« ថ្ងៃទី ២២–២៨ ខែ សីហា ។ ទំនុកដំកើង ១០២–១០៣; ១១០; ១១៦–១១៩; ១២៧–១២៨; ១៣៥–១៣៩; ១៤៦–១៥០ ៖ ‹ គួរឲ្យជីវិតទាំងឡាយដែលមានដង្ហើមបានសរសើរដល់ព្រះយេហូវ៉ា › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )
« ថ្ងៃទី ២២–២៨ ខែ សីហា ។ ទំនុកដំកើង ១០២–១០៣; ១១០; ១១៦–១១៩; ១២៧–១២៨; ១៣៥–១៣៩; ១៤៦–១៥០ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២២
គ្រប់ជង្គង់នឹងលុតចុះ ដោយ ជេ ខឺត រីឆាត
ថ្ងៃទី ២២–២៨ ខែ សីហា
ទំនុកដំកើង ១០២–១០៣; ១១០; ១១៦–១១៩; ១២៧–១២៨; ១៣៥–១៣៩; ១៤៦–១៥០
« គួរឲ្យជីវិតទាំងឡាយដែលមានដង្ហើមបានសរសើរដល់ព្រះយេហូវ៉ា »
ប្រសិនបើអ្នកត្រូវការគំនិតបន្ថែម នៅពេលអ្នករៀបចំបង្រៀន សូមមើល « ធនធានបន្ថែមសម្រាប់បង្រៀនកុមារ » និង « ការបំពេញតាមតម្រូវការរបស់កុមារតូចៗ » នៅខាងដើមនៃធនធាននេះ ។
កត់ត្រាចំណាប់អារម្មណ៍របស់បងប្អូន
អញ្ជើញឲ្យចែកចាយ
សូមបង្ហាញរូបភាពមួយចំនួននៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ហើយសូមអញ្ជើញឲ្យកុមារចែកចាយនូវអ្វីដែលកំពុងកើតឡើងនៅក្នុងរូបភាពនោះ ។ សូមជួយពួកគេមើលឃើញពីទំនាក់ទំនងរវាងរូបភាពទាំងនេះ និងអ្វីដែលពួកគេកំពុងរៀននៅក្នុងគម្ពីរ ទំនុកដំកើង ។
បង្រៀនគោលលទ្ធិ ៖ កុមារតូចៗ
ព្រះបន្ទូលរបស់ព្រះ គឺដូចជាពន្លឺ ។
កុមារដែលបងប្អូនបង្រៀន កំពុងតែដើរនៅលើផ្លូវត្រឡប់ទៅឯព្រះវរបិតាសួគ៌វិញ ។ ព្រះបន្ទូលរបស់ព្រះ អាចជួយពួកគេនៅលើផ្លូវនោះឥឡូវនេះ និងពេញមួយជីវិតរបស់ពួកគេ ។
សកម្មភាពដែលអាចជ្រើសរើស
-
សូមបង្ហាញរូបភាពនៃអ្វីដែលបានរៀបរាប់នៅក្នុង ទំនុកដំកើង ១១៩:១០៥ហើយអញ្ជើញកុមារឲ្យដាក់រូបភាពនោះតាមលំដាប់លំដោយត្រឹមត្រូវ កាលដែលបងប្អូនអានខគម្ពីរនេះ ។ សូមឲ្យកុមារថាតាមឃ្លាទាំងនោះជាមួយបងប្អូន នៅពេលដែលបងប្អូនចង្អុលទៅរូបភាពទាំងនោះ ។
-
សូមអញ្ជើញកុមារឲ្យនិយាយពីអារម្មណ៏របស់ពួកគេនៅពេលស្ថិតនៅក្នុងទីងងឹត ។ តើមានរឿងអ្វីខ្លះ ដែលពិបាកធ្វើនៅក្នុងទីងងឹត ? បងប្អូនក៏អាចអញ្ជើញកុមារឲ្យព្យាយាមធ្វើអ្វីមួយដោយបិទភ្នែក ដូចជាការគូររូបភាព ។ ហេតុអ្វីការណ៍ទាំងនេះងាយស្រួលធ្វើនៅពេលមានពន្លឺ ? សូមជួយកុមារឲ្យយល់ពីរបៀបដែលព្រះបន្ទូលរបស់ព្រះ ដូចដែលបានរកឃើញនៅក្នុងព្រះគម្ពីរ និងពាក្យរបស់ព្យាការីដែលកំពុងរស់នៅ បំភ្លឺផ្លូវរបស់យើងឲ្យត្រឡប់ទៅឯព្រះវរបិតាសួគ៌វិញ ។
ព្រះវរបិតាសួគ៌ និងព្រះយេស៊ូវគ្រីស្ទស្គាល់ និងស្រឡាញ់ខ្ញុំ ។
នៅពេញមួយជីវិតរបស់យើង យើងត្រូវរំឭកថា ព្រះវរបិតាសួគ៌ និងព្រះយេស៊ូវស្គាល់យើងម្នាក់ៗដោយផ្ទាល់ ។ ទំនុកដំកើង ១៣៩ អាចជួយបងប្អូនបង្រៀនកុមារថា ពួកទ្រង់ស្គាល់ និងស្រឡាញ់ពួកគេ ។
សកម្មភាពដែលអាចជ្រើសរើស
-
សូមធ្វើបញ្ជីខ្លីៗនៃអ្វីដែលបងប្អូនដឹងអំពីកុមារម្នាក់ៗ ។ ពេលបងប្អូនអានបញ្ជីទាំងនោះម្ដងមួយៗ សូមសួរដល់កុមារឲ្យទាយថា បងប្អូនកំពុងពិពណ៌នាអំពីនរណា ។ សូមអាន ទំនុកដំកើង ១៣៩:១–៣ហើយជួយកុមារយល់ពាក្យទាំងឡាយដែលពួកគេប្រហែលជាអត់ដឹង ។ សូមថ្លែងទីបន្ទាល់ថា ព្រះវរបិតាសួគ៌ និងព្រះយេស៊ូវស្គាល់ពួកគេច្បាស់—ពួកទ្រង់ស្គាល់ឈ្មោះរបស់ពួកគេ អ្វីដែលធ្វើឲ្យពួកគេសប្បាយរីករាយ និងសោកសៅ និងអ្វីដែលពួកគេពូកែធ្វើ ។
-
សូមអាន ទំនុកដំកើង ១៣៩:២៣ហើយអញ្ជើញកុមារឲ្យដាក់ដៃនៅលើបេះដូងរបស់ពួកគេ នៅពេលដែលបងប្អូននិយាយថា « ចិត្ត » ហើយប៉ះក្បាលរបស់ពួកគេ នៅពេលបងប្អូននិយាយថា « គំនិត » ។ សូមចែកចាយអំពីគ្រាមួយដែលអ្នកបានមានអារម្មណ៍ថា ព្រះបានដឹងអំពីចិត្ត និងគំនិតរបស់បងប្អូន ។
ខ្ញុំអាចសរសើរតម្កើងព្រះអម្ចាស់ ។
ការសរសើរតម្កើងព្រះអម្ចាស់មានន័យថា ការបង្ហាញការដឹងគុណ និងសេចក្តីស្រឡាញ់របស់យើងចំពោះទ្រង់ ។ សូមជួយកុមារឲ្យរៀនថា យើងអាចសរសើរតម្កើងទ្រង់ នៅពេលយើងធ្វើអ្វីៗ ដូចជាច្រៀង អធិស្ឋាន និងគោរពតាមការបង្រៀនរបស់ទ្រង់ ។
សកម្មភាពដែលអាចជ្រើសរើស
-
សូមអញ្ជើញកុមារឲ្យចែកចាយនូវបទពិសោធន៍នានា កាលនរណាម្នាក់បានសរសើរពួកគេ ឬបានប្រាប់ពួកគេថា ពួកគេធ្វើបានល្អណាស់ ។ សូមចែកចាយអ្វីដែលល្អៗមកពី ទំនុកដំកើង ១៤៦:៦–៩ ដែលព្រះអម្ចាស់បានធ្វើ ហើយអញ្ជើញកុមារឲ្យនិយាយអំពីកិច្ចការផ្សេងទៀតដែលទ្រង់ធ្វើសម្រាប់យើង ។ សូមជួយពួកគេគិតអំពីវិធីទាំងឡាយណា ដែលពួកគេអាចសរសើរដល់ទ្រង់ចំពោះកិច្ចការទាំងនោះ ។
-
សូមច្រៀងជាមួយគ្នានូវចម្រៀងមួយបទអំពីការសរសើរ ដូចជាបទ « Beauty Everywhereសៀវភៅចម្រៀងកុមារទំព័រ ២៣២ ) ។ សូមពន្យល់ថា សម្រាប់សាសន៍អ៊ីស្រាអែល តាំងពីយូរយារមកហើយ ទំនុកដំកើង គឺដូចជាចម្រៀងដែលយើងច្រៀងសព្វថ្ងៃ ដើម្បីថ្វាយបង្គំ និងសរសើរតម្កើងដល់ព្រះ ។
បង្រៀនគោលលទ្ធិ ៖ កុមារធំៗ
ព្រះអម្ចាស់ប្រទានឲ្យខ្ញុំនូវការលួងលោម និងសេចក្ដីសង្ឃឹម ។
ព្រះជ្រាបពីការសាកល្បង និងទុក្ខព្រួយរបស់យើង ហើយទ្រង់សព្វព្រះទ័យលួងលោម និងលើកទឹកចិត្តដល់យើង ។ សូមជួយកុមារស្ថាបនាជំនឿរបស់ពួកគេទៅលើទ្រង់ ដើម្បីពួកគេនឹងងាកមករកទ្រង់នៅពេលពួកគេត្រូវការទ្រង់ ។
ការប្រោសឲ្យជា ដោយ ជេ ខឺត រីឆាត
សកម្មភាពដែលអាចជ្រើសរើស
-
សូមអញ្ជើញកុមារម្នាក់អាន ទំនុកដំកើង ១០២:១–២ ។ តើព្រះអម្ចាស់អាចជួយយើងនៅក្នុងគ្រាលំបាកបានយ៉ាងដូចម្តេច ? តើយើងអាចសុំជំនួយពីទ្រង់ដោយរបៀបណា ? សូមចែកចាយបទពិសោធន៍ ដែលបងប្អូនមានអារម្មណ៏ថា ព្រះបានឮការអធិស្ឋានរបស់បងប្អូន នៅពេល ដែលបងប្អូនមានបញ្ហា ហើយអញ្ជើញកុមារឲ្យចែកចាយនូវបទពិសោធន៍ និងទីបន្ទាល់របស់ពួកគេ ។
-
សូមអញ្ជើញកុមារឲ្យស្វែងរកពាក្យនៃការលួងលោម និងសេចក្តីសង្ឃឹមនៅក្នុង ទំនុកដំកើង ១០៣ ។ តើពាក្យអស់ទាំងនេះអាចជួយមនុស្សនៅពេលប្រឈមមុខនឹងបញ្ហាយ៉ាងដូចម្ដេច ? សូមលើកទឹកចិត្តកុមារឲ្យសរសេរនូវឃ្លាទាំងឡាយ ដែលពួកគេយល់ថា វាមានអត្ថន័យដើម្បីជួយរំឭកដល់ពួកគេថា ព្រះអម្ចាស់អាចជួយពួកគេ នៅពេលពួកគេមានទុក្ខលំបាក ។
ព្រះបន្ទូលរបស់ព្រះជួយខ្ញុំឲ្យដើរតាមផ្លូវរបស់ទ្រង់ ។
ទោះបីជាលោកិយនេះមើលទៅហាក់ដូចជាងងឹតពេលខ្លះក៏ដោយ តែព្រះបន្ទូលរបស់ព្រះអាចជួយបំភ្លឺផ្លូវរបស់យើង ហើយជួយយើងអោយត្រឡប់មករកទ្រង់វិញ ។
សកម្មភាពដែលអាចជ្រើសរើស
-
សូមគូរនៅលើក្ដារខៀននូវរូបភាពនៃពន្លឺមួយ ( ដូចជាចង្កៀង ) និងរូបភាពនៃព្រះគម្ពីរទាំងឡាយ ។ សូមអញ្ជើញឲ្យកុមារអាន ទំនុកដំកើង ១១៩:១០៥ ។ តើពន្លឺអាចជួយដល់យើងយ៉ាងដូចម្ដេច ? តើព្រះបន្ទូលរបស់ព្រះអាចជួយយើងយ៉ាងដូចម្ដេច ? សុំឲ្យកុមារសរសេរនូវចម្លើយរបស់ពួកគេនៅលើក្តារខៀនក្បែររូបភាពទាំងនោះ ។ តើព្រះបន្ទូលរបស់ព្រះជាពន្លឺយ៉ាងដូចម្តេច ? តើវាអាចជួយយើងឲ្យនៅលើផ្លូវដែលនាំត្រឡប់ទៅកាន់ព្រះវរបិតាសួគ៌យ៉ាងដូចម្តេច ?
-
សូមបំបែកកុមារជាគូរ ហើយឲ្យវគ្គបទគម្ពីរមួយដល់គូរនីមួយៗ ដូចតទៅនេះ ៖ ទំនុកដំកើង ១១៩:៤៧–៤៨; ទំនុកដំកើង ១១៩:១០៥; នីហ្វៃទី១ ១១:២៥; នីហ្វៃទី២ ៣១:២០ ។ សូមអញ្ជើញពួកគេឲ្យអានវគ្គបទគម្ពីរ ហើយរកមើលអ្វីដែលព្រះវរបិតាសួគ៌បានប្រទានដល់យើង ដើម្បីជួយយើងឲ្យស្ថិតនៅលើផ្លូវត្រឡប់ទៅរកទ្រង់វិញ ។ សូមអញ្ជើញកុមារឲ្យពិចារណា និងចែកចាយនូវអ្វីដែលពួកគេមានអារម្មណ៍បំផុសគំនិតឲ្យធ្វើ ដោយសារតែអ្វីដែលពួកគេបានរៀននៅថ្ងៃនេះ ។
-
សូមច្រៀងចម្រៀងជាមួយគ្នាមួយបទអំពីការដើរតាមផ្លូវរបស់ព្រះដូចជាបទ « I Will Walk with Jesus » នៅគេហទំព័រ ( ChurchofJesusChrist.org ) ។ តើយើងអាចរៀនអ្វីខ្លះ ចេញពីចម្រៀងនេះអំពីរបៀបដើរនៅលើផ្លូវត្រូវ ?
ព្រះវរបិតាសួគ៌ និងព្រះយេស៊ូវគ្រីស្ទ អាចជួយខ្ញុំឲ្យដឹងពីរបៀប ដើម្បីធ្វើឲ្យប្រសើរឡើង ។
ទំនុកដំកើង ១៣៩ បង្រៀនថា ព្រះជ្រាបដឹងអ្វីៗទាំងអស់អំពីយើង រួមទាំងចំនុចខ្លាំង និងចំនុចខ្សោយរបស់យើង ។ ប្រសិនបើយើងងាកមករកទ្រង់ នោះទ្រង់អាចបង្រៀនយើងនូវអ្វីដែលយើងត្រូវធ្វើ ដើម្បីឲ្យកាន់តែប្រែក្លាយដូចជាទ្រង់ ។
សកម្មភាពដែលអាចជ្រើសរើស
-
សូមសរសេរពាក្យនៃ ទំនុកដំកើង ១៣៩:២៣–២៤ នៅលើក្តារខៀន ហើយអញ្ជើញកុមារឲ្យគូសពីក្រោមពាក្យដែលរៀបរាប់អំពីអ្វីៗដែលព្រះអាចធ្វើសម្រាប់យើង ។ ហេតុអ្វីយើងចង់ឲ្យព្រះធ្វើរឿងទាំងនេះ ? តើយើងអាចយាងទ្រង់ឲ្យ « នាំ [ យើង ] តាមផ្លូវដ៏នៅអស់កល្បជានិច្ច » ដោយរបៀបណា ?
-
សូមលើកទឹកចិត្តកុមារឲ្យ « ពិនិត្យមើល » ជីវិតផ្ទាល់ខ្លួនរបស់ពួកគេនូវវិធីដែលពួកគេអាចធ្វើឲ្យប្រសើរឡើង នៅក្នុងផ្នែកទាំងបួននៃការផ្តោតទៅលើ នៅក្នុងកម្មវិធីកុមារ និងយុវវ័យ—ខាងវិញ្ញាណ សង្គម រាងកាយ និងបញ្ញា ។ សូមរំឭកពួកគេថា ព្រះអម្ចាស់ទ្រង់ជ្រាបពីរបៀបដែលពួកគេអាចកែលម្អនៅក្នុងផ្នែកនីមួយៗនេះ ហើយលើកទឹកចិត្តពួកគេឲ្យស្វែងរកការណែនាំពីទ្រង់ ។
-
សូមច្រៀងចម្រៀងអំពីរបៀបដែលព្រះវរបិតាសួគ៌អាចជួយយើងកែលម្អ ដូចជាបទ « បិតាសូមជួយកូន » ( សៀវភៅចម្រៀងកុមារទំព័រ ៥២ ) ។ សូមចែកចាយពីរបៀបដែលព្រះវរបិតាសួគ៌ និងព្រះយេស៊ូវគ្រីស្ទបានជួយបងប្អូនកែលម្អ ។
សូមលើកទឹកចិត្តឲ្យមានការរៀនសូត្រនៅឯគេហដ្ឋាន
យូរៗម្ដង បងប្អូនអាចអញ្ជើញកុមារម្នាក់ និងសមាជិកគ្រួសារម្នាក់របស់គាត់មកចែកចាយជាមួយថ្នាក់នូវអ្វីដែលពួកគេកំពុងធ្វើដើម្បីរៀនដំណឹងល្អនៅផ្ទះ ។ សូមលើកទឹកចិត្តឲ្យកុមារដទៃទៀតឲ្យចែកចាយនូវគំនិតទាំងនេះ ជាមួយក្រុមគ្រួសាររបស់ពួកគេ ។
ការកែលម្អការបង្រៀនរបស់យើង
ប្រើតន្ត្រី ។ ចម្រៀងថ្នាក់អង្គការបឋមសិក្សា និងទំនុកតម្កើងអាចជួយកុមារទាំងអស់ឲ្យយល់ និងចងចាំនៅក្នុងចិត្តនូវសេចក្ដីពិតនៃដំណឹងល្អ ។ ការច្រៀងក៏អាចជួយឲ្យកុមារចូលរួមយ៉ាងសកម្មនៅក្នុងការរៀនសូត្រផងដែរ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះទំព័រ ២២ ) ។