Fakatātā hono fakahaaʻi ʻe ʻIlaisa ha saliote afi ki heʻene tamaioʻeikí, © Review & Herald Publishing/licensed mei he goodsalt.com

4–10 Siulai

2 Ngaahi Tuʻi 2–7

“ ʻOku Ai ha Palōfita ʻi ʻIsileli”

ʻOku fakataumuʻa e ngaahi ʻekitivitī ʻi he lēsoni ko ʻení ke fakatupu haʻo ngaahi fakakaukau pē ʻaʻau. Te ke lava ʻo maʻu ha ueʻi fakalaumālie ke feau e ngaahi fie maʻu ʻo e fānau ʻokú ke akoʻí ʻo fakafou ʻi ha ako ʻi he faʻa lotu.

Lekooti Hoʻo Ngaahi Ongó

Fakaafeʻi e Feʻinasiʻakí

Ke poupouʻi e fānaú ke vahevahe ʻa e meʻa ʻoku nau ʻilo fekauʻaki mo e palōfita ko ʻIlaisá, fakaafeʻi kinautolu ke tā ha fakatātā ʻo ha meʻa naʻá ne fai.

Akoʻi e Tokāteliné: Fānau Iiki Angé

2 Ngaahi Tuʻi 4–5

ʻE lava ke fakahoko ʻe he ʻOtuá ha ngaahi mana ʻi heʻeku moʻuí.

Naʻe tāpuekina ʻe he ʻEikí ha kakai tokolahi ʻi ha ngaahi founga fakaofo, ʻo fakafou ʻi he palōfita ko ʻIlaisá. Tokoni ki he fānaú ke nau ʻiloʻi e ngaahi mana ʻa e ʻEikí ʻi heʻenau moʻuí.

Ngaahi ʻEkitivitī ʻe Ala Fakahokó

• Vahevahe ha mana ʻe taha pe lahi ange ʻoku lekooti ʻi he 2 Ngaahi Tuʻi 4–5 (vakai, “Palōfita ko ʻIlaisá” Ngaahi Talanoa ʻi he Fuakava Motuʻá). Tuku ke vahevahe ʻe he fānaú e meʻa ʻoku nau saiʻia ai ʻi he ngaahi talanoa ko ʻení. Fakaafeʻi ke nau toe fetalanoaʻaki e ngaahi talanoá.

• Fakamoʻoni ʻe lava ke fakaʻaongaʻi ʻe he ʻEikí Hono mālohí ke fakahoko ha ngaahi meʻa maʻongoʻonga ke tokoniʻi kitautolu. ʻOku tau ui e ngaahi meʻá ni ko ha ngaahi mana. Vahevahe ʻa e founga kuo fakahā atu ai ʻe he ʻEikí ʻEne ʻofá kiate koe ʻi ha ngaahi founga ʻoku lalahi pe iiki. Hivaʻi fakataha ha foʻi hiva fekauʻaki mo e ʻofa ʻa e ʻOtuá, hangē ko e “ ʻOku ʻOfa ʻEku Tamai Hēvaní ʻIate Au” (Tohi Hiva ʻa e Fānaú, 16). Kole ki he fānaú ke nau vahevahe e founga ʻoku nau ʻilo ai ʻoku ʻofa e Tamai Hēvaní ʻiate kinautolú.

2 Ngaahi Tuʻi 5:1–15

Te u lava ʻo fili ke fai e ngaahi meʻa ʻoku fekauʻi mai ʻe he ʻOtuá ʻo fakafou ʻi Heʻene palōfitá.

Naʻe faingataʻa kia Neamani ke talangofua ʻi he taimi naʻe talaange ai ʻe he palōfita ko ʻIlaisá ʻa e founga ke fakamoʻui ai ia mei he kiliá. Fakalaulauloto ki he founga te ke lava ai ʻo tokoniʻi e fānaú ke mahino e ngaahi tāpuaki ʻoku maʻu mei he talangofuá.

Ngaahi ʻEkitivitī ʻe Ala Fakahokó

• Fakahoko e talanoa ʻo Neamaní (vakai, 2 Ngaahi Tuʻi 5:9–14; “Ko Hono Fakamoʻui ʻe ʻIlaisa ʻa Neamaní” ʻi he Ngaahi Talanoa ʻo e Fuakava Motuʻá; vakai foki, fakatātā ʻo Neamani ʻi he lēsoni ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Fakamamafaʻi ange ʻi he kamataʻangá, ne ʻikai fie kaukau ʻa Neamani ʻi he Vaitafe Soataní, neongo ne talaange ʻe ʻIlaisa ʻe moʻui ai hono fokoutuá. Talanoa fekauʻaki mo ha taimi ne ʻikai ke ke fakapapauʻi ai ʻokú ke fie fakahoko e meʻa ʻoku totonú, pea tokoni ki he fānaú ke nau fakakaukau ki ha ngaahi sīpinga pē ʻanautolu. Vahevahe leva e founga naʻe tāpuekina ai ʻa Neamani ʻi heʻene fakahoko ʻa e fili totonú.

• Lau ki he fānaú ʻa e 2 Ngaahi Tuʻi 5:13 pea fakamatalaʻi ange naʻe tokoni e tamaioʻeiki ʻa Neamaní kiate ia ke talangofua ki he palōfita ko ʻIlaisá. Tokoni ki he fānaú ke nau fakakaukau ki ha ngaahi founga ʻe lava ke nau tokoniʻi ai honau ngaahi kaungāmeʻá pe kau mēmipa honau fāmilí ke fanongo mo talangofua ki he palōfitá.

2 Ngaahi Tuʻi 6:8–17

ʻOku tokangaʻi au ʻe he ʻEikí.

ʻI he mamata e tamaioʻeiki ʻa ʻIlaisá ki hono takatakaiʻi kinautolu ʻe he kau tau ʻo Sīliá, naʻá ne manavahē ʻaupito. Ka neongo ia, ne talaange ʻe ʻIlaisa ke “ ʻoua naʻá [ne] manavahē” koeʻuhí naʻe ʻiate kinautolu ʻa e ʻEikí (2 Ngaahi Tuʻi 6:16).

Ngaahi ʻEkitivitī ʻe Ala Fakahokó

• Lau ki he fānaú ʻa e 2 Ngaahi Tuʻi 6:15 pe fakamatalaʻi ia ʻi he lea pē ʻaʻau ke lava ʻo mahino kiate kinautolu. Fakaafeʻi e fānaú ke nau fakakaukauloto ʻoku takatakaiʻi kinautolu ʻe ha kau tau tokolahi mo ha fanga hoosi mo ha ngaahi saliote, ʻo hangē ko e tamaioʻeiki ʻa ʻIlaisá. Te nau ongoʻi fēfē? Ko e hā te nau ala fakahokó? Kole ange ke nau kuikui ka ke lau kiate kinautolu ʻa e 2 Ngaahi Tuʻi 6:16–17. ʻI hoʻo aʻu ki he kupuʻi lea “fakaʻā ʻa hono matá,” kole ki he fānaú ke nau ʻāʻā hake. Fakamatalaʻi ange ʻa e meʻa ne mamata ki ai e tamaioʻeikí ʻa ia naʻá ne maluʻi ia mo ʻIlaisá. Vahevahe e founga ʻokú ke ʻilo ai ʻoku tokangaʻi kitautolu ʻe he ʻEikí.

• Hivaʻi fakataha ha foʻi hiva fekauʻaki mo e tokangaʻi kitautolu ʻe he ʻOtuá, hangē ko e ʻuluaki veesi ʻo e“ ʻE Fānau ko e ʻOtua ē” (Ngaahi Himí, fika 190). Fetongi e ngaahi lea ʻi he hivá ʻaki ha ngaahi hingoa ʻo e fānaú ke fakamamafaʻi ʻoku tokangaʻi kinautolu ʻe he ʻOtuá.

Akoʻi e Tokāteliné: Fānau Lalahi Angé

2 Ngaahi Tuʻi 4–5

ʻE lava ke fakahoko ʻe he ʻOtuá ha ngaahi mana ʻi heʻeku moʻuí.

Lolotonga e ngāue fakafaifekau ʻa ʻIlaisá, naʻá ne fakamoʻui mo tāpuakiʻi ha kakai tokolahi. ʻE tokoni fēfē e ngaahi mana ʻi he 2 Ngaahi Tuʻi 4–5 ki he fānaú ke nau ʻilo e toʻu kupu ʻo e Tamai Hēvaní ʻi heʻenau moʻuí?

Ngaahi ʻEkitivitī ʻe Ala Fakahokó

• Fakaafeʻi e fānaú ke nau hiki ʻi he palakipoé e lahi taha ʻo e ngaahi mana te nau lava ʻo manatuʻi mei he ngaahi folofolá. Fakaafeʻi leva ke nau toe vakaiʻi ʻa e 2 Ngaahi Tuʻi 4–5 pea tānaki ki heʻenau lisí (vakai, 2 Ngaahi Tuʻi 4:1–7, 14–17, 32–35, 38–41, 42–44; 5:10–14). Ko e hā ʻoku akoʻi ʻe he ngaahi mana ko ʻení fekauʻaki mo e ongo ʻoku maʻu ʻe he Tamai Hēvaní kiate kitautolú?

• Kole ki he fānaú ke nau talanoa fekauʻaki mo e ʻuhinga ʻo e maná. Kapau ʻoku nau fie maʻu tokoni, ʻe lava ke nau toe vakaiʻi ʻa e “Maná” ʻi he Fakahinohino ki he Ngaahi Folofolá (scriptures.ChurchofJesusChrist.org). Fakaafeʻi ke nau vahevahe ha ngaahi mana ʻe niʻihi naʻe fakahoko ʻe Sīsū. Talanoa fekauʻaki mo e founga kuó ke mamata ai ki he mālohi ʻo e ʻOtuá ʻi hoʻo moʻuí. ʻE lava ke ke fakakau ai e ngaahi mana fakaʻaho hangē ko e ngaahi ongo ʻo e melinó, ko e meʻafoaki ʻo e moʻui fakaʻahó, pe tokoni ʻi ha ngaahi ngāue fakaʻaho. Fakaafeʻi e fānaú ke nau talanoa ki he ngaahi mana lalahi mo iiki ʻi heʻenau moʻuí.

2 Ngaahi Tuʻi 5:1–15

Te u lava ʻo fili ke faivelenga, loto-fakatōkilalo mo talangofua.

Naʻe loto ʻa Neamani ke fakamoʻui ia mei he kiliá, ka ne ʻikai ke ne ʻamanaki ki he fakahinohino faingofua ne ʻoange ʻe ʻIlaisá: “ ʻAlu ʻo kaukau ʻi Soatani ke liunga fitu” (2 Ngaahi Tuʻi 5:10). Fakakaukau ki he founga te ke lava ai ʻo fakaʻaongaʻi e talanoá ni ke akoʻi e fānaú fekauʻaki mo e tui kia Sīsū Kalaisí, loto-fakatōkilaló mo e talangofuá.

Ngaahi ʻEkitivitī ʻe Ala Fakahokó

• Hiki ʻi he palakipoé ʻa e tuí, loto-fakatōkilaló, mo e talangofuá pea ʻeke ki he fānaú e ʻuhinga ʻo e ngaahi leá ni (vakai, Tuʻu Maʻu ʻi he Tuí, 195–98, 106–07, 185–86). Fakaafeʻi e fānaú ke lau ʻa e 2 Ngaahi Tuʻi 5:9–14.   Naʻe fakahaaʻi fēfē ʻe Neamani ʻa e tuí, loto-fakatōkilaló mo e talangofua ki he ʻEikí? Ko e hā ʻoku mahuʻinga ai ke tau maʻu e ngaahi ʻulungaanga ko ʻení?

• Kole ki he fānaú ke nau talaatu ha taimi naʻe tokoniʻi ai kinautolu ʻe ha kaungāmeʻa ke fili ʻa e totonú. Vahevahe foki haʻo aʻusia pē ʻaʻau. Lau fakataha ʻa e 2 Ngaahi Tuʻi 5:10–13 ke ako e founga naʻe tokoniʻi ai ʻe he tamaioʻeiki ʻa Neamaní ia ke fili ke talangofua ki he palōfitá. Ko e hā te tau lava ʻo fai ke fetokoniʻaki ke muimui ʻi hotau palōfita he ʻaho ní?

• Fakaafeʻi e fānaú ke fakakakato ʻa e peesi ʻekitivitií pea vahevahe mo ha mēmipa ʻo e fāmilí pe kaungāmeʻa ha meʻa ne nau ako mei he talanoa ʻo Neamani ʻi he 2 Ngaahi Tuʻi 5:1–15.

2 Ngaahi Tuʻi 6:8–17

ʻOku ʻikai ke u tuenoa.

ʻE ala ongoʻi ʻe he fānau ʻokú ke akoʻi ʻi ha taimi ʻe niiʻhi ʻo hangē ko e tamaioʻeiki ʻa ʻIlaisá—ʻo ʻikai fakapapauʻi e founga ke fakafepakiʻi e ngaahi faingataʻa ʻi muʻa ʻiate kinautolú. ʻE lava ke ke fakaʻaongaʻi e talanoa ʻi he 2 Ngaahi Tuʻi 6:8–17 ke akoʻi kinautolu ke “ ʻoua naʻa [nau] manavahē” koeʻuhí ʻoku teʻeki siʻaki kinautolu ʻe he ʻEikí ke tuenoa.

Ngaahi ʻEkitivitī ʻe Ala Fakahokó

• Lau fakataha ʻa e 2 Ngaahi Tuʻi 6:15–17. Fakaafeʻi ha taha ʻo e fānaú ke pehē pē ko e tamaioʻeiki ia ʻa ʻIlaisá kae fakafehuʻi ʻe he fānau kehé ʻene aʻusiá, hangē ko e meʻa naʻá ne ongo ʻi he taimi naʻe takatakaiʻi ai ʻe he kau tau Sīliá e koló pe naʻe fēfē nai ʻene mamata ki he kau tau ʻa e ʻOtuá. Talanoa mo e fānaú fekauʻaki mo ha ngaahi taimi ʻoku nau ongoʻi tuenoa ai ʻi he feinga ke moʻui ʻaki e ongoongoleleí. ʻOku tokoniʻi fēfē nai kitautolu ʻe he ʻEikí ke tau ʻilo ʻoku ʻikai ke tau tuenoá?

• Hivaʻi ha foʻi hiva fekauʻaki mo e falala ki he ʻEikí, hangē “Ko e Tui Mateakí” (Ngaahi Himí, fika 62). Ko e hā ʻoku akoʻi mai ʻe he foʻi hivá ni fekauʻaki mo e falala ki he ʻEikí?

Poupouʻi e Ako ʻi ʻApí

Fakaafeʻi e fānaú ke nau vahevahe ha ngaahi aʻusia mo honau fāmilí ʻi ha taimi ne nau fakatokangaʻi ai e toʻukupu ʻo e ʻOtuá ʻi heʻenau moʻuí. Poupouʻi ke nau kole ki he kau mēmipa honau fāmilí ke nau vahevahe ha ngaahi aʻusia tatau.

Fakatupulaki ʻEtau Founga Akoʻí

ʻOku ako ʻa e fānaú ʻi ha ngaahi founga kehekehe. “ ʻE ʻaonga lelei taha ange hoʻo feinga ke akoʻi e fānaú ʻi hoʻo fakaʻaongaʻi ha ngaahi founga fakafaiako kehekehe,” ʻo kau ai ʻa e ngaahi talanoá, ngaahi fakatātā, mo e hivá (Ko e Faiako ʻi he Founga ʻa e Fakamoʻuí,26