត់ន័យដើម្បីប្រទានពរដល់កុមារដែលបងប្អូនបង្រៀនបាន ។ សូមកត់ត្រារាល់គំនិតដែលបងប្អូនគិតក្នុងចិត្តកាលដែលបងប្អូនអាន ។
អញ្ជើញឲ្យចែកចាយ
សូមអញ្ជើញកុមារឲ្យឈរជាជួរ ។ សូមចាប់ផ្តើមពីជួរមុខ សូមផ្តល់ឱកាសឲ្យកុមារម្នាក់ៗចែកចាយអ្វីមួយដែលគាត់ ឬនាងទើបបានរៀនថ្មីៗនេះអំពីដំណឹងល្អនៅអំឡុងពេលសិក្សាព្រះគម្ពីរ នៅក្នុងអង្គការបឋមសិក្សា ឬនៅកន្លែងណាផ្សេងទៀត ។
បង្រៀនគោលលទ្ធិ ៖ កុមារតូចៗ
សមាជិកសាសនាចក្រគួរតែជាមិត្តភក្ដិនឹងគ្នា និងជា « ជាតិតែមួយ » ។
តើកុមារក្នុងថ្នាក់របស់បងប្អូនមើលទៅជា « អ្នកដទៃ » ឬជា « ជាតិតែមួយ » នឹងគ្នាទៅវិញទៅមក និងជាមួយសមាជិកវួដដទៃដែរឬទេ ? សូមជួយពួកគេឲ្យយល់ថា ទោះជាយើងមានភាពខុសគ្នាក្ដី ក៏ព្រះអង្គសង្គ្រោះជួយយើងឲ្យរួបរួមគ្នា ហើយស្រឡាញ់គ្នាទៅវិញទៅមកដែរ ។
សកម្មភាពដែលអាចធ្វើបាន
-
សូមដាក់រូបភាពព្រះអង្គសង្គ្រោះនៅកណ្ដាលថ្នាក់រៀន ។ សូមអញ្ជើញកុមារឲ្យឈរនៅកន្លែងផ្សេងៗគ្នាក្នុងថ្នាក់ ដើម្បីបង្ហាញអំពី « អ្នកដទៃ » ឬ « អ្នកសំណាក់ » ។ សូមជួយពួកគេឲ្យយល់ថា ពាក្យទាំងនេះមានន័យថាមនុស្សដែលយើងពុំទាន់ស្គាល់នៅឡើយទេ ។ កាលដែលបងប្អូនអាន អេភេសូរ ២:១៩ សូមអញ្ជើញពួកគេឲ្យដើរឆ្ពោះទៅរករូបភាពរបស់ព្រះគ្រីស្ទ រហូតដល់ពួកគេឈរនៅជិតគ្នា ។ សូមប្រាប់ពួកគេថា កាលដែលយើងខិតទៅជិតព្រះអង្គសង្រ្គោះ យើងអាចមានសាមគ្គីភាពជាមួយអ្នកដទៃ « ជាជាតិតែមួយ » ឬជាមិត្តភក្តិ ។
-
សូមស្វែងរករូបភាពនានាអំពីកុមារមកពីទីកន្លែងផ្សេងៗគ្នាលើពិភពលោក រួចលាក់រូបភាពទាំងនោះនៅជុំវិញបន្ទប់ ។ សូមដាក់រូបភាពព្រះអង្គសង្គ្រោះនៅខាងមុខថ្នាក់រៀន ។ សូមអញ្ជើញកុមារទាំងអស់ឲ្យចាប់ដៃគូដូចអ្នកផ្សព្វផ្សាយសាសនា រួចដាក់វេនគ្នាស្វែងរករូបភាព « អ្នកដទៃ » មួយ ដើម្បីទៅដាក់នៅក្បែររូបភាពព្រះអង្គសង្គ្រោះ ។ សូមជួយពួកគេឲ្យយល់ថា នៅពេលមនុស្សបានទទួលពិធីបុណ្យជ្រមុជទឹក ពួកគេបានក្លាយជាសមាជិកម្នាក់ក្នុងគ្រួសារសាសនាចក្រយើង ឬជា « ពួកដំណាក់ព្រះ » ។ តើយើងអាចជួយនរណាម្នាក់ដែលជាមនុស្សមកថ្មី ឲ្យមានអារម្មណ៍ស្វាគមន៍បានយ៉ាងដូចម្ដេច ?
ព្រះវរបិតាសព្វព្រះទ័យឲ្យខ្ញុំគោរពប្រតិបត្តិឪពុកម្ដាយរបស់ខ្ញុំ ។
នៅពេលបងប្អូនអាន អេភេសូរ ៦:១–៣ សូមគិតអំពីរបៀបនានា ដែលបងប្អូនអាចជួយកុមារឲ្យយល់ពីមូលហេតុដ៏សំខាន់ដែលត្រូវគោរពតាមឪពុកម្ដាយរបស់ពួកគេ ។
សកម្មភាពដែលអាចធ្វើបាន
-
សូមអាន អេភេសូរ ៦:១ ឲ្យកុមារក្នុងថ្នាក់ស្ដាប់ ឬជួយកុមារម្នាក់ឲ្យអានខគម្ពីរនេះ ។ សូមជួយពួកគេឲ្យគិតពីគ្រាដែលពួកគេគោរពតាមឪពុកម្តាយរបស់ពួកគេ ។ សូមឲ្យពួកគេចែកចាយពីរបៀបដែលពួកគេទទួលបានពរជ័យមកពីការគោរពតាមនោះ និងអារម្មណ៍របស់ពួកគេនៅពេលពួកគេបានគោរពតាម ។ ហេតុអ្វីវាសំខាន់ដើម្បីគោរពតាមឪពុកម្តាយរបស់យើង ?
-
សូមច្រៀងចម្រៀងមួយបទជាមួយគ្នាអំពីការគោរពប្រតិបត្តិ ដូចជាបទ « ខ្ញុំនឹងឆាប់ធ្វើតាម » ( សៀវភៅចម្រៀងកុមារ ទំព័រ ៧១ ) ។ សូមឲ្យកុមារប្តូរវេនគ្នារៀបរាប់អ្វីមួយ ដែលឪពុកម្តាយរបស់ពួកគេបានសុំឲ្យពួកគេធ្វើ ហើយសូមអញ្ជើញពួកគេឲ្យសម្តែងធ្វើរឿងនោះ ។
-
សូមបង្ហាញរូបភាពព្រះយេស៊ូវគ្រីស្ទទទួលបុណ្យជ្រមុជទឹក ( សូមមើល សៀវភៅរូបភាពដំណឹងល្អ ល.រ. ៣៥ ) ហើយសូមចែកចាយពីរបៀបដែលព្រះអង្គសង្រ្គោះបានគោរពតាមព្រះវរបិតាសួគ៌ដោយការទទួលបុណ្យជ្រមុជទឹក ( សូមមើល នីហ្វៃទី២ ៣១:៦–៧ ) ។ សូមចែកចាយបទពិសោធន៍មួយ ដែលបងប្អូនបានគោរពតាមឪពុកម្តាយរបស់បងប្អូន ហើយទទួលបានពរជ័យ ។ ហេតុអ្វីព្រះវរបិតាសួគ៌សព្វព្រះទ័យឲ្យយើងគោរពតាមឪពុកម្តាយរបស់យើង ?
គ្រឿងសឹករបស់ព្រះអាចការពារខ្ញុំពីសេចក្ដីអាក្រក់ ។
តើបងប្អូននឹងជួយកុមារឲ្យយល់ថា ការធ្វើកិច្ចការសុចរិតគឺដូចជាការពាក់គ្រឿងសឹកតាមរបៀបណា ?
សកម្មភាពដែលអាចធ្វើបាន
-
សូមបង្ហាញរូបភាពមនុស្សម្នាក់ពាក់គ្រឿងសឹក ដូចជាគ្រឿងសឹកនៅក្នុងទំព័រសកម្មភាពគម្រោងមេរៀនសប្តាហ៍នេះ ឬ គម្រោងមេរៀនសប្តាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ។ កាលដែលបងប្អូនទន្ទេញ អេភេសូរ ៦:១០–១៨ សូមបង្ហាញកុមារពីរបៀបដែលគ្រឿងសឹកខុសៗគ្នាការពារកន្លែងផ្សេងៗគ្នាលើរូបកាយ ។ ( សូមមើល « The Whole Armor of God » Friend ខែ មិថុនា ឆ្នាំ ២០១៦ ទំព័រ ២៤–២៥ ) ។
-
សូមយកវត្ថុមួយចំនួនមកថ្នាក់រៀន ដែលអាចតំណាងឲ្យបំណែកគ្រឿងសឹកផ្សេងៗ ដែលមានរៀបរាប់នៅក្នុង អេភេសូរ ៦:១៤–១៧ ( ឧទាហរណ៍ មួក ឬអាវប៊ឹង ) ឬធ្វើគ្រឿងសឹកសាមញ្ញៗដោយប្រើក្រដាស ។ សូមឲ្យកុមារប្តូរវេនគ្នាពាក់ « គ្រឿងសឹក » ម្នាក់ម្ដងៗ ។ សូមជួយពួកគេឲ្យយល់ពីរបៀបដែលយើងពាក់គ្រឿងសឹករបស់ព្រះ ( ឧទាហរណ៍ តាមរយៈការសិក្សាព្រះគម្ពីរ ការបម្រើអ្នកដទៃ ការអធិស្ឋាន ការគោរពប្រតិបត្តិ ។ល។ ) ។ សូមពិភាក្សាពីរបៀបដែលរឿងទាំងនេះការពារយើងពីអារក្ស ។
បង្រៀនគោលលទ្ធិ ៖ កុមារធំៗ
យើងជា « ជាតិតែមួយ » នៅក្នុងក្រុមគ្រួសាររបស់ព្រះ ។
កុមារនឹងរឹងមាំ នៅពេលពួកគេមានមិត្តភក្ដិល្អនៅក្នុងដំណឹងល្អ ។ តើបងប្អូនអាចជួយពួកគេឲ្យបង្កើនមិត្តភាពជាមួយមនុស្សដទៃកាន់តែរឹងមាំតាមរបៀបណា ?
ពួកយើងគឺជា « ជាតិតែមួយ » នឹងពួកបរិសុទ្ធនៃព្រះ ។
សកម្មភាពដែលអាចធ្វើបាន
-
សូមអាន អេភេសូរ ២:១៩ ជាមួយគ្នា រួចពិភាក្សាអំពីអត្ថន័យនៃការក្លាយជាមនុស្សដទៃ ឬអ្នកសំណាក់ ។ សូមចែកចាយបទពិសោធន៍មួយ ជាពេលដែលបងប្អូនមានអារម្មណ៍ថាជាអ្នកដទៃ ឬអ្នកសំណាក់ ហើយមាននរណាម្នាក់បានជួយបងប្អូន ឲ្យមានអារម្មណ៍ស្វាគមន៍ និងទទួលស្គាល់ ។ សូមអញ្ជើញកុមារឲ្យចែកចាយបទពិសោធន៍ស្រដៀងនេះ ។ តើយើងអាចធ្វើអ្វីខ្លះ ដើម្បីក្លាយជា « ជាតិតែមួយ » ជាជាងអ្នកដទៃ ? តើមានកុមារនៅក្នុងថ្នាក់របស់បងប្អូនដែលពុំសូវចូលរៀន ដែលប្រហែលជាដោយសារតែពួកគេមានអារម្មណ៍ថាជាអ្នកដទៃដែរឬទេ ? សូមជួយកុមារឲ្យដាក់ផែនការ ដើម្បីជួយសមាជិកទាំងនោះឲ្យមានអារម្មណ៍ស្វាគមន៍ និងទទួលបានសេចក្ដីស្រឡាញ់ ។
-
ដើម្បីជួយកុមារឲ្យពង្រឹងទំនាក់ទំនងរបស់ពួកគេជាមួយគ្នា សូមសរសេរសំណួរមួយចំនួននៅលើក្តារខៀនដែលជំរុញពួកគេឲ្យចែកចាយអ្វីមួយអំពីខ្លួនពួកគេ ដូចជា តើការអធិស្ឋានរបស់ប្អូនៗត្រូវបានឆ្លើយតបនៅពេលណាដែរ ? ឬ តើប្អូនៗចូលចិត្តធ្វើអ្វីបំផុតជាមួយគ្រួសាររបស់ប្អូន ? សូមបំបែកសិស្សជាដៃគូ ហើយអញ្ជើញពួកគេឲ្យសួរគ្នាទៅវិញទៅមកនូវសំណួរនេះ ។ តើយើងបានរៀនអ្វីខ្លះអំពីគ្នា ?
ព្រះវរបិតាសួគ៌សព្វព្រះទ័យឲ្យខ្ញុំស្ដាប់បង្គាប់ ហើយគោរពប្រតិបត្តិឪពុកម្ដាយរបស់ខ្ញុំ ។
សូមគិតអំពីរបៀបនានា ដែលបងប្អូនអាចជួយកុមារឲ្យយល់ពីមូលហេតុដែលត្រូវស្ដាប់បង្គាប់ឪពុកម្ដាយ ។
សកម្មភាពដែលអាចធ្វើបាន
-
សូមអញ្ជើញកុមារឲ្យអាន អេភេសូរ ៦:១–៣ ដោយខ្លួនគេ រួចបង្ហាញឃ្លាដែលពួកគេចាប់អារម្មណ៍ជាងគេ ។ សូមអញ្ជើញពួកគេឲ្យចែកចាយឃ្លាទាំងនេះ និងមូលហេតុដែលពួកគេមានអារម្មណ៍ថា ឃ្លាទាំងនេះសំខាន់ ។
-
សូមជួយកុមារឲ្យស្វែងរក និងនិយាយអំពីគំរូនៃបុគ្គលនៅក្នុងព្រះគម្ពីរដែលបានធ្វើតាម និងគោរពដល់ឪពុកម្តាយរបស់ពួកគេ ដូចជា ព្រះអង្គសង្រ្គោះ ( សូមមើល លូកា ២:៤២–៥២ ) នាងរស់ ( សូមមើល នាងរស់ ១ ) ឬ នីហ្វៃ ( សូមមើល នីហ្វៃទី១ ៣:១–៨ ) ។ ហេតុអ្វីវាសំខាន់ដែលត្រូវស្ដាប់បង្គាប់ ហើយគោរពប្រតិបត្តិឪពុកម្ដាយរបស់យើង ?
-
សូមចែកក្រដាសមួយសន្លឹកឲ្យកុមារម្នាក់ៗ ដែលមានសរសេរពាក្យ គោរពប្រតិបត្តិ នៅផ្នែកខាងលើ ។ សូមពិភាក្សាអំពីអត្ថន័យនៃពាក្យនេះ ។ សូមអញ្ជើញកុមារឲ្យសរសេរ ឬគូរនៅលើក្រដាសរបស់ពួកគេ នូវកិច្ចការមួយដែលពួកគេអាចធ្វើបាន ដែលជាការគោរពប្រតិបត្តិដល់ឪពុកម្ដាយរបស់ពួកគេ ។
គ្រឿងសឹករបស់ព្រះអាចការពារខ្ញុំពីសេចក្ដីអាក្រក់ ។
នៅពេលបងប្អូនអាន អេភេសូរ ៦:១០–១៨ សូមគិតអំពីគ្រោះថ្នាក់ខាងវិញ្ញាណមួយចំនួន ដែលកុមារនឹងជួបប្រទះ និងរបៀបដែលបងប្អូនអាចពង្រឹងកុមារឲ្យប្រឆាំងនឹងវា ។
សកម្មភាពដែលអាចធ្វើបាន
-
សូមឲ្យកុមារម្នាក់អាន អេភេសូរ ៦:១០–១៨ សូមឲ្យកុមារម្នាក់ទៀតសរសេរ ឬគូរនៅលើក្ដារខៀន នូវរូបបំណែកនៃគ្រឿងសឹកដែលបានអាន ។ ហេតុអ្វីបានជាគ្រឿងសឹកសំខាន់នៅក្នុងចម្បាំង ? តើយើងអាចពាក់គ្រឿងសឹករបស់ព្រះជារៀងរាល់ថ្ងៃបានតាមរបៀបណា ?
-
សូមចាត់កុមារម្នាក់ៗឲ្យគូរ រួចសរសេរនៅលើបំណែកនៃគ្រឿងសឹកដែលបានអាននៅក្នុង អេភេសូរ ៦:១៤–១៧ ។ តើបំណែកគ្រឿងសឹកទាំងនេះការពារយើងពីសេចក្ដីអាក្រក់បានយ៉ាងដូចម្ដេច ? តើព្រះអម្ចាស់បានសន្យាអ្វីខ្លះដល់អ្នកដែលពាក់គ្រឿងសឹករបស់ព្រះ ? ( សូមមើល អេភេសូរ ៦:១៣ ) ។ តើ « ទប់ទល់ក្នុងថ្ងៃអាក្រក់ » មានន័យដូចម្ដេច ?
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យឃ្លាំមើលនៅសប្ដាហ៍នេះ រកនរណាម្នាក់ដែលអាចមានអារម្មណ៍ថាដូចអ្នកដទៃ ។ សូមអញ្ជើញពួកគេឲ្យធ្វើអ្វីមួយ ដើម្បីជួយដល់បុគ្គលនោះ ។
ការកែលម្អការបង្រៀនរបស់យើង
ជួយកុមារតូចៗឲ្យរៀនចេញពីព្រះគម្ពីរ ។ កុមារតូចៗអាចរៀនចេញពីព្រះគម្ពីរបាន ប៉ុន្តែពួកគេអាចត្រូវផ្តោតយកចិត្តទុកដាក់លើខគម្ពីរតែមួយ ឬក៏គ្រាន់តែឃ្លាគន្លឹះមួយតែប៉ុណ្ណោះ ។ បងប្អូនអាចអញ្ជើញកុមារឲ្យក្រោកឈរនៅពេលពួកគេឮពាក្យ ឬឃ្លាជាក់លាក់មួយ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ២៥–២៦ ) ។