Malanga ʻa Kalaisi ʻi he Maama Fakalaumālié, tā ʻa Robert T. Barrett

20–26 Nōvema

1 mo e 2 Pita

“Fiefia ʻaki ʻa e Fiefia Taʻefaʻalaua pea Fungani Lelei”

Kamata hoʻo ako ʻa e 1 mo e 2 Pita ʻaki ha lotu. Manatuʻi ko hoʻo teuteu lelei taha ke akoʻí ʻe haʻu ia mei ho ngaahi aʻusia ʻi he ako fakatāutahá mo e fakafāmilí.

Fakaafeʻi e Feʻinasiʻakí

Fakaʻaliʻali e fākatātā ʻo Pita ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, pea fakaafeʻi e fānaú ke nau tala atu ha meʻa ʻoku nau ʻilo fekauʻaki mo Pita. Fakamanatu ange naʻe hoko ʻa Pita ko e taki ʻo e Siasí hili e toetuʻu ʻa Sīsuú, pea fakamatalaʻi ange ko e 1 Pita mo e 2 Pita ko ha ʻū tohi ia meiate ia ki he kau mēmipa ʻo e Siasí ʻi hono kuongá.

Akoʻi e Tokāteliné: Fānau Iiki Angé

1 Pita 1:6–7; 3:14

ʻE lava ke u fiefia neongo e ngaahi taimi faingataʻá.

Fakakaukau ki ha founga te ke lava ai ʻo akoʻi e ngaahi veesi ko ʻení ʻi ha founga ʻe tokoniʻi ai e fānaú ke nau tafoki ki he Fakamoʻuí ʻi he taimi te nau fehangahangai ai mo e faingataʻá.

Ngaahi ʻEkitivitī ʻe Ala Fakahokó

• Tokoniʻi e fānaú ke nau fakakaukau ki ha ngaahi sīpinga ʻo e ngaahi meʻa faingataʻa naʻe foua ʻe Sīsuú, hangē ko hono manukiʻí pe fakakata ʻaki Iá. Fakamatalaʻi ange ʻe ʻi ai ha ngaahi taimi faingataʻa ʻi heʻetau moʻuí. Lau fakataha ʻa e 1 Pita 1:6–7; 3:14 pea vahevahe haʻo aʻusia ʻo ha taimi naʻá ke fehangahangai ai mo hano “ʻahiʻahi ʻa [hoʻo] tuí” pea naʻe tokoni atu ʻa e Fakamoʻuí ke ke fiefia. Pe te ke vahevahe e lotu ʻa e Palōfita ko Siosefa Sāmitá ʻi he Fale Fakapōpula Lipetií mo e nonga naʻe ʻoange ʻe he ʻOtuá kiate iá (vakai, Tokāteline mo e Ngaahi Fuakava 121:1–8; 123:17).

Siosefa Sāmita ʻi he Fale Fakapōpula Lipetií, tā ʻa Greg K. Olsen

• Fakaʻaliʻali ha fakatātā ʻoku hā ai ʻa Sīsū mo ha kakai kehe (ʻoku lahi ʻi he Tohi Fakatātā ʻo e Ongoongoleleí; pea mo e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Kole ki he fānaú ke nau kumi ʻa Sīsū ʻi he fakatātaá. Fakamoʻoni ange kapau te tau hanga ki he Fakamoʻuí, te Ne lava ʻo tokoniʻi kitautolu ke tau maʻu ʻa e fiefiá ʻi heʻetau moʻuí.

1 Pita 2:9–12

ʻOku finangalo e Tamai Hēvaní ke u hoko ko ha faʻifaʻitakiʻanga ki he niʻihi kehé.

Naʻe akonaki mai ʻa Paula ko e “kakai ʻa e ʻOtuá” ʻa kitautolu pea ʻe lava ʻe heʻetau ngaahi ngāue leleí ʻo “fakamālō ai ki he ʻOtuá.”

Ngaahi ʻEkitivitī ʻe Ala Fakahokó

• Fakamatalaʻi ʻa e ngaahi meʻa ʻoku hā mahino mai mei honau ʻātakaí, pe fakaʻaliʻali ha ʻū fakatātā ʻo e ngaahi meʻa peheé. Hangē ko ʻení, ʻoku hā mahino mai ha temipale mei he ngaahi fale ʻi hono ʻātakaí pe ko e māʻolunga makehe ha moʻunga mei ha teleʻa. Fakamatalaʻi ange ko e taimi ʻoku tau tauhi ai ʻa e ngaahi fekaú, ʻoku tau makehe ange ai pea ʻoku lava ke mamata ʻa e kakai kehé ki heʻetau ngaahi tā-sīpingá. Talanoa ki ha ngaahi “ngāue lelei” ʻe niʻihi kuó ke mamata kuo fai ʻe he fānaú. Fakamatalaʻi ange, ʻoku hoko e ngaahi ngāue lelei ko ʻení ke “fakamālō ai ki he ʻOtuá”—ʻoku nau tokoni ke ongoʻi ʻe he niʻihi kehé ha ʻofa lahi ange ki he ʻOtuá mo holi ke tokoni kiate Ia.

• Fakakakato mo e fānaú ʻa e peesi ʻekitivitií. ʻOku fakamālōʻia fēfē ʻe he kakai ʻi he fakatātaá ʻa e ʻOtuá?

1 Pita 3:18–20; 4:6

ʻOku ako ʻa e ngaahi laumālie ʻi he maama tataliʻanga ʻo e ngaahi laumālié fekauʻaki mo e ongoongoleleí.

Hili e pekia ʻa Sīsuú, naʻá Ne hāʻele ki he maama tataliʻanga ʻo e ngaahi laumālié pea ʻave ʻa e ngaahi laumālie angatonú ke akoʻi e ngaahi laumālie kehe ʻa ia kuo teʻeki ai ke nau tali ʻa e ongoongoleleí.

Ngaahi ʻEkitivitī ʻe Ala Fakahokó

• Talanoa ki he fānaú ʻo kau ki ha taha ʻokú ke ʻilo kuo pekia. Fakamatalaʻi ange, ko e taimi ʻoku mate ai e kakaí, ʻoku mavahe honau laumālié mei honau sinó ʻo ʻalu ki he maama tataliʻanga ʻo e ngaahi laumālié. Lau e 1 Pita 3:19 pea fakamatalaʻi ange ko e taimi ne pekia ai ʻa Sīsuú, naʻá ne hāʻele ʻo ʻaʻahi ki he maama tataliʻanga ʻo e ngaahi laumālié. Naʻá Ne kole ai ki he ngaahi laumālie angatonú ke nau akoʻi e ongoongoleleí ki he ngaahi laumālie kehe kuo teʻeki ai ke nau tali ʻa e ongoongoleleí (vakai, Tokāteline mo e Ngaahi Fuakava 138:30).

• Fakaʻaliʻali ha fakatātā ʻo ha temipale. Fakamatalaʻi ange ki he fānaú ko e taimi te nau matuʻotuʻa feʻunga aí, te nau lava ke ʻalu ki he temipalé ʻo papitaiso maʻa ʻenau ngaahi kui naʻe teʻeki papitaiso lolotonga ʻenau ʻi he māmaní. Tokoniʻi e fānaú ke nau fakafonu ha fuʻu ʻakau fakafāmili faingofua.

Akoʻi e Tokāteliné: Fānau Lalahi Angé

1 Pita 3:12–17; 4:13–14, 16

Te u lava ʻo maʻu ʻa e fiefiá mo e nongá neongo ʻa e ngaahi taimi faingataʻá.

Mahalo ʻe aʻusia ʻe he fānau ʻokú ke akoʻí ha faʻahinga ʻe niʻihi ʻo e lumolumaʻí pe manukiʻí koeʻuhi ko e meʻa ʻoku nau tui ki aí. ʻE lava ke tokoni ʻa e ngaahi veesi ko ʻení kiate kinautolu lolotonga e ngaahi taimi ko iá.

Ngaahi ʻEkitivitī ʻe Ala Fakahokó

• Fakamatalaʻi fakanounou ha ngaahi talanoa ʻe niʻihi fekauʻaki mo hono fakatangaʻi ʻo Sīsuú, pe fakaafeʻi e fānaú ke nau lau ia—vakai ki ha sīpinga ʻi he Mātiu 12:9–14 pe Luke 22:47–54. Fehuʻi ki he fānaú pe kuo lumolumaʻi pe manukia nai kinautolu koeʻuhí ko ʻenau moʻui ʻaki ʻa e ngaahi akonaki ʻa Sīsū Kalaisí. Ko e hā ʻa e ongo ne nau maʻú? Lau fakataha leva e 1 Pita 3:12–14; 4:13–14,16, pea kole ki he fānaú ke nau fekumi ki he meʻa ne lea ʻaki ʻe Pita fekauʻaki mo e faingataʻaʻia “koeʻuhi ko e māʻoniʻoní.” Ko e hā ʻe lava ai ke tau kei fiefia pē ʻi he taimi ʻoku lumolumaʻi ai kitautolu ʻe he kakaí ʻi hono fai ʻa ia ʻoku totonú?

• Vahevahe ha aʻusia ʻi he taimi naʻá ke maʻu ai ha fiefia mo e nonga lolotonga ha faingataʻa, pe vahevahe ange ʻa e founga ne maʻu ai ʻe he Palōfita ko Siosefa Sāmitá ʻa e fiemālié ʻi he taimi naʻá ne ʻi he Fale Fakapōpula Lipetií aí (vakai, Tokāteline mo e Ngaahi Fuakava 121:1–8; 123:17). Te tau maʻu fēfē ʻa e fiefiá mo e melinó ʻia Kalaisi lolotonga ʻetau ngaahi faingataʻá?

1 Pita 3:15

ʻE lava ke u mateuteu maʻu pē ke vahevahe ʻa e ongoongoleleí.

ʻE maʻu ʻe he ʻa e fānau ʻokú ke akoʻí ha ngaahi faingamālie lahi ʻi he toenga ʻo ʻenau moʻuí ke tali ha ngaahi fehuʻi mei ha kakai kehe fekauʻaki mo ʻenau tuí. Fakakaukau ki he meʻa te ke lava ʻo fai ke tokoniʻi ai kinautolu ke nau “nofo teu pē ke talia” [ha faʻahinga meʻa].

Ngaahi ʻEkitivitī ʻe Ala Fakahokó

• Talanoa ki ha taimi naʻe ʻeke atu ai ʻe ha taha ha fehuʻi kau ki he Siasí, pea fakamatalaʻi ange pe naʻá ke ongoʻi mateuteu nai ke tali. Kole ki he fānaú ke nau talanoa kau ki ha faʻahinga taimi kuo fai ange ai ʻe ha kakai ha ngaahi fehuʻi kau ki he Siasí. Lau fakataha e 1 Pita 3:15. Te tau muimui fēfē ki he akonaki ʻa Pita ʻi he veesi ko ʻení?

• Tokoniʻi e fānaú ke nau fakakaukau ki ha ngaahi fehuʻi ʻe niʻihi ʻe ala ʻeke ʻe he kakaí fekauʻaki mo Sīsū Kalaisi pe ko Hono Siasí. Tuku ki he fānaú ke nau taufetongi ʻi hono fakamatalaʻi atu e founga te nau tali ʻaki e ngaahi fehuʻi ko ʻení kae lava ke nau “nofo teu [maʻu] pē.” ʻOku ʻomi ʻe he Ngaahi Tefito ʻo e Tuí ha ngaahi moʻoni faingofua ʻe lava ke fakaʻaongaʻi ʻe he fānaú ke tali e ngaahi fehuʻi fekauʻaki mo e Siasí.

1 Pita 3:18–20; 4:6

ʻOku ako ʻa e ngaahi laumālie ʻi he maama tataliʻanga ʻo e ngaahi laumālié fekauʻaki mo e ongoongoleleí.

Ko e taimi ʻoku mate ai ha taha anga māʻoniʻoni, ʻokú ne ʻalu ki he maama tataliʻanga ʻo e ngaahi laumālié ke akoʻi e ongoongoleleí kiate kinautolu naʻe ʻikai ke nau maʻu ia lolotonga ʻenau ʻi he māmaní.

Ngaahi ʻEkitivitī ʻe Ala Fakahokó

• Tā ʻi he palakipoé ha siakale mo ha laine ʻi lotomālie. Tohiʻi e Palataisi ʻo e Ngaahi Laumālié ʻi he konga ʻe taha ʻo e siakalé pea Fale Fakapōpula ʻo e Ngaahi Laumālié ʻi he konga ʻe tahá. Fakaafeʻi ha taha ʻi he fānaú ke ne lau ʻa e 1 Pita 3:18–20; 4:6 (vakai ki he 1 Pita 4:6, ʻi he Fakahinohino ki he Ngaahi Folofolá, ki hano toe vakaiʻi mei he Liliu ʻa Siosefa Sāmitá).  Fakamatalaʻi ange, ko e taimi naʻe pekia ai ʻa Sīsuú, naʻá Ne hāʻele ki he palataisi ʻo e ngaahi laumālié. Naʻá Ne fekau ki he ngaahi laumālie angatonu aí ke nau akoʻi e ongoongoleleí ki he ngaahi laumālie ʻi he fale fakapōpula ʻo e ngaahi laumālié.

• Fakaafeʻi ha mātuʻa pe ko ha tokoua matuʻotuʻa ange ʻo e fānaú ke talanoa kau ki he ʻalu ki he temipalé mo hono maʻu e ngaahi ouau maʻa ha taha ʻo ʻenau ngaahi kuí.

• Fakaafeʻi e fānaú ke nau fakafonu ha fuʻu ʻakau fakafāmili faingofua.

Poupouʻi e Ako ʻi ʻApí

Fakaafeʻi e fānaú ke vahevahe ʻenau ʻakau fakafāmilí ki he ngaahi mēmipa ʻo honau fāmilí pea kole kiate kinautolu ha tokoni ki hono tānaki mai ki ai ha ngaahi hingoá.

Fakatupulaki ʻEtau Founga Akoʻí

Feinga ke mahino kiate koe ʻa e fānau ʻokú ke akoʻí. ʻOkú ke ʻiloʻi ʻa e fānau ʻokú ke akoʻí, ko ia fakafeʻungaʻi e ngaahi fakakaukau ʻi he fokotuʻutuʻu ko ʻení ʻo ka fie maʻu, ke feau ʻenau ngaahi fiemaʻú. Te ke lava ʻo fakaʻaongaʻi ha taha ʻi he ngaahi ʻekitivitī ʻoku fokotuʻu atu ʻi he fokotuʻutuʻu ko ʻení, kae ʻikai ko ia pē kuo tohi maʻá e taʻu motuʻa ʻo e fānau ʻokú ke akoʻí. (Vakai, Ko e Faiako ʻi he Founga ʻa e Fakamoʻuí, 7.)