« ថ្ងៃទី ១–៧ ខែ សីហា ។ យ៉ូប ១–៣; ១២–១៤; ១៩; ២១–២៤; ៣៨–៤០; ៤២ ៖ « គង់តែខ្ញុំនឹងទុកចិត្តដល់ទ្រង់ដែរ »ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )

« ថ្ងៃទី ១–៧ ខែ សីហា ។ យ៉ូប ១–៣; ១២–១៤; ១៩; ២១–២៤; ៣៨–៤០; ៤២ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២២

ការកាត់សេចក្តីរបស់យ៉ូប ដោយ យ៉ូសែប ប្រ៊ីកឃី

ថ្ងៃទី ១–៧ ខែ សីហា

យ៉ូប ១–៣; ១២–១៤; ១៩; ២១–២៤; ៣៨–៤០; ៤២

« គង់តែខ្ញុំនឹងទុកចិត្តដល់ទ្រង់ដែរ »

នៅពេលបងប្អូនសិក្សា កំណត់ហេតុរបស់យ៉ូប តើមានសារលិខិតអ្វីខ្លះដែលបងប្អូនរកឃើញសម្រាប់ជីវិតរបស់បងប្អូនផ្ទាល់ ? តើសារលិខិតមួយណាដែលបងប្អូនមានអារម្មណ៍ថា កុមារដែលបងប្អូនបង្រៀនត្រូវការស្តាប់ ?

កត់ត្រាចំណាប់អារម្មណ៍របស់បងប្អូន

អញ្ជើញឲ្យចែកចាយ

សូមបង្ហាញកុមារនូវរូបភាពមួយអំពីយ៉ូប ( សូមមើល គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ) ។ សូមសួរកុមារថា តើពួកគេគិតថាបុរសដែលនៅក្នុងរូបនេះមានអារម្មណ៏យ៉ាងដូចម្ដេច ។ សូមអញ្ជើញពួកគេឲ្យចែកចាយអ្វីដែលពួកគេដឹងអំពីយ៉ូប ។

បង្រៀនគោលលទ្ធិ ៖ កុមារតូចៗ

យ៉ូប ១–២; ១៣:១៥

ព្រះវរបិតាសួគ៌ និងព្រះយេស៊ូវគ្រីស្ទ នឹងជួយខ្ញុំក្នុងគ្រាលំបាក ពេលខ្ញុំមានជំនឿលើពួកទ្រង់ ។

យ៉ូបបានទុកចិត្ដលើព្រះ ហើយគាត់អាចរក្សាភាពស្មោះត្រង់ សូម្បីតែពេលគាត់ប្រឈមមុខនឹងការសាកល្បងដ៏លំបាកយ៉ាងខ្លាំង ។ រឿងរបស់យ៉ូបអាចជួយកុមារពង្រឹងជំនឿលើព្រះវរបិតាសួគ៌ និងព្រះយេស៊ូវគ្រីស្ទ ដូច្នេះពួកគេនឹងបានត្រៀមខ្លួនប្រឈមមុខនឹងការសាកល្បងដ៏លំបាកទាំងឡាយរបស់ពួកគេផ្ទាល់ ។

សកម្មភាពដែលអាចជ្រើសរើស

សូមអញ្ជើញកុមារឲ្យចែកចាយអំពីអ្វីដែលពួកគេបានដឹងអំពីយ៉ូប ហើយជួយពួកគេយល់អំពីអ្វីដែលបានកើតឡើងចំពោះគាត់ ( សូមមើល យ៉ូប ១–២ « យ៉ូប » នៅក្នុង ដំណើររឿងព្រះគម្ពីរសញ្ញាចាស់ ) ។ សូមសួរពួកគេថា តើពួកគេមានអារម្មណ៍យ៉ាងណា បើពួកគេគឺជា យ៉ូប ។ តើនរណាអាចជួយយើង នៅពេលយើងមានអារម្មណ៍មិនសប្បាយចិត្តនៅក្នុងជីវិតរបស់យើង ? សូមបង្ហាញរូបភាពព្រះយេស៊ូវគ្រីស្ទ និងពន្យល់ថា ជំនឿរបស់យ៉ូបនៅលើព្រះអម្ចាស់ បានជួយគាត់នៅក្នុងការសាកល្បងរបស់គាត់ ( សូមមើល យ៉ូប ១:២១ ) ។
សូមអានទៅកាន់កុមារនូវពាក្យរបស់យ៉ូបនៅក្នុង យ៉ូប ១៣:១៥ ៖ « ខ្ញុំទុកចិត្តដល់ទ្រង់ » ។ ដើម្បីជួយកុមារឲ្យយល់អំពីអត្ថន័យនៃការទុកចិត្តលើព្រះ សូមនិយាយជាមួយពួកគេអំពីមនុស្សផ្សេងទៀតដែលពួកគេទុកចិត្ត ។ ជាឧទាហរណ៍ តើយើងទុកចិត្តទៅលើឪពុកម្តាយយើងធ្វើអ្វីខ្លះ ? តើយើងទុកចិត្តទៅលើគ្រូបង្រៀនរបស់យើងធ្វើអ្វីខ្លះ ? តើយើងទុកចិត្តទៅលើព្រះវរបិតាសួគ៌ និងព្រះយេស៊ូវគ្រីស្ទធ្វើអ្វីខ្លះ ? សូមបង្ហាញនូវការទុកចិត្តរបស់បងប្អូនទៅលើព្រះវរបិតាសួគ៌ និងព្រះយេស៊ូវគ្រីស្ទ ហើយជួយកុមារឲ្យគិតអំពីរបៀបដែលពួកគេអាចបង្ហាញថា ពួកគេស្រឡាញ់ និងទុកចិត្តទៅលើពួកទ្រង់ ។

យ៉ូប ១៩:២៥

ព្រះយេស៊ូវគ្រីស្ទ គឺជាព្រះប្រោសលោះរបស់ខ្ញុំ ។

យ៉ូបអាចស៊ូទ្រាំនឹងការសាកល្បង និងការរងទុក្ខ ដោយសារជំនឿរបស់គាត់នៅលើព្រះអម្ចាស់ ។ តើអ្នកអាចជួយកុមារពង្រឹងសេចក្តីជំនឿរបស់ពួកគេនៅលើព្រះយេស៊ូវគ្រីស្ទ ដែលជាព្រះប្រោសលោះរបស់យើងយ៉ាងដូចម្តេច ?

សកម្មភាពដែលអាចជ្រើសរើស

សូមបង្ហាញរូបភាពព្រះយេស៊ូវនៅលើឈើឆ្កាង ឬត្រូវបានគេបញ្ជុះព្រះសពក្នុងផ្នូរ ( សូមមើល សៀវភៅរូបភាពដំណឹងល្អ ល.រ. ៥៧,៥៨ ) ។ សុំកុមារឲ្យពន្យល់នូវអ្វីដែលកំពុងកើតឡើងនៅក្នុងរូបភាព ។ សូមអានទៅកាន់កុមារនូវសក្ខីភាពរបស់យ៉ូបដែលមាននៅក្នុង យ៉ូប ១៩:២៥ ។ សូមដាក់តាំងនូវរូបភាពព្រះអង្គសង្រ្គោះដែលមានព្រះជន្មរស់ឡើងវិញ ( សូមមើល សៀវភៅរូបភាពដំណឹងល្អ ល.រ. ៥៩,៦០សូមមើលផងដែរ ទំព័រសកម្មភាពសប្ដាហ៍នេះ ) និងថ្លែងសក្ខីភាពថា ព្រះយេស៊ូវគ្រីស្ទបានមានព្រះជន្មរស់ឡើងវិញ ហើយមានព្រះជន្មរស់នៅសព្វថ្ងៃនេះ ។ ហេតុអ្វីយើងមានអំណរគុណដែលព្រះយេស៊ូវគ្រីស្ទបានមានព្រះជន្មរស់ឡើងវិញ ?
សូមបង្ហាញរូបភាពរបស់យ៉ូប ហើយពន្យល់ថា យ៉ូបបានមានការឈឺចាប់យ៉ាងខ្លាំងណាស់ព្រោះស្បែករបស់គាត់មានដំបៅពេញខ្លួន ។ គាត់បានបាត់បង់ផ្ទះ ហើយកូនៗរបស់គាត់បានស្លាប់ទៀត ។ ប៉ុន្ដែយ៉ូបបានដឹងអ្វីមួយដែលសំខាន់បំផុត ដែលជួយលួងលោមដល់គាត់ ។ សូមអាន យ៉ូប ១៩:២៥ហើយសូមសួរទៅកុមារថា តើយ៉ូបបានដឹងអ្វី ។ សូមចែកចាយជាមួយកុមារអំពីរបៀបដែលបងប្អូនដឹងថា ព្រះយេស៊ូវគ្រីស្ទនៅមានព្រះជន្មរស់ និងអញ្ជើញពួកគេឲ្យចែកចាយនូវទីបន្ទាល់របស់ពួកគេអំពីទ្រង់ ។

យ៉ូប ដោយ ហ្គារី អិល ខាប
សូមកុមារឲ្យផាត់ពណ៏លើទំព័រសកម្មភាពសប្ដាហ៍នេះ ។ នៅពេលដែលពួកគេធ្វើកិច្ចការ សូមលេង ឬច្រៀងនូវចម្រៀងមួយបទអំពី ការមានព្រះជន្មរស់ឡើងវិញរបស់ព្រះយេស៊ូវគ្រីស្ទ ដូចជាបទ « តើព្រះយេស៊ូវរស់ឡើងវិញឬ ? » ឬ « ព្រះយេស៊ូវបានរស់ឡើងវិញ » ( សៀវភៅចម្រៀងកុមារ ទំព័រ ៤៥, ៤៤ ) ។ សុំពួកគេឲ្យចែកចាយពីអារម្មណ៍របស់ពួកគេចំពោះព្រះយេស៊ូវ និងជួយពួកគេឲ្យយល់ថា យើងអាចមានអារម្មណ៍ល្អមកពីព្រះវិញ្ញាណបរិសុទ្ធ ដើម្បីជួយយើងឲ្យដឹងថា ព្រះយេស៊ូវគ្រីស្ទពិតជាមានមែន ។

បង្រៀនគោលលទ្ធិ ៖ កុមារធំៗ

យ៉ូប ១–២; ១២; ១៩

ព្រះវរបិតាសួគ៌ និងព្រះយេស៊ូវគ្រីស្ទ នឹងជួយខ្ញុំយកឈ្នះក្នុងគ្រាលំបាក ពេលខ្ញុំមានជំនឿទៅលើពួកទ្រង់ ។

មនុស្សគ្រប់គ្នាមានថ្ងៃលំបាក ហើយមនុស្សខ្លះមានការសាកល្បងដែលមានរយៈពេលយូរ ។ សេចក្តីជំនឿរបស់យ៉ូបទៅលើព្រះ ជួយទ្រទ្រង់គាត់ឲ្យឆ្លងកាត់ការសាកល្បងទាំងឡាយ ។ សូមពិចារណាអំពីរបៀបដែលរឿងរបស់យ៉ូបអាចជួយកុមារពង្រឹងនូវសេចក្តីជំនឿរបស់ពួកគេទៅលើព្រះវរបិតាសួគ៌ និងព្រះយេស៊ូវគ្រីស្ទ ដើម្បីពួកគេអាចប្រឈមមុខនឹងការសាកល្បងដ៏លំបាករបស់ពួកគេ នៅពេលបច្ចុប្បន្ន និងនៅពេលអនាគត ។

សកម្មភាពដែលអាចជ្រើសរើស

សូមឲ្យកុមារចែកចាយនូវអ្វីដែលពួកគេដឹងអំពីរឿងរបស់យ៉ូប ។ តើគាត់ជាមនុស្សបែបណា ? តើមានអ្វីបានកើតឡើងចំពោះគាត់ ? តើគាត់បានឆ្លើយតបចំពោះបញ្ហាដែលគាត់ប្រឈមមុខយ៉ាងដូចម្តេច ? សូមចង្អុលបង្ហាញពួកគេនៅក្នុងខគម្ពីរ យ៉ូប ១–២ ដើម្បីជួយពួកគេប្រាប់រឿងរ៉ាវនេះ ( សូមមើល យ៉ូប ១:១, ១៣–២២; ២:៧–១០សូមមើល « យ៉ូប » នៅក្នុង ដំណើររឿងព្រះគម្ពីរសញ្ញាចាស់ ) ។ សូមអញ្ជើញកុមារឲ្យចែកចាយនូវអ្វីដែលពួកគេមានអារម្មណ៏ថា ជាសារដ៏សំខាន់នៃរឿងរបស់យ៉ូប ។
សូមដាក់បង្ហាញរូបភាពមួយចំនួនរបស់ព្រះយេស៊ូវគ្រីស្ទប្រាស្រ័យទាក់ទងជាមួយអ្នកដទៃ ហើយសូមសួរកុមារថា តើពួកគេមានអារម្មណ៍ថា រូបភាពទាំងនេះបង្រៀនយើងអ្វីខ្លះអំពីព្រះយេស៊ូវគ្រីស្ទជានរណា ហើយទ្រង់មានលក្ខណៈបែបណា ។ តើយើងដឹងអ្វីខ្លះទៀត អំពីទ្រង់ ? សូមអញ្ជើញកុមារឲ្យអានខគម្ពីរមួយចំនួនដូចតទៅនេះ ដើម្បីរកឲ្យឃើញនូវអ្វីដែលយ៉ូបបានដឹងអំពីព្រះអម្ចាស់ ៖ យ៉ូប ១២:១០, ១៣, ១៦; ១៩:២៥–២៧ ។ ហេតុអ្វីបានជាវាសំខាន់ដើម្បីដឹងរឿងអស់ទាំងនេះអំពីព្រះអង្គសង្រ្គោះ ?
សូមអញ្ជើញកុមារឲ្យអាន យ៉ូប ១៩:១៤–១៩ហើយសូមសួរពួកគេថា តើខគម្ពីរទាំងនេះនិយាយអំពីរបៀបដែលមនុស្សដទៃទៀតកំពុងប្រព្រឹត្តចំពោះយ៉ូបយ៉ាងដូចម្ដេច ។ តើយើងមានអារម្មណ៍បែបណា ប្រសិនបើរឿងនេះបានកើតឡើងចំពោះយើង ? សូមអញ្ជើញកុមារឲ្យអាន យ៉ូប ១៩:២៣–២៧ ដើម្បីរកមើលរបៀបដែលយ៉ូបបានរកឃើញការលួងលោមនៅក្នុងស្ថានភាពនេះ ។ តើខគម្ពីរទាំងនេះបង្រៀនយើងអ្វីខ្លះអំពីព្រះអង្គសង្រ្គោះ ? ហេតុអ្វីបានជាវាមានសារៈសំខាន់ ដើម្បីដឹងថា ទ្រង់មានព្រះជន្មរស់ហើយស្រឡាញ់យើង ? ( សូមមើល យ៉ូហាន ១៧:៣) ។
សូមច្រៀងចម្រៀងមួយបទជាមួយគ្នា ដែលថ្លែងទីបន្ទាល់អំពីព្រះយេស៊ូវគ្រីស្ទ ដូចជាបទ « ខ្ញុំដឹងថាព្រះប្រោសលោះខ្ញុំនៅរស់ » ( ទំនុកតម្កើង លេខ ៧៦ ) ។ តើបទចម្រៀងនេះផ្តល់យោបល់អ្វីខ្លះ អំពីមូលហេតុដែលវាសំខាន់នៅក្នុងការមានទីបន្ទាល់ថា ព្រះយេស៊ូវគ្រីស្ទមានព្រះជន្មរស់ ? សូមប្រាប់ពីរបៀបដែលបងប្អូនដឹងថា ព្រះអង្គសង្គ្រោះនៅមានព្រះជន្ម និងមូលហេតុដែលបងប្អូនមានអំណរគុណដល់ចំណេះដឹងនេះ ។ សូមលើកទឹកចិត្តដល់ពួកគេឲ្យចែកចាយអារម្មណ៏ និងទីបន្ទាល់របស់ពួកគេផងដែរ ។

យ៉ូប ១៩:១៣–១៩; ២២:៥

មិត្តល្អជួយលើកស្ទួយ និងលើកទឹកចិត្តគ្នាទៅវិញទៅមក ។

នៅពេលដែលយ៉ូបកំពុងជួបការលំបាក មិត្តភក្តិរបស់គាត់បាននិយាយថា ព្រះកំពុងដាក់ទណ្ឌកម្មគាត់ពីព្រោះគាត់បានមានបាប ។ រឿងនេះអាចជួយបងប្អូនបង្រៀនកុមារនូវវិធីដ៏ប្រសើរ នៅក្នុងការឆ្លើយតបនៅពេលមិត្តណាម្នាក់មានបញ្ហា ( សូមមើល យ៉ូប ១៦:១–៥ ) ។

សកម្មភាពដែលអាចជ្រើសរើស

សូមឲ្យកុមាររំឭកឡើងវិញនូវរឿងលំបាកៗជាច្រើនដែលបានកើតឡើងចំពោះយ៉ូប ( សូមមើល យ៉ូប ១:១៣–១៩; ២:៧ ) ។ សូមអានជាមួយគ្នា យ៉ូប ១៩:១៤, ១៩រកមើលពីរបៀបដែលមិត្តភក្តិរបស់យ៉ូបមានប្រតិកម្មចំពោះការសាកល្បងរបស់គាត់ ( សូមមើលផងដែរ យ៉ូប ២២:១–៥ ) ។ សូមអញ្ជើញកុមារឲ្យស្រមៃថា ពួកគេគឺជាមិត្តភក្តិរបស់យ៉ូប—តើពួកគេនឹងព្យាយាមជួយគាត់យ៉ាងដូចម្តេច ? សូមលើកទឹកចិត្តពួកគេឲ្យគិតពីមិត្តម្នាក់ ដែលអាចនឹងឆ្លងកាត់ពេលវេលាដ៏លំបាក ហើយរៀបគម្រោងអ្វីមួយដែលពួកគេអាចធ្វើបាន ដើម្បីបង្ហាញសេចក្តីស្រឡាញ់ និងការគាំទ្រដល់មិត្តរបស់ពួកគេ ។
សុំឲ្យកុមារសរសេរបញ្ជីនូវគុណសម្បត្តិខ្លះៗរបស់មិត្តល្អ និងរកមើលឈ្មោះមិត្តមួយណាដែលមានគុណសម្បត្តិទាំងនេះ ។ សូមបង្ហាញរូបភាពរបស់ព្រះយេស៊ូវគ្រីស្ទ ។ តើព្រះយេស៊ូវគឺជាមិត្តល្អចំពោះយើងម្នាក់ៗយ៉ាងដូម្តេច ? តើយើងអាចធ្វើតាមគំរូរបស់ទ្រង់យ៉ាងដូចម្ដេច ?

សូមលើកទឹកចិត្តឲ្យមានការរៀនសូត្រនៅឯគេហដ្ឋាន

សូមអញ្ជើញកុមារឲ្យចែកចាយជាមួយសមាជិកគ្រួសារ ឬមិត្តភក្តិណាម្នាក់នូវវិធីមួយដែលព្រះវរបិតាសួគ៌ និងព្រះយេស៊ូវគ្រីស្ទអាចជួយពួកគេ នៅពេលដែលពួកគេមានការពិបាក ។

ការកែលម្អការបង្រៀនរបស់យើង

ថ្លែងទីបន្ទាល់អំពីពរជ័យទាំងឡាយដែលបានសន្យា ។ នៅពេលព្រះអម្ចាស់ប្រទានបទបញ្ញត្តិមួយ ជាញឹកញាប់ទ្រង់សន្យានូវពរជ័យទាំងឡាយចំពោះការកាន់តាមបទបញ្ញត្តិនោះ ។ នៅពេលអ្នកអញ្ជើញកុមារឲ្យរស់នៅតាមគោលការណ៍ជាក់លាក់មួយចំនួន សូមចែកចាយសេចក្តីសន្យាដែលព្រះបានធ្វើតាមរយៈព្យាការី ដល់ជនទាំងឡាយណាដែលរស់នៅតាមគោលការណ៍នោះ ។ អ្នកក៏អាចថ្លែងទីបន្ទាល់អំពីពរជ័យនានាដែលអ្នកបានទទួល តាមរយៈការរស់នៅតាមគោលការណ៍នោះផងដែរ ។

ទំព័រសកម្មភាព ៖ ព្រះយេស៊ូវគ្រីស្ទ គឺជាព្រះប្រោសលោះរបស់ខ្ញុំ