ʻĒseta, tā fakatātaaʻi ʻe James Johnson

25–31 Siulai

ʻĒseta

“Naʻa Kuó Ke Hoko [Mai] Ai … Koeʻuhí ko ha Kuonga Peheni”

ʻOku fakamoʻoni e folofola kotoa pē kia Sīsū Kalaisi. Fakalaulauloto ki he founga te ke tokoniʻi ai e fānaú ke nau ʻiloʻi e takiekina ʻa e Fakamoʻuí ʻi he talanoa ʻo ʻĒsetá.

Lekooti Hoʻo Ngaahi Ongó

Fakaafeʻi e Feʻinasiʻakí

Paasi takai ha fakatātā ʻo ʻĒseta (vakai, lēsoni ʻo e uike ní ʻi he haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). ʻI hono puke ʻe he fānaú e fakatātaá, fakaafeʻi ke nau vahevahe ha meʻa ʻoku nau ʻilo fekauʻaki mo e talanoa ʻo ʻĒsetá.

Akoʻi e Tokāteliné: Fānau Iiki Angé

ʻĒseta 2:5–7

Te u lava ʻo tokoniʻi hoku fāmilí.

ʻI he taimi ne mālōlō ai e ongomātuʻa ʻa ʻĒsetá, ne tokangaʻi ia ʻe hono kāinga ko Motekiaí. ʻE lava ke ke fakaʻaongaʻi ʻena aʻusiá ko ha faingamālie ke talanoa fekauʻaki mo e tokoni ki he kau mēmipa hotau ngaahi fāmilí.

Ngaahi ʻEkitivitī ʻe Ala Fakahokó

• Tā ʻi he palakipoé ha niʻihi ʻoku nau fakafofongaʻi ʻa ʻĒseta, ko ʻene ongomātuʻá, mo hono kāinga ko Motekiaí. Fakamatalaʻi ange ne mālōlō e ongomātuʻa ʻa ʻĒsetá, ko ia ne fie maʻu ai ʻe ʻĒseta ha tokotaha ke tauhi ia. Lau ki he fānaú ʻa e ʻĒseta 2:7 pea kole ki he fānaú ke fakafanongo ki he meʻa ne fai ʻe Motekiaí. Tokoni ki he fānaú ke fakakaukau ki he ngaahi fie maʻu ʻe ala maʻu ʻe he kau mēmipa honau fāmilí ʻe lava ke tokoni ai e fānaú.

• Fakaafeʻi ha fānau ʻe niʻihi ke nau fakatātaaʻi ha meʻa lelei ʻe lava ke nau fai ke tokoni ki ha tokotaha ʻi honau fāmilí, pea kole ki he fānau kehé ke nau mateʻi e meʻa ʻoku nau faí. Fakaafeʻi ke nau talanoa fekauʻaki mo e ngaahi meʻa ʻoku nau fai ke tāpuekina ai honau ngaahi fāmilí, pea fakamatala fekauʻaki mo ha niʻihi ʻo e ngaahi meʻa ʻokú ke faí.

• Hivaʻi ha foʻi hiva fekauʻaki mo hono tokoniʻi hotau ngaahi fāmilí, hangē ko e “ ʻI Heʻetau Tokoní” (Tohi Hiva ʻa e Fānaú, 108). Vahevahe hoʻo fakamoʻoní ki hono maʻu ʻetau fiefiá ʻi heʻetau tokoni ki hotau ngaahi fāmilí.

ʻĒseta 4:15–16

Te u lava ʻo loto-toʻa.

ʻE fehangahangai e fānau okú ke akoʻí mo ha ngaahi tūkunga te nau fie maʻu ai e tokoni ʻa e ʻEikí ke nau loto-toʻa. Te ke tokoni fēfē nai kiate kinautolu ke nau ako mei he sīpinga ʻo e loto-toʻa ʻa ʻĒsetá?

Ngaahi ʻEkitivitī ʻe Ala Fakahokó

• ʻOku ʻilo nai ʻe he fānau ʻokú ke akoʻí e ʻuhinga ʻo e loto-toʻá? Vahevahe ha kiʻi fakaʻuhinga nounou hangē ko e “ ʻOku ʻuhinga ʻa e loto-toʻá ki hono fakahoko ʻo e meʻa totonú ʻo aʻu ki he taimi ʻokú ke manavahē aí.” Vahevahe e talanoa ʻo ʻĒsetá (vakai, “ ʻĒseta” ʻi he Ngaahi Talanoa mei he Fuakava Motuʻá), pea tokoni ki he fānaú ke nau ʻilo e founga ne loto-toʻa ai ʻa ʻĒsetá. Tuku ke fakaʻaongaʻi ʻe he fānaú e ngaahi fakatātā ʻi he peesi ʻekitivitī ʻo e uike ní ki hono toe fakahoko e talanoá.

• Fakaʻaliʻali e fakatātā ʻo ʻĒsetá (vakai ki he lēsoni ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Hivaʻi mo e fānaú ha foʻi hiva fekauʻaki mo e loto-toʻá, hangē ko e “Te u Loto-toʻa” (Tohi Hiva ʻa e Fānaú, 85). Fakamahinoʻi ange ha ngaahi foʻi lea mo ha ngaahi kupuʻi lea ʻi he foʻi hiva ko iá ʻokú ne fakamatalaʻi ʻa ʻĒseta, pea fakamoʻoni ʻe lava ke tokoniʻi ʻe he Fakamoʻuí e fānaú ke nau loto-toʻa.

• Talanoa ki he fānaú ʻo kau ki ha taimi ne loto-toʻa ai ʻa Sīsū Kalaisi; hangē ko ʻení, ko e taimi ne mamahi ai koeʻuhí ko ʻetau ngaahi angahalá, ʻi Ketisemani pea mo e kolosí fakatouʻosi (vakai, Mātiu 26:36–39; 27:33–35). Kole ki he fānaú ke nau fakamatala fekauʻaki mo ha taimi ne nau loto-toʻa ai (ʻe lava ke ke tomuʻa fetuʻutaki ki honau ngaahi fāmilí ʻo kole ange ha ngaahi sīpinga ʻe niʻhi). Ko e hā naʻá ne tokoniʻi ke nau loto-toʻá? Fakamatala ki he fānaú e founga kuo tokoniʻi ai koe ʻe he ʻEikí ke ke loto-toʻa ʻi ha taimi naʻá ke ilifia ai.

  

  ʻĒseta ʻi he ʻao ʻo e Tuʻí, tā ʻe Minerva K. Teichert

Akoʻi e Tokāteliné: Fānau Lalahi Angé

ʻĒseta 4:14

Te u lava ʻo hoko ko ha meʻangāue ʻi he toʻukupu ʻo e ʻOtuá.

ʻI he taimi ne manavasiʻi ai ʻa ʻĒsetá, ne poupouʻi ia ʻe Motekiai ʻaki ʻene akoʻi ange mahalo naʻe ʻomi ia ʻe he ʻEikí ke hoko ko ha kuiní koeʻuhí “ko ha kuonga peheni” (ʻĒseta 4:14). Fakalaulauloto ki he founga ʻoku teuteu ai ʻe he ʻEikí e fānau ʻokú ke akoʻí ki honau ngaahi faingamālie ke tāpuekina e niʻihi kehé.

Ngaahi ʻEkitivitī ʻe Ala Fakahokó

• Fakaafeʻi ha taha ke ne tā ha foʻi hiva maʻá e fānaú ʻi ha meʻalea, pe fakaʻaliʻali ha fakatātā ʻo ha taha ʻokú ne tā ha meʻalea. Talanoa fekauʻaki mo e ʻuhinga ʻo e hoko ko ha meʻangāue ʻi he toʻukupu ʻo e ʻOtuá. Toe vakaiʻi mo e fānaú e talanoa ʻo ʻĒsetá (vakai, “ ʻĒseta” ʻi he Ngaahi Talanoa mei he Fuakava Motuʻá), pea fakaafeʻi ke nau talanoa fekauʻaki mo e founga ne hoko ai ʻa ʻĒseta ko ha meʻangāue maʻá e ʻEikí ke fakahoko ʻEne ngaahi taumuʻá. Te tau hoko fēfē ko ha ngaahi meʻangāue maʻá e ʻEikí?

• Hili hono toe vakaiʻi e talanoa ʻo ʻĒsetá, fakapipiki ʻi he tuʻa ʻo e fānau takitaha ha kaati ʻoku hiki ai e hingoa ʻo ha taha ʻo kinautolu he talanoá. Fakaafeʻi e fānaú ke nau feinga ke ʻilo pe ko e hingoa ʻo hai ʻi honau tuʻá ʻaki hono ʻeke ki he fānau kehé ha ngaahi fehuʻi hangē ko e “Naʻe māʻoniʻoni nai ʻa e tokotaha ko ʻení?” pe “Ko ha fefine nai ʻa e tokotaha ko ʻení?” Hili iá pea aleaʻi e founga naʻe hoko ai ʻa Motekiai mo ʻĒseta ko ha meʻangāue maʻá e ʻEikí ke fakahaofi e kakai Siú.

ʻĒseta 3:1–11; 4:10–17

ʻOku tokoni mai e Tamai Hēvaní ke u maʻu ha loto-toʻa ʻi he taimi ʻoku ou manavasiʻi aí.

Ko e fē ha taimi kuó ke sio ai ki ha loto-toʻa ʻa e fānau ʻokú ke akoʻí? Ko e hā ha ngaahi aʻusia te ke lava ʻo vahevahe ʻi ha taimi naʻá ke fie maʻu ai e tokoni ʻa e ʻEikí ke ke loto-toʻa?

Ngaahi ʻEkitivitī ʻe Ala Fakahokó

• Hiki ʻi he palakipoé ʻa e Naʻe fakahaaʻi ʻe Motekiai ʻene loto-toʻá ʻaki … mo e Naʻe fakahaaʻi ʻe ʻĒseta ʻene loto-toʻá ʻaki … Fakaafeʻi ha niʻihi ʻo e fānaú ke lau ʻa e ʻĒseta 3:1–11 mo e niʻih kehé ke lau ʻa e ʻĒseta 4:10–17. Kole ange ke nau fakaʻaongaʻi e meʻa ne nau laú ke fakakakato e ngaahi sētesi ʻi he palakipoé. Hili iá pea hiki ʻa e Te u fakahaaʻi ʻeku loto-toʻá ʻaki … pea fakaafeʻi e fānaú ke nau lisi e ngaahi meʻa ʻoku finangalo e Tamai Hēvaní ke nau fakahoko ʻa ia ʻe fie maʻu ai ke nau loto-toʻá. Te tau lava fēfē ʻo hangē ko Motekiai mo ʻĒsetá?

• Fakaafeʻi e fānaú ke nau fakakaukau ki ha ngaahi tūkunga ʻoku nau fehangahangai mo ia ʻe ala faingataʻa ai ke nau fakahoko e meʻa ʻoku totonú. Hiki ʻi he palakipoé e ngaahi lea loto-toʻa ʻa ʻĒsetá “Pea ko ia te u hū ai ki he tuʻí, … pea kapau te u mate ai, te u mate pē” (ʻĒseta 4:16). Tokoni ke fakaʻaongaʻi ʻe he fānaú e ngaahi lea ʻa ʻĒsetá kiate kinautolu pē ʻaki hono fetongi e “te u hū ai ki he tuʻí” ʻaki ha fili māʻoniʻoni kae faingataʻa ʻe ala fie maʻu ke nau fakahoko. Fakaafeʻi leva ke nau fetongi ʻa e “maté” ʻaki ha meʻa taʻe-fakafiemālie ʻe ala hoko mei hono fakahoko ʻo e meʻa totonú. Ko e hā ʻoku lelei ange ai ke fakahoko e meʻa totonú, neongo ʻoku ʻi ai ha ngaahi nunuʻa faingataʻa?

•    

ʻĒseta 4:1–3, 10–17

ʻE lava ke tokonia au ʻe he ʻaukaí mo tāpuekina e niʻihi kehé.

Naʻe ʻaukai ʻa ʻĒseta mo e kakai Siú lolotonga ha taimi faingataʻa. Te ke tokoni fēfē nai ki he fānau ʻokú ke akoʻí ke mahino kiate kinautolu e ngaahi tāpuaki fakalaumālie ʻo e ʻaukaí?

Ngaahi ʻEkitivitī ʻe Ala Fakahokó

• Fakaafeʻi e fānaú ke nau lisi e ngaahi meʻa te nau lava ʻo ʻaukai ki aí (kapau ʻe fie maʻu, ʻe lava ke nau vakai ki he “ʻAukaí mo e Ngaahi Foaki ʻAukaí” ʻi he Tuʻu Maʻu ʻi he Tuí, 218-20). Kole ange leva ke nau lau ʻa e ʻĒseta 4:1–3, 10–17 ke ʻiloʻi e ʻuhinga ne ʻaukai ai e kakai Siú mo ʻĒsetá. Poupouʻi e fānaú ke fakakaukau ki ha ʻuhinga te nau ala fie maʻu ai ha tokoni makehe mei he ʻEikí, pea fokotuʻu ange ke nau fakakau e ʻuhinga ko iá ʻi heʻenau ʻaukaí he Sāpate ʻaukai hokó.

• Fakaafeʻi e fānaú ke pehē pē ʻoku nau fakamatalaʻi ki ha kaungāmeʻa ʻa e ʻuhinga ʻoku nau ʻaukai aí. Ko e hā e meʻa te nau ala lea ʻaki? Mou vakai ki he Fakahinohino ki he Ngaahi Folofolá, “ ʻAukaí” (scriptures.ChurchofJesusChrist.org) ʻo ka nau ka fie maʻu tokoni. Vahevahe ha aʻusia ʻo ha taimi naʻá ke ʻaukai ai ke maʻu e tokoni ʻa e ʻEikí. Fakaafeʻi e fānaú ke vahevahe ha ngaahi aʻusia kuo nau maʻu ʻi he ʻaukaí.

Poupouʻi e Ako ʻi ʻApí

Hivaʻi fakataha ha foʻi hiva fekauʻaki mo ha tefitoʻi moʻoni naʻá ke ako he kalasí he ʻahó ni (vakai ki he fakahokohoko ʻo e ngaahi tefitó ʻi he Tohi Hiva ʻa e Fānaú ki ha ngaahi fakakaukau). Fakaafeʻi e fānaú ke nau hivaʻi ha foʻi hiva mo honau ngaahi fāmilí.

Fakatupulaki ʻEtau Founga Akoʻí

Moʻui ʻaki ʻa e meʻa ʻokú ke akoʻí. ʻE toe mālohi ange hoʻo faiakó ʻo kapau te ke lava ʻo fakamoʻoni mei ha aʻusia fakataautaha fekauʻaki mo e ngaahi tāpuaki ʻo hono moʻui ʻaki e ongoongoleleí. ʻI hoʻo fili ha ngaahi tefitoʻi moʻoni ke akoʻi ki he fānaú, fakalaulauloto ki he founga te ke lava ʻo moʻui kakato ange ʻaki e ngaahi tefitoʻi moʻoni ko iá. (Vakai, Faiako ʻi he Founga ‘a e Fakamo‘uí, 13–14.)