« ថ្ងៃទី ៤–១០ ខែ ធ្នូ ។ វិវរណៈ ១–៥ ៖ ‹ សិរីល្អ និងព្រះចេស្តាដល់ … កូនចៀមនៅអស់កល្បជានិច្ចរៀងរាបតទៅ › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២១ )
« ថ្ងៃទី ៤–១០ ខែ ធ្នូ ។ វិវរណៈ ១–៥ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣
ថ្ងៃទី ៤–១០ ខែ ធ្នូ
វិវរណៈ ១–៥
« សិរីល្អ និងព្រះចេស្តាដល់ … កូនចៀមនៅអស់កល្បជានិច្ចរៀងរាបតទៅ »
កុមារអាចពិបាកយល់ពីគម្ពីរ វិវរណៈ ប៉ុន្តែវាក៏មានគោលលទ្ធិសំខាន់ៗដែលស្រស់ស្អាត និងសាមញ្ញផងដែរ ។
អញ្ជើញឲ្យចែកចាយ
សូមអញ្ជើញកុមារឲ្យចែកចាយអារម្មណ៍របស់ពួកគេ ប្រសិនបើពួកគេបានឃើញព្រះយេស៊ូវគ្រីស្ទនៅក្នុងការនិមិត្ត ។ សូមឲ្យកុមារចែកចាយអ្វីក៏ដោយដែលពួកគេដឹងអំពីការនិមិត្តរបស់យ៉ូហានពីព្រះយេស៊ូវនៅក្នុងគម្ពីរ វិវរណៈ ។
បង្រៀនគោលលទ្ធិ ៖ កុមារតូចៗ
ខ្ញុំអាចបញ្ចាំងពន្លឺរបស់ព្រះអង្គសង្គ្រោះ ។
នៅក្នុង វិវរណៈ ១:២០ ព្រះអង្គសង្គ្រោះបានប្រៀបធៀបសាសនាចក្ររបស់ទ្រង់ទៅនឹងជើងចង្កៀង ។ សូមជួយកុមារឲ្យយល់ថា ពួកគេអាចបញ្ចាំងពន្លឺរបស់ព្រះអង្គសង្រ្គោះបាន តាមរយៈការរស់នៅតាមការបង្រៀនរបស់ទ្រង់ ។
សកម្មភាពដែលអាចធ្វើបាន
-
សូមបង្ហាញរូបភាពនៃប្រភពពន្លឺខុសៗគ្នាទៅកុមារ ដូចជា ពន្លឺអំពូលភ្លើង ទាន និងព្រះអាទិត្យ ។ កាលដែលបងប្អូនអាន « ជើងចង្កៀងទាំង៧ នោះគឺជាពួកជំនុំទាំង៧នោះឯង » ( វិវរណៈ ១:២០ ) សូមអញ្ជើញកុមារឲ្យចង្អុលទៅរូបភាពនៃពន្លឺដែលបានរៀបរាប់នៅក្នុងខគម្ពីរនេះ ។ សូមជួយកុមារឲ្យពិភាក្សាពីរបៀបដែលយើងក្នុងនាមជាសមាជិកនៃសាសនាចក្ររបស់ព្រះយេស៊ូវ អាចធ្វើដូចជាពន្លឺភ្លើងទៀនបាន—ឧទាហរណ៍ នៅពេលយើងធ្វើរឿងល្អៗសម្រាប់អ្នកដទៃ ។
-
សូមច្រៀងចម្រៀងអំពីការធ្វើជាពន្លឺដល់អ្នកដទៃ ដូចជាបទ « ព្រះយេស៊ូវចង់ឲ្យខ្ញុំធ្វើជាពន្លឺ » ( សៀវភៅចម្រៀងកុមារ ទំព័រ ៣៨ ) ។ សូមចែកចាយពីរបៀបដែលបងប្អូនបានឃើញកុមាររស់នៅតាមដំណឹងល្អនៃព្រះយេស៊ូវគ្រីស្ទ ហើយការធ្វើជាពន្លឺដល់អ្នកនៅជុំវិញខ្លួនរបស់ពួកគេ ។ សូមចែកចាយពីរបៀបដែលការធ្វើជាពន្លឺដល់អ្នកដទៃបានជួយបងប្អូនឲ្យមានអារម្មណ៍ខិតកាន់តែជិតព្រះវរបិតាសួគ៌ និងព្រះយេស៊ូវគ្រីស្ទ ។
ខ្ញុំអាចយាងអញ្ជើញព្រះយេស៊ូវគ្រីស្ទឲ្យចូលមកក្នុងជីវិតរបស់ខ្ញុំបាន ។
ការប្រៀបប្រដូចព្រះយេស៊ូវឈរនៅមាត់ទ្វារ ហើយគោះទ្វារ អាចជួយកុមារឲ្យយល់ថា ទ្រង់សព្វព្រះទ័យគង់នៅក្បែរពួកគេ ។
សកម្មភាពដែលអាចធ្វើបាន
-
កាលដែលបងប្អូនអាន វិវរណៈ ៣:២០ សូមបង្ហាញរូបភាពព្រះយេស៊ូវគ្រីស្ទគង់នៅមាត់ទ្វារចេញពី គម្រោងមេរៀនសប្តាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ។ សូមអញ្ជើញកុមារឲ្យស្រមៃថា ព្រះយេស៊ូវបានគោះទ្វារផ្ទះរបស់ពួកគេ ។ សូមឲ្យកុមារនិយាយអំពីអ្វីដែលពួកគេនឹងធ្វើ ។
-
សូមអញ្ជើញកុមារឲ្យប្រាប់បងប្អូនអំពីគ្រាដែលពួកគេបានរង់ចាំនរណាម្នាក់ឲ្យមកលេងផ្ទះរបស់ពួកគេ ជាមនុស្សដែលពួកគេអន្ទះសាចង់ជួប ។ តើវាមានអារម្មណ៍បែបណាដែលរង់ចាំឲ្យនរណាមកគោះទ្វាររបស់ពួកគេនោះ ? ចុះប្រសិនបើយើងមិនឲ្យបុគ្គលនោះចូលក្នុងផ្ទះវិញ ? សូមអាន វិវរណៈ ៣:២០ រួចឲ្យកុមារដាក់វេនគ្នាកាន់រូបភាពព្រះយេស៊ូវ ហើយធ្វើជាអ្នកគោះទ្វារ ។ កុមារដទៃទៀតក្នុងថ្នាក់អាចធ្វើជាអ្នកបើកទ្វារ ។ តើយើងអាចធ្វើដូចម្ដេចដើម្បីយាងព្រះយេស៊ូវឲ្យគង់នៅក្បែរយើង ទោះជាយើងពុំអាចមើលឃើញទ្រង់ក៏ដោយនោះ ។
ព្រះយេស៊ូវគ្រីស្ទគឺជាអង្គតែមួយគត់ ដែលស័ក្ដិសមនឹងធ្វើជាព្រះអង្គសង្គ្រោះរបស់ខ្ញុំ ។
យ៉ូហានបានរៀនចេញពីការនិមិត្តរបស់លោកថា មានតែព្រះយេស៊ូវគ្រីស្ទ ( ដែលមានរូបតំណាងជាកូនចៀម ) ប៉ុណ្ណោះ ទើបអាចធ្វើជាព្រះអង្គសង្គ្រោះរបស់យើងបាន ហើយបំពេញតាមផែនការរបស់ព្រះវរបិតាសួគ៌ ( ដែលមានរូបតំណាងជាគម្ពីរដែលបានបិទត្រា ) បាន ។
សកម្មភាពដែលអាចធ្វើបាន
-
ពីមុនចូលថ្នាក់ សូមខ្ចប់សំណៅចម្លងនៃ សៀវភៅរូបភាពដំណឹងល្អ ដោយប្រើក្រដាស ឬខ្សែ ។ ដោយប្រើឃ្លាគន្លឹះមួយចំនួនចេញពី វិវរណៈ ៥:១–១០ សូមពិពណ៌នាអំពីការនិមិត្តដែលយ៉ូហានបានឃើញ ។ សូមបង្ហាញសៀវភៅនោះដល់កុមារ រួចប្រាប់ពួកគេថា វិធីតែមួយគត់ដើម្បីបើកសៀវភៅនេះបាន គឺត្រូវស្វែងរករូបភាពព្រះយេស៊ូវគ្រីស្ទដែលបងប្អូនបានលាក់នៅក្នុងបន្ទប់ ។ នៅពេលពួកគេរកឃើញរូបភាពនេះហើយ សូមបើកសៀវភៅនោះ ហើយចែកចាយជាមួយកុមារនូវរូបភាពខ្លះៗនៅក្នុងសៀវភៅដែលតំណាងឲ្យពរជ័យ ដែលមានដោយសារដង្វាយធួនរបស់ព្រះយេស៊ូវគ្រីស្ទ ( ដូចជា ព្រះវិហារបរិសុទ្ធ ពិធីបុណ្យជ្រមុជទឹក និងក្រុមគ្រួសារ ) ។ សូមថ្លែងទីបន្ទាល់ថា ព្រះអង្គសង្រ្គោះគឺជាព្រះតែមួយអង្គគត់ដែលអាចធ្វើឲ្យរឿងទាំងនោះអាចកើតមានបាន ។
-
សូមសង្ខេបការនិមិត្តដែលមានពិពណ៌នានៅក្នុង វិវរណៈ ៥:១–១០ រួចអញ្ជើញកុមារឲ្យសម្ដែងតាមអារម្មណ៍របស់យ៉ូហាន និងមនុស្សដទៃទៀតដែលមាននៅក្នុងផ្នែកផ្សេងៗគ្នានៃការនិមិត្តនេះ ។ ឧទាហរណ៍ ពួកគេអាចធ្វើជាយំ នៅពេលគ្មាននរណាម្នាក់អាចបើកសៀវភៅបាន ឬពួកគេអាចធ្វើជារីករាយ នៅពេលព្រះអង្គសង្គ្រោះបានបើកវាឡើង ។
បង្រៀនគោលលទ្ធិ ៖ កុមារធំៗ
ប្រសិនបើខ្ញុំតាំងចិត្តធ្វើតាមដំណឹងល្អរបស់ព្រះអង្គសង្រ្គោះ នោះខ្ញុំនឹងទទួលបានពរជ័យដ៏មហិមានៅឯស្ថានសួគ៌ ។
តើវាមានអត្ថន័យយ៉ាងណាចំពោះបងប្អូនដែលធ្វើជា « ស្ទើរៗប៉ុណ្ណោះ គឺមិនមែនត្រជាក់ ក៏មិនក្តៅផង » ? សូមគិតពិចារណាពីរបៀបដើម្បីជួយកុមារឲ្យធ្វើផ្ទុយនឹងការស្ទើរៗ—ឲ្យមានភាពក្លៀវក្លាក្នុងការប្តេជ្ញាចិត្តរបស់ពួកគេចំពោះព្រះអង្គសង្គ្រោះ និងដំណឹងល្អរបស់ទ្រង់ ។
សកម្មភាពដែលអាចធ្វើបាន
-
សូមអានជាមួយគ្នាក្នុង វិវរណៈ ៣:៥, ១២, ២១ ហើយសូមពន្យល់រាល់ពាក្យដែលកុមារអាចមិនស្គាល់ ។ តើពាក្យ « ឈ្នះ » មានអត្ថន័យដូចម្តេច ? សូមអញ្ជើញកុមារឲ្យគូររូបពរជ័យមួយដែលបានសន្យានៅក្នុងខគម្ពីរទាំងនេះ ហើយចែកចាយវាមួយនឹងកុមារក្នុងថ្នាក់ ។
-
សូមអានជាមួយគ្នាក្នុង វិវរណៈ ៣:១៥–១៦ ។ សូមឲ្យកុមារនិយាយអំពីអ្វីដែលមានគុណប្រយោជន៍ ឬឆ្ងាញ់បំផុត នៅពេលដែលវានៅក្តៅៗ ( ដូចជា សម្ល ) ឬត្រជាក់ ( ដូចជា ការ៉េម ) ។ តើការធ្វើជាមនុស្សស្ទើរៗអំពីព្រះអង្គសង្រ្គោះ រារាំងយើងពីការទទួលបានពរជ័យដែលបានសន្យានៅក្នុងខទី ៥ ១២ និង ២១ យ៉ាងដូចម្តេច ?
-
នៅលើក្តារខៀន សូមសរសេរពាក្យ ស្ទើរៗព្រមជាមួយសទិសន័យមួយចំនួន ដូចជា ដែលមិនពេញ, មិនល្មមឬ មិនគ្រប់គ្រាន់ ។ សូមប្រើពាក្យទាំងនេះដើម្បីជួយកុមារឲ្យយល់ពីមូលហេតុ ដែលព្រះអម្ចាស់មិនចង់ឲ្យយើងធ្វើជាមនុស្សស្ទើរៗ ។ តើពាក្យអ្វីដែលយើងអាចគិតដល់ ដើម្បីពិពណ៌នាអំពីរបៀបដែលទ្រង់ចង់ឲ្យយើងប្រព្រឹត្ត ? សូមចែកចាយពីមូលហេតុដែលបងប្អូនចង់ប្តេជ្ញាចិត្តយ៉ាងមុតមាំចំពោះព្រះអង្គសង្គ្រោះ ហើយសូមអញ្ជើញកុមារឲ្យចែកចាយគំនិតរបស់ពួកគេផងដែរ ។
ខ្ញុំអាចជ្រើសរើសដើម្បីអនុញ្ញាតឲ្យព្រះយេស៊ូវធ្វើជាចំណែកមួយក្នុងជីវិតរបស់ខ្ញុំ ។
តើបងប្អូនអាចជួយកុមារដែលបងប្អូនបង្រៀនឲ្យបើកដួងចិត្ត និងជីវិតរបស់ពួកគេ ទទួលយកព្រះចេស្ដា និងឥទ្ធិពលរបស់ព្រះយេស៊ូវគ្រីស្ទយ៉ាងដូចម្ដេច ?
សកម្មភាពដែលអាចធ្វើបាន
-
កាលដែលបងប្អូនអាន វិវរណៈ ៣:២០ សូមបង្ហាញរូបភាពព្រះយេស៊ូវគ្រីស្ទគង់នៅមាត់ទ្វារចេញពី គម្រោងមេរៀនសប្តាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ។ ដើម្បីជួយកុមារឲ្យយល់អត្ថន័យនៃរូបភាពនេះ សូមអញ្ជើញពួកគេឲ្យធ្វើការជាគូៗដើម្បីឆ្លើយសំណួរដូចនេះ ៖ ហេតុអ្វីបានជាប្អូនគិតថា ព្រះយេស៊ូវកំពុងគោះទ្វារផ្ទះ ? ហេតុអ្វីបានជាគ្មានដៃទ្វារនៅខាងក្រៅទ្វារ ? តើការអនុញ្ញាតឲ្យព្រះយេស៊ូវយាងចូលមកក្នុងជីវិតរបស់យើងមានន័យដូចម្ដេច ?
-
សូមឲ្យកុមារសរសេរនៅលើក្ដារខៀននូវរបៀបខុសៗគ្នាដើម្បី « បើកទ្វារឲ្យ » ព្រះយេស៊ូវ ។ ឧទាហរណ៍ខ្លះៗអាចរួមមានការបម្រើអ្នកដទៃ ការអានព្រះគម្ពីរ ការរក្សាសេចក្តីសញ្ញាដែលយើងធ្វើនៅពេលជ្រមុជទឹក និងការទទួលទានសាក្រាម៉ង់ ។
ព្រះយេស៊ូវគ្រីស្ទគឺជាអង្គតែមួយគត់ ដែលស័ក្ដិសមនឹងធ្វើជាព្រះអង្គសង្គ្រោះរបស់ខ្ញុំ ។
ការនិមិត្តដែលមានពិពណ៌នានៅក្នុង វិវរណៈ ៥ បានបង្រៀនថា មានតែព្រះយេស៊ូវគ្រីស្ទប៉ុណ្ណោះ ទើបជាអង្គដែលស័ក្ដិសម ហើយអាចធ្វើដង្វាយធួន ព្រមទាំងសង្គ្រោះយើងពីអំពើបាបបាន ។
សកម្មភាពដែលអាចធ្វើបាន
-
សូមអញ្ជើញកុមារឲ្យប្រាប់អំពីគ្រាមួយ ដែលពួកគេត្រូវការនរណាម្នាក់ដើម្បីជួយធ្វើកិច្ចការមួយ ដែលពួកគេពុំអាចធ្វើដោយខ្លួនពួកគេបាន ។ សូមឲ្យពួកគេអាន វិវរណៈ ៥:១–១០ រួចស្វែងរកអ្វីដែលចាំបាច់ដើម្បីធ្វើ ដែលមានតែបុគ្គលម្នាក់ប៉ុណ្ណោះដែលអាចធ្វើបាន ( សូមពន្យល់ថា កូនចៀមគឺជាព្រះយេស៊ូវគ្រីស្ទ រីឯក្រាំងតំណាងឲ្យផែនការរបស់ព្រះ ) ។ តើព្រះយេស៊ូវបានធ្វើអ្វីសម្រាប់យើង ដែលគ្មាននរណាទៀតអាចធ្វើបាននោះ ?
-
សូមឲ្យកុមាររកមើលទំនុកតម្កើង ឬសៀវភៅចម្រៀងកុមារដែលថ្លែងទីបន្ទាល់អំពីព្រះយេស៊ូវគ្រីស្ទ ( ដូចជាបទ « Beautiful Savior » Children’s Songbook ទំព័រ ៦២–៦៣ ) ។ តើទំនុកបទនៅក្នុងចម្រៀងនេះ បង្រៀនអ្វីខ្លះអំពីព្រះយេស៊ូវគ្រីស្ទ ? តើបទចម្រៀងនេះអាចដូចជាទំនុកតម្កើង ដែលបានច្រៀងសរសើរព្រះយេស៊ូវគ្រីស្ទនៅក្នុង វិវរណៈ ៥:៩–១០ យ៉ាងដូចម្ដេច ?
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យចែកចាយជាមួយក្រុមគ្រួសាររបស់ពួកគេ អំពីរបៀបទាំងឡាយដែលពួកគេអាចអញ្ជើញឲ្យមានឥទ្ធិពលរបស់ព្រះអង្គសង្គ្រោះ ចូលមកក្នុងជីវិតរបស់ពួកគេបាន ។
ការកែលម្អការបង្រៀនរបស់យើង
លើកទឹកចិត្តឲ្យមានគារវភាព ។ ទិដ្ឋភាពដ៏សំខាន់មួយនៃគារវភាព គឺជាការគិតដល់ព្រះវរបិតាសួគ៌ និងព្រះយេស៊ូវគ្រីស្ទ ។ បងប្អូនអាចរំឭកកុមារឲ្យមានគារវភាពបាន ដោយការច្រៀង ឬការបន្ទររហ៊ឹមបទចម្រៀងមួយដោយស្ងាត់ស្ងៀម ឬការបង្ហាញរូបភាពព្រះយេស៊ូវមួយសន្លឹក ។