Եհովան հայտնվում է Մովսեսին և Իսրայելի երեցներին

Եհովան հայտնվում է Մովսեսին և Իսրայելի 70 երեցներին, նկարը ըստ՝ Ջերի Հարթսոնի

Ապրիլի 25-ից մայիսի 1-ը

Ելից 24, 31–34

«Իմ երեսը պիտի գնայ»

Երբ Մովսեսը պատրաստվում էր առաջնորդել Իսրայելի զավակներին դեպի խոստումի երկիր, Տերն ասաց. «Իմ երեսը պիտի գնայ» (Ելից 33.14): Երբ պատրաստվեք ուսուցանել ձեր դասարանի երեխաներին, մտածեք, թե ինչպես կարող եք հրավիրել Տիրոջ ներկայությունը «գնայ [ձեզ] հետ»:

Գրի առեք ձեր տպավորությունները

կիսվելու պատկերակ

Հրավիրեք կիսվել

Յուրաքանչյուր երեխայի խնդրեք պատահականորեն ընտրել որևէ համարակալված թերթիկ: Օգտագործեք այդ թվերը՝ որոշելով, թե երեխաներն ինչ կարգով կարող են կիսվել ինչ-որ բանով, որը նրանք սովորում են սուրբ գրություններից՝ կա՛մ տանը, կա՛մ Երեխաների միությունում:

ուսուցման պատկերակ

Ուսուցանեք վարդապետությունը. կրտսեր խմբի երեխաներ

Ելից 31.13, 17

Հանգստության օրը պատվելը իմ սիրո նշանն է Տիրոջ հանդեպ:

Տերն ասաց Մովսեսին, որ երբ Իսրայելի զավակները սուրբ պահեցին Հանգստության օրը, նրանք ցույց տվեցին Իրեն, որ ուզում են լինել Իր ժողովուրդը:

Հնարավոր վարժություններ

• Գրատախտակին մի սիրտ նկարեք և հարցրեք երեխաներին, թե ինչ կարող է նշանակել այդ խորհրդանիշը: Օգնեք նրանց մտածել ուրիշ բաներ, որոնք կարող են սիրո նշան լինել, օրինակ՝ գրկախառնումը կամ որևէ ծառայություն մատուցելը: Նրանց համար կարդացեք Ելից 31.13: Օգնեք նրանց հասկանալ, որ երբ մենք սուրբ ենք պահում Հանգստության օրը, դա նշան է Տիրոջը, որ մենք սիրում ենք Նրան։

• Ասեք երեխաներին մի քանի եղանակների մասին, որոնցով դուք փորձում եք Հանգստության օրը ցույց տալ ձեր սերը Տիրոջ հանդեպ։ Թող նրանք պատմեն, թե իրենք և իրենց ընտանիքներն ինչպես են անում այդ: Հրավիրեք երեխաներին օգտագործել այս շաբաթվա գործնական աշխատանքի էջը՝ ավելի շատ գաղափարներով կիսվելու համար։

  երեխաներն ու ծնողները տանը

  Պատվելով Հանգստության օրը՝ մենք ցույց ենք տալիս մեր սերը Տիրոջ հանդեպ։

Ելից 32.1–8, 19–24

Ես կարող եմ Տիրոջը դնել առաջին տեղում իմ կյանքում:

Մինչ Մովսեսը Սինայ լեռան վրա խոսում էր Տիրոջ հետ, Իսրայելի զավակները նախընտրեցին Նրա փոխարեն երկրպագել ոսկե կուռքին։ Այս պատմությունը կարող է հիշեցնել ձեր ուսուցանած երեխաներին, որ մենք չպետք է թույլ տանք, որ որևէ բան Տիրոջից առավել կարևոր դառնա մեզ համար:

Հնարավոր վարժություններ

• Երեխաների հետ համառոտ վերանայեք Տասը պատվիրանները՝ շեշտադրելով առաջին երկուսը (Ելից 20.3–6): Օգտագործեք «Տասը պատվիրանները» (Հին Կտակարանի պատմություններում), նրանց հետ կիսվելով Ելից 32.1–8, 19–24 հատվածներում տրված պատմությունով: Եթե հնարավոր է, թող երեխաներն օգնեն ձեզ պատմել պատմությունը: Օգնեք երեխաներին հասկանալ, թե իսրայելացիներն ինչ սխալ գործեցին այս պատմության մեջ (գուցե կամենաք հիշեցնել երեխաներին Տասը պատվիրաններից առաջին երկուսը): Իսրայելացիներն ի՞նչ պետք է անեին փոխարենը։

• Ցույց տվեք Հիսուս Քրիստոսի նկարը մի քանի ուրիշ առարկաների նկարների հետ միասին, որոնց վրա երեխաները կարող էին ժամանակ ծախսել, օրինակ՝ խաղալիքներ, խաղեր և այլն: Խնդրեք երեխաներին, որ գտնեն նկարը, որը ցույց է տալիս, թե մեզ համար ինչը պետք է լինի ամենակարևորը: Պատմեք երեխաներին, թե դուք որքան օրհնված եք, որ Տիրոջը դնում եք առաջին տեղում ձեր կյանքում՝ գերադասելով նույնիսկ ուրիշ լավ բաներից:

Ելից 33․11

Տերը դեմ առ դեմ խոսեց Մովսեսի հետ:

Երբ Մովսեսը ոչնչացրեց ոսկե հորթը, «Եհովան խօսում էր Մովսէսի հետ դէմ առ դէմ, ինչպէս մի մարդ իր բարեկամի հետ կխօսէ»: Այս գիտելիքը կարող է կերտել երեխաների հավատքն այն մասին, որ Տերը իրական անձնավորություն է, ով սիրում է նրանց:

Հնարավոր վարժություններ

• Պատմեք երեխաներին, թե դուք ինչ եք զգում, երբ խոսում եք որևէ լավ ընկերոջ հետ, և հարցրեք նրանց, թե իրենք ինչ են զգում: Նրանց համար կարդացեք Ելից 33.11 հատվածի առաջին նախադասությունը: Հարցրեք երեխաներին, թե իրենց կարծիքով, ինչ էր զգում մարգարե Մովսեսը։ Պատմեք երեխաներին այն ժամանակների մասին, երբ դուք մոտ եք զգացել Տիրոջը, նույնիսկ, եթե չեք տեսել Նրան ձեր աչքերով:

• Միասին երգեք որևէ երգ, որն արտահայտում է, թե Երկնային Հայրն ու Հիսուս Քրիստոսն ինչպես են վերաբերվում մեզ, օրինակ՝ «Jesus Is Our Loving Friend» (Children’s Songbook, 58): Ցույց տվեք Փրկիչի նկարը, որտեղ Նա սեր է ցուցադրում ուրիշների հանդեպ (տես Ավետարանի նկարների գիրք, հ. 36, 41–43, 46–47): Խրախուսեք երեխաներին կիսվել, թե նրանք ինչպես են վերաբերվում Երկնային Հորը և Հիսուս Քրիստոսին:

ուսուցման պատկերակ

Ուսուցանեք վարդապետությունը. ավագ խմբի երեխաներ

Ելից 31.12–17

Հանգստության օրը պատվելը իմ սիրո նշանն է Տիրոջ հանդեպ:

Հանգստության օրը սուրբ պահելը կարող է ավելի հեշտ և ուրախալի լինել երեխաների համար, երբ նրանք գիտակցեն, որ դա Տիրոջ հանդեպ իրենց պարտավորության նշանն է:

Հնարավոր վարժություններ

• Երեխաներին մի քանի հարց տվեք, որպեսզի օգնեք նրանց հասկանալ, թե ինչ է նշանը, օրինակ՝ «Ո՞ր նշաններն են ձեզ հայտնում, որ գարուն է գալիս կամ դուք մրսում եք»: Խնդրեք նրանց կարդալ Ելից 31.13, 16–17-ը և գտնել «նշան» բառը: Ըստ Տիրոջ, ո՞րն է նշանը մեր և Իր միջև։ Ինչո՞ւ է այդ նշանն այդքան կարևոր։

• Հրավիրեք երեխաներին հերթով բացատրել, թե նրանք ինչու են ընտրում պատվել Հանգստության օրը։ Կարող են օգնել հետևյալ տեսանյութերը՝ «Հանգստության օրը քեզ համար է» և «Իմ սուրբ օրը. պատվելով հանգստության օրը» (ChurchofJesusChrist.org)

• Երեխաներին խնդրեք գրի առնել, թե ինչ կարող են անել կիրակի օրը, որպեսզի Տիրոջը ցույց տան, որ սիրում են Նրան։ Խնդրեք նրանց իրենց ցուցակից կիսվել մի քանի գործողություններով: Առաջարկեք, որ երեխաները տուն տանեն ցուցակները, կիսվեն դրանցով իրենց ընտանիքների հետ և անդրադառնան դրանց, երբ Հանգստության օրվա լավ գաղափարների կարիք ունենան:

Ելից 32.1–8, 19–24

Ես կարող եմ Տիրոջը դնել առաջին տեղում իմ կյանքում:

Ելից 32 գլխի պատմության կարևոր ուղերձներից է Տասը պատվիրաններից առաջին երկուսը պահելու կարևորությունը. մի երկրպագեք ոչ ոքի կամ որևէ այլ բանի՝ բացի Տիրոջից:

Հնարավոր վարժություններ

• Խնդրեք երեխաներին կիսվել՝ ինչ գիտեն Ահարոնի պատմության մասին, ով պատրաստեց ոսկե հորթը, որ իսրայելացիները երկրպագեն: Եթե օգնության կարիք ունեն, հղում կատարեք Ելից 32.1–8, 19–24-ը, կամ նրանց հետ կիսվեք «Տասը պատվիրաններով» (Հին կտակարանի պատմություններում): Իսրայելացիների համար ինչո՞ւ էր սխալ կուռքի պաշտամունքը: (Կարող եք ուղղորդել երեխաներին անդրադառնալ Տասը պատվիրաններից առաջին երկուսին Ելից 20.3–6:)

• Օգնեք երեխաներին մտածել այն օրինակների մասին, որոնց մարդիկ կարող են գայթակղվել երկրպագել Տիրոջ փոխարեն, և որոնք շեղում են մեր ուշադրությունը Նրանից: Ապա խնդրեք նրանց կիսվել այնպիսի օրինակներով, որոնք օգնում են կենտրոնանալ Փրկիչի վրա և երկրպագել Նրան:

Ելից 32.1–5, 21–24

Ես կարող եմ պաշտպանել արդարությունը:

Երբ իսրայելացիները հանձնարարեցին Ահարոնին ոսկե կուռք պատրաստել, նա համաձայնվեց անել այդ, չնայած դա սխալ էր (տես Երկրորդ Օրինաց 9.20): Մտածեք, թե ինչպես կարող եք խրախուսել երեխաներին պաշտպանել արդարությունը, նույնիսկ, երբ մյուսները ճնշում են նրանց, որ չանեն դա:

Հնարավոր վարժություններ

• Հրավիրեք երեխաներին կարդալ Ելից 32.1–5, 21–24-ը անհատապես կամ զույգերով և կիսվել, թե իրենց կարծիքով, Ահարոնն ինչ պետք է աներ, երբ իսրայելացիները խնդրեցին նրան ոսկե հորթ պատրաստել: Ահարոնն ինչպե՞ս կարող էր օգնել մարդկանց։

• Օգնեք երեխաներին մտածել իրավիճակներ, երբ նրանց կխնդրեն ինչ-որ բան անել, որն, ըստ իրենց, սխալ կլինի։ Խնդրեք երեխաներին միմյանց հետ կիսվել գաղափարներով այն մասին, թե ինչպես վարվել նման իրավիճակներում:

սովորելու պատկերակ

Խրախուսեք տնային ուսումնասիրությունը

Հրավիրեք երեխաներին իրենց ընտանիքի անդամների հետ կիսվել այսօր սովորած գաղափարներով այն մասին, թե ինչպես սուրբ պահել Հանգստության օրը:

Բարելավել մեր ուսուցումը

Հրավիրեք երեխաներին վկայություններ բերել: Ձեր տված հարցերը կարող են խրախուսել երեխաներին կիսվել, թե նրանք ինչպես են վերաբերվում Փրկիչին, և ավետարանով ապրելն ինչպես է օրհնել նրանց։ Այդպիսով նրանք կբերեն իրենց վկայությունը: (Տես Ուսուցանել Փրկիչի ձևով 11, 32:)

գործնական աշխատանքի էջ. Հանգստության օրը պատվելը իմ սիրո նշանն է Տիրոջ հանդեպ