« ថ្ងៃទី ១៨–២៤ ខែ មេសា ។ និក្ខមនំ ១៨–២០ ៖ ‹ យើងខ្ញុំរាល់គ្នានឹងធ្វើតាមគ្រប់សេចក្តីដែលព្រះយេហូវ៉ាទ្រង់មានព្រះបន្ទូលមក › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )
« ថ្ងៃទី ១៨–២៤ ខែ មេសា ។ និក្ខមនំ ១៨–២០ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២២
ភ្នំមួយនៅស្រុកអេស៊ីព្ទតាមទំនៀមទម្លាប់ជឿថាភ្នំនេះជាភ្នំស៊ីណាយ ។
ថ្ងៃទី ១៨–២៤ ខែ មេសា
និក្ខមនំ ១៨–២០
« យើងខ្ញុំរាល់គ្នានឹងធ្វើតាមគ្រប់សេចក្តីដែលព្រះយេហូវ៉ាទ្រង់មានព្រះបន្ទូលមក »
នៅពេលបងប្អូនអាន និក្ខមនំ ១៨–២០ សូមគិតអំពីគោលការណ៍ដែលនឹងមានអត្ថន័យបំផុតចំពោះកុមារ ។ បងប្អូនប្រហែលជាត្រូវបានបំផុសគំនិតឲ្យគូសចំណាំគោលការណ៍មួយក្រៅពីយោបល់ខាងក្រោមទាំងនោះ ។
កត់ត្រាចំណាប់អារម្មណ៍របស់បងប្អូន
អញ្ជើញឲ្យចែកចាយ
សូមអញ្ជើញកុមារឲ្យចែកចាយ ក្រិត្យវិន័យមួយនៃក្រិត្យវិន័យទាំងដប់ប្រការ ( ឬរំឭកក្រឹត្យវិន័យពីរបីជាមួយពួកគេ ) និងអំពីមូលហេតុដែលពួកគេមានអារម្មណ៍ថាសំខាន់ដើម្បីគោរពតាមក្រឹត្យវិន័យនោះ ។
បង្រៀនគោលលទ្ធិ ៖ កុមារតូចៗ
ការចែកចាយទីបន្ទាល់របស់ខ្ញុំអាចប្រទានពរដល់អ្នកដទៃ ។
រេហួលបានត្រេកអរ នៅពេលម៉ូសេចែកចាយពីអ្វីដែលព្រះអម្ចាស់បានធ្វើសម្រាប់កូនចៅអ៊ីស្រាអែល ។ ដំណើររឿងនេះអាចបំផុសគំនិតកុមារ ដែលបងប្អូនបង្រៀនឲ្យចែកចាយជាមួយអ្នកដទៃពីអ្វីដែលពួកគេដឹងថាជាការពិត ។
សកម្មភាពដែលអាចជ្រើសរើស
-
សូមអាន ពាក្យសំដីខាងក្រោម ដល់កុមារ មកពី និក្ខមនំ ១៨:៨ ៖ « ឯម៉ូសេលោកចាប់តាំងរ៉ាយរឿងប្រាប់ឪពុកក្មេកពីអស់ទាំងការដែលព្រះយេហូវ៉ាទ្រង់បានធ្វើ » ។ សូមសួរកុមារប្រសិនបើពួកគេចងចាំអំពីអ្វីដែលព្រះអម្ចាស់ បានធ្វើដើម្បីជួយកុមារនៃសាសន៍អ៊ីស្រាអែលឲ្យរត់ភៀសខ្លួនពីស្រុកអេស៊ីព្ទ ។ ( ដើម្បីជួយពួកគេចងចាំ សូមបង្ហាញរូបភាព ឬ ទំព័រសកម្មភាពមកពីមេរៀនមុនៗ ) ។ តើការណ៍អ្វីខ្លះ ដែលព្រះអម្ចាស់បានធ្វើដើម្បីជួយយើង ? សូមជួយកុមារយល់ថា ដូចម៉ូសេដូច្នោះ ដែរ គឺយើងអាចប្រាប់មនុស្សដទៃទៀត អំពីរឿងដ៏អស្ចារ្យ ដែលព្រះអម្ចាស់បានធ្វើសម្រាប់យើង ។
-
ថ្នាក់អង្គការបឋមសិក្សាអាចជាកន្លែងមួយដ៏ល្អសម្រាប់កុមារ ដើម្បីអនុវត្តន៍នូវការចែកចាយទីបន្ទាល់សាមញ្ញៗ ។ សូមចែកចាយទីបន្ទាល់របស់បងប្អូនជាមួយពួកគេ និងជួយពួកគេឲ្យចែកចាយសេចក្តីពិតនៃដំណឹងល្អផ្សេងទៀត ដែលពួកគេជឿជាមួយគ្នាទៅវិញទៅមក ។
ព្រះអម្ចាស់បានប្រទានក្រឹត្យវិន័យទាំងឡាយ ពីព្រោះទ្រង់សព្វព្រះទ័យឲ្យខ្ញុំរីករាយ ។
ក្រិត្យវិន័យទាំងឡាយ គឺជាសេចក្តីណែនាំរបស់ព្រះវរបិតាសួគ៌សម្រាប់ការស្វែងរកភាពសុខសាន្តនៅក្នុងជីវិតនេះ និងសេចក្តីអំណរសម្រាប់ភាពអស់កល្បជានិច្ច ។ តើបងប្អូនអាចលើកទឹកចិត្តកុមារឲ្យគោរពតាមក្រឹត្យវិន័យរបស់ព្រះដោយរបៀបណា ?
សកម្មភាពដែលអាចជ្រើសរើស
-
សូមបង្ហាញរូបភាពមកពី « ក្រឹត្យវិន័យទាំងដប់ប្រការ »( នៅក្នុង ដំណើររឿងព្រះគម្ពីរសញ្ញាចាស់ )ហើយអញ្ជើញកុមារឲ្យចែកចាយពីអ្វីដែលពួកគេបានដឹងអំពីដំណើររឿង ។ សូមជួយពួកគេឲ្យយល់អំពីផ្នែកណាមួយនៃដំណើររឿងដែលពួកគេមិនទាន់បានស្គាល់ ។
-
កាលដែលបងប្អូន អានក្រឹត្យវិន័យពីរបីមកពី និក្ខមនំ ២០:៣–១៧ ទៅកាន់កុមារ ( ឬសម្រាយជាពាក្យសម្តីដែលពួកគេអាចយល់ ) សូមអញ្ជើញពួកគេឲ្យលើកមេដៃឡើង ប្រសិនបើក្រិត្យវិន័យ ខាងលើ គឺជាអ្វី ដែលយើងគួរធ្វើតាម និង ដាក់មេដៃចុះ ប្រសិនបើនេះជាអ្វីដែលយើងមិនគួរធ្វើ ។ សូមចែកចាយទីបន្ទាល់របស់បងប្អូនអំពីសុភមង្គលដែលបានមកអំពី ការគោរពតាមក្រឹត្យវិន័យរបស់ព្រះ( សូមមើល ម៉ូសាយ ២:៤១ ) ។
-
សូមច្រៀងចម្រៀងមួយបទជាមួយកុមារអំពីរបៀបដែលព្រះវរបិតាសួគ៌ ប្រទានពរដល់យើង នៅពេលដែលយើងគោរពតាមក្រឹត្យវិន័យ ដូចជាបទ « រក្សាបទបញ្ញត្តិ» ( សៀវភៅចម្រៀងកុមារទំព័រ ១៩០ ) ។ សូមអញ្ជើញកុមារឲ្យស្តាប់រកមើលពាក្យពេចន៍ដើម្បីស្វែងរកពរជ័យអ្វីដែលយើងទទួលនៅពេលដែលយើងគោរពតាម ។
ខ្ញុំអាចគោរពឳពុកម្តាយរបស់ខ្ញុំ ។
ការគោរពប្រតិបត្តិឳពុកម្តាយ គឺលើសពីការគ្រាន់តែគោរពពួកលោក ។ សូមជួយកុមារឲ្យយល់អំពីវិធីផ្សេងៗដែលពួកគេអាចគោរពប្រតិបត្តិដល់ឳពុកម្តាយ ។
សកម្មភាពដែលអាចជ្រើសរើស
-
សូមជួយកុមាររៀនពីឃ្លា « ចូរឲ្យគោរពប្រតិបត្តិដល់ឪពុកម្តាយ ដើម្បីឲ្យបានអាយុវែងនៅក្នុងស្រុក ដែលព្រះយេហូវ៉ា ជាព្រះនៃឯងទ្រង់ប្រទានឲ្យ » ( និក្ខមនំ ២០:១២ ) ។ ប្រសិនបើចាំបាច់សូមពន្យល់ថា ពាក្យ « គោរពប្រតិបត្តិ » មនុស្សមួយចំនួនអាចចង់មានន័យថា ជាការបង្ហាញការគួរសមសម្រាប់ពួកលោក ឬដើម្បីនាំមកនូវសុភមង្គលដល់ពួកគេ ។ តើព្រះយេស៊ូវបានធ្វើអ្វីខ្លះដើម្បីគោរពប្រតិបត្តិដល់ព្រះវរបិតាសួគ៌របស់ទ្រង់ ? តើទ្រង់បានគោរពប្រតិបត្តិដល់មាតារបស់ទ្រង់ដោយរបៀបណា ? ( សូមមើល លូកា ២:៤៨-៥១ ; យ៉ូហាន ១៩:២៦–២៧ ) ។ សូមជួយកុមារឲ្យគិតអំពីអ្វីដែលពួកគេអាចធ្វើដើម្បីគោរពប្រតិបត្តិដល់ឳពុកម្តាយរបស់ពួកគេ ហើយអញ្ជើញពួកគេឲ្យធ្វើសកម្មភាពចេញពីគំនិតរបស់ពួកគេ ។
-
សូមអញ្ជើញកុមារឲ្យធ្វើកាតថ្លែងអំណរគុណសម្រាប់ឳពុកម្តាយរបស់ពួកគេ ។ ពួកគេអាចសរសេរ ឬ គូរនៅខាងក្នុងកាតនោះនូវអ្វីដែលពួកគេបានធ្វើដើម្បីគោរពប្រតិបត្តិដល់ឳពុកម្តាយរបស់ពួកគេ ។
បង្រៀនគោលលទ្ធិ ៖ កុមារធំៗ
ខ្ញុំអាច ជួយ « ជាជំនួយ »នៅក្នុងការធ្វើកិច្ចការរបស់ព្រះអម្ចាស់ ?
ម៉ូសេបានរៀនថាការព្យាយាមដើម្បីដឹកនាំកូនចៅអ៊ីស្រាអែលទាំងអស់ដោយខ្លួនលោក គឺ « មិនស្រួលទេ » ( និក្ខមនំ ១៨:១៧ ) ។ ការស្រឡាញ់ និងការបម្រើគ្នាទៅវិញទៅមកអាចជួយសម្រាលបន្ទុកថ្នាក់ដឹកនាំរបស់យើង ។
សកម្មភាពដែលអាចជ្រើសរើស
-
សូមអញ្ជើញកុមារឲ្យគូររង្វង់ជាច្រើននៅលើក្ដារខៀនដើម្បីជាតំណាងសមាជិកវួដ ។ សូមគូររង្វង់បិទស្លាក ប៊ីស្សព ។ តើហេតុអ្វីបានវាជាបញ្ហានៅពេលប៊ីស្សព គឺជាមនុស្សតែម្នាក់ដែលត្រូវជួយមនុស្សគ្រប់គ្នា ? សូមអានជាមួយគ្នានៅក្នុង និក្ខមនំ ១៨:១៣–២៦ ដើម្បីស្វែងរកដំបូន្មានអ្វីដែល រេហួល ផ្តល់ឲ្យនៅពេលម៉ូសេព្យាយាមធ្វើអ្វីគ្រប់យ៉ាងដោយខ្លួនលោក ។ សូមឲ្យកុមារបិទស្លាករង្វង់ផ្សេងទៀតដើម្បីតំណាងឲ្យថ្នាក់ដឹកនាំវួដដទៃទៀត ដែលបានជួយប៊ីស្សពបម្រើអ្នកដទៃ ។ តើថ្នាក់ដឹកនាំ និងសមាជិកដទៃទៀតអាចជួយសម្រាលបន្ទុកប៊ីស្សពដោយរបៀបណា ? តើយើងអាចធ្វើដូចគ្នានេះសម្រាប់ថ្នាក់ដឹកនាំវួដរបស់យើងយ៉ាងដូចម្តេច ? សម្រាប់ឳពុកម្តាយយើងយ៉ាងដូចម្តេច ?
-
សូមជួយកុមារ ធ្វើបញ្ជីថ្នាក់ដឹកនាំនៅក្នុងវួដរបស់បងប្អូន ។ ជាថ្នាក់ទាំងមូលសូមជ្រើសរើសមនុស្សម្នាក់ហើយពិភាក្សាអំពីអ្វីដែលមនុស្សម្នាក់នេះធ្វើ ដើម្បីសម្រេចកិច្ចការរបស់ព្រះអម្ចាស់ និងអ្វីដែលកុមារអាចធ្វើដើម្បីជួយ ។
រូបភាពបុរសចាប់ដៃជាមួយនឹងស្ត្រីការបម្រើអ្នកដទៃ គឺជាវិធីមួយដែលយើងអាចជួយនៅក្នុងកិច្ចការរបស់ព្រះអម្ចាស់ ។
វាសំខាន់ខ្លាំងណាស់ដែលត្រូវដាក់ព្រះអម្ចាស់ដំបូងគេនៅក្នុងជីវិតរបស់ខ្ញុំ ។
យើងទាំងអស់គ្នាមានអ្វីៗដែលអាចនឹងត្រូវល្បួងឲ្យដាក់ពីមុនព្រះនៅក្នុងជីវិតរបស់យើង ។ តើបងប្អូនអាចជួយកុមារឲ្យយល់អំពីអត្ថន័យនៃការដាក់ព្រះវរបិតាសួគ៌ ជាមុនដោយរបៀបណា ?
សកម្មភាពដែលអាចជ្រើសរើស
-
សូមអាន និក្ខមនំ ២០:១–៧ ជាមួយគ្នា ហើយពន្យល់ថាអ្វីក៏ដោយដែលយើងដាក់ពីមុនព្រះនៅក្នុងជីវិតរបស់យើង គឺប្រៀបដូចជា « ព្រះឯណាទៀត » ហើយ «ឆ្លាក់ធ្វើរូបណា » ដូចបានរៀបរាប់នៅក្នុងខទី ៣–៤ ។ សូមសួរកុមារថា ហេតុអ្វីព្រះវរបិតាសួគ៌ចង់ឲ្យយើងដាក់ទ្រង់ជាមុន ។ តើពរជ័យអ្វីដែលទ្រង់បានសន្យាចំពោះយើងប្រសិនបើយើងធ្វើតាម ? សូមសួរកុមារថាតើយើងអាចបង្ហាញព្រះវរបិតាសួគ៌ថា ទ្រង់សំខាន់លើសអ្វីៗទាំងអស់នៅក្នុងជីវិតរបស់យើងដោយរបៀបណា ។
-
សូមគិតអំពីកិច្ចការជំហានដំបូងមានសារៈសំខាន់ដូចជា លាងដៃ មុនពេលបរិភោគអាហារ ពាក់ស្រោមជើងមុនពេលពាក់ស្បែកជើង ។ តើនឹងមានអ្វីកើតឡើង ប្រសិនបើយើងមិនធ្វើតាមជំហានសំខាន់ៗទាំងនេះ ? តើវានឹងក្លាយជាដូចម្តេចក្នុងការដាក់ព្រះវរបិតាសួគ៌ជាមុននៅក្នុងជីវិតរបស់យើង ? សូមចែកចាយទីបន្ទាល់របស់បងប្អូនអំពីការដាក់ព្រះជាមុន បានប្រទានពរដល់ជីវិតបងប្អូន ហើយសូមអញ្ជើញកុមារឲ្យចែកចាយទីបន្ទាល់របស់ពួកគេផងដែរ ។
-
សូមច្រៀងចម្រៀងមួយបទអំពីព្រះវរបិតាសួគ៌ ដូចជាបទ « ព្រះវរបិតាស្រឡាញ់ខ្ញុំសៀវភៅចម្រៀងកុមារទំព័រ ១៦–១៧ ) ។ តើយើងរៀនអ្វីខ្លះចេញពីបទចម្រៀងអំពីហេតុអ្វីវាសំខាន់ក្នុងការដាក់ព្រះវរបិតាសួគ៌មុនគេនៅក្នុងជីវិតរបស់យើង ?
ព្រះអម្ចាស់បានប្រទានក្រឹត្យវិន័យទាំងឡាយ ពីព្រោះទ្រង់សព្វព្រះទ័យឲ្យខ្ញុំរីករាយ ។
កុមារនឹងកាន់តែចង់គោរពតាមក្រឹត្យវិន័យ ប្រសិនបើពួកគេ ឃើញវាគឺជាការបង្ហាញសេចក្តីស្រឡាញ់របស់ព្រះ និង ជាឱកាសដើម្បីសម្តែងសេចក្តីស្រឡាញ់របស់ពួកគេចំពោះទ្រង់ ។
សកម្មភាពដែលអាចជ្រើសរើស
-
សូមរៀបចំចម្រៀកក្រដាសដែលមានក្រឹត្យវិន័យនៅក្នុង និក្ខមនំ ២០:៣–១៧ នៅលើនោះ ។ សូមសរសេរចាប់ពីលេខមួយដល់លេខដប់នៅលើក្តារខៀន ហើយអញ្ជើញកុមារឲ្យដាក់ចម្រៀកក្រដាសនោះតាមលំដាប់លំដោយត្រឹមត្រូវនៅលើក្តារខៀន ។ សូមនិយាយអំពីរបៀបដែលយើងអាចធ្វើតាមក្រឹត្យវិន័យទាំងនេះ ។ ពួកគេអាចមើលនៅក្នុងអត្ថបទប្រធានបទដំណឹងល្អ « ក្រិត្យវិន័យដប់ប្រការ » នៅលើគេហទំព័រ ( topics.ChurchofJesusChrist.org ) ។
-
សូមអញ្ជើញកុមារឲ្យគូររូបភាពនៃពាក្យគន្លឹះចេញពីក្រឹត្យវិន័យដើម្បីជួយពួកគេចងចាំវា ។
-
សូមដំណាលរឿងរបស់ក្លូ ដកស្រង់ចេញពីសារលិខិត ស៊ិស្ទើរ ខារូល អិម ស្ទីវិនស៍ « បើអ្នករាល់គ្នាស្រឡាញ់ខ្ញុំ ចូរកាន់តាមបញ្ញត្តិរបស់ខ្ញុំចុះ » ( Liahona ខែ វិច្ឆិកា ឆ្នាំ ២០១៥ ទំព័រ ១១៨–២០ ) ។ តើរឿងនេះជួយយើងឲ្យយល់អំពីមូលហេតុដែលព្រះអម្ចាស់ប្រទានក្រឹត្យវិន័យដល់យើងដោយរបៀបណា ? តើយើងអាចចាប់ផើ្តមគោរពតាមដើម្បីបង្ហាញសេចក្ដីស្រឡាញ់របស់យើងចំពោះព្រះដោយរបៀបណា ?
សូមលើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យគិតអំពីអ្វីដែលពួកគេអាចចូលចិត្តធ្វើ ពីព្រោះតែអ្វីដែលពួកគេបានរៀននៅក្នុងថ្នាក់ ។ សូមជួយពួកគេធ្វើការរំឭកមួយសាមញ្ញអំពីអ្វីដែលពួកគេនឹងធ្វើ ដើម្បីពួកគេអាចយកទៅផ្ទះ ។
ការកែលម្អការបង្រៀនរបស់យើង
សូមជួយសិស្សឲ្យស្គាល់ពីព្រះវិញ្ញាណ ។ កុមារអាចស្គាល់ឥទ្ធិពលនៃព្រះវិញ្ញាណ ។ សូមបង្រៀនពួកគេថា អារម្មណ៍នៃសេចក្ដីសុខសាន្ត សេចក្ដីស្រឡាញ់ និងដួងចិត្តកក់ក្ដៅដែលពួកគេមាននៅពេលដែលពួកគេនិយាយ ឬច្រៀងពីព្រះយេស៊ូវគ្រីស្ទ និងដំណឹងល្អរបស់ទ្រង់ កើតមានមកពីព្រះវិញ្ញាណបរិសុទ្ធ ។