« ថ្ងៃទី ៣០ ខែ ឧសភា–ថ្ងៃទី ៥ ខែ មិថុនា ។ ពួកចៅហ្វាយ ២–៤; ៦–៨; ១៣–១៦ ៖ ‹ នោះទ្រង់ក៏តាំងឲ្យមានអ្នកជួយសង្គ្រោះម្នាក់ › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )
« ថ្ងៃទី ៣០ ខែ ឧសភា–ថ្ងៃទី ៥ ខែ មិថុនា ។ ពួកចៅហ្វាយ ២–៤; ៦–៨; ១៣–១៦ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២០
រចនារូបភាព ដេបូរ៉ាដឹកនាំកងទ័ពអ៊ីស្រាអែល © Lifeway Collection /បានទទួលអាជ្ញាប័ណ្ណពី goodsalt.com
ថ្ងៃទី ៣០ ខែ ឧសភា–ថ្ងៃទី ៥ ខែ មិថុនា
ពួកចៅហ្វាយ ២–៤; ៦–៨; ១៣–១៦
« នោះទ្រង់ក៏តាំងឲ្យមានអ្នកជួយសង្គ្រោះម្នាក់ »
មានរឿងរ៉ាវបំផុសគំនិតជាច្រើនដែលអាចបានរកឃើញនៅក្នុង ពួកចៅហ្វាយ ២–៤; ៦–៨; ១៣–១៦ ។ សូមពិចារណាអំពីរបៀបដែលបងប្អូនអាចប្រើរឿងរ៉ាវទាំងនេះ ដើម្បីជួយកុមារឲ្យខិតកាន់តែជិតព្រះអង្គសង្គ្រោះ និងមានបំណងចង់ដើរតាមទ្រង់ ។
កត់ត្រាចំណាប់អារម្មណ៍របស់បងប្អូន
អញ្ជើញឲ្យចែកចាយ
សូមអញ្ជើញកុមារម្នាក់ៗឲ្យចែកចាយរឿងមួយមកពីព្រះគម្ពីរដែលពួកគេបានរៀនថ្មីៗនេះ ។ បន្ទាប់មក សុំឲ្យពួកគេចែកចាយអ្វីដែលពួកគេរៀនមកពីរឿងទាំងនេះ ។
បង្រៀនគោលលទ្ធិ ៖ កុមារតូចៗ
ព្រះយេស៊ូវគ្រីស្ទគឺជាព្រះអង្គសង្រ្គោះរបស់ខ្ញុំ ។
នៅពេលដែលសាសន៍អ៊ីស្រាអែលបានអធិស្ឋានដល់ព្រះអម្ចាស់ ទ្រង់បានតែងតាំងឲ្យមានអ្នកជួយសង្គ្រោះម្នាក់ដល់ពួកគេ ។ សូមជួយកុមារឲ្យឃើញថា ព្រះយេស៊ូវគ្រីស្ទគឺជាព្រះអង្គសង្រ្គោះដែលព្រះបានតែងតាំងមកដល់យើង ។
សកម្មភាពដែលអាចជ្រើសរើស
-
សូមពន្យល់ដល់កុមារថា នៅពេលដែលសាសន៍អ៊ីស្រាអែលឈប់ធ្វើតាមបញ្ញត្ដិរបស់ព្រះជាម្ចាស់ ពួកគេបានបាត់បង់ការការពាររបស់ទ្រង់ ហើយត្រូវធ្វើឲ្យបរាជ័យដោយសារខ្មាំងសត្រូវរបស់ពួកគេ ។ សូមអានមកពី ពួកចៅហ្វាយ ៣:៩ នូវឃ្លាថា « ពួកកូនចៅអ៊ីស្រាអែលបានអំពាវនាវដល់ព្រះយេហូវ៉ា » ។ តើពួកសាសន៏អ៊ីស្រាអែលបានធ្វើអ្វីខ្លះ នៅពេលពួកគេត្រូវការជំនួយ ? សូមចែកចាយបទពិសោធន៍ នៅពេលបងប្អូនបានអធិស្ឋានដើម្បីសុំជំនួយ ហើយព្រះបានឆ្លើយតបទៅនឹងការអធិស្ឋានរបស់បងប្អូន ។
-
សូមអានពី ពួកចៅហ្វាយ ៣:៩ នូវឃ្លាថា « នោះទ្រង់ក៏តាំងឲ្យមានអ្នកជួយសង្គ្រោះម្នាក់ » ហើយអញ្ជើញកុមារឲ្យថាតាមបងប្អូនឲ្យបានពីរបីដង ។ សូមពន្យល់ថា អ្នកជួយសង្គ្រោះគឺជាអ្នកដែលជួយរំដោះយើង ។ សូមបង្ហាញកុមារនូវរូបភាពមនុស្សមួយចំនួន រួមទាំងរូបភាពរបស់ព្រះយេស៊ូវគ្រីស្ទ ហើយដាក់រូបភាពនោះផ្កាប់មុខចុះនៅលើឥដ្ឋ ។ សូមឲ្យកុមារប្ដូរវេនគ្នាបើករូបភាពនោះ ហើយរករូបភាពរបស់ព្រះយេស៊ូវគ្រីស្ទ ហើយលើកវាឡើង ។ សូមថ្លែងទីបន្ទាល់ថា ព្រះយេស៊ូវគ្រីស្ទគឺជាព្រះអង្គសង្រ្គោះដែលព្រះបានតែងតាំងដើម្បីជួយសង្គ្រោះយើងពីអំពើបាប និងសេចក្តីស្លាប់ ។
គេឌានបានទុកចិត្តលើព្រះអម្ចាស់ © Lifeway Collection /licensed from goodsalt.com
ព្រះអម្ចាស់អាចប្រើរឿងតូចតាចដើម្បីធ្វើកិច្ចការដ៏មហិមា ។
គេឌានបានចាត់ទុកខ្លួនគាត់ជាអ្នកក្រ និងជាមនុស្សមិនសូវសំខាន់ ប៉ុន្តែព្រះបានឃើញថា គាត់ជា « អ្នកពូកែក្លាហាន » ( ពួកចៅហ្វាយ ៦:១២ ) ។ សូមជួយកុមារឲ្យឃើញថា ទោះបីជាពួកគេមានអារម្មណ៏ថាតូចក៏ដោយ ក៏ព្រះអាចធ្វើការតាមរយៈពួកគេដើម្បីធ្វើកិច្ចការដែលសំខាន់ៗបានដែរ ( សូមមើលអាលម៉ា ៣៧:៦–៧ ) ។
សកម្មភាពដែលអាចជ្រើសរើស
-
សូមប្រាប់កុមារថា ព្រះអម្ចាស់ត្រូវការនរណាម្នាក់ជួយទ្រង់ រំដោះពួកសាសន៏អ៊ីស្រាអែលពីសត្រូវរបស់ពួកគេ គឺពួកម៉ាឌាន ហើយទ្រង់បានជ្រើសរើសយកគេឌាន ។ សូមអាន ពួកចៅហ្វាយ ៦:១៥ ទៅកាន់កុមារ ហើយសូមសួរពួកគេថាហេតុអ្វីបានជាគេឌានមិនមានអារម្មណ៏ថា គាត់អាចធ្វើអ្វីដែលព្រះអម្ចាស់សព្វព្រះទ័យ ។ សូមអាន ខទី ១៦ហើយសួរពួកគេថា តើអ្នកណាដែលព្រះអម្ចាស់បាននិយាយថានឹងជួយគេឌាន ។ សូមប្រាប់កុមារអំពីគ្រាមួយ នៅពេលព្រះអម្ចាស់បានសុំឲ្យបងប្អូនធ្វើអ្វីដែលពិបាកដើម្បីបម្រើទ្រង់ ហើយបងប្អូនបានមានអារម្មណ៏ថា ទ្រង់បានគង់ជាមួយនឹងបងប្អូន ។
-
សូមដាក់តាំងបង្ហាញរូបភាពកុមារ ឬយុវវ័យធ្វើកិច្ចការដ៏អស្ចារ្យនៅក្នុងការបម្រើព្រះ ( សូមមើល សៀវភៅរូបភាពដំណឹងល្អ លេខ ១៩, ២៣, ៩០, ១០២ ) ឬប្រាប់អំពីឧទាហរណ៍ដែលបងប្អូនបានឃើញ ។ សូមជួយកុមារឲ្យគិតអំពីរបៀបដែលពួកគេអាចចូលរួមនៅក្នុងកិច្ចការរបស់ព្រះ ហើយអញ្ជើញពួកគេឲ្យគូររូបខ្លួនពួកគេធ្វើកិច្ចការអស់ទាំងនោះ ។
-
សូមប្រើទំព័រសកម្មភាពនៅសប្តាហ៍នេះ ដើម្បីបង្រៀនកុមារអំពីរបៀបដែលព្រះអម្ចាស់បានធ្វើឲ្យកងទ័ពអ៊ីស្រាអែលមានចំនួនតិចជាងមុន ដើម្បីឲ្យសាសន៍អ៊ីស្រាអែលដឹងថា ព្រះចេស្ដារបស់ព្រះអង្គបានសង្គ្រោះពួកគេឲ្យរួចផុតពីខ្មាំងសត្រូវរបស់ពួកគេ ។ សូមចែកចាយឧទាហរណ៍នៃរឿងតូចតាចដែលអាចធ្វើកិច្ចការដ៏អស្ចារ្យបាន ដូចជាឃ្មុំប្រមូលទឹកដមផ្កាដើម្បីធ្វើជាទឹកឃ្មុំ ។ សូមថ្លែងទីបន្ទាល់របស់បងប្អូនថា ព្រះអាចជួយយើងធ្វើកិច្ចការដ៏មហិមា ទោះបីជានៅពេលយើងមានអារម្មណ៏ថាតូចក៏ដោយ ។
បង្រៀនគោលលទ្ធិ ៖ កុមារធំៗ
ព្រះយេស៊ូវគ្រីស្ទគឺជាអង្គសង្គ្រោះរបស់ខ្ញុំ ។
ពួកចៅហ្វាយ ៣ សូមពិពណ៌នាអំពីវដ្តមួយដែលបងប្អូនអាចប្រើដើម្បីបង្រៀនកុមារថា ព្រះសង្គ្រោះយើងពីអំពើបាបតាមរយៈព្រះអង្គសង្រ្គោះព្រះយេស៊ូវគ្រីស្ទ ។
សកម្មភាពដែលអាចជ្រើសរើស
-
សូមសរសេរនៅលើក្ដារខៀនដូចតទៅនេះ ៖ « បានប្រព្រឹត្តសេចក្តីដែលលាមកអាក្រក់ » « បានអំពាវនាវដល់ព្រះយេហូវ៉ា » និង « តាំងឲ្យមានអ្នកជួយសង្គ្រោះម្នាក់ » ។ សូមឲ្យកុមារខ្លះស្វែងរកឃ្លាទាំងនេះនៅក្នុង ពួកចៅហ្វាយ ៣:៧–៩ហើយអញ្ជើញកុមារផ្សេងទៀតឲ្យរកនៅក្នុង ពួកចៅហ្វាយ ៣:១២–១៥ ។ សូមពន្យល់ដល់កុមារថា នៅក្នុងព្រះគម្ពីរពួកចៅហ្វាយ ពួកសាសន៍អ៊ីស្រាអែលបាន « ប្រព្រឹត្តសេចក្តីដែលលាមកអាក្រក់ » ម្តងហើយម្តងទៀត ។ បន្ទាប់មក នៅពេលដែលខ្មាំង សត្រូវរបស់ពួកគេមកវាយលុក ពួកគេបាន « អំពាវនាវដល់ព្រះយេហូវ៉ា » ហើយព្រះអម្ចាស់ « តាំងឲ្យមានអ្នកជួយសង្គ្រោះម្នាក់ » ដើម្បីជួយដល់ពួកគេ ។ តើយើងរៀនអ្វីខ្លះអំពីព្រះអម្ចាស់មកពីវដ្តនេះ ?
-
សូមច្រៀងចម្រៀងជាមួយគ្នាមួយបទដែលជួយឲ្យកុមារយល់ថា ព្រះយេស៊ូវគ្រីស្ទគឺជាព្រះអង្គប្រោសលោះ និងព្រះអង្គសង្គ្រោះរបស់ពួកគេ ដូចជាបទ « ទ្រង់បញ្ជូនបុត្រាទ្រង់មក » ( សៀវភៅចម្រៀងកុមារ ទំព័រ ២០ ) ។ សូមអញ្ជើញកុមារឲ្យចែកចាយអារម្មណ៏របស់ពួកគេអំពីអ្វីដែលព្រះអង្គសង្រ្កោះបានធ្វើដើម្បីរំដោះយើងពីអំពើបាប ការសាកល្បងទុក្ខព្រួយ និងសេចក្តីស្លាប់ ។
ខ្ញុំអាចស្មោះត្រង់នឹងព្រះអម្ចាស់ ទោះបីអ្នកដទៃមិនស្មោះត្រង់ក៏ដោយ ។
ទោះបីជាពួកសាសន៍អ៊ីស្រាអែលជាច្រើនបានឃ្លាតឆ្ងាយពីព្រះអម្ចាស់ក៏ដោយ ក៏មានអ្នកខ្លះនៅតែស្មោះត្រង់នឹងទ្រង់ ហើយអាចជួយអ្នកដទៃជាច្រើនឲ្យត្រឡប់មករកសេចក្តីសុចរិតវិញដែរ ។ តើបងប្អូនអាចជួយលើកទឹកចិត្តកុមារឲ្យនៅស្មោះត្រង់នឹងព្រះអម្ចាស់ ដោយមិនខ្វល់ពីទង្វើរបស់អ្នកដទៃយ៉ាងដូចម្តេច ?
សកម្មភាពដែលអាចជ្រើសរើស
-
សូមប្រាប់កុមារថា នៅក្នុងអំឡុងពេលមួយដែលសាសន៍អ៊ីស្រាអែលបានធ្វើអាក្រក់ ស្ត្រីសុចរិតម្នាក់ឈ្មោះដេបូរ៉ា និងមេបញ្ជាការកងទ័ពអ៊ីស្រាអែល ឈ្មោះបារ៉ាក បានរំដោះពួកអ៊ីស្រាអែលពីសត្រូវរបស់ពួកគេ ( សូមមើល ពួកចៅហ្វាយ ៤:១–១៥ ) ។ សូមអានជាមួយគ្នា ពួកចៅហ្វាយ ៤:១៤ ហើយសូមសួរកុមារឲ្យស្វែងរកអ្វីមួយដែលដេបូរ៉ាបាននិយាយ ដែលបង្ហាញអំពីជំនឿរបស់នាងលើព្រះអម្ចាស់យ៉ាងខ្លាំង ។ សូមឲ្យកុមារអាន គោលលទ្ធិ និង សេចក្តីសញ្ញា ៨៤:៨៨ ដើម្បីស្វែងរកគោលការណ៍ដែលមាននៅក្នុង ពួកចៅហ្វាយ ៤:១៤ ។ សូមលើកទឹកចិត្តឲ្យពួកគេចែកចាយនូវអ្វីដែលព្រះអម្ចាស់សន្យា ថា « ត្បិតយើងនឹងទៅពីមុខអ្នក » មានន័យយ៉ាងដូចម្តេចចំពោះពួកគេ ។
-
សូមច្រៀងចម្រៀងមួយបទអំពីការគោរពបទបញ្ញត្តិ ដូចជាបទ « ជ្រើសផ្លូវត្រូវ » ( ទំនុកតម្កើង លេខ ១៤៨ ) ឬ « ជ្រើសរើសផ្លូវត្រូវ » ( សៀវភៅចម្រៀងកុមារ » ទំព័រ ៨២ ) ។ តើយើងអាចក្រោកឈរសម្រាប់សេចក្ដីសុចរិត ហើយគោរពបទបញ្ញត្តិ ទោះបីអ្នកផ្សេងទៀតនៅជុំវិញយើងមិនធ្វើ យ៉ាងដូចម្តេច ?
មាគ៌ារបស់ព្រះ គឺខុសពីមាគ៌ារបស់លោកិយ ។
ព្រះអម្ចាស់បានសុំអោយគេឌានធ្វើនូវអ្វីដែលគាត់ប្រហែលជាមិនយល់ទេ នៅពេលនោះ ។ តើមានអ្វីខ្លះបានបំផុសគំនិតដល់បងប្អូនអំពីរឿងរបស់គាត់ ? តើបងប្អូនមានអារម្មណ៏ថា រឿងនេះអាចផ្ដល់ពរជ័យដល់កុមារដែលបងប្អូនបង្រៀនយ៉ាងដូចម្ដេច ?
សកម្មភាពដែលអាចជ្រើសរើស
-
សូមឲ្យកុមារស្រមៃថា ពួកគេត្រូវការប្រមូលកងទ័ពរួមគ្នាដើម្បីទៅប្រយុទ្ធ ។ តើមានមនុស្សប៉ុន្មាននាក់ដែលពួកគេត្រូវការនៅក្នុងកងទ័ពរបស់ពួកគេ ? ដោយប្រើ ពួកចៅហ្វាយ ៧:៤–៧សូមអញ្ជើញកុមារឲ្យសម្ដែងនូវរបៀបដែលព្រះអម្ចាស់បានជួយដល់គេឌានឲ្យជ្រើសរើសកងទ័ពដែលនឹងរំដោះពួកអ៊ីស្រាអែលពីពួកម៉ាឌាន ។ ហេតុអ្វីបានជាព្រះអម្ចាស់ចង់ឲ្យកងទ័ពរបស់គេឌានមានចំនួនតិចយ៉ាងដូច្នេះ ? ( សូមមើល ពួកចៅហ្វាយ ៧:២ ) ។ ហេតុអ្វីបានជាការធ្វើតាមបញ្ជារបស់ព្រះអម្ចាស់ប្រហែលជាពិបាកសម្រាប់គេឌាន និងកងទ័ពរបស់គាត់ ? សូមឲ្យកុមារចែកចាយនូវបទពិសោធន៍នានា នៅពេលពួកគេរៀនទុកចិត្តលើព្រះអម្ចាស់ ទោះបីជាការធ្វើដូច្នោះវាពិបាកយ៉ាងណាក៏ដោយ ។
-
សូមអញ្ជើញកុមារឲ្យគូររូបភាពដាវ ខែល ត្រែ ចន្លុះ និងក្អម ។ សូមសួរកុមារថា តើវត្ថុទាំងនេះណាមួយដែល ពួកគេនឹងយកទៅជាមួយ ពួកគេទៅក្នុងសមរភូមិ ប្រយុទ្ធ ។ សូមអញ្ជើញពួកគេអាន ពួកចៅហ្វាយ ៧:១៦ ដើម្បីរៀនអំពីអ្វីដែលពលទ័ពរបស់គេឌានយក ទៅ ជាមួយពួកគេ ។ ហេតុអ្វីបានជាត្រូវមានភាពក្លាហានដើម្បីធ្វើ បែប នេះ ? សូមអានជាមួយ គ្នា ពួកចៅហ្វាយ ៧:១៩–២១ ដើម្បីរៀនពីរបៀបដែលពួកកងទ័ពប្រើត្រែ និងក្អម ដើម្បីកម្ចាត់ពួកម៉ាឌាន ។ តើយើងរៀនអ្វីខ្លះអំពីព្រះអម្ចាស់មកពីរឿងនេះ ?
សូមលើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារចែកចាយជាមួយនឹងសមាជិកគ្រួសារម្នាក់អំពីរឿងមួយដែលពួកគេបានរៀនថ្ងៃនេះ ដែលធ្វើឲ្យពួកគេចង់គោរពតាមបទបញ្ញត្តិទាំងឡាយ ។
ការកែលម្អការបង្រៀនរបស់យើង
កែសម្រួលសកម្មភាពឲ្យស្របទៅនឹងតម្រូវការ ។ សូមកុំចាត់ទុកគម្រោងមេរៀនទាំងនេះថា ជាការណែនាំដែលបងប្អូនត្រូវតែធ្វើតាមនោះទេ ។ ប៉ុន្ដែ សូមប្រើវាជាប្រភពនៃគំនិតបន្ថែមដើម្បីបណ្ដុះការបំផុសគំនិតផ្ទាល់ខ្លួនរបស់បងប្អូន កាលដែលបងប្អូនសញ្ជឹងគិតអំពីតម្រូវការរបស់កុមារដែលបងប្អូនបង្រៀន ។ ឧទាហរណ៍ នៅក្នុងករណីមួយចំនួនបងប្អូនអាចទទួលអារម្មណ៍បំផុសគំនិតឲ្យកែសម្រួលសកម្មភាពសម្រាប់កុមារតូចៗ ដើម្បីបង្រៀនកុមារធំៗ ឬកែសម្រួលសកម្មភាពសម្រាប់កុមារធំៗ ដើម្បីបង្រៀនកុមារតូចៗវិញ ។