« ថ្ងៃទី ៨–១៤ ខែ សីហា ។ ទំនុកដំកើង ១–២; ៨; ១៩–៣៣; ៤០; ៤៦ ៖ ‹ ព្រះយេហូវ៉ាទ្រង់ជាអ្នកគង្វាលខ្ញុំ › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )

« ថ្ងៃទី ៨–១៤ ខែ សីហា ។ ទំនុកដំកើង ១–២; ៨; ១៩–៣៣; ៤០; ៤៦ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២២

ព្រះអម្ចាស់ជាអ្នកគង្វាលខ្ញុំ ដោយ យង់សុង គិម havenlight.com

ថ្ងៃទី ៨–១៤ ខែ សីហា

ទំនុកដំកើង ១–២; ៨; ១៩–៣៣; ៤០; ៤៦

« ព្រះយេហូវ៉ាទ្រង់ជាអ្នកគង្វាលខ្ញុំ »

គម្រោងមេរៀននេះបង្ហាញពីបទគម្ពីរដ៏ពិរោះមួយចំនួននៅក្នុង ទំនុកដំកើង ដែលនឹងផ្ដល់ពរជ័យដល់កុមារ ប៉ុន្តែសូមកុំមានអារម្មណ៍ថាវាមានដែនកំណត់អី ។ ចូរធ្វើតាមការដឹកនាំពីព្រះវិញ្ញាណ ។

កត់ត្រាចំណាប់អារម្មណ៍របស់បងប្អូន

អញ្ជើញឲ្យចែកចាយ

នៅពីរបីថ្ងៃមុន សូមអញ្ជើញកុមារពីរបីនាក់ឲ្យនាំយកគំនូរមកថ្នាក់រៀន ដែលតំណាងឲ្យអ្វីដែលពួកគេ និងគ្រួសាររបស់ពួកគេបានអាននៅក្នុង ទំនុកដំកើង នៅសប្តាហ៍នេះ ដូចជា អ្នកគង្វាល ( សូមមើល ទំនុកដំកើង ២៣:១ ) ពែងមួយ( សូមមើល ទំនុកដំកើង ២៣:៥ ) ឬរូបបេះដូងមួយ ( សូមមើល ទំនុកដំកើង ២៤:៤ ) ។ សូមអញ្ជើញពួកគេឲ្យនិយាយអំពីគំនូររបស់ពួកគេ និងខមួយមកពី ទំនុកដំកើង ដែលរៀបរាប់អំពីរបស់ទាំងនោះ ។

បង្រៀនគោលលទ្ធិ ៖ កុមារតូចៗ

ទំនុកដំកើង ១៩:១; ៣៣:៥

« ផ្ទៃមេឃសម្ដែងពីសិរីល្អនៃព្រះ » ។

ទំនុកដំកើង ១៩ និង៣៣ បង្រៀនយើងថា យើងអាចរកឃើញភស្ដុតាងនៃសិរីរុងរឿង និងសេចក្តីល្អរបស់ព្រះដែលនៅជុំវិញយើង នៅក្នុងការបង្កបង្កើតដ៏ស្រស់ស្អាតរបស់ទ្រង់ ។ សូមជួយកុមារឲ្យរៀនមើលឃើញព្រះហស្តរបស់ព្រះ នៅក្នុងពិភពលោកជុំវិញពួកគេ ។

សកម្មភាពដែលអាចជ្រើសរើស

សូមបង្ហាញកុមារនូវរូបភាពដ៏ស្រស់ស្អាតមួយចំនួនដែលព្រះបានបង្កើត ឬមើលចេញទៅក្រៅបង្អួចរួមគ្នាដើម្បីរកមើលរបស់ទាំងនេះ ។ សូមសួរកុមារនូវអ្វីដែលពួកគេចូលចិត្តអំពីការបង្កបង្កើតរបស់ព្រះវរបិតាសួគ៌ ។ សូមអាន ទំនុកដំកើង ១៩:១ ឬ ៣៣:៥ហើយសួរកុមារថាតើពួកគេមានអារម្មណ៍យ៉ាងណាចំពោះព្រះវរបិតាសួគ៌ នៅពេលពួកគេឃើញការបង្កបង្កើតរបស់ទ្រង់ ។
សូមច្រៀងចម្រៀងមួយបទជាមួយគ្នាអំពីការបង្កបង្កើតរបស់ទ្រង់ ដូចជា « លោកិយគួរឲ្យស្រឡាញ់ » ( សៀវភៅចម្រៀងកុមារទំព័រ ១២៣ ) ។ សូមអញ្ជើញកុមារឲ្យជ្រើសរើសអ្វីមួយដែលព្រះបានបង្កើត ( ដូចជាអ្វីមួយដែលបានរៀបរាប់នៅក្នុងបទចម្រៀង ) ហើយគូររូបភាពរបស់វា ដើម្បីចែកចាយជាមួយក្រុមគ្រួសាររបស់ពួកគេ ។

ទំនុកដំកើង ២៣

« ព្រះយេហូវ៉ាទ្រង់ជាអ្នកគង្វាលខ្ញុំ » ។

ប្រសិនបើកុមារអាចរៀនតាំងពីក្មេងថា ព្រះអម្ចាស់ជាអ្នកគង្វាលរបស់ពួកគេ នោះពួកគេនឹងងាយដើរតាមទ្រង់ « ទៅតាមផ្លូវសុចរិត » ។

សកម្មភាពដែលអាចជ្រើសរើស

សូមផ្តល់ឲ្យកុមារម្នាក់ៗនូវទំព័រសកម្មភាពនៃសប្តាហ៍នេះ ឬផ្តល់ឲ្យពួកគេម្នាក់ៗនូវរូបភាពអំពីទំព័រសកម្មភាព ។ សូមអញ្ជើញឲ្យកុមារស្តាប់ ពេលបងប្អូនអាន ទំនុកដំកើង ២៣ ។ សុំឲ្យពួកគេចង្អុល ឬលើករូបភាពមួយឡើង នៅពេលពួកគេឮវាបានរៀបរាប់នៅក្នុងទំនុកដំកើង ។ សូមថ្លែងទីបន្ទាល់របស់បងប្អូនថា ព្រះយេស៊ូវការពារយើង ដូចជាអ្នកគង្វាលការពារចៀមរបស់គាត់ដែរ ។
សូមប្រាប់ដល់កុមារអំពីរបៀបដែលបងប្អូនដឹងថា ព្រះអង្គសង្គ្រោះស្រឡាញ់បងប្អូន ។ សូមអញ្ជើញឲ្យកុមារក្រោកឈរម្តងម្នាក់ៗ និងចែកចាយនូវរបៀបដែលពួកគេដឹងថាព្រះយេស៊ូវស្រឡាញ់ពួកគេ ។ សូមច្រៀងជាមួយគ្នានូវចម្រៀងមួយបទដែលអាចផ្តល់ជាគំនិតដល់ពួកគេ ដូចជាបទ « ខ្ញុំស្គាល់ក្តីស្នេហ៍ព្រះសង្គ្រោះ » ( សៀវភៅចម្រៀងកុមារ ទំព័រ ៤២–៤៣ ) ។

ទំនុកដំកើង ៣០:៥

ព្រះយេស៊ូវគ្រីស្ទអាចបង្វែរភាពទុក្ខព្រួយទៅជាសេចក្តីអំណរ ។

សូមពិចារណាអំពីរបៀបដែលបងប្អូននឹងជួយកុមារទទួលបានទីបន្ទាល់ផ្ទាល់ខ្លួនរបស់ពួកគេ អំពីអំណរដែលព្រះយេស៊ូវគ្រីស្ទបានផ្តល់ដល់យើងនៅពេលយើងសោកសៅ ។

សកម្មភាពដែលអាចជ្រើសរើស

សូមអញ្ជើញកុមារឲ្យធ្វើសម្តែងជាយំនៅពេលបងប្អូនអាន ទំនុកដំកើង ៣០:៥« ទឹកភ្នែកនឹងមាននៅជាប់អស់មួយយប់ក៏បាន » ។ បន្ទាប់មកសុំឲ្យពួកគេរីករាយ នៅពេលបងប្អូនអាន « តែព្រឹកឡើង គង់នឹងមានសេចក្តីអំណរឡើងដែរ » ។ សូមអានឃ្លានេះពីរបីដង ហើយថ្លែងទីបន្ទាល់ដល់កុមារថា ដោយសារតែព្រះយេស៊ូវគ្រីស្ទ ភាពទុក្ខព្រួយដែលយើងមាននៅក្នុងជីវិតនេះអាចត្រូវបានជំនួសដោយសេចក្តីអំណរ ។
សូមបង្ហាញរូបភាពរបស់ព្រះអង្គសង្រ្គោះ ហើយប្រាប់ក្មេងៗអំពីរឿងខ្លះៗដែលទ្រង់បានធ្វើសម្រាប់បងប្អូន ដែលនាំឲ្យបងប្អូនមានអំណរ ។ សូមដាក់វេនឲ្យកុមារម្នាក់ៗកាន់រូបភាព ហើយចែកចាយនូវអ្វីដែលព្រះយេស៊ូវបានធ្វើដែលនាំឲ្យពួកគេមានអំណរ ។

បង្រៀនគោលលទ្ធិ ៖ កុមារធំៗ

ទំនុកដំកើង ២៣; ២៧–២៨; ៣២; ៤៦

ព្រះអម្ចាស់ផ្ដល់ឲ្យខ្ញុំនូវសន្តិភាព កម្លាំង និងការណែនាំ ។

ទំនុកដំកើង ជាច្រើនថ្លែងទីបន្ទាល់ពីពរជ័យរបស់ព្រះអម្ចាស់នៅក្នុងជីវិតរបស់យើង ។ អ្នកអាចប្រើ ទំនុកដំកើង ដើម្បីជួយកុមារឲ្យរៀនទុកចិត្តទៅលើទ្រង់ ហើយងាកមករកទ្រង់ ។

សកម្មភាពដែលអាចជ្រើសរើស

សូមសរសេរនៅលើក្តារខៀន ព្រះអម្ចាស់គឺជា ។ សូមឲ្យកុមារជ្រើសរើសខគម្ពីរមួយ ឬច្រើនពីខាងក្រោមនេះដើម្បីអាន ៖ ទំនុកដំកើង ២៣:១; ២៧:១; ២៨:១; ២៨:៧; ៣២:៧; ៤៦:១ ។ សុំឲ្យពួកគេបំពេញប្រយោគនៅលើក្ដារខៀន ដោយប្រើអ្វីដែលពួកគេរៀនមកពីព្រះគម្ពីររបស់ពួកគេ ។ សូមជួយកុមារពិភាក្សាថាតើនិមិត្តសញ្ញាទាំងនេះបង្រៀនយើងអ្វីខ្លះអំពីព្រះអម្ចាស់ ។
សូមបង្ហាញកុមារនូវរូបភាពរបស់សត្វចៀម ។ សុំឲ្យពួកគេរកឈ្មោះវត្ថុមួយចំនួនដែលសត្វចៀមត្រូវការ ដើម្បីឲ្យមានសុវត្ថិភាព និងមានសុខភាពល្អ និងលើកទឹកចិត្តឲ្យពួកគេរកមើលនៅក្នុង ទំនុកដំកើង ២៣:១–៤ សម្រាប់គំនិតយោបល់ ។ សូមបង្ហាញរូបភាពរបស់កុមារម្នាក់ ។ តើយើងអាចធ្វើអ្វីខ្លះ ដើម្បីមានសុវត្ថិភាព និងរឹងមាំខាងព្រលឹងវិញ្ញាណ ? សូមអានទាំងអស់គ្នា ទំនុកដំកើង ២៣ហើយសួរកុមារថាតើអ្វីដែលអ្នកគង្វាលធ្វើនៅក្នុងទំនុកដំកើងនេះ អាចប្រៀបធៀបទៅនឹងអ្វីដែលព្រះយេស៊ូវគ្រីស្ទធ្វើសម្រាប់យើងយ៉ាងដូចម្តេច ។

ព្រះវិហារបរិសុទ្ធ ខនសិបសិន ឈីលី — យើងត្រូវតែស្អាតស្អំខាងវិញ្ញាណ និងបរិសុទ្ធ ដើម្បីចូលទៅក្នុងវត្តមានរបស់ព្រះអម្ចាស់ ។

ទំនុកដំកើង ២៤:៣–៤

ដើម្បីចូលទៅក្នុងព្រះវិហារបរិសុទ្ធយើងត្រូវមាន « ដៃស្អាត និងចិត្តបរិសុទ្ធ ។ »

នៅពេលដែលកុមារទន្ទឹងរង់ចាំការចូលព្រះវិហារបរិសុទ្ធនៅថ្ងៃណាមួយ សូមជួយពួកគេឲ្យយល់ថា ពួកគេអាចរៀបចំខ្លួនបានដោយមានភាពស្អាតស្អំខាងវិញ្ញាណ តាមរយៈដង្វាយធួនរបស់ព្រះអង្គសង្គ្រោះ ។

សកម្មភាពដែលអាចជ្រើសរើស

សូមបង្ហាញរូបភាពព្រះវិហារបរិសុទ្ធមួយ ។ សូមអញ្ជើញពួគគេឲ្យអាន ទំនុកដំកើង ២៤:៣ និងរកពាក្យដែលរំឭកពួកគេអំពីព្រះវិហារបរិសុទ្ធ ។ បន្ទាប់មក សូមអានជាមួយគ្នា ខទី ៤ ដើម្បីដឹងថាអ្នកណាអាចចូលព្រះវិហារបរិសុទ្ធ បាន ( ពន្យល់ន័យពាក្យណាដែលមិនច្បាស់ ) ។ តើដៃរបស់យើងកខ្វក់ដោយរបៀបណា ? តើដៃ និងដួងចិត្តរបស់យើងកខ្វក់ខាងវិញ្ញាណដោយរបៀបណា ? តើយើងសម្អាតដៃកខ្វក់របស់យើងដោយរបៀបណា ? តើព្រះអង្គសង្គ្រោះអាចជួយយើងសម្អាតដៃ និងដួងចិត្តខាងវិញ្ញាណរបស់យើងដោយរបៀបណា ? ( ប្រសិនបើវាមានប្រយោជន៍សូមពន្យល់ថា « ដៃ » នៅក្នុងខនេះអាចតំណាងឲ្យសកម្មភាពរបស់យើង ហើយ « ចិត្ត » អាចតំណាងឲ្យសេចក្តីប៉ងប្រាថ្នារបស់យើង ) ។
សូមរំឭកជាមួយកុមារ នូវតម្រូវការដើម្បីទទួលបានបណ្ណចូលព្រះវិហារបរិសុទ្ធ ( សូមមើល រ័សុល អិម ណិលសុន « Closing Remarks » លីអាហូណាខែ វិច្ឆិកា ឆ្នាំ ២០១៩ ទំព័រ ១២០–១២២ ឬអញ្ជើញសមាជិកនៃគណៈប៊ីស្សព ដើម្បីពិភាក្សាអំពីតម្រូវការទាំងនេះជាមួយនឹងថ្នាក់ ) ។ សូមអញ្ជើញកុមារឲ្យជ្រើសរើសរឿងមួយ ដែលបំផុសគំនិតពួកគេឲ្យធ្វើ ដើម្បីត្រៀមខ្លួនឲ្យមានភាពស័ក្តិសមចូលទៅក្នុងព្រះវិហារបរិសុទ្ធ ។

ទំនុកដំកើង ៤៦:១០

« ចូរបង្អង់សិន ហើយឲ្យបានដឹងថា អញជាព្រះ » ។

ទោះបីមានភាពមមាញឹកនៅជុំវិញខ្លួនយើង សូមឆ្លៀតពេលដោយមានគារវភាព និងបង្អង់សិន អាចជួយយើងស្ថាបនាទីបន្ទាល់របស់យើង ថាព្រះមានព្រះជន្មនៅរស់ ។

សកម្មភាពដែលអាចជ្រើសរើស

សូមជួយកុមារឲ្យចងចាំបន្ទាត់ដំបូងមកពី ទំនុកដំកើង ៤៦:១០« ចូរបង្អង់សិន ឲ្យបានដឹងថា អញជាព្រះ ។ » សូមនិយាយជាមួយពួកគេអំពីអត្ថន័យនៃពាក្យ « ចូរបង្អង់សិន » ទាំងផ្លូវកាយ និងផ្លូវចិត្ត ។ សូមចែកចាយជាមួយកុមារនូវបទពិសោធន៍មួយ ដែលការ « បង្អង់សិន » បានពង្រឹងដល់ទីបន្ទាល់របស់បងប្អូនអំពីព្រះវរបិតាសួគ៌ ។ សូមឲ្យកុមារចែកចាយរាល់បទពិសោធន៍ដែលពួកគេបានមាន ។ តើហេតុអ្វីការបង្អង់សិនជាវិធីសំខាន់ ដើម្បីដឹងថាព្រះមានព្រះជន្មនៅរស់ ?
សូមអញ្ជើញកុមារឲ្យរំឭកឡើងវិញជាមួយបងប្អូននូវអ្វីដែលពួកគេធ្វើក្នុងថ្ងៃធម្មតា ។ សូមជួយពួកគេឲ្យគិតអំពីគ្រានានា ក្នុងថ្ងៃដែលពួកគេអាចព្យាយាម « បង្អង់សិន » ហើយមានអារម្មណ៍ជិតស្និទ្ធនឹងព្រះវរបិតាសួគ៌ ។ សូមលើកទឹកចិត្តពួកគេឲ្យកំណត់គោលដៅ ដើម្បីប្រើពេលវេលាបែបនេះក្នុងសប្តាហ៍ខាងមុខនេះដើម្បីពង្រឹងទីបន្ទាល់របស់ពួកគេអំពីព្រះវរបិតាសួគ៌ ។
សូមអញ្ជើញកុមារឲ្យរាយបញ្ជីនូវរឿងមួយចំនួនដែលយើងអាចធ្វើបាន ដើម្បីដឹងដោយខ្លួនឯងថាព្រះវរបិតាសួគ៌ពិត ហើយថាទ្រង់ស្រឡាញ់យើង ។ សូមអញ្ជើញពួកគេឲ្យជ្រើសរើសអ្វីមួយចេញពីបញ្ជីដែលពួកគេចង់ធ្វើ ។

សូមលើកទឹកចិត្តឲ្យមានការរៀនសូត្រនៅឯគេហដ្ឋាន

សូមអញ្ជើញកុមារឲ្យជ្រើសរើសខមួយដែលពួកគេចូលចិត្តចេញមកពី ទំនុកដំកើង ដែលពួកគេបាននិយាយអំពីនៅថ្ងៃនេះ ។ សូមលើកទឹកចិត្តពួកគេឲ្យចែកចាយខគម្ពីរនោះជាមួយនឹងសមាជិកគ្រួសារ ឬមិត្តភក្តិណាម្នាក់ ។

ការកែលម្អការបង្រៀនរបស់យើង

ផ្ដោតទៅលើសេចក្ដីត្រូវការរបស់កុមារ ។ នៅក្នុងនាមជាគ្រូបង្រៀន បងប្អូនស្ថិតនៅក្នុងតួនាទីដ៏ពិសេសមួយ ដើម្បីយល់ពីតម្រូវការរបស់មនុស្សដែលបងប្អូនបង្រៀន ។ បទពិសោធន៍របស់បងប្អូន ការស្គាល់កុមាររបស់បងប្អូនច្បាស់ និងការណែនាំពីព្រះវិញ្ញាណ នឹងជួយបងប្អូនឲ្យដឹងថា តើសកម្មភាពរៀនណាខ្លះដែលអាចស្ថាបនាជំនឿរបស់ពួកគេលើព្រះវរបិតាសួគ៌ និងព្រះយេស៊ូវគ្រីស្ទ ។

ទំព័រសកម្មភាព ៖ « ព្រះយេហូវ៉ាទ្រង់ជាអ្នកគង្វាលខ្ញុំ »