« ថ្ងៃទី ១១–១៧ ខែ ធ្នូ ។ វិវរណៈ ៦–១៤ ៖ ‹ គេបានឈ្នះ … ដោយសារឈាមនៃកូនចៀម › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២១ )
« ថ្ងៃទី ១១–១៧ ខែ ធ្នូ ។ វិវរណៈ ៦–១៤ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣
សិល្បៈរួមគ្នាដោយ អេរិក ចនសុន ៖ ក្រុមប្រឹក្សាដ៏ធំ ដោយ រ៉ូប៊ើត ធី បារែត រូបបណ្ដុំផ្កាយបញ្ចេញរស្មីរបស់ភ្នាក់ងារលំហអាកាសសហព័ន្ធអឺរ៉ុប
ថ្ងៃទី ១១–១៧ ខែ ធ្នូ
វិវរណៈ ៦–១៤
« គេបានឈ្នះ … ដោយសារឈាមនៃកូនចៀម »
នៅពេលបងប្អូនអាន វិវរណៈ ១–១៤ សូមគិតពីកុមារដែលបងប្អូនបង្រៀន ។ ព្រះវិញ្ញាណបរិសុទ្ធអាចជួយបងប្អូនឲ្យស្គាល់សេចក្តីពិត ដែលនឹងទាក់ទងនឹងពួកគេ ។
អញ្ជើញឲ្យចែកចាយ
សូមបង្ហាញរូបភាពមួយចំនួនដែលនឹងជួយកុមារឲ្យចងចាំអ្វី ដែលពួកគេបានរៀននាពេលថ្មីៗនេះនៅផ្ទះ ឬនៅក្នុងអង្គការបឋមសិក្សា ។ សូមអញ្ជើញកុមារឲ្យចែកចាយអ្វីដែលពួកគេដឹងអំពីរូបភាពនេះ ។
បង្រៀនគោលលទ្ធិ ៖ កុមារតូចៗ
ព្រះយេស៊ូវគ្រីស្ទជួយខ្ញុំបានជ្រះស្អាត ។
យ៉ូហានបានឃើញ្មនុស្សជាច្រើនពាក់រ៉ូបដែល « … ធ្វើឲ្យឡើងសក្នុងឈាមរបស់កូនចៀម » ( ខទី ១៤ ) ។ សូមពិចារណាពីរបៀបដែលទស្សននិមិត្តនេះអាចជួយឲ្យកុមារយល់ពីសារៈសំខាន់នៃការបានជ្រះស្អាតតាមរយៈដង្វាយធួនរបស់ព្រះយេស៊ូវគ្រីស្ទ ។
សកម្មភាពដែលអាចធ្វើបាន
-
សូមបង្ហាញសម្លៀកបំពាក់ពណ៌សខ្លះៗ ( ឬរូបភាពសម្លៀកបំពាក់ពណ៌ស ) និងរូបភាពរបស់ព្រះយេស៊ូវ ។ សូមអាន វិវរណៈ ៧:៩, ១៣–១៤ ឲ្យកុមារស្តាប់ ហើយសូមឲ្យពួកគេចង្អុលរូបភាពនេះ និងសម្លៀកបំពាក់ រាល់ពេលពួកគេឭពាក្យ ស ។ សូមពន្យល់ថា សម្លៀកបំពាក់ពណ៌សតំណាងឲ្យភាពស្អាតស្អំ និងរំឭកយើងថា ព្រះយេស៊ូវគ្រីស្ទអាចធ្វើឲ្យយើងជ្រះស្អាតពីកំហុសរបស់យើងបាន ។
-
សូមបង្ហាញក្រណាត់ពណ៌សមួយចម្រៀក ឬក្រដាសពណ៌សមួយសន្លឹកទៅកុមារ ហើយឲ្យពួកគេធ្វើឲ្យវាប្រឡាក់ដោយការគូសប៊ិចនៅលើវា ឬយកដីមកប្រឡាក់លើវា ។ សូមពន្យល់ថា នៅពេលយើងមិនគោរពប្រតិបត្តិតាមបទបញ្ញត្តិ វាអាចមានអារម្មណ៍ដូចជាសម្លៀកបំពាក់ប្រឡាក់ដូច្នោះដែរ ។ សូមបង្ហាញរូបភាពរបស់ព្រះយេស៊ូវនៅក្នុងសួនច្បារគែតសេម៉ានី ( ដូចជា សៀវភៅរូបភាពដំណឹងល្អ ល.រ ៥៦ ) ដាក់សម្លៀកបំពាក់ ឬក្រដាសប្រឡាក់មួយឡែក ហើយបង្ហាញក្រណាត់ ឬក្រដាសស្អាតដល់ពួកគេវិញ ។ សូមថ្លែងទីបន្ទាល់ថា ព្រះយេស៊ូវគ្រីស្ទអាចជួយយើងឲ្យជ្រះស្អាត ។
-
សូមច្រៀងចម្រៀងអំពីពិធីបុណ្យជ្រមុជទឹក ដូចជា « ពេលខ្ញុំបានជ្រមុជទឹក » ( សៀវភៅចម្រៀងកុមារ ទំព័រ ៥៣ ) ហើយសូមថ្លែងទីបន្ទាល់ថា ព្រះយេស៊ូវអាចជួយយើងឲ្យបានជ្រះស្អាត នៅពេលយើងទទួលបុណ្យជ្រមុជទឹក ។
ខ្ញុំបានបង្ហាញសេចក្ដីជំនឿលើព្រះយេស៊ូវគ្រីស្ទ នៅក្នុងជីវិតមុនឆាកជីវិតនេះ ។
នៅក្នុងសង្គ្រាមនៅស្ថានសួគ៌ បុត្រាបុត្រីស្មោះត្រង់របស់ព្រះបានយកឈ្នះលើសាតាំងតាមរយៈ « សេចក្តីបន្ទាល់របស់គេ » និងតាមរយៈការបង្ហាញសេចក្តីជំនឿលើព្រះយេស៊ូវគ្រីស្ទ ( វិវរណៈ ១២:១១ ) ។ ពួកគេនៅបន្តធ្វើដូច្នេះនៅសព្វថ្ងៃនេះ ។
សកម្មភាពដែលអាចធ្វើបាន
-
ដើម្បីជួយកុមារឲ្យយល់អំពីអត្ថន័យក្នុងការធ្វើតាមគំរូរបស់បុគ្គលម្នាក់ នោះសូមជ្រើសរើសកុមារម្នាក់ឲ្យធ្វើជា « អ្នកដឹកនាំ » ហើយសូមឲ្យកុមារដទៃទៀតធ្វើតាមគាត់ ដោយការត្រាប់តាមអ្វីដែលគាត់ធ្វើ ។ បន្ទាប់មក សូមឲ្យកុមារផ្សេងទៀតធ្វើជាអ្នកដឹកនាំ ។ សូមអាន វិវរណៈ ១២:៧–១១ ដល់កុមារ ហើយសូមពន្យល់ថា ពីមុនពួកយើងកើតមក ពួកយើងបានជ្រើសរើសធ្វើតាមព្រះគ្រីស្ទ ហើយពុំធ្វើតាមសាតាំងឡើយ ។
-
សូមច្រៀងជាមួយគ្នានូវបទចម្រៀងមួយបទ អំពីជីវិតមុនឆាកជីវិតនេះ ដូចជាបទ « ខ្ញុំរស់នៅស្ថានសួគ៌ » ឬ « ខ្ញុំនឹងធ្វើតាមផែនការព្រះ » ( សៀវភៅចម្រៀងកុមារ ទំព័រ ១៤០, ៨៦–៨៧ ) ។ សូមសួរសំណួរដូចជា « តើមានអ្វីកើតឡើងនៅស្ថានសួគ៌ពីមុនយើងបានកើតមក ? » និង « តើយើងបានជ្រើសរើសធ្វើអ្វី ? » ( សូមមើលផងដែរ « សេចក្តីផ្តើម ៖ ផែនការរបស់ព្រះវរបិតាសួគ៌យើង » ដំណើររឿងព្រះគម្ពីរសញ្ញាថ្មី ទំព័រ ១–៥ ឬវីដេអូដូចគ្នានេះនៅលើគេហទំព័រ ChurchofJesusChrist.org ) ។
ដំណឹងល្អត្រូវបានស្តារឡើងវិញនៅសម័យរបស់យើង ។
យ៉ូហានបានសរសេរអំពីទេវតាមួយអង្គដែលនឹងនាំមកនូវ « ដំណឹងល្អដ៏នៅអស់កល្បជានិច្ច » ( វិវរណៈ ១៤:៦ ) ។ ការពិភាក្សាពី វិវរណៈ ១៤:៦–៧ ផ្តល់ឲ្យបងប្អូននូវឱកាសដើម្បីថ្លែងទីបន្ទាល់ពីការស្តារឡើងវិញនៃដំណឹងល្អនៃព្រះយេស៊ូវគ្រីស្ទនៅសម័យរបស់យើង ។
សកម្មភាពដែលអាចធ្វើបាន
-
សូមបង្ហាញរូបភាពមរ៉ូណៃកំពុងមានបន្ទូលទៅកាន់យ៉ូសែប ស្ម៊ីធ ដល់កុមារ កាលដែលបងប្អូនអាន វិវរណៈ ១៤:៦ ( សូមមើល សៀវភៅរូបភាពដំណឹងល្អ ល.រ. ៩១ ) ។ សូមអញ្ជើញកុមារឲ្យចង្អុលទៅទេវតាដែលនៅក្នុងរូបភាពនោះ ។ សូមចែកចាយដំណើររឿងនៃការយាងមករបស់ទេវតាមរ៉ូណៃជាមួយពួកគេ ( សូមមើល « ជំពូក ៣ ៖ ទេវតាមរ៉ូណៃ និងផ្ទាំងចំណារមាស » នៅក្នុង ដំណើររឿងព្រះគម្ពីរគោលលទ្ធិ និង សេចក្តីសញ្ញា ទំព័រ ១៣–១៧ ឬវីដេអូដូចគ្នានេះនៅលើគេហទំព័រ ChurchofJesusChrist.org ) ។
-
សូមអញ្ជើញកុមារឲ្យសម្តែងតាមដំណើររឿងរបស់មរ៉ូណៃ ដែលបានយាងមកជួបយ៉ូសែប ស្ម៊ីធ ( សូមមើល យ៉ូសែប ស្ម៊ីធ—ប្រវត្តិ ១:២៩–៣៥ ) ។ សូមជួយពួកគេឲ្យរៀបរាប់ពីពរជ័យមួយចំនួនដែលយើងអរសប្បាយ ដោយសារតែដំណឹងល្អនៃព្រះយេស៊ូវគ្រីស្ទដែលបានស្តារឡើងវិញ ។ សូមចែកចាយទីបន្ទាល់របស់បងប្អូនអំពីការស្តារឡើងវិញ ។
បង្រៀនគោលលទ្ធិ ៖ កុមារធំៗ
ដំណឹងល្អអាចជួយខ្ញុំឲ្យយកឈ្នះលើការល្បួងបាន ។
ផ្សែងដែលហុយឡើងធ្វើឲ្យអាកាសងងឹតនៅក្នុង វិវរណៈ ៩:២ អាចប្រដូចទៅនឹងការល្បួង ( សូមមើល នីហ្វៃទី១ ១២:១៧ ) ។
សកម្មភាពដែលអាចធ្វើបាន
-
សូមគូររូបព្រះអាទិត្យ និងពពកខ្មៅ រួចកាត់វាចេញ ។ សូមអញ្ជើញកុមារឲ្យអាន វិវរណៈ ៩:២ និង នីហ្វៃទី១ ១២:១៧ រួចសរសេរនៅលើពពកខ្មៅ នូវអ្វីដែលតំណាងឲ្យផ្សែង ឬអ័ព្ទនៅក្នុងខគម្ពីរទាំងនេះ ។ សូមបិទពពកខ្មៅនៅលើក្ដារខៀន រួចអញ្ជើញកុមារឲ្យធ្វើបញ្ជីនៃការល្បួងដែលកុមារជួបប្រទះនៅក្នុងវ័យរបស់ពួកគេ ។ បន្ទាប់មក សូមបិទព្រះអាទិត្យនៅលើក្ដារខៀន រួចឲ្យពួកគេធ្វើបញ្ជីនៃមធ្យោបាយ ដែលព្រះវរបិតាសួគ៌បានប្រទានដល់យើង ដើម្បីយកឈ្នះលើភាពងងឹតនៃលោកិយនេះ ។
-
តើយើងអាចជួយអ្នកដទៃដែលស្ថិតនៅក្នុងភាពខ្មៅងងឹតខាងវិញ្ញាណយ៉ាងដូចម្តេច ? ដើម្បីជួយកុមារឲ្យគិតអំពីសំណួរនេះ សូមបង្ហាញផ្នែកខ្លះនៃវីដេអូ « Choose the Light » ( នៅលើគេហទំព័រChurchofJesusChrist.org ) ជាពិសេសវគ្គពាក់កណ្ដាលចុងក្រោយនៃវីដេអូនេះ ។ តើយើងដូចជាមនុស្សដែលជួយអ្នកជិះកង់នៅក្នុងរូងនេះយ៉ាងដូចម្តេច ?
ខ្ញុំបានបង្ហាញសេចក្ដីជំនឿលើព្រះយេស៊ូវគ្រីស្ទ នៅក្នុងជីវិតមុនឆាកជីវិតនេះ ។
កុមារដែលបងប្អូនបង្រៀន មកនៅលើផែនដីនេះដោយសារពួកគេបានមានសេចក្តីជំនឿលើព្រះយេស៊ូវគ្រីស្ទនៅក្នុងជីវិតមុនឆាកជីវិតនេះ ហើយបានជ្រើសរើសធ្វើតាមទ្រង់ ។
សកម្មភាពដែលអាចធ្វើបាន
-
សូមអានជាមួយគ្នាក្នុង វិវរណៈ ១២:៧–១១ ហើយសរសេរនៅលើក្តារខៀននូវពាក្យ នាគ ចំបាំងនៅលើមេឃ បោះទម្លាក់ សេចក្តីបន្ទាល់ និង កូនចៀម ។ សូមឲ្យកុមារសង្ខេបខគម្ពីរទាំងនេះ ដោយប្រើប្រាស់ពាក្យនៅលើក្តារខៀន ។ តើយើងរៀនអ្វីខ្លះអំពីព្រះយេស៊ូវគ្រីស្ទ ( កូនចៀម ) ចេញមកពីខគម្ពីរទាំងនេះ ? តើយើងរៀនអ្វីខ្លះអំពីជម្រើសដែលយើងបានធ្វើនៅក្នុងជីវិតមុនឆាកជីវិតនេះ ?
-
នៅលើក្តារខៀន សូមគូរជួរឈរបី ហើយសរសេរនៅលើជួរឈរនីមួយៗថា ពីមុនជីវិតនេះ អំឡុងជីវិតនេះ និង ទាំងពីរ ។ សូមរៀបចំស្លាកក្រដាសដែលមានសរសេរពីសេចក្តីពិតអំពីជីវិតមុនឆាកជីវិតនេះ និងអំពីជីវិតរមែងស្លាប់ ដូចជា យើងមានរូបកាយ យើងពុំមានរូបកាយ យើងរស់នៅទីដែលមានវត្តមានរបស់ព្រះ យើងធ្វើសង្រ្គាមជាមួយសាតាំង យើងអនុវត្តសេចក្តីជំនឿលើព្រះយេស៊ូវគ្រីស្ទ និង យើងធ្វើតាមផែនការរបស់ព្រះ ។ សូមអនុញ្ញាតឲ្យកុមារឆ្លាស់វេនគ្នារើសយកចម្រៀកក្រដាសនោះ ហើយសម្រេចចិត្តដាក់វាទៅក្នុងជួរឈរណាមួយ ។ សូមចែកចាយទំនុកចិត្តរបស់បងប្អូនថា កុមារអាចបន្តបង្ហាញសេចក្តីជំនឿលើព្រះគ្រីស្ទបាន ។
ជាផ្នែកមួយនៃការស្តារឡើងវិញ នោះដំណឹងល្អនឹងត្រូវផ្សព្វផ្សាយដល់ពិភពលោកទាំងមូល ។
កុមារដែលបងប្អូនបង្រៀនអាចជួយផ្សព្វផ្សាយដំណឹងល្អដល់ « គ្រប់អស់ទាំងសាសន៍ គ្រប់ពូជអំបូរ គ្រប់ភាសា ហើយគ្រប់ទាំងគ្រួសារដែរ » ( វិវរណៈ ១៤:៦ ) ។
សកម្មភាពដែលអាចធ្វើបាន
-
សូមឲ្យកុមារអាន វិវរណៈ ១៤:៦–៧ ហើយសរសេរនៅលើក្តារខៀននូវពាក្យ ឬឃ្លាចេញពីខគម្ពីរទាំងនេះ ដែលមានអត្ថន័យចំពោះពួកគេ ។ សូមឲ្យពួកគេនិយាយអំពីមូលហេតុដែលពួកគេបានជ្រើសរើសពាក្យ ឬឃ្លាទាំងនោះ ។ សូមពន្យល់ថា ខគម្ពីរទាំងនេះពិពណ៌នាពីការស្តារដំណឹងល្អឡើងវិញនៅសម័យរបស់យើង ។ សូមសួរពួកគេពីរបៀបដែលពួកគេអាចរួមចំណែកនៅក្នុងកិច្ចការនៃការផ្សព្វផ្សាយដំណឹងល្អដល់ពិភពលោកនេះ ។
-
សូមអញ្ជើញពួកគេឲ្យអាន វិវរណៈ ១៤:៧ និងនិយាយឡើងវិញតាមពាក្យសម្តីរបស់ពួកគេផ្ទាល់ នូវសារលិខិតដែលទេវតាមានសម្រាប់ពិភពលោក ។ ឬសូមអញ្ជើញពួកគេឲ្យគូររូបភាពដែលតំណាងឲ្យសារលិខិតរបស់ទេវតា ។ តើយើងអាចចែកចាយអ្វីខ្លះជាមួយអ្នកដទៃអំពីដំណឹងល្អនៃព្រះយេស៊ូវគ្រីស្ទ ?
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមជួយកុមារឲ្យសរសេរពាក្យ ឬឃ្លាមួយដែលនឹងជួយពួកគេឲ្យចងចាំអ្វីមួយ ដែលពួកគេបានរៀននៅក្នុងថ្នាក់នាថ្ងៃនេះ ។ សូមអញ្ជើញពួកគេឲ្យបង្ហាញអ្វីដែលពួកគេបានសរសេរទៅកាន់នរណាម្នាក់នៅឯផ្ទះ និងចែកចាយអ្វីដែលពួកគេបានរៀន ។
ការកែលម្អការបង្រៀនរបស់យើង
បង្រៀនគោលលទ្ធិតាមរយៈតន្រ្តី ។ ការច្រៀងចម្រៀងជាមួយកុមារអាចពង្រឹងគោលលទ្ធិ ដែលបងប្អូនបង្រៀនចេញពីបទគម្ពីរ ។ សម្រាប់គំនិតនានា សូមមើលផ្នែក « ការប្រើតន្ត្រីដើម្បីបង្រៀនគោលលទ្ធិ » ដែលមានចំណងជើងថា « សេចក្តីណែនាំសម្រាប់ម៉ោងច្រៀងចម្រៀង និងបទបង្ហាញតន្ដ្រីរបស់កុមារនៅក្នុងម៉ោងប្រជុំសាក្រាម៉ង់ » នៅចុងបញ្ចប់ធនធាននេះ ។