« ថ្ងៃទី ១៩–២៥ ខែ កញ្ញា ។ អេសាយ ៤០–៤៩ ៖ ‹ ចូរកម្សាន្ដទុក្ខរាស្ត្រយើងចុះ › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )
« ថ្ងៃទី ១៩–២៥ ខែ កញ្ញា ។ អេសាយ ៤០–៤៩ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២២
ការព្យាបាលមនុស្សខ្វាក់ ដោយ ខាល ហេនរីក ប្លក់
ថ្ងៃទី ១៩–២៥ ខែ កញ្ញា
អេសាយ ៤០–៤៩
« ចូរកម្សាន្ដទុក្ខរាស្ត្រយើងចុះ »
វគ្គបទគម្ពីរជាច្រើននៅក្នុង អេសាយ ៤០–៤៩ អាចជួយកុមារឲ្យបង្កើនសេចក្ដីស្រឡាញ់របស់ពួកគេចំពោះព្រះអម្ចាស់ និងសេចក្ដីជំនឿរបស់ពួកគេលើទ្រង់ ។ សូមស្វែងរកការណែនាំពីព្រះវិញ្ញាណដើម្បីរកឃើញវគ្គបទគម្ពីរទាំងនោះ ពេលបងប្អូនសិក្សា ។
កត់ត្រាចំណាប់អារម្មណ៍របស់បងប្អូន
អញ្ជើញឲ្យចែកចាយ
សូមអាន អេសាយ ៤០:៩ ជាមួយកុមារ ហើយអញ្ជើញពួកគេឲ្យធ្វើជាឡើងទៅលើ « ភ្នំខ្ពស់ » ហើយបន្ទាប់មកប្ដូរវេនគ្នាប្រកាសចែកចាយអ្វីដែលពួកគេបានរៀនចេញពីព្រះគម្ពីរនាពេលថ្មីៗនេះ—នៅផ្ទះ ឬនៅព្រះវិហារ ។
បង្រៀនគោលលទ្ធិ ៖ កុមារតូចៗ
ខ្ញុំអាចធ្វើជាសាក្សីម្នាក់របស់ព្រះអម្ចាស់ ។
ព្រះអម្ចាស់បានរំឭកពួកសាសន៍អ៊ីស្រាអែលថា ពួកគេបានធ្វើជាសាក្សីដល់កិច្ចការដ៏អស្ចារ្យជាច្រើន ដែលទ្រង់បានធ្វើសម្រាប់ពួកគេ ។ ទ្រង់សព្វព្រះទ័យឲ្យពួកគេ ( និងពួកយើងទាំងអស់គ្នា ) ធ្វើជាសាក្សីរបស់ទ្រង់ ដោយជួយមនុស្សដទៃទៀតឲ្យស្គាល់ព្រះចេស្ដា និងសេចក្ដីល្អរបស់ព្រះ ។
សកម្មភាពដែលអាចធ្វើបាន
-
ប្រាប់កុមារអំពីអ្វីមួយដែលបងប្អូនបានធ្វើជាសាក្សី ។ សូមជួយពួកគេឲ្យគិតអំពីអ្វីដែលពួកគេបានដកពិសោធន៍ ដែលពួកគេអាចប្រាប់គ្នាទៅវិញទៅមកអំពី « សាក្សី » ម្នាក់ ឬការធ្វើជា « សាក្សី » ម្នាក់—ឧទាហរណ៍ អាហារដ៏ឆ្ងាញ់ដែលពួកគេបានភ្លក់ កន្លែងមួយដែលពួកគេបានទៅលេង ឬមនុស្សម្នាក់ដែលពួកគេបានស្គាល់ ។ សូមអានឲ្យកុមារស្តាប់ចេញពី អេសាយ ៤៣:១០ ៖ « ឯងរាល់គ្នាជាស្មរបន្ទាល់របស់យើង ហើយជាអ្នកបម្រើដែលយើងបានរើសតាំង » ។ ប្រាប់កុមារថា ពេលយើងទទួលបុណ្យជ្រមុជទឹក យើងសន្យាដើម្បីធ្វើជាសាក្សីរបស់ព្រះយេស៊ូវគ្រីស្ទ ( សូមមើល ម៉ូសាយ ១៨:៩ ) ។ តើវាមានអត្ថន័យយ៉ាងដូចម្តេចដើម្បីធ្វើជាសាក្សីរបស់ព្រះអម្ចាស់ ?
-
សូមឲ្យកុមារចែកចាយនូវអ្វីដែលពួកគេដឹងអំពីព្រះយេស៊ូវគ្រីស្ទ និងដំណឹងល្អរបស់ទ្រង់ ។ បង្ហាញរូបភាពដល់ពួកគេដើម្បីផ្ដល់ជាគំនិតដល់ពួកគេ ( ឧទាហរណ៍ រូបភាពការមានព្រះជន្មរស់ឡើងវិញរបស់ព្រះអង្គសង្គ្រោះ ព្រះគម្ពីរមរមន ព្រះវិហារបរិសុទ្ធ និងព្យាការីដែលនៅរស់ ) ។ សូមអញ្ជើញពួកគេឲ្យនិយាយអំពីអ្វីដែលពួកគេអាចធ្វើជាមួយអ្នកដទៃទៀត ក្នុងនាមជាសាក្សីរបស់ព្រះអម្ចាស់ ។
« ក្រៅពីយើង គ្មានអ្នកសង្គ្រោះណាទៀតឡើយ » ។
ព្រះយេស៊ូវគ្រីស្ទគឺជាព្រះតែមួយអង្គគត់ដែលអាចសង្គ្រោះយើងពីអំពើបាប និងសេចក្ដីស្លាប់បាន ។ សូមពិចារណាអំពីរបៀបដែលបងប្អូននឹងបំផុសគំនិតកុមារឲ្យដាក់ការទុកចិត្តរបស់ពួកគេទៅលើទ្រង់ ។
សកម្មភាពដែលអាចធ្វើបាន
-
អញ្ជើញកុមារឲ្យស្រមៃពីស្ថានភាពមួយ ដែលពួកគេអាចត្រូវការជំនួយ ( ដូចជាការឈឺ ឬជាប់នៅក្នុងព្យុះមួយ ) ។ សូមបង្ហាញវត្ថុមួយចំនួន ( ឬរូបភាពនៃវត្ថុនានា ) ជារបស់មួយចំនួនដែលនឹងជួយពួកគេនៅក្នុងស្ថានភាពនោះ និងរបស់ផ្សេងទៀតដែលនឹងមិនជួយពួកគេ ។ ឧទាហរណ៍ ឆ័ត្រមានប្រយោជន៍នៅពេលមានព្យុះភ្លៀង ប៉ុន្តែទឹកមួយកែវ និងខ្មៅដៃមួយដើម វាមិនប្រយោជន៍ពេលព្យុះភ្លៀងនោះទេ ។ ឲ្យកុមារជ្រើសរើសវត្ថុមួយ ដែលនឹងជួយពួកគេនៅក្នុងស្ថានភាពនោះ ។ សូមបង្ហាញរូបភាពរបស់ព្រះអង្គសង្គ្រោះ ដើម្បីជួយកុមារឲ្យនិយាយអំពីរបៀបដែលទ្រង់ជួយយើង ។
-
សូមអាន អេសាយ ៤៣:១១ ទៅកុមារ ហើយឲ្យពួកគេចង្អុលទៅរូបភាពព្រះយេស៊ូវ ពេលដែលពួកគេឮពាក្យ « អ្នកសង្គ្រោះ » ។ សូមថ្លែងទីបន្ទាល់ថា ព្រះយេស៊ូវគ្រីស្ទបានរងទុក្ខ និងបានសុគតសម្រាប់យើង ហើយបានមានព្រះជន្មរស់ឡើងវិញ ទ្រង់ជាព្រះតែមួយអង្គគត់ដែលអាចសង្គ្រោះយើងពីអំពើបាប និងសេចក្ដីស្លាប់ ។
យើងអាចឲ្យ « សេចក្តីសុចរិតរបស់ឯង នឹងបានដូចជារលកនៃសមុទ្រ » ( អេសាយ ៤៨:១៨ ) ។
ការកាន់តាមបទបញ្ញត្តិរបស់ព្រះនាំមកនូវសេចក្ដីសុខសាន្ត ។
ព្រះអម្ចាស់សន្យាប្រទានសេចក្ដីសុខសាន្តដូចជា « ទន្លេ » ហើយសេចក្ដីសុចរិតដូចជា « រលកនៃសមុទ្រ » ដល់ពួកអ្នកដែលកាន់តាមបទបញ្ញត្តិទាំងឡាយរបស់ទ្រង់ ។
សកម្មភាពដែលអាចធ្វើបាន
-
សូមអាន អេសាយ ៤៨:១៨ ទៅកាន់កុមារ ។ អញ្ជើញពួកគេឲ្យធ្វើដៃរបស់ពួកគេដូចជាទន្លេ និងរលក ។ សូមនិយាយអំពីរបៀបដែលការកាន់តាមបទបញ្ញត្តិរបស់ព្រះបានជួយបងប្អូនឲ្យទទួលអារម្មណ៍សុខសាន្តដូចជាទន្លេ ឬរឹងមាំដូចជារលក ។
-
គូររូបទន្លេមួយនៅលើក្ដារខៀន ។ សូមជួយកុមារឲ្យគិតពីបទបញ្ញត្តិដែលព្រះបានប្រទានដល់យើង ។ សរសេរបទបញ្ញត្តិទាំងនោះនៅលើក្រដាសជាច្រើនសន្លឹក ( ឬគូររូបភាពសាមញ្ញអំពីបទបញ្ញត្តិទាំងនោះ ) ហើយឲ្យកុមារប្ដូរវេនគ្នាបិទបទបញ្ញត្តិទាំងនោះទៅនឹងទន្លេនៅលើក្ដារខៀន ។ សូមជួយកុមារឲ្យរៀនពីរបៀបដែលការកាន់តាមបទបញ្ញត្តិនាំមកនូវភាពសុខសាន្ត ។
-
សូមច្រៀងចម្រៀងមួយបទអំពីបទបញ្ញត្តិ ដូចជាបទ « រក្សាបទបញ្ញត្តិ » ( សៀវភៅចម្រៀងកុមារ ទំព័រ ៦៨ ) ។ តើចម្រៀងនេះបង្រៀនអ្វីខ្លះអំពីមូលហេតុដែលយើងគួរតែកាន់តាមបទបញ្ញត្តិរបស់ព្រះ ?
បង្រៀនគោលលទ្ធិ ៖ កុមារធំៗ
ខ្ញុំអាចជួយរៀបចំ « ផ្លូវសម្រាប់ទទួលព្រះយេហូវ៉ា » ។
យើងជួយបំពេញតាមការព្យាករនៅក្នុង អេសាយ ៤០:៣–៥ បាន ដោយការជួយអ្នកដទៃទៀតឲ្យទទួលយកព្រះអម្ចាស់នៅក្នុងជីវិតរបស់ពួកគេ ។
សកម្មភាពដែលអាចធ្វើបាន
-
សូមកុមារម្នាក់ឲ្យអាន អេសាយ ៤០:៣ ខណៈដែលកុមារផ្សេងទៀតអាននូវវគ្គបទគម្ពីរដូចតទៅនេះម្នាក់មួយ ហើយរកមើលពាក្យ និងឃ្លាស្រដៀងគ្នាទាំងឡាយ ៖ ម៉ាកុស ១:៣–៤ ( យ៉ូហាន បាទីស្ទ ); អាលម៉ា ៧:៩ ( អាលម៉ា ); គោលលទ្ធិ និង សេចក្ដីសញ្ញា ៣៣:១០–១១ ( អ្នកផ្សព្វផ្សាយសាសនានៅថ្ងៃចុងក្រោយ ) ។ សូមជួយពួកគេឲ្យរកមើលថានរណាដែលកំពុងរៀបចំ « ផ្លូវសម្រាប់ទទួលព្រះយេហូវ៉ា » នៅក្នុងវគ្គបទគម្ពីរនីមួយៗ ។ តើមនុស្សទាំងនេះរៀបចំផ្លូវសម្រាប់ទទួលព្រះយេហូវ៉ាដោយរបៀបណា ? តើយើងអាចធ្វើអ្វីខ្លះដើម្បីជួយ ?
-
សូមគូររូបផ្លូវមួយនៅលើក្ដារខៀន ហើយអាន អេសាយ ៤០:៣–៥ ជាមួយកុមារ ។ ឲ្យកុមាររៀបរាប់ពីឧបសគ្គទាំងឡាយ ដែលអាចរារាំងមនុស្សពីការធ្វើតាមព្រះអង្គសង្គ្រោះ ហើយអញ្ជើញពួកគេឲ្យគូររូបភាពឧបសគ្គនៅលើផ្លូវនោះ ។ សូមទុកឲ្យពួកគេលុបឧបសគ្គទាំងនោះ ពេលដែលបងប្អូននិយាយអំពីរបៀបដែលយើងអាចជួយមនុស្សឲ្យយកឈ្នះលើឧបសគ្គនោះបាន ។
ព្រះអម្ចាស់គង់នៅជាមួយខ្ញុំនៅក្នុងការសាកល្បងរបស់ខ្ញុំ ។
ពេលយើងធ្វើសេចក្ដីសញ្ញាជាមួយព្រះអម្ចាស់ ទ្រង់បានសន្យាថានឹងគង់នៅជាមួយយើង—សូម្បីអំឡុងពេលសាកល្បងរបស់យើងក្ដី ។ សូមជួយកុមារឲ្យឃើញថា ខ្លួនពួកគេគឺជាផ្នែកនៃរាស្ត្រក្នុងសេចក្ដីសញ្ញារបស់ព្រះអម្ចាស់ និងជាអ្នកទទួលបានសេចក្ដីសន្យារបស់ទ្រង់ ។
សកម្មភាពដែលអាចធ្វើបាន
-
សូមសរសេរនៅលើក្ដារខៀន ខ្ញុំជា… និង ខ្ញុំនឹង… ។ អញ្ជើញកុមារឲ្យអាន អេសាយ ៤១:១០ និង អេសាយ ៤៣:១–៥ ដើម្បីរកមើលថា តើព្រះអម្ចាស់មានព្រះបន្ទូលថាទ្រង់ជានរណា និងអ្វីដែលទ្រង់មានព្រះបន្ទូលថាទ្រង់នឹងធ្វើ ។ តើមានឃ្លាផ្សេងទៀតណាខ្លះដែលត្រូវបានលើកឡើងដដែលៗនៅក្នុងខគម្ពីរទាំងនេះ ? តើសារលិខិតទាំងនេះអាចផ្ដល់ការលួងលោម និងក្ដីសង្ឃឹមដល់យើងយ៉ាងណាដែរ នៅអំឡុងគ្រាលំបាកៗ ?
-
សូមអាន អេសាយ ៤៨:១០ ជាមួយគ្នា ហើយប្រាប់ថា ឡជាអ្វី និងរបៀបផ្សេងៗដើម្បីប្រើវា ។ សូមពន្យល់ថា លោហធាតុត្រូវបានបន្សុទ្ធនៅក្នុងឡ ។ ហេតុអ្វីឡគឺជាវិធីដ៏ល្អមួយដើម្បីពិពណ៌នាអំពីសេចក្តីវេទនា ? តើសេចក្តីវេទនារបស់យើងអាចបន្សុទ្ធយើងយ៉ាងដូចម្តេច ? ( សូមមើល អាលម៉ា ៦២:៤១ ) ។
ព្រះអម្ចាស់នឹងមិនដែលភ្លេចខ្ញុំឡើយ ។
ពេលយើងមានអារម្មណ៍ឃ្លាតឆ្ងាយពីព្រះអម្ចាស់ ដោយសារអំពើបាប ការសាកល្បង ឬមូលហេតុផ្សេងទៀតណាក៏ដោយ សារលិខិតមកពី អេសាយ ៤៩:១៤–១៦ អាចនាំមកនូវការលួងលោម ។
សកម្មភាពដែលអាចធ្វើបាន
-
សូមឲ្យកុមារអាន អេសាយ ៤៩:១៤ ។ តើអ្វីទៅដែលអាចធ្វើឲ្យមនុស្សមានអារម្មណ៍ថាត្រូវបានគេបំភ្លេច ឬបោះបង់ចោលនោះ ? តើយើងអាចជួយអ្នកដទៃឲ្យដឹងថា ព្រះអម្ចាស់មិនបានភ្លេចពួកគេយ៉ាងដូចម្ដេច ? តើយើងដឹងថា ទ្រង់មិនបានភ្លេចយើងយ៉ាងដូចម្ដេច ?
-
សូមអញ្ជើញកុមារឲ្យនិយាយអំពីនរណាម្នាក់ដែលពួកគេស្គាល់ ដែលពួកគេនឹងមិនដែលភ្លេចឡើយ ដូចជាសមាជិកគ្រួសារ ឬមិត្តម្នាក់ ។ សូមពិភាក្សាគ្នាពីអារម្មណ៍របស់ម្ដាយដែលពេញដោយសេចក្ដីស្រឡាញ់ម្នាក់ចំពោះកូនៗរបស់គាត់ និងពីទឹកព្រះទ័យរបស់ព្រះអម្ចាស់ចំពោះយើង ។ បន្ទាប់មក ឲ្យកុមារអាន អេសាយ ៤៩:១៥–១៦ ។ យោងទៅតាមខគម្ពីរទាំងនេះ តើហេតុអ្វីព្រះអម្ចាស់នឹងមិនដែលភ្លេចយើង ? សូមអញ្ជើញកុមារឲ្យចែកចាយអារម្មណ៍របស់ពួកគេអំពីព្រះយេស៊ូវគ្រីស្ទ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យគិតអំពីអ្វីដែលពួកគេបានរៀននៅថ្ងៃនេះ ដែលពួកគេចង់រៀនបន្ថែមទៀត ។ សូមជួយពួកគេឲ្យសរសេរសំណួរមួយអំពីអ្វី ដែលពួកគេអាចសួរទៅឪពុក ឬម្ដាយ ឬសមាជិកគ្រួសារផ្សេងទៀត ។
ការកែលម្អការបង្រៀនរបស់យើង
សូមបត់បែនទៅតាមសេចក្ដីត្រូវការរបស់កុមារ ។ ប្រសិនបើបងប្អូនបង្រៀនកុមារតូចៗ ប៉ុន្តែមានអារម្មណ៍បំផុសគំនិតឲ្យបង្រៀនពួកគេពីគោលការណ៍មួយក្នុងគម្រោងមេរៀននៅក្នុង « កុមារធំៗ » ឬប្រសិនបើបងប្អូនបង្រៀនកុមារធំៗ ប៉ុន្តែមានអារម្មណ៍បំផុសគំនិតឲ្យបង្រៀនពួកគេពីគោលការណ៍មួយក្នុងគម្រោងមេរៀននៅក្នុង « កុមារតូចៗ » សូមបត់បែនសកម្មភាពដែលបានផ្ដល់យោបល់សម្រាប់គោលការណ៍នោះ ដើម្បីបំពេញតាមតម្រូវការ និងសមត្ថភាពរបស់កុមារដែលបងប្អូនបង្រៀននោះ ។