Little Lamb (Lami Siʻisiʻí), tā ʻa Jenedy Paige

18–24 Tīsema

Kilisimasí

“Ongoongolelei ʻo e Fiefia Lahi”

Ko e lēsoni ko ʻení ko ha faingamālie ia ke tokoniʻi ai e fānau ʻokú ke akoʻí ke nau fakamanatua ʻi he taimi Kilisimasí, ʻa e ʻaloʻi, moʻui, mo e ngāue fakafaifekau ʻa e Fakamoʻuí. Tauhi maʻu e fakakaukaú ni lolotonga hoʻo teuteu ke akoʻí.

Fakaafeʻi e Feʻinasiʻakí

Fakaʻaliʻali e fakatātā ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, pea fakaafeʻi e fānaú ke nau vahevahe e meʻa ʻoku nau ʻilo kau ki he ʻaloʻi ʻo e Fakamoʻuí.

Akoʻi e Tokāteliné: Fānau Iiki Angé

Mātiu 2:1–12; Luke 2:1–14

Naʻe haʻu ʻa Sīsū Kalaisi ki māmani ko ha kiʻi pēpē.

ʻOku saiʻia ʻa e fānaú ʻi he talanoa ki he ʻaloʻi ʻo Sīsū Kalaisí. Ko e hā ha ngaahi moʻoni fakatokāteline ʻokú ke maʻu ʻi he talanoa ko ʻení, ʻokú ke ongoʻi ʻoku totonu ke mahino ki he fānaú?

Ngaahi ʻEkitivitī ʻe Ala Fakahokó

• Lau e Luke 2:1–14 ki he fānaú, pe fakamatalaʻi e ngaahi meʻa ʻoku hoko ʻi he ngaahi veesi ko ʻení ʻaki hono fakahoa ki he “Vahe 5: ʻAloʻi ʻo Sīsū Kalaisí” (ʻi he Ngaahi Talanoa ʻo e Fuakava Foʻoú, 13–15, pe ko e vitiō fekauʻaki mo iá ʻi he ChurchofJesusChrist.org). Fakaafeʻi e fānaú ke nau tā ha ʻū fakatātā ʻo e ngaahi meʻa ko ʻeni ʻoku hokó pea fakaʻaongaʻi e ʻū fakatātaá ke fai e talanoá ʻiate kinautolu pē. Ko e hā ʻoku tau fiefia ai ʻi he ʻaloʻi ʻo Sīsuú?

• Kole ki he fānaú ke nau fai atu e talanoa ʻo e muimui e kau Tangata Potó ʻi he foʻi fetuʻú ke kumi ʻa Sīsuú. Kapau ʻoku fie maʻu ke fakamanatu kiate kinautolu ʻa e talanoá, vakai ki he Mātiu 2:1–12 pe “Vahe 7: Ko e Kau Tangata Potó” (ʻi he Ngaahi Talanoa ʻo e Fuakava Foʻoú, 18, pe ko e vitiō fekauʻaki mo iá ʻi he ChurchofJesusChrist.org). Fufuuʻi ha fakatātā ʻo Sīsū ʻi he lokí. Tā pe kosi ʻo toʻo ha foʻi fetuʻu laʻipepa pea puke ia ʻi he ʻeá. Fakaafeʻi e fānaú ke nau pehē pē ko ha kau tangata poto kinautolu ʻoku nau ʻomi ha ʻū meʻaʻofa, pea tataki takai kinautolu ʻi he lokí ke maʻu ʻa Sīsū. Tokoniʻi e fānaú ke nau fakakaukau ki ha ʻū meʻaʻofa te tau lava ʻo foaki kia Sīsū.

• Hivaʻi mo e fānaú ha ngaahi himi pe hiva Kilisimasi (vakai Ngaahi Himí, fika 110–122; Tohi Hiva ʻa e Fānaú, 24–32). Kole ange ke nau vahevahe ha meʻa ʻoku akoʻi ʻe he foʻi hiva takitaha ʻa ia ʻoku nau ongoʻi ʻoku mahuʻinga ke ʻiloʻi.

Ketisemaní, tā ʻa J. Kirk Richards

Sione 3:16

Naʻe fakafaingofuaʻi ʻe Sīsū Kalaisi ke u toe lava ʻo nofo mo e Tamai Hēvaní ha ʻaho.

ʻOku mahino nai ki he fānau ʻokú ke akoʻí ʻa e ʻuhinga naʻe hāʻele mai ai ʻa Sīsū Kalaisi ki he māmaní? Tuku ha taimi ke fakalaulauloto ai ki he meʻa kuo fai ʻe he Fakamoʻuí maʻau fakataautaha pea mo e founga te ke lava ai ʻo tokoni ke mahino ki he fānaú e meʻa kuó Ne fai maʻanautolú.

Ngaahi ʻEkitivitī ʻe Ala Fakahokó

• ʻOmi ha meʻaʻofa kuo ʻosi kofu pe faʻo puha ki he kalasí mo ha fakatātā ʻo Sīsū Kalaisi ʻi loto. Fakapipiki ha kiʻi laʻipepa ʻi he meʻaʻofá ʻo tohiʻi ai e “Sione 3:16” pea talaange ki he fānaú ko ha kiʻi tokoni ʻeni ke nau ʻiloʻi ai pe ko e hā e meʻaʻofá. Lau mo e fānaú e Sione 3:16 pea fakaafeʻi ke nau mateʻi pe ko e hā e meʻaʻofá pea fakaava leva. Ko e hā e ʻuhinga naʻe ʻomi ai ʻe he ʻOtuá ʻa Hono ʻAló?

• Tokoniʻi e fānaú ke nau fakakakato e sētesi ko ʻení: “Naʻe hāʻele mai ʻa Sīsū Kalaisi ki he māmaní ke .” Fakaʻaliʻali ange leva ha ʻū fakatātā fekauʻaki mo e feilaulau fakalelei, pekia, mo e Toetuʻu ʻa e Fakamoʻuí (vakai, Tohi Fakatātā ʻo e Ongoongoleleí, fika 56–59), pea talanoa nounou kau ki he ngaahi meʻa ko ʻeni ne hokó. Te ke lava foki ʻo hivaʻi ha foʻi hiva fekauʻaki mo e ʻuhinga naʻe hāʻele mai ai ʻa Sīsū ki he māmaní, hangē ko e “Naʻá Ne Fekau Hono ʻAló” (Tohi Hiva ʻa e Fānaú, 20–21). Fai hoʻo fakamoʻoni kia Sīsū Kalaisí mo e meʻa kuó Ne fai maʻaú.

Akoʻi e Tokāteliné: Fānau Lalahi Angé

Mātiu 1:18–25; 2:1–12; Luke 1:26–38; 2:1–20

Naʻe haʻu ʻa Sīsū Kalaisi ki māmani ko ha kiʻi pēpē.

Te ke tokoniʻi fēfē ʻa e fānaú ke nau tokanga kia Sīsū Kalaisi ʻi he Kilisimasí?

Ngaahi ʻEkitivitī ʻe Ala Fakahokó

• Fakaafeʻi ha taha ʻi he fānaú ke ne laukonga kau ki he ngaahi meʻa naʻe hoko ʻoku kaunga ki he ʻaloʻi ʻo e Fakamoʻuí ʻi he (vakai, Mātiu 1:18–25; 2:1–12; Luke 1:26–38; 2:1–20). Kole ki he fānaú ke nau taufetongi ʻi hono tā ʻi he palakipoé ha ʻū fakatātā ʻo e meʻa ʻoku fakamatalaʻi ʻe he folofolá. Ko e hā e ngaahi meʻa ʻoku akoʻi mai ʻe he ngaahi talanoa ko ʻení kau kia Sīsū Kalaisi?

• Fakaafeʻi e fānaú ke tohiʻi ʻi ha fanga kiʻi laʻipepa, ha ngaahi meʻa te nau lava ʻo fai ke tokoniʻi ai kinautolu ke nau tokanga taha ki he Fakamoʻuí lolotonga e faʻahitaʻu Kilisimasí.   Fakaafeʻi ke nau vahevahe e meʻa ne nau tohí. Poupouʻi ʻa e fānaú ke nau ʻalu mo e ʻū laʻipepá ki ʻapi pea nau fakahoko mo honau ngaahi fāmilí ʻa e ngaahi fokotuʻu ne nau tohi ʻi he laʻipepá.

• Hivaʻi ha ngaahi hiva Kilisimasi kau ki he Fakamoʻuí (vakai Tohi Hiva ʻa e Fānaú, 24–32; Ngaahi Himí, fika 110–122), pea fakaafeʻi e fānaú ke vahevahe ha laine pe kupuʻi lea ʻi he ngaahi hivá ʻoku nau manako ai.

Sione 3:16

Naʻe fakafaingofuaʻi ʻe Sīsū Kalaisi ke u toe lava ʻo nofo mo e Tamai Hēvaní ha ʻaho.

Te ke tokoniʻi fēfē ʻa e fānaú ke nau toe vakaiʻi e meʻa ne nau ako ʻi he taʻu ní mo mahino e ʻuhinga ʻoku nau fie maʻu ai ʻa Sīsū Kalaisi ʻi heʻenau moʻuí?

Ngaahi ʻEkitivitī ʻe Ala Fakahokó

• Fakahingoa ha laʻipepa ʻe taha ko e Ko hai ʻa Sīsū Kalaisi? pea mo e laʻipepa ʻe taha ko e Ko e hā e ʻuhinga naʻá Ne hāʻele mai ai ki māmaní? pea fakapipiki kinaua ki ha holisi kehekehe ʻi he loki akó. Fakaafeʻi e fānau takitaha ke lau ha taha ʻo e ngaahi potufolofola ko ʻení: Mātiu 16:15–16; Sione 3:16; 1 Nīfai 10:4; Mōsaia 3:8; ʻAlamā 7:10–13; 3 Nīfai 27:14–15. Kole ki he fānaú ke nau kumi e tali ki he ongo fehuʻi ʻi he holisí, ʻi he ngaahi potufolofola ne nau laú. Fakaafeʻi ke nau tohi ʻenau ngaahi talí pea fakapipiki ia ki he holisí ʻi he tafaʻaki ʻo e fehuʻi ʻoku taau mo iá. Te tau lava fēfē ʻo fakahaaʻi ʻetau houngaʻia ʻi he meʻa kuo fai ʻe Sīsū Kalaisi maʻatautolú?

• Fakaafeʻi e fānaú ke nau lisi ʻi he palakipoé ʻa e ngaahi hingoa kotoa ʻo Sīsū ʻoku nau lava ʻo fakakaukau ki aí (vakai, Fakahinohino ki he Ngaahi Folofolá, “Sīsū Kalaisi”). Ko e hā ʻoku akoʻi mai ʻe he ngaahi talanoa ko ʻení fekauʻaki mo Sīsū Kalaisi mo ʻEne ngāue fakafaifekaú? Ko e hā e ʻuhinga ʻoku tau fie maʻu ai ʻa Sīsū Kalaisi ʻi heʻetau moʻuí?  

Poupouʻi e Ako ʻi ʻApí

Poupouʻi e fānaú ke nau ʻiloʻi ha founga ʻe taha pe lahi ange ke tokoniʻi ai ha taha kehe pe ʻunu ke ofi ange kia Sīsū Kalaisi ʻi he Kilisimasi ko ʻení.

Fakatupulaki ʻEtau Founga Akoʻí

Fakaafeʻi ʻa e fānaú ke nau vahevahe ʻa e meʻa ʻoku nau akó. ʻE lava ke maʻu ʻe he fānaú ha ivi tākiekina mālohi ki he leleí ʻi honau ngaahi fāmilí. Poupouʻi e fānau ʻokú ke akoʻí ke vahevahe ki honau ngaahi fāmilí ha meʻa ne nau ako ʻi he Palaimelí. (Vakai, Ko e Faiako ʻi he Founga ʻa e Fakamoʻuí, 30.)